1. Den ki situashon David a hañ’é?

 DAVID tabata hui pa su bida. Saul, e rei poderoso di Israel tabata determiná pa mat’é. Ora David tabatin mester di kuminda, el a para na e stat di Nob i a pidi solamente sinku pan. (1 Sam. 21:1, 3) Mas despues, e ku su hòmbernan a bai skonde den un kueba. (1 Sam. 22:1) Kon bin David a hañ’é den e situashon ei?

2. Den ki situashon peligroso Saul a hinka su mes? (1 Samuel 23:16, 17)

² Saul tabata super yalurs riba David pasobra David tabata hopi gustá i a gana hopi bataya. I Saul tabata sa tambe ku debí na su mes desobedensia Yehova a rechas’é komo rei di Israel i a skohe David na su lugá. (Lesa 1 Samuel 23:16, 17.) Komo ku te ainda Saul tabata rei di Israel i e tabatin un ehérsito grandi i hopi hende ainda tabata apoy’é, David mester a hui pa su bida. Di bèrdat Saul a kere ku e por a stòp Dios di hasi David rei? (Isa. 55:11) Beibel no ta bisa kiko tabata pasa den Saul su kabes, pero tin un kos sí ku nos tin sigur di dje: Saul tabata hinkando su mes den un situashon hopi peligroso. Esnan ku bringa kontra Dios semper ta pèrdè!

3. Kiko David a hasi apesar di su situashon?

³ David tabata humilde. No ta e mes a skohe pa bira rei di Israel, ma ta Yehova a skoh’é. (1 Sam. 16:1, 12, 13) Saul tabata odia David masha tantu mes. Pero, David no a  kulpa Yehova pa e peliger ku e tabata aden. Ni e no a reklamá ku e tabatin tiki kuminda i ku e mester a biba den kueba. De echo, kisas ta ora e tabata den e kueba ei, el a komponé e bunita kantika ku ta inkluí e palabranan di nos teksto sentral: “Hende ku ta buska Yehova lo no falta nada ku ta bon.”—Sal. 34:10, NW.

4. Kua pregunta nos lo bai kontestá den e artíkulo akí, i dikon nan ta importante?

⁴ Awe, hopi di Yehova su sirbidónan a yega di haña nan den situashon ku nan no tabatin sufisiente kuminda ni otro kos básiko pa biba. * Esei tabata e kaso foral durante e pandemia. Anto mas serka nos ta di e “tribulashon grandi,” mas pió kosnan lo bira. (Mat. 24:21) Pues, ta bon pa nos kontestá e kuater preguntanan akí: Den ki sentido David no a tabata “falta nada ku ta bon”? Dikon nos mester siña ta kontentu ku loke nos tin? Dikon nos por konfia ku Yehova lo perkurá pa nos? I kon nos por prepará awor pa futuro?

5-6. Kon Salmo 23:1-6 ta yuda nos komprondé e palabranan di nos teksto di aña?

⁵ Kiko David tabata ke men ora el a bisa ku Yehova su sirbidónan lo “no falta nada ku ta bon”? Wèl, David a usa e mesun tipo di palabranan ei na Salmo 23. E salmo ei por yuda nos komprondé kiko e tabata ke men. (Lesa Salmo 23:1-6.) David a kuminsá e salmo ei bisando: “SEÑOR ta mi Wardador, lo mi no tin falta di nada.” Den e restu di e salmo, David a menshoná loke ku di bèrdat ta importante—e hopi bendishonnan spiritual ku el a haña pasobra Yehova ta su Wardador. Yehova a gui’é “den e kamindanan di hustisia,” i semper El a yud’é, den bon i den malu. Pa David, sirbi Yehova tabata manera “drumi den  lugánan di yerba bèrdè.” Pero, e tabata sa ku esei no a nifiká ku lo e no tabatin problema den bida i ku lo e no tabatin enemigu. Tabatin biaha ku e por a bira desanimá, komo si fuera e tabata “kana den e vaye di sombra.” Pero komo ku Yehova tabata su Wardador, David a bisa: “Mi no tin miedu di maldat.”

⁶ Pues, den ki sentido David no tabata “falta nada ku ta bon”? Den sentido spiritual e tabatin tur loke e tabatin mester. Su felisidat no a dependé di kosnan material. David a keda kontentu ku loke Yehova a perkurá p’e. Pa David, e kos di mas importante tabata Yehova su bendishon i protekshon.

7. Segun Lukas 21:20-24, ki situashon difísil e kristiannan di promé siglo a haña nan kuné?

⁷ For di loke David a bisa nos ta mira kon importante ta pa nos tin un punto di bista korekto di kosnan material. Aunke no tin nada malu den disfrutá di e kosnan material ku nos tin, nos lo no ke hasi nan e kos di mas importante den nos bida. Esei tabata algu importante ku e kristiannan di promé siglo ku tabata biba na Hudea mester a komprondé. (Lesa Lukas 21:20-24.) Hesus a spièrta nan ku lo yega e dia ku Herúsalèm lo keda “rondoná pa ehérsito.” Ora esei sosodé, nan mester a “hui bai den seru.” Esei lo a skapa nan bida, pero nan lo mester a laga hopi kos atras. Un par di aña pasá, E Toren di Vigilansia a splik’é asin’akí: “Nan a bandoná kunuku i kas, sin sikiera rekohé nan pertenensianan for di nan kas. Sigur dje protekshon i apoyo di Yehova, nan a pone su adorashon promé ku tur otro kos ku por a parse importante.”

