ARTÍKULO DI ESTUDIO 4
Dikon Nos Ta Bai Memorial?
“Sigui hasi esaki na mi memoria.”—LUK. 22:19.
KANTIKA 20 Bo A Duna Nos Bo Yu di Mas Stimá
UN BISTA ADELANTÁ *
1-2. (a) Rònt di ki tempu nos ta kòrda normalmente riba un ser kerí ku a muri? (b) Kiko Hesus a hasi riba e anochi promé ku el a muri?
SIN importá kuantu aña a pasa desde ku un ser kerí di nos a muri, semper nos ta keda kòrda riba dje. Hopi biaha esei sa sosodé rònt di e fecha ku el a fayesé.
2 Tur aña nos ta entre e miónes di hende rònt mundu ku ta bini huntu pa rekordá morto di un hende ku nos ta stima mashá—Hesukristu. (1 Ped. 1:8) El a duna su bida komo reskate pa salba nos di piká i morto. (Mat. 20:28) Hesus mes tabata ke pa su siguidónan rekordá su morto. E anochi promé ku el a muri el a introdusí un sena spesial i a bisa: “Sigui hasi esaki na mi memoria.” *—Luk. 22:19.
3. Kiko nos lo bai wak den e artíkulo akí?
3 Tur aña miónes di hende ta bai e Konmemorashon di e morto di Kristu, esta, Memorial. Di tur e hendenan ei, un grupo chikitu so tin e speransa pa biba den shelu i e sobrá tin un speransa pa biba aki riba tera. Den e artíkulo akí, nos ta bai wak algun motibu dikon kada un di e gruponan akí ke bai Memorial tur aña. Nos lo wak tambe dikon ta bon pa nos bai. Pero promé, laga nos wak algun motibu pakiko e ungínan ta bai Memorial.
DIKON E UNGÍNAN TA BAI MEMORIAL?
4. Dikon e ungínan ta tuma di e pan i e biña na Memorial?
4 Un motibu dikon e ungínan ta bai Memorial tur aña ta pa partisipá na dje. Kon nan ta hasi esei? Esei ta ora nan ta tuma di e pan i e biña. Pero, dikon nan ta hasi esei? Pa kontestá esei, laga nos wak kiko a pasa riba e último anochi di Hesus su bida aki riba tera. Despues di a selebrá e Pasku Hudiu, Hesus a introdusí loke awe nos konosé komo e Sena di Señor. El a pasa e pan i e biña na su 11 fiel apòstelnan i a bisa nan pa kome i bebe. Hesus a splika nan tokante dos pakto, òf kontrakt: e pakto nobo i e pakto di Reino. * (Luk. 22:19, 20, 28-30) E paktonan akí a habri kaminda pa e apòstelnan ei i tambe un kantidat chikitu di otro hende por bira rei i saserdote den shelu. (Rev. 5:10; 14:1) E restu ungí ku te ainda ta bibu aki riba tera so por tuma di e pan i e biña na Memorial pasó nan ta forma parti di e dos paktonan ei.
5. Kiko e ungínan sa tokante nan speransa?
5 Ata un otro motibu dikon e ungínan ta bai Memorial: E ta duna nan un oportunidat pa meditá riba nan speransa. Yehova a duna nan un speransa masha bunita mes—nan lo ta inmortal i nan kurpa lo no kaba na nada. Tambe nan lo reina ku Hesukristu resusitá huntu ku e restu di e 144.000, i mas bunita ainda, nan lo por ta den presensia di Yehova Dios! (1 Kor. 15:51-53; 1 Huan 3:2) Nan sa ku ta Dios a invitá nan pa disfrutá di e privilegionan ei den shelu. Pero, pa nan por drenta shelu nan tin ku keda fiel te na morto. (2 Tim. 4:7, 8) Ora nan pensa riba nan speransa, nan ta bira masha kontentu mes. (Tito 2:13) Pero kiko awor di e ‘otro karnénan’? (Huan 10:16) Pakiko nan ta bai Memorial?
