1. Den ki tipo di famia Santiago a lanta?

 SANTIAGO, ruman di Hesus, a lanta den un famia ku tabata fiel na Yehova. * Su mayornan, Hose ku Maria, tabata stima Yehova masha hopi mes i a hasi tur nan esfuerso pa sirbié. Ma, esei no tabata e úniko bendishon ku Santiago tabatin. Su ruman mayó lo a bira e Mesías primintí. Esta privilegiá Santiago tabata pa lanta den e famia ei!

2. Kon bini Santiago tabata atmirá su ruman mayó?

² Santiago tabatin hopi motibu pa atmirá su ruman mas grandi. (Mat. 13:55) Por ehèmpel, ora Hesus tabatin 12 aña, e tabata konosé e Skritura asina bon te ku el a sorprendé e maestronan na Herúsalèm. (Luk. 2:46, 47) Kisas Santiago a traha komo karpinté huntu ku Hesus. Si esei tabata e kaso, lo el a siña konosé su ruman hopi bon. Nathan H. Knorr tabatin kustumber di bisa: “Bo ta siña hopi tokante un hende ora bo traha kuné.” * Probablemente Santiago por a mira tambe kon “Hesus a sigui krese físikamente i oumentá den sabiduria, i mas i mas e tabata haña aprobashon di Dios i di hende.” (Luk. 2:52) Debí na tur esei, nos lo a ferwagt ku Santiago tabata un di Hesus su promé disipelnan. Pero, no tabata asina.

3. Kiko Santiago a pensa di Hesus durante Hesus su sirbishi riba tera?

 ³ Durante Hesus su sirbishi riba tera, Santiago no a bira un di su disipelnan. (Huan 7:3-5) Kisas, Santiago mes tabata un di Hesus su famianan ku a pensa ku “el a bira di kabes.” (Mar. 3:21) Anto ta parse ku e no tabata ni presente huntu ku nan mama, Maria, ora ku Hesus tabata na e staka di tormento.—Huan 19:25-27.

4. Kiko nos lo siña den e artíkulo akí?

⁴ Ku tempu, Santiago a pone fe den Hesus i a bira un ansiano respetá den e kongregashon kristian. Den e artíkulo akí, nos lo siña dos lès for di Santiago: (1) dikon nos mester keda humilde i (2) kon nos por ta bon maestro.

5. Kiko Santiago a hasi despues ku Hesus a aparesé na dje?

⁵ Na ki momento Santiago a bira un disipel leal di Hesus? Despues ku Hesus a resusitá, “el a aparesé na Santiago, kaba na tur e apòstelnan.” (1 Kor. 15:7) Ta despues di e enkuentro ei, el a bira un di Hesus su disipelnan. E tabata presente ora e apòstelnan a haña spiritu santu den e kamber ariba na Herúsalèm. (Echo. 1:13, 14) Despues Santiago tabatin privilegio di forma parti di e kuerpo gobernante di promé siglo. (Echo. 15:6, 13-22; Gal. 2:9) I promé ku aña 62, Dios a inspir’é pa skirbi un karta na e kristiannan ungí. Te ainda nos por siña hopi for di e karta ei sea ku nos tin speransa pa biba pa semper den shelu òf riba tera. (Sant. 1:1) E historiadó hudiu Hosefo a skirbi ku sumo saserdote hudiu Ananías yu di Anas, a duna òrdu pa mata Santiago. Santiago a keda fiel na Yehova te na fin di su bida aki riba tera.

6. Den ki manera Santiago tabata diferente for di e lidernan religioso di su tempu?

⁶ Santiago tabata humilde. Dikon nos por bisa esei? Wak e diferensia entre Santiago i mayoria di e lidernan religioso di su tempu. Ora Santiago a mira e evidensianan bon kla ku Hesus ta e Yu di Dios, humildemente el a aseptá esei. Pero, e saserdotenan prinsipal na Herúsalèm sí no a hasi esei. Por ehèmpel, ora Hesus a lanta Lázaro for di morto, nan no por a nenga esei. Na lugá di aseptá ku ta Yehova a manda Hesus, nan a purba di mata tantu Hesus komo  Lázaro. (Huan 11:53; 12:9-11) Anto despues, ora ku Hesus a resusitá, nan a hasi tur loke nan tabata por pa hende no haña sa esei. (Mat. 28:11-15) Orguyo a pone e lidernan religioso ei rechasá e Mesías.

7. Dikon nos mester evitá di ta orguyoso?

⁷ Kiko ta e lès? Evitá di ta orguyoso i keda habrí pa Yehova siña bo. Meskos ku un malesa tiki tiki por pone ku un hende su kurason no ta bati bon mas, asina tambe tiki tiki orguyo por pone ku nos no ta obedesé Yehova su guia mas. E fariseonan tabata asina orguyoso ku nan a nenga di rekonosé e evidensia ku nan por a mira bon kla ku Hesus tabatin Dios su spiritu santu i ku e tabata e Yu di Dios. (Huan 12:37-40) E aktitut ei tabata masha peligroso pasobra esei a stroba nan di haña bida eterno. (Mat. 23:13, 33) Pues, ta masha importante pa sigui permití Dios su Palabra i su spiritu santu kambia nos personalidat i pensamentu i yuda nos tuma bon desishon. (Sant. 3:17) Debí ku Santiago tabata humilde, e tabata habrí pa laga Yehova siñ’é. I manera nos lo bai mira, su humildat a yud’é bira un bon maestro.

