1. Ki impakto un diskurso tabatin riba un hóben?

NA 1926, un hóben a batisá komo Studiante di Beibel. El a pensa ku e tabatin speransa pa bai shelu. P’esei, meskos ku tur Studiantenan di Beibel * e tabata tuma di e pan i e biña na e Sena di Señor. Pero, na 1935 su speransa a kambia ora el a skucha e diskurso históriko titulá: “E Multitut Grandi.” Ruman J. F. Rutherford a duna e diskurso ei na un kongreso na Washington D.C., Merka. Kiko a ser spliká na e kongreso ei?

2. Ki splikashon Ruman Rutherford a duna den su diskurso?

² Den Ruman Rutherford su diskurso, el a splika ken ta esnan ku ta forma e “multitut grandi” ku Revelashon 7:9 ta papia di dje. Te na e momento ei, Studiantenan di Beibel a pensa ku e multitut grandi tabata un grupo di hende ku lo a bai shelu pero nan no tabata mesun fiel ku esnan ungí. Ruman Rutherford a usa Beibel pa splika ku e multitut grandi lo no bai shelu, pero ku nan ta parti di otro karné * di Kristu ku lo sobrebibí “e tribulashon  grandi” i lo biba pa semper riba tera. (Rev. 7:14) Hesus a primintí: “Mi tin otro karné ku no ta di e kurá akí; nan tambe mi tin ku trese, i nan lo skucha mi stèm, i nan tur lo bira ún tou bou di ún wardadó.” (Huan 10:16) E grupo di “otro karné” ei ta referí na Testigunan di Yehova leal ku tin e speransa di biba pa semper den Paradeis aki riba tera. (Mat. 25:31-33, 46) Laga nos mira kon e komprondementu nobo ei a kambia speransa di míles di nos rumannan, inkluso di e ruman hóben ei.—Sal. 97:11; Pro. 4:18.

3-4. Kiko míles di ruman a komprondé tokante nan speransa na e kongreso di 1935?

³ E momento impaktante di e kongreso tabata ora e diskursante a bisa: “Tur hende ku tin e speransa di biba pa semper riba tera lanta para.” Un ruman ku tabata presente a bisa ku mas ku mitar di e rumannan ku tabat’ei a lanta para. Anto Ruman Rutherford a bisa: “Ata e multitut grandi!” Despues di esei, tur ruman a grita di alegria. E rumannan ku a lanta para a komprondé bon kla ku nan no a ser skohí pa biba den shelu ni nan no a ser ungí pa spiritu santu. E siguiente dia di e kongreso, 840 hende a batisá. Mayoria di nan tabata di e otro karné.

⁴ Despues di e diskurso ei, e hóben ku nos a menshoná na prinsipio i míles di otro ruman a stòp di tuma di e pan i e biña na e Sena di Señor. Un ruman humildemente a bisa loke vários otro ruman tambe tabata sinti: “E último biaha ku mi a kome di e pan i bebe di e biña tabata na e Memorial di 1935. Mi a komprondé ku Yehova no a usa su spiritu santu pa duna mi e speransa di biba den shelu; na lugá di esei mi tin e speransa di biba riba tera i pa yuda hasié un paradeis.” (Rom. 8:16, 17; 2 Kor. 1:21, 22) Djei padilanti, esnan ku ta forma parti di e multitut grandi a oumentá i a traha lado a lado ku e restu * ungí.

5. Kiko Yehova ta pensa di e rumannan ku a stòp di tuma di e pan i e biña?

⁵ Pues, e último biaha ku algun ruman a tuma di e pan i e biña tabata na e Memorial di 1935. Pero, kiko si awe un ruman ta kere ku e mester tuma di e pan i e biña pero despues ta bin komprondé ku e no ta ungí? Kiko Yehova ta pensa di dje? (1 Kor. 11:28) Ta bèrdat ku algun ruman a tuma di e pan i e biña pasobra nan no a komprondé ki speransa nan tabatin. Pero, si nan atmití nan eror i stòp di tuma di e pan i e biña i sigui sirbi Yehova fielmente, nan por tin sigur ku lo e konta nan komo otro karné. Aunke nan no ta tuma di e pan i e biña, nan ta sigui asistí na e Konmemorashon pasobra nan ta apresiá loke Yehova i Hesus a hasi pa nan.

6. Kiko Hesus a bisa e angelnan pa nan hasi?

⁶ Debí ku tribulashon grandi ta a punto di kuminsá, lo ta animante pa nos pasa den loke Revelashon kapítulo 7 ta bisa tokante e kristiannan ungí i e multitut grandi di otro karné. Hesus a bisa  e angelnan pa nan sigui tene e kuater bientunan di destrukshon. Nan no tin ku laga e bientu supla riba tera te ora ku tur kristian ungí haña e seyo, esta, te ora ku Yehova duna nan e aprobashon final. (Rev. 7:1-4) E rekompensa ku e rumannan ungí di Kristu lo haña pa nan fieldat ta ku nan lo sirbi komo rei i saserdote huntu ku Kristu den shelu. (Rev. 20:6) Yehova, Hesus i e angelnan lo ta kontentu pa mira e 144.000 ungínan haña nan rekompensa selestial.

