1. Kiko ta mustra ku hende ta sin kariño awe?

BEIBEL a profetisá ku den e último dianan hende lo ta “sin kariño.” (2 Tim. 3:1, 3) Anto nos ta mira esei bon kla awe. Por ehèmpel, hopi pareha ta divorsiá i nan ta keda rabiá ku otro anto e muchanan ta sinti ku niun hende no ta stima nan. Asta famia ku ta biba den e mesun kas por sinti ku nan no ta será ku otro. Un konsehero di famia a bisa: “Mama, tata i e muchanan no ta papia ku otro. I nan ta pasa mayoria di nan tempu riba kòmpiuter, tablet, telefòn òf ta hunga wega di vidio. Aunke nan ta biba bou di e mesun dak, apénas nan konosé otro.”

2-3. (a) Di akuerdo ku Romanonan 12:10, pa ken nos mester tin tierno kariño? (b) Kiko nos lo wak den e artíkulo akí?

² Nos no ke ta sin amor manera hopi hende den e mundu akí. (Rom. 12:2) Mas bien nos mester tin tierno kariño, no solamente pa nos famia, pero tambe pa nos rumannan den kongregashon. (Lesa Romanonan 12:10.) Pero, kiko ta tierno kariño? Esei ta e manera ku famia ta sinti ora nan tin un amistat será ku otro. Esei ta e tipo di amor ku nos mester tin pa nos rumannan den kongregashon. Ora nos ta stima nos rumannan asina, nos tur por ta kontentu sirbiendo Yehova huntu.—Mik. 2:12.

³ Pa yuda nos demostrá e tipo di amor ei, laga nos  wak kiko nos por siña for di Yehova i algun di su sirbidónan.

4. Kiko Santiago 5:11 ta bisa nos tokante Yehova su amor?

⁴ Beibel ta konta nos di Yehova su bunita kualidatnan. Por ehèmpel, e ta bisa ku “Dios ta amor.” (1 Huan 4:8) Ora nos haña sa esei tokante Yehova, esei ta pone ku nos ke bira su amigu. Pero, Beibel ta bisa tambe ku Yehova “tin masha kariño” i “kompashon.” (Lesa Santiago 5:11.) E teksto ei ta mustra ku Yehova ta stima nos masha hopi mes. Esei no ta alegrá bo kurason?

5. Den ki manera Yehova ta demostrá miserikòrdia, i kon nos por imit’é?

⁵ Santiago 5:11 ta menshoná Yehova su tierno kariño huntu ku su miserikòrdia. Esei ta un otro kualidat ku ta hala nos mas serka di dje. (Éks. 34:6) Un manera ku Yehova ta demostrá su miserikòrdia ta di pordoná nos pa e erornan ku nos ta kometé. (Sal. 51:1) Den Beibel, miserikòrdia ta enserá mas ku djis pordoná un hende. E ta enserá tambe un sintimentu profundo ku un hende tin ora e mira un otro den difikultat i e ta haña gana di yuda e hende ei. Yehova ta bisa ku e deseo profundo ku e tin pa yuda nos ta asta mas fuerte ku e sintimentu ku un mama tin pa su yu. (Isa. 49:15) Ora nos ta pasando den difikultat, ta Yehova su miserikòrdia ta loke ta motiv’é pa yuda nos. (Sal. 37:39; 1 Kor. 10:13) Nos por demostrá miserikòrdia na nos rumannan ora nos ta pordoná nan i no ta karga renkor. (Efe. 4:32) Pero, e manera di mas importante ku nos por demostrá miserikòrdia ta di yuda nos rumannan ora nan haña nan ku difikultat. Ora nos laga amor motivá nos pa demostrá miserikòrdia na otro hende, nos ta imitá Yehova, kende ta demostrá tierno  kariño mas mihó ku kualke otro persona.—Efe. 5:1.

6. Deskribí e amistat entre Jonatan ku David.

⁶ Den Beibel nos por lesa tokante hende imperfekto ku a stima otro manera ruman. Tuma e ehèmpel di Jonatan ku David. Beibel ta bisa: “Alma di Jonatan a keda uní ku alma di David, i Jonatan tabata stima David manera su mes.” (1 Sam. 18:1) Yehova a skohe David pa bira rei despues di Saul. Pero ku tempu, Saul a bira yalurs riba David i a purba di mat’é. Ma Jonatan, yu di Saul, no a bai tras di su tata. Jonatan ku David a primintí otro ku semper nan lo a keda amigu i semper nan lo a sigui yuda otro.—1 Sam. 20:42.