8. Ki lès importante nos ta siña for di loke a pasa ku e kristiannan di promé siglo bibando na Hudea?

⁸ Ki lès importante nos ta siña for di loke a pasa ku e kristiannan di promé siglo bibando na Hudea? E Toren di Vigilansia ku nos a menshoná awor ei a sigui bisa ku nos lo haña nos ku prueba den futuro ku lo saka na kla nos punto di bista tokante kosnan material. El a puntra: “Nan ta e kos mas importante, òf ta e salbashon ku lo bini pa tur hende ku ta na banda di Dios ta mas importante? Sí, nos huimentu lo por enserá algun kontratempu i miseria. Nos lo mester ta kla pa hasi tur loke ta nesesario, meskos ku e kristiannan (nos ekivalentenan) di promé siglo, ku a hui for di Hudea.” *

9. Kon e palabranan di Pablo na Hebreonan 13:5 i 6 ta animá bo?

⁹ Bo por imaginá bo kon duru tabata pa e kristiannan ei bandoná kasi tur loke nan tabatin i kuminsá di nobo? Nan tabatin mester di fe pa konfia ku Yehova lo a perkurá pa nan nesesidatnan básiko. Pero, wak kiko a yuda nan prepará pa esei. Sinku aña promé ku e romanonan a bin rondoná Herúsalèm, Apòstel Pablo a duna e hebreonan konseho ku lo a yuda nan. El a bisa: “Laga boso manera di biba ta liber di amor pa plaka, i keda kontentu ku loke boso tin. Pasobra Dios a bisa: ‘Hamas lo mi bandoná bo, i hamas lo mi laga bo desampará.’ P’esei nos por ta yen di ánimo i bisa: ‘Yehova ta mi ayudante; lo mi no tin miedu. Kiko hende por hasi mi?’” (Heb. 13:5, 6) Kon a para ku e kristiannan ku a sigui Pablo su konseho? Pa nan, tabata mas fásil pa kustumbrá ku un bida mas simpel. Nan  tabatin sigur ku Yehova lo a perkurá pa nan nesesidatnan básiko. Pablo su palabranan ta sigurá nos ku Yehova lo perkurá pa tur loke nos tin mester.

10. Ki “sekreto” Pablo a kompartí ku nos?

¹⁰ Pablo a duna Timoteo un konseho similar ku ta konta pa nos tambe. El a skirbi: “Pues, si nos tin kuminda, paña i un dak riba nos kabes, nos lo keda kontentu ku e kosnan akí.” (1 Tim. 6:8) Pero, akaso esei ke men ku nos no por disfrutá di un dushi kuminda, biba den un kas bunita ni kumpra paña nobo de bes en kuando? Esei no ta loke Pablo tabata ke men. Loke e tabata ke men ta ku nos mester keda kontentu ku loke nos tin. (Flp. 4:12) Esei tabata Pablo su “sekreto.” E kos di mas importante i presioso ku nos tin ta nos amistat ku Yehova, no kos material.—Hab. 3:17, 18.

11. Kiko Moises a bisa e israelitanan, anto kon esei ta yuda nos keda kontentu ku loke nos tin?

¹¹ Kisas loke nos ta pensa ku nos tin mester no ta loke Yehova ta pensa ku nos tin mester. Wak kiko Moises a bisa e israelitanan despues ku nan a pasa 40 aña den desierto: “SEÑOR bo Dios a bendishoná bo den tur loke bo a hasi; E tabata sa di bo dualmentu dor di e desierto grandi akí. SEÑOR bo Dios tabata ku bo durante e kuarenta añanan akí; bo no tabatin falta di nada.” (Deu. 2:7) Durante e 40 añanan ei, Yehova a duna nan mana  pa kome. Nan paña, e mesun pañanan ku nan a sali for di Egipto kuné, nunka a gasta. (Deu. 8:3, 4) Aunke algun di e israelitanan lo a pensa ku e kosnan ei no tabata sufisiente, Moises a kòrda nan ku nan tabatin tur loke nan tabatin mester. Yehova lo ta felis si nos siña pa ta kontentu ku loke nos tin, pa ta gradisidu pa e kosnan simpel ku e ta duna nos i pa komprondé ku nan ta regalo di dje.