8. Kiko por yuda nos bira un bon maestro?

⁸ Santiago no tabatin hopi skol. Pa e lidernan religioso di su tempu e tabata meskos ku Pedro i Huan—un “hende gewon ku no tabatin muchu edukashon.” (Echo. 4:13) Pero, Santiago a siña bira un bon maestro. Nos por mira esei bon kla ora nos lesa e buki ku ta karga su nòmber. Meskos ku Santiago, kisas nos tampoko no tin hopi skol. Pero, ku yudansa di Yehova su spiritu santu i di e entrenamentu di su organisashon, nos tambe por bira bon maestro. Ban wak kiko a yuda Santiago bira un bon maestro anto kiko nos por siña for di dje.

9. Kon Santiago tabata siña hende?

⁹ Santiago no a usa palabra grandi ni splikashon kompliká. Debí na esei, e hendenan tabata komprondé mesora ki pa hasi i kon pa hasié. Por ehèmpel,  wak kon simpel el a splika ku kristiannan mester ta dispuesto pa sufri inhustisia sin rabia. El a skirbi: “Nos ta proklamá ku esnan ku a perseverá ta felis! Boso a tende di e perseveransia di Yòb i boso sa di e bendishon ku Yehova a dun’é, i na esaki boso a mira ku Yehova tin masha kariño, kompashon i miserikòrdia.” (Sant. 5:11) Bo a mira kon Santiago a usa e Skritura komo base di su splikashon? El a usa Dios su Palabra pa yuda e hendenan mira ku Yehova semper ta bendishoná esnan ku, manera Yòb, ta leal na djE. Santiago a usa palabranan simpel i lógiko pa yuda e hendenan komprondé e lès ei. Di e manera ei, el a hala atenshon na Yehova i no na su mes.

10. Ki ta un manera ku nos por imitá Santiago ora ku nos ta siña hende?

¹⁰ Kiko ta e lès? Siña hende na un manera simpel i usa Beibel. Nos meta no mester ta pa laga hende mira kuantu nos sa. Mas bien pa mustra nan kuantu Yehova sa i kuantu e ta stima nan. (Rom. 11:33) Anto nos por logra esei ora nos ta usa Beibel komo nos base. Por ehèmpel, na lugá di bisa nos studiante kiko nos lo hasi si nos tabata na nan lugá, nos mester yuda nan rasoná riba relatonan bíbliko i yuda nan komprondé kon Yehova ta pensa i sinti. Anto e ora ei nan lo apliká loke nan ta siña pasobra nan ke agradá Yehova, no nos.

11. Ki problema algun kristian den tempu di Santiago tabatin, i ki konseho el a duna nan? (Santiago 5:13-15)

¹¹ Santiago tabata realístiko. Ora nos lesa su karta, nos ta ripará ku Santiago tabata konsiente di e problemanan ku su rumannan tabatin anto el a duna nan guia tokante esei. Por ehèmpel, algun kristian tabata slo pa apliká konseho. (Sant. 1:22) Tin tabata trata hende riku mihó ku e pobernan. (Sant. 2:1-3) Pa otronan, tabata difísil pa kontrolá nan lenga. (Sant. 3:8-10) Tur e rumannan ei tabatin problemanan serio, pero Santiago tabatin fe ku nan por a kambia. El a duna nan konseho na un manera amabel pero firme i a animá esnan ku no tabatin bon amistat ku Yehova pa buska yudansa serka e ansianonan.—Lesa Santiago 5:13-15.

12. Kon nos por keda positivo ora di yuda nos studiantenan?

¹² Kiko ta e lès? Sea realístiko, pero keda ku un punto di bista positivo di otronan. Pa hopi studiante ta difísil pa apliká konseho for di Beibel. (Sant. 4:1-4) Kisas ta tuma tempu pa nan stòp ku mal hábito i pa kultivá kualidatnan kristian. Meskos ku Santiago, nos mester tin kurashi pa bisa nan kiko nan tin ku mehorá. Pero na mes momento, nos mester keda positivo, konfiando ku Yehova ta hala hende humilde serka dje i lo duna nan e forsa nesesario pa hasi kambio den nan bida.—Sant. 4:10.