DIKON E OTRO KARNÉNAN TA BAI MEMORIAL?
6. Dikon e otro karnénan ta bai Memorial tur aña?
6 E otro karnénan no ta tuma di e pan i e biña na Memorial; mas bien nan ta bai Memorial pa opservá. Na 1938 tabata e promé biaha ku esnan ku e speransa di biba pa semper riba tera a haña invitashon pa bin asistí na Memorial. E Toren di Vigilansia di 1 di mart 1938 a bisa: “Ta lógiko i ta na su lugá ku e [otro karnénan] lo tin ku ta presente na un tipo di reunion asina pa mira kiko ta sosodé. . . . E okashon ta un momento di goso pa nan tambe.” Meskos ku e invitadonan na un kasamentu ta kontentu pa t’ei na e seremonia, asina tambe e otro karnénan ta kontentu pa t’ei na Memorial.
7. Dikon e otro karnénan ta ansioso pa skucha e diskurso di Memorial?
7 E otro karnénan tambe ta pensa riba nan speransa. Nan ta ansioso pa skucha e diskurso di Memorial pasobra gran parti di dje ta trata loke Kristu i su 144.000 ko-gobernantenan lo hasi pa humanidat fiel durante e Reinado di Mil Aña. E 144.000, bou di guia di nan Rei Hesukristu, lo transformá e tera, hasié un paradeis i yuda hende obediente bira perfekto. Lo ta hopi emoshonante pa e miónes di hende ku ta forma parti di e otro karnénan skucha i imaginá kon e profesianan na Isaías 35:5, 6; 65:21-23 anto Revelashon 21:3 i 4 lo kumpli. Ora nan ta mira nan mes i nan sernan kerí den e mundu nobo, esei ta fortalesé nan speransa pa futuro i nan determinashon pa nunka stòp di sirbi Yehova.—Mat. 24:13; Gal. 6:9.
8. Pa ki otro motibu e otro karnénan ta bai Memorial?
8 Laga nos wak un otro motibu dikon e otro karnénan ta bai Memorial. Nan ke mustra ku nan ta stima i ke yuda e ungínan. Beibel a profetisá ku e ungínan i e otro karnénan lo traha hopi uní ku otro. Kon asina? Laga nos wak algun ehèmpel.
9. Segun e profesia na Zakarías 8:23 kon e otro karnénan ta sinti tokante nan rumannan ungí?
9 Lesa Zakarías 8:23. E profesia akí ta splika na un manera hopi bunita kon e otro karnénan ta sinti tokante nan rumannan ungí. E palabranan “un hudiu” i “boso” ta referí na e mesun grupo—e restu ungí. (Rom. 2:28, 29) “Dies hòmber for di tur e nashonnan” ta representá e otro karnénan. Nan ta “tene,” òf gara duru na e ungínan ora nan ta djòin e ungínan den adorashon puru. P’esei, riba e anochi di Memorial, e otro karnénan ta mustra kon será nan ta ku e ungínan dor di ta presente na e okashon ei ku nan.
10. Kiko Yehova a hasi pa kumpli ku e profesia na Ezekiel 37:15-19, 24 i 25?
10 Lesa Ezekiel 37:15-19, 24, 25. Yehova a kumpli ku e profesia akí ora el a pone e ungínan i e otro karnénan traha uní ku otro. E profesia ta papia tokante dos pida palu. E grupo ku tin e speransa pa biba den shelu ta manera e pida palu “pa Huda” (for di e tribu ei tabata skohe e reinan di Israel) anto e grupo ku tin speransa pa biba aki riba tera ta manera e pida palu “di Efraim.” * Yehova lo uni e dos gruponan ei pa asina nan bira “un solo pida palu.” Esei ke men ku nan ta sirbi uní bou di un solo Rei, Kristu Hesus. Tur aña, e ungínan i e otro karnénan ta bai Memorial no komo dos grupo separá pero komo “ún tou bou di ún wardadó.”—Huan 10:16.
