1. Kon nos ta pasa tempu ku Yehova?

 NOS tur gusta pasa tempu ku e hendenan ku nos ta stima. Por ehèmpel, pa un pareha kasá, no tin nada mas dushi ku pasa tempu huntu. Hóbennan gusta pasa tempu ku nan amigunan. Anto nos tur ta balorá e tempu ku nos por pasa ku nos rumannan. Pero, loke nos gusta mas ainda ta di pasa tempu ku nos Dios. Kon nos ta hasi esei? Esei ta di hasi orashon na dje, lesa su Palabra i meditá riba su promesa i bunita kualidatnan. Bo no ta haña ku e tempu ku nos ta pasa ku Yehova ta mashá presioso?—Sal. 139:17.

2. Dikon no ta semper fásil pa pasa tempu ku Yehova?

² Aunke nos gusta pasa tempu ku Yehova, esei no ta semper ta fásil. Nos por tin un bida asina drùk ku nos ta sinti ku nos no tin espasio pa pasa tempu ku Yehova. Nos trabou, nos famia i otro kosnan por kita asina tantu tempu for di nos, ku nos ta sinti ku nos no tin tempu pa hasi orashon, studia ni meditá.

3. Ki otro peliger nos tin ku tene kuidou kuné?

³ Tin hopi kos ku nos ta hasi ku riba nan mes no ta malu. Pero, tin un peliger ku nos tin ku tene kuidou kuné. Si nos no paga tinu, e kosnan ei por tuma asina tantu tempu ku nos no ta sobra tempu pa hala mas serka  Yehova. Por ehèmpel, nos mester relahá i dibertí. Pero, nos por pasa muchu tempu hasiendo esei i no ta sobra kasi niun tempu pa kosnan spiritual. Ta importante pa nos tene tur kos na nan lugá.—Pro. 25:27; 1 Tim. 4:8.

4. Kiko nos lo wak den e artíkulo akí?

⁴ Den e artíkulo akí nos lo wak dikon ta importante pa nos tuma bon desishon i pone e prioridatnan korekto den nos bida. Tambe nos lo wak kon nos por usa e tempu ku nos ta pasa ku Yehova di e mihó manera, i kon esei ta benefisiá nos.

5. Kon Efesionan 5:15-17 por yuda hóbennan tuma bon desishon?

⁵ Tuma bon desishon. Hopi