7. Kiko por a stroba Jonatan ku David di ta bon amigu di otro?

⁷ Apesar di diferente faktor, tòg Jonatan ku David tabata bon amigu di otro. Por ehèmpel, Jonatan tabata kasi 30 aña mas grandi ku David. Jonatan por a pensa ku e no tabatin nada en komun ku David pasobra David tabata muchu mas yòn kuné i tabatin ménos eksperensia kuné. Pero Jonatan no a pensa asina. E tabatin hopi rèspèt pa David.

8. Kon bin Jonatan tabata bon amigu di David?

⁸ Jonatan por tabata yalurs riba David. Komo ku Jonatan tabata yu di Saul, e por a insistí ku e mester a bira rei despues di Saul. (1 Sam. 20:31) Pero, Jonatan tabata humilde i tabata leal na Yehova. El a apoyá Yehova su desishon di hasi David rei despues di Saul. Jonatan tabata leal na David tambe, aunke esei a nifiká ku su tata a rabia masha pisá kuné.—1 Sam. 20:32-34.

9. Kon nos por sa ku Jonatan no tabata yalurs riba David?

⁹ Jonatan tabata stima David i p’esei e no tabata yalurs riba dje. Jonatan tabatin kurashi i a bringa den hopi bataya i e tabata bon den usa bog i flecha. E ku su tata Saul tabata konosí pa ta “mas lihé ku águila” i “mas fuerte ku leon.” (2 Sam. 1:22, 23) Pues, Jonatan por a broma tokante tur e kosnan ku el a hasi yen di kurashi. Pero, Jonatan no a purba di ta mihó ku David ni tabata kier ta yalurs riba tur e kosnan bon ku el a hasi. Mas bien, Jonatan a atmirá David pasobra e tabatin kurashi i a konfia den Yehova. De echo, ta te despues ku David a mata Goliat, Jonatan a kuminsá stima David manera su mes. Kon nos por demostrá ku nos ta stima nos rumannan mesun tantu ku Jonatan a stima David?

10. Kiko “stima otro intensamente di kurason” ta enserá?

¹⁰ Beibel ta bisa nos pa “stima otro intensamente di kurason.” (1 Ped. 1:22) Yehova mes ta un ehèmpel pa nos den esaki. E ta stima nos asina tantu, ku si nos keda fiel na dje, nada por stòp e di stima nos. (Rom. 8:38, 39) E palabra griego tradusí “intensamente” ta duna e idea di un hende ku ta hasi masha esfuerso mes pa mustra amor. I tin biaha ta esei nos mester hasi pa algun di nos rumannan. Ora nan traha riba nos  nèrvio, nos tin ku sigui soportá “otro den amor, hasiendo esfuerso sinsero pa mantené e union di spiritu den e vínkulo di pas.” (Efe. 4:1-3) Ora nos ta hasi esfuerso pa mantené “e vínkulo di pas,” nos lo no keda mira e erornan di nos rumannan so. Mas bien, nos lo hasi esfuerso pa mira nan manera Yehova ta mira nan.—1 Sam. 16:7; Sal. 130:3.

11. Dikon tin biaha no ta fásil pa nos stima nos rumannan?

¹¹ No ta semper fásil pa nos stima nos rumannan, spesialmente ora nos ta konsiente di nan fayonan. Ta parse ku esei tabata un reto pa e kristiannan di promé siglo. Por ehèmpel, ta parse ku Evodia i Síntike no tabatin niun tiki problema pa traha “lado a lado ku [Pablo] na fabor di e bon notisia.” Pero pa un motibu òf otro, nan no por a bai bon ku otro. P’esei, Pablo a animá nan “pa nan ta di e mesun mente den union ku Señor.”—Flp. 4:2, 3.

12. Kon nos por stima nos rumannan?

¹² Kon nos por stima nos rumannan? Promé, nos mester siña konosé nan mihó, ya ku esei ta hasié mas fásil pa nos komprondé nan i stima nan. No laga edat ni background bira un opstákulo. Kòrda, aunke Jonatan tabata kasi 30 aña mas grandi ku David, esei no a strob’é di sera un amistat kuné. Tin ruman den bo kongregashon, sea di mas edat òf mas yòn, ku bo por bira amigu di dje? Hasiendo esei, lo bo mustra ku bo ta “stima henter e hermandat.”—1 Ped. 2:17.