13. Kiko Santiago a rekonosé? (Santiago 3:2, nota.)

¹³ Santiago no a pensa ku e tabata mihó ku otro hende. E no a pensa ku e tabata mihó ku e otro kristiannan debí ku e tabata ruman di Hesus òf debí ku e tabatin un asignashon importante. El a yama e otro kristiannan: “Mi rumannan stimá.” (Sant. 1:16, 19; 2:5) E no a laga otro hende kere ku e tabata perfekto. Mas bien,  el a inkluí su mes ora el a bisa: “Nos tur ta faya hopi biaha.”—Lesa Santiago 3:2, nota.

14. Dikon nos mester ta dispuesto pa atmití nos fayonan?

¹⁴ Kiko ta e lès? Kòrda ku nos tur ta pekadó. Nunka nos mester pensa ku nos ta mas ku nos studiantenan. Dikon nò? Pasobra si nos duna nan e impreshon ku nos no sa peka nunka, nan por pensa ku nunka nan lo no por kumpli ku tur loke Yehova ta ferwagt di nan. P’esei, nos mester ta onesto i atmití ku no ta tur biaha tabata fásil pa nos apliká loke ku Beibel ta bisa. Ora nos splika nan kon Yehova a yuda nos hasi kambio den nos bida, nos por yuda nan mira ku nan tambe por sirbi Yehova.

15. Kon Santiago su ilustrashonnan tabata? (Santiago 3:2-6, 10-12)

¹⁵ Santiago a usa ilustrashon ku a yega na kurason di su oyentenan. Klaru ku ta spiritu santu a yud’é, pero probablemente el a siña hopi tambe for di e manera ku su ruman mayó, Hesus, a usa ilustrashon. E ilustrashonnan ku Santiago a usa den su karta ta simpel i komprendibel.—Lesa Santiago 3:2-6, 10-12.

16. Dikon nos mester usa ilustrashon ku ta yega na kurason di nos oyentenan?

¹⁶ Kiko ta e lès? Usa ilustrashon ku ta yega na kurason di nos oyentenan. Ora bo usa bon ilustrashon, bo ta yuda bo oyentenan mira nan dilanti loke nan ta skuchando. Anto esei lo yuda nan komprondé i keda kòrda bèrdatnan di Beibel importante. Hesus tabata bon den usa ilustrashonnan ku ta yega na kurason di hende, anto su ruman Santiago a hasi meskos kuné. Laga nos analisá un di Santiago su ilustrashonnan anto wak dikon e ta un bon ilustrashon.

17. Dikon e ilustrashon na Santiago 1:22-25 ta asina bon?

¹⁷ Lesa Santiago 1:22-25. Tin diferente motibu ku ta hasi Santiago su ilustrashon tokante spil un bon ilustrashon. Santiago tabatin un lès spesífiko na mente, esta, ku pa e Palabra di Dios yuda nos, nos mester hasi mas ku djis les’é. Nos mester apliká loke nos ta lesa.  Santiago a skohe un ilustrashon ku su oyentenan por a komprondé fásilmente—un hende ku ta wak den spil. Kiko e tabata kier a siña e rumannan? Lo ta masha bobo pa un hende wak den spil, mira algu ku e mester drecha anto bira bai sin hasi nada tokante esei. Di mes manera, lo ta masha bobo pa nos lesa Dios su Palabra, mira algu ku nos mester drecha tokante nos personalidat anto keda sin hasi nada tokante esei.

18. Kiko ta tres kos ku nos mester hasi ora di usa ilustrashon?

¹⁸ Ora bo ta usa un ilustrashon, bo por imitá Santiago na tres manera: (1) Hasi sigur ku e ilustrashon ku bo ta usa ta klòp ku e punto ku bo ke pa e persona komprondé. (2) Usa ilustrashon ku ta fásil pa e persona komprondé. (3) Hasi sigur ku e ta kapta e punto tras di e ilustrashon. Si bo ta haña ku ta difísil pa haña bon ilustrashon, kisas bo por buska den Índice de las publicaciones Watch Tower, bou di “Ejemplos.” Ei bo por haña hopi ilustrashon ku bo por usa. Pero kòrda ku ilustrashon ta manera un mikrofon—e ta resaltá e punto ku bo ke trese padilanti. P’esei, hasi sigur ku bo ta usa ilustrashon solamente pa e puntonan prinsipal ku bo ke pa bo studiante komprondé. Ta klaru ku e motibu di mas importante pa mehorá nos manera di siña no ta pa hala atenshon na nos mes pero pa yuda mas tantu hende posibel forma parti di Yehova su famia felis.

19. Kon nos por mustra ku nos ta stima nos rumannan?

¹⁹ Santiago tabatin un ruman hòmber perfekto, pero nos nò. Sinembargo, nos tin e privilegio di sirbi Yehova huntu ku un famia grandi di rumannan kristian. Nos por demostrá ku nos ta stima nan ora nos ta pasa tempu ku nan, siña for di nan i sirbi fielmente lado a lado ku nan den e trabou di prediká i siña hende. Ora nos ta hasi esfuerso pa imitá Santiago den nos aktitut, kondukta i manera di siña hende, nos ta onra Yehova i ta yuda hende sinsero hala serka nos amoroso Tata selestial.