7. Ken Huan a mira na Revelashon 7:9 i 10, i kiko nan ta hasiendo? (Wak e plachi riba portada.)

⁷ Despues ku Huan a papia tokante e 144.000 rei- i saserdotenan ei, el a mira algu masha maravioso: “un multitut grandi” ku a sobrebibí Armagedon. Na komparashon ku e promé grupo, e di dos grupo akí ta hopi mas grandi i no por ser kontá. (Lesa Revelashon 7:9, 10.) Nan tabata “bistí na paña largu blanku.” Esei ta nifiká ku nan no tabatin mancha di Satanas su mundu i nan a keda leal na Dios i Kristu. (Sant. 1:27) Nan a grita di alegria ku nan a ser salbá debí na loke Yehova i Hesus, e Lamchi di Dios, a hasi. Tambe nan tabatin rama di palma den nan man. Esei ta nifiká ku nan ta kontentu pa aseptá Hesus komo e Rei ku Yehova a nombra.—Kompará ku Huan 12:12, 13.

8. Kiko Revelashon 7:11 i 12 ta bisa tokante Yehova su famia selestial?

⁸ Lesa Revelashon 7:11, 12. Kiko a pasa ora esnan den shelu a mira e multitut grandi? Huan a mira ku tur persona den shelu tabata kontentu i tabata alabá Dios ora nan a mira esnan di e multitut grandi. Yehova su famia selestial lo ta kontentu pa mira kumplimentu di e vishon ei ora e multitut grandi sobrebibí e tribulashon grandi.

9. Di akuerdo ku Revelashon 7:13-15, kiko e multitut grandi ta hasiendo?

⁹ Lesa Revelashon 7:13-15. Huan a skirbi ku e multitut grandi a “laba nan pañanan largu i a hasi nan blanku den sanger di e Lamchi.” Esei ta nifiká ku nan tin un konsenshi limpi i ku Yehova ta kontentu ku nan. (Isa. 1:18) Nan ta rumannan dediká i batisá ku tin fe fuerte den e sakrifisio di Hesus i ku tin un amistat será ku Yehova. (Huan 3:36; 1 Ped. 3:21) P’esei, Yehova ta kontentu ku nan i “nan ta rindi sirbishi sagrado na dje di dia i anochi” aki riba tera. Ku zelo nan ta hasi mayor parti di e trabou di prediká i hasi hende disipel pasobra pa nan e Reino di Dios ta e kos di mas importante den nan bida.—Mat. 6:33; 24:14; 28:19, 20.

10. Di kiko e multitut grandi tin sigur, i ki promesa nan lo mira kumpli?

¹⁰ E multitut grandi tin sigur ku Yehova lo sigui kuida nan pasobra “Esun sintá riba e trono lo span su tènt riba nan.” E promesa ku e grupo di otro karné a spera asina tantu riba dje por  fin lo kumpli: “[Dios lo] seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—Rev. 21:3, 4.

11-12. (a) Segun Revelashon 7:16 i 17, ki bendishon ta spera e multitut grandi? (b) Kiko e otro karnénan lo hasi na e Konmemorashon, i dikon nan lo hasi esei?

¹¹ Lesa Revelashon 7:16, 17. Na e momento akí, algun di nos rumannan ta pasa hamber debí ku nan no tin  sufisiente plaka òf debí na guera. I tin otro ta den prizòn debí na nan kreensia. Pero, e multitut grandi ta masha kontentu pasobra nan sa ku despues ku nan sobrebibí destrukshon di e mundu malbado akí, semper nan lo tin abundansia di tantu kuminda físiko komo spiritual. Ora Yehova destruí e mundu malbado di Satanas, lo e hasi sigur di protehá e multitut grandi di Su rabia ku lo ta manera un kalor inmenso. Despues di e tribulashon grandi Hesus lo guia e sobrebibientenan na “awa di bida,” esta, lo e yuda nan haña bida eterno. Djis imaginá bo ki bunita speransa e multitut grandi tin: Di tur e míles di miónes di hende ku a yega di biba, nan lo no muri nunka.—Huan 11:26.

¹² E otro karnénan ta gradisidu na Yehova i Hesus pa nan bunita speransa. Aunke Yehova no a skohe nan pa biba den shelu, e ta stima nan mes tantu ku e ungínan. Tantu e ungínan komo e otro karnénan por alabá Dios i Kristu. Anto un manera ku nan ta hasi esei ta di t’ei presente na e Sena di Señor.

13-14. Dikon nos tin ku bai na e Konmemorashon di e Morto di Kristu?