13. Dikon nos no por ta será ku tur ruman den e kongregashon?

¹³ Awor, e echo ku nos ta stima tur nos rumannan ke men ku nos ta será ku tur ruman den e kongregashon? Nò, esei no ta posibel. Ta lógiko ku kisas bo ta sinti bo mas será ku un ruman pasobra boso tin hopi kos en komun. Hesus a yama tur su apòstelnan “amigu,” pero  ta ku Huan e tabata mas será. (Huan 13:23; 15:15; 20:2) Sinembargo, e no a trata Huan mihó ku e otro apòstelnan. Por ehèmpel, ora Huan i su ruman Santiago a pidi Hesus pa un puesto importante den e Reino di Dios, el a bisa nan: “No ta keda na ami pa disidí ken ta sinta na mi man drechi òf na mi man robes.” (Mar. 10:35-40) Meskos ku Hesus, nos tampoko lo no ke trata e rumannan ku nos ta será kuné mihó ku otro ruman. (Sant. 2:3, 4) Si nos hasi esei, nos lo kousa divishon i esei lo kita e pas den e kongregashon.—Hudas 17-19.

14. Kon Filipensenan 2:3 ta yuda nos evitá di ke ta mihó ku otro ruman?

¹⁴ Si nos ta stima otro, nos lo no purba di ta mihó ku otro ruman. Kòrda ku Jonatan no tabata yalurs riba David ni a purba di bira rei na su lugá. Nos tur por imitá Jonatan su ehèmpel. No envidiá bo rumannan debí na nan abilidatnan. Mas bien, ‘konsiderá ku otro ruman ta superior na bo.’ (Lesa Filipensenan 2:3.) Kòrda ku kada ruman ta hasi algu pa yuda e kongregashon. Si nos ta humilde, nos lo mira e bon kualidatnan di nos rumannan i nos lo sigui nan ehèmpel.—1 Kor. 12:21-25.

15. Kiko bo ta siña for di loke a pasa ku Tanya i su famia?

¹⁵ Ora nos ta pasa den situashon difísil, Yehova por usa nos rumannan pa konsolá nos, mustra ku nan ta stima nos i duna nos e yudansa ku nos tin mester. Wak kiko a pasa na 2019 ku un ruman ku yama Tanya i su tres yunan.  Nan a bai e Kongreso Internashonal na Merka: “Amor No Ta Kaba Nunka!” Tanya a konta: “Regresando hotèl, un outo a pèrdè kontrol i a bin dal den nos. No tabatin herido. Tur di shòk nos a sali for di e outo i para riba kaminda. Un outo a para i e shofùr a zuai nos indikando nos pa nos bin na su outo. Tabata un di nos rumannan ku tambe a sali for di kongreso. I e no tabata e úniko ku a para. Sinku delegado di Suesia tambe a para. E ruman muhénan a brasa ami i mi yu muhé. Nos tabatin mester di esei. Mi a sigurá nan ku nos lo ta bon. Pero, nan no kier a bai laga nos. Nan a keda ku nos asta despues ku e paramédikonan a yega, i nan a hasi sigur ku nos tabatin tur kos ku nos tabatin mester. Na kada momento den e situashon difísil akí, nos a ègt sinti Yehova su amor. E eksperensia akí a fortalesé nos amor pa nos rumannan, i riba tur kos, nos amor pa Yehova i nos apresio p’e.” Bo por kòrda un biaha ku un ruman a sali na bo yudansa i a demostrá kuantu e ta stima bo?

16. Ki motibu nos tin pa mustra ku nos ta stima nos rumannan?

¹⁶ Pensa riba e benefisionan di stima nos rumannan. Nos ta konsolá nan ora nan mester di yudansa. Nos ta yuda nan pa huntu nos sirbi Yehova felis. Nos ta proba ku nos ta disipel di Hesus, i esei ta hala hende sinsero na adorashon berdadero. I riba tur kos, nos ta agradá Yehova, “e Tata di tierno miserikòrdia i Dios di tur konsuelo.” (2 Kor. 1:3) P’esei, laga nos sigui stima nos rumannan!