11. Kon “e karnénan” menshoná na Mateo 25:31-36 i 40 ta yuda Kristu su rumannan?
11 Lesa Mateo 25:31-36, 40. “E karnénan” ku Hesus a papia di dje ta representá hende hustu ku ta biba durante e tempu di fin ku tin speransa pa biba aki riba tera, esta, e otro karnénan. Fielmente nan ta yuda Kristu su rumannan ungí ku ainda t’ei riba tera. E manera prinsipal ku nan ta hasi esei ta den e trabou mundial di prediká i di hasi hende disipel.—Mat. 24:14; 28:19, 20.
12-13. Kua ta un otro manera ku e otro karnénan ta yuda Kristu su rumannan?
12 Tur aña, den e simannan promé ku Memorial, e otro karnénan ta mustra ku nan ta yuda Kristu su rumannan ora nan ta partisipá den e kampaña mundial pa invitá hende interesá na Memorial. (Wak e kuadro “ Bo A Kuminsá Plania pa e Temporada di Memorial?”) Tambe nan ta yuda hasi e diferente preparashonnan pa asina tur kongregashon rònt mundu por tene Memorial, apesar ku den mayoria di kongregashon no tin hende ku ta bai tuma di e pan i e biña. E otro karnénan ta super kontentu pa por yuda Kristu su rumannan den e maneranan ei. Nan sa ku Hesus ta mira loke nan ta hasi pa su rumannan ungí, komo si fuera ta p’e mes nan ta hasié.—Mat. 25:37-40.
13 Kiko ta algun otro motibu pakiko nos tur, sin importá si nos speransa ta pa biba den shelu òf aki riba tera, lo ke t’ei na Memorial?
PAKIKO NOS TUR TA BAI MEMORIAL?
14. Kiko Yehova i Hesus a hasi pa demostrá ku nan ta stima nos masha tantu mes?
14 Nos tin apresio pa e amor ku Yehova i Hesus a mustra na nos. Yehova a mustra ku e stima nos den vários manera, pero un di nan ta sobresalí riba tur. Esei ta di manda su Yu stimá pa sufri i muri pa nos. (Huan 3:16) I nos ta mira ku Hesus tambe ta stima nos masha hopi mes pasobra e tabata dispuesto pa muri pa nos. (Huan 15:13) Hamas nos lo por paga Yehova i Hesus bèk pa tur e amor ku nan a mustra na nos. Pero, na e manera ku nos ta hiba nos bida tur dia, nos lo demostrá si nos ta apresiá loke nan a hasi pa nos. (Kol. 3:15) Pues, nos ta bai Memorial pa kòrda kuantu nan ta stima nos i pa nos demostrá nan ku nos ta stima nan masha hopi mes tambe.
15. Dikon tantu e ungínan komo e otro karnénan ta gradisidu pa e regalo di e reskate?
15 Nos ta gradisidu pa e regalo di e reskate. (Mat. 20:28) Pa e ungínan, e reskate ta hopi presioso pasobra e ta hasi nan speransa posibel. Debí na nan fe den Kristu su sakrifisio, Yehova a deklará nan hustu i a adoptá nan komo su yunan. (Rom. 5:1; 8:15-17, 23) E otro karnénan tambe ta gradisidu pa e reskate. Debí na nan fe den Kristu su sakrifisio, nan por tin un bon amistat ku Dios, por rindi sirbishi sagrado na dje i por “sobrebibí e tribulashon grandi.” (Rev. 7:13-15) Un manera ku tantu e ungínan komo e otro karnénan por mustra nan apresio pa e reskate ta di t’ei presente na Memorial tur aña.
16. Ki ta un otro motibu dikon nos ke t’ei na Memorial?
16 Un otro motibu pakiko nos ke t’ei na Memorial ta pasobra nos ke obedesé Hesus. Sin importá kua speransa nos tin pa futuro, kada un di nos ke obedesé Hesus su mandamentu ku el a duna riba e anochi ku el a introdusí Memorial: “Sigui hasi esaki na mi memoria.”—1 Kor. 11:23, 24.