¹³ Den e último añanan, mas o ménos 1 di kada 1.000 persona ku asistí na e Konmemorashon ta tuma di e pan i e biña. Mayoria di kongregashon no tin niun hende ku ta tuma di e pan i e biña. Mayoria di hende ku ta asistí na e Konmemorashon tin speransa pa biba aki riba tera. Si esei ta e kaso, dikon nan ta asistí na e Konmemorashon? Pa e mesun motibu ku un hende ta bai kasamentu di su amigu. E ta bai pasobra e ke demostrá su amor i apoyo na e pareha ku ta kasando. Asina tambe, e otro karnénan ta bai e Konmemorashon pa demostrá nan amor i apoyo na Kristu i e ungínan. Un otro motibu pakiko e otro karnénan ta bai ta pa demostrá nan  apresio pa e sakrifisio di Hesus; un sakrifisio ku ta hasi posibel ku nan por biba pa semper riba tera.

¹⁴ Un otro motibu mas dikon e otro karnénan ta asistí na e Konmemorashon ta pa obedesé Hesus su mandamentu. Ora Hesus a tene e promé Sena di Señor, el a bisa su disipelnan fiel: “Sigui hasi esaki na mi memoria.” (1 Kor. 11:23-26) Pues, tanten ku tin ungí na bida aki riba tera e otro karnénan lo sigui asistí na e Konmemorashon. Anto nan ta invitá tur hende pa kompañá nan.

15. Kiko nos por hasi pa alabá Dios i Kristu na e Konmemorashon?

¹⁵ Na e Konmemorashon nos por alabá Dios i Kristu ora nos ta kanta huntu i hasi orashon. Pa e aña akí e diskurso su tema ta: “Mustra Apresio pa Loke Dios i Kristu A Hasi pa Bo!” Segun ku nos ta skucha e diskurso ei, nos lo ta mas gradisidu pa tur loke Yehova i Kristu a hasi pa nos. Pues segun ku e pan i e biña ta pasa, kòrda riba loke nan ta representá: e kurpa i sanger di Hesus. Kòrda kuantu Yehova ta stima nos debí ku el a permití su Yu muri pa asina nos por haña bida. (Mat. 20:28) Tur hende ku ta stima nos Tata selestial i su Yu lo asistí na e Konmemorashon.

16. Den ki sentido e ungínan i e otro karnénan ta meskos?

¹⁶ Tantu e ungínan komo e otro karnénan ta mesun balioso pa Dios. E ta stima nan tur dos mesun tantu. Nos sa esei pasobra el a paga e mesun preis pa kumpra tur dos grupo: bida di su Yu stimá. E úniko diferensia ku e dos gruponan ei tin ta nan speransa. Pero, nan tur dos mester keda fiel na Dios i Kristu. (Sal. 31:23) Kòrda, Yehova ta duna su spiritu santu na kada hende di akuerdo ku loke e mester, sin importá si e ta ungí òf nò.

17. Kiko e restu ungí ta anhelá?

¹⁷ E kristiannan ungí no ta nase ku nan speransa selestial. Ta Yehova ta esun ku ta duna nan e speransa ei. Nan ta pensa riba nan speransa, ta hasi orashon tokante dje i ta ansioso pa risibí nan rekompensa den shelu. Nan no sa tur detaye tokante nan kurpa spiritual. (Flp. 3:20, 21; 1 Huan 3:2) Pero nan ta ansioso pa topa Yehova, Hesus, e angelnan i e otro ungínan. Nan ta anhelá pa ta huntu ku nan den e Reino selestial.

18. Kiko e otro karnénan ta anhelá?

¹⁸ E otro karnénan ta anhelá pa biba  riba tera. Esei ta un deseo ku tur hende tin. (Ekl. 3:11) Nan ta ansioso pa e dia yega ora ku nan por yuda hasi e tera un paradeis. Nan lo traha kas, planta hardin i disfrutá di salú perfekto huntu ku nan yunan. (Isa. 65:21-23) Nan ta anhelá pa biaha bai yen kaminda, pa mira tur e seru-, mondinan i laman, i pa studia tur e kosnan ku Yehova a krea. I mas ku tur kos, nan ta kontentu pa sa ku nan amistat ku Yehova lo sigui krese mas i mas.

19. Ki oportunidat e Konmemorashon ta duna kada un di nos, anto ki fecha e Konmemorashon lo ta e aña akí?

¹⁹ Yehova a duna kada un di su sirbidónan dediká un bunita speransa pa futuro. (Yer. 29:11) E Konmemorashon di Kristu su morto ta duna kada un di nos un oportunidat spesial pa alabá Dios i Kristu pa tur loke nan a hasi pa nos por biba pa semper. Sin duda, e Konmemorashon ta e reunion di mas importante pa kristiannan berdadero. E aña akí lo e ta djasabra 27 di mart despues ku solo baha. Hopi hende ta biba den paisnan kaminda nan ta liber pa asistí na e reunion importante akí. Otronan lo asistí apesar di oposishon, i algun lo tene e Konmemorashon den prizòn. Segun ku Yehova, Hesus i e famia selestial di Dios ta opservá nos, laga kada kongregashon, grupo i persona disfrutá di e Konmemorashon.