12. Kiko ta mustra ku David a konfia den Yehova i no den su mes?

¹² David tabata sa ku Yehova ta leal i ku e ta hopi interesá den esnan ku stim’é. Aunke ku David su bida tabata den peliger ora el a komponé Salmo 34, su fe tabata asina fuerte ku el a sinti manera “e angel di SEÑOR [tabata] kampa rònt” di dje. (Sal. 34:7) Kisas David tabata kompará Yehova su angel ku un sòldá ku tabata kampa riba un vèlt i ku semper tabata alerta pa e enemigu. David tabata un sòldá ku hopi kurashi, anto Yehova a primintí ku lo e bira rei. Pero, asina mes e no a dependé riba su abilidat pa tira piedra ku slengu ni pa usa spada pa derotá enemigu. (1 Sam. 16:13; 24:12) Mas bien, David a konfia den Dios i el a konfia ku Yehova su angel lo a reskatá esnan ku ta tem’é. Klaru, nos no ta ferwagt ku Yehova ta bai protehá nos di un forma milagroso awe. Pero, nos sa ku tur esnan ku konfia den Yehova, asta si nan muri, lo haña bida eterno.

13. (a) Dikon Gòg di Magòg lo pensa ku nos lo ta un blanko fásil? (b) Dikon nos no mester tin miedu? (Wak e plachi riba portada)

¹³ Nos konfiansa ku Yehova lo bai protehá nos lo ser poné na prueba den futuro. Ora Gòg di Magòg, un grupo di nashon, ataká Dios su pueblo, kisas nos lo pensa ku nan lo bai mata nos tur. Nos mester ta kompletamente konvensí ku Yehova por i lo salba nos. Pa e nashonnan, nos lo ta manera karné ku no tin niun hende pa protehá nan. (Eze. 38:10-12) Nos lo ta manera un blanko fásil pasó nos no tin arma ni nos no a haña training pa bringa. Nan lo no mira loke nos lo mira ku nos wowonan di fe—un kantidat grandi di angel ku ta kampa rònt di Dios su pueblo, kla pa defendé nos. Pero, ta kon bini e nashonnan no por mira nan? Pasobra nan no tin fe den Dios. Nan lo keda sorprendí ora e ehérsito di shelu sali na nos defensa!—Rev. 19:11, 14, 15.

14. Kiko nos tin ku hasi aworakí pa prepará pa loke ta bini den futuro?

¹⁴ Kiko nos tin ku hasi awor pa prepará pa futuro? Promé ku tur kos, nos mester tin un punto di bista korekto di kosnan material pasobra lo yega e dia ku nos lo tin ku laga nan tur atras. Ademas, nos mester siña keda kontentu ku loke nos tin i hasi sigur ku e kos di mas importante ta nos amistat ku Yehova. Mas mihó nos konosé nos Dios, mas konvensí nos lo ta ku e por protehá nos ora Gòg di Magòg ataká nos.

15. Kiko a pasa ku David den pasado ku a konvens’é ku nunka Yehova lo lag’é na kaya?

¹⁵ Laga nos wak kiko mas a yuda David i ku tambe por yuda nos prepará pa pruebanan den futuro. David a bisa: “O purba i mira ku SEÑOR ta bon; bendishoná ta e hende ku ta tuma refugio den  dje!” (Sal. 34:8) E palabranan ei ta yuda nos mira pakiko David tabata sa ku e por a konta ku Yehova. Hopi biaha David a konfia den Yehova i su Dios nunka a lag’é na kaya. Ora David tabata hóben i e mester a enfrentá Goliat, el a bisa e gigante filisteo ei: “Awe SEÑOR lo entregá bo den mi man.” (1 Sam. 17:46) Despues, ora David tabata sirbi Saul, Saul a purba di mat’é vários biaha. Pero, Yehova tabata ku David. (1 Sam. 18:12) Debí ku David a mira kon Yehova a yud’é den pasado, e tabata sa ku Yehova lo yud’é ku su problemanan.

16. Kon nos por “purba i mira” ku Yehova ta bon?

¹⁶ Mas nos konfia den Yehova aworakí, mas sigur nos lo ta ku lo e salba nos den futuro. Nos mester tin hopi fe i konfiansa den Yehova pa nos pidi nos doño di trabou dia liber pa nos bai asamblea òf kongreso, òf pa pidié kambia nos oranan di trabou pa nos bai tur nos reunionnan i sali mas den sirbishi. Pero ban bisa ku nos doño di trabou nenga, anto riba dje nos pèrdè trabou. Puntra bo mes: ‘Mi tin fe ku Yehova nunka lo bandoná mi ni laga mi desampará, i ku semper lo e perkurá pa loke mi tin mester?’ (Heb. 13:5) Hopi ruman den sirbishi di tempu kompleto por konta bo kon Yehova semper a yuda nan ora nan tabatin mester di djE. No tin duda; Yehova ta fiel.

17. Kiko ta e teksto di aña pa 2022, i dikon e ta na su lugá?

¹⁷ Ku Yehova na nos banda, nos no tin nodi di tin miedu di loke ta bini den futuro. Tanten nos pone su Reino na promé lugá den nos bida, nos Dios hamas lo bandoná nos. Pa yuda nos kòrda ku nos tin ku prepará awor pa e situashonnan difísil den futuro i pa konfia ku Yehova lo no bandoná nos, Kuerpo Gobernante a skohe Salmo 34:10 (NW) komo nos teksto di aña pa 2022: “Hende ku ta buska Yehova lo no falta nada ku ta bon.”