DIKON TA BON PA KADA UN DI NOS BAI MEMORIAL?
17. Kon Memorial ta hala nos mas serka di Yehova?
17 Nos ta hala mas serka di Yehova. (Sant. 4:8) Manera nos a mira, Memorial ta duna nos chèns pa meditá riba e speransa ku Yehova a duna nos i riba e amor ku el a mustra na nos. (Yer. 29:11; 1 Huan 4:8-10) Nos ta konvensí di e speransa ei i ku Yehova su amor pa nos nunka lo faya. Ora nos meditá riba eseinan, nos amor pa Yehova i nos amistat kuné lo bira mas fuerte.—Rom. 8:38, 39.
18. Ora nos meditá riba Hesus su bida, kiko nos lo haña mas gana di hasi?
18 Nos ta haña mas gana pa imitá Hesus. (1 Ped. 2:21) E dianan promé ku Memorial, nos ta lesa e relatonan tokante Hesus su último simannan aki riba tera, su morto i su resurekshon. Anto riba e anochi di Memorial, nos ta skucha e diskurso ku ta kòrda nos kuantu Hesus ta stima nos. (Efe. 5:2; 1 Huan 3:16) Ora nos lesa i meditá riba kuantu Hesus a sakrifiká su mes, nos lo haña mas gana pa “sigui kana meskos ku Hesus a kana.”—1 Huan 2:6.
19. Kon nos por keda Dios su amigu pa semper?
19 Nos lo ta mas determiná pa keda amigu di Dios. (Hudas 20, 21) Nos ta keda amigu di Dios ora nos keda hasi nos bèst pa obedes’é, santifiká su nòmber i hasi su kurason kontentu. (Pro. 27:11; Mat. 6:9; 1 Huan 5:3) Ora nos bai Memorial nos lo ta mas determiná ainda pa biba kada dia na un manera ku ta hasi Yehova su kurason kontentu. Ta komo si fuera nos ta bis’é: “Mi ke ta bo amigu pa semper!”
20. Ki bon motibu nos tin pa bai Memorial?
20 Sea nos speransa ta pa biba den shelu òf aki riba tera, kada un di nos tin bon motibu pa bai Memorial tur aña. Ora nos bini huntu riba e fecha ei, nos ta kòrda riba e morto di un persona ku nos ta stima: Hesukristu. I riba tur kos, nos ta kòrda ku Yehova a duna su Yu komo reskate pa nos—esei ta e muestra mas grandi di amor ku ta eksistí. E aña akí Memorial lo ta riba djabièrnè, 15 di aprel, despues ku solo baha. Kada un di nos stima Yehova i su Yu, p’esei riba e fecha ei no tin nada ku ta mas importante ku bai Memorial.
KANTIKA 16 Alabá Yehova pa Su Yu, Esun Ungí
^ Sea nos speransa ta pa biba den shelu òf den Paradeis aki riba tera, tur aña nos ta ansioso pa asistí na Memorial. E artíkulo akí lo analisá e motibunan ku Beibel ta duna nos pa nos bai Memorial i dikon ta bon pa nos hasi esei.
^ E palabranan akí a ser tradusí den Beibel Papiamentu Koriente komo: “Hasié pa boso kòrda riba mi” i den Beibel Santu komo: “Hasi esaki na mi rekuerdo.”
^ Pa mas informashon tokante e pakto nobo i e pakto di Reino, wak e artíkulo “Boso Lo Bira ‘un Reino di Saserdote’” den E Toren di Vigilansia di 15 di òktober 2014, pág. 15-17.
^ Pa mas informashon tokante e profesia di e dos pida palunan ku tin na Ezekiel kapítulo 37, wak Pregunta di Lektor den E Toren di Vigilansia di yüli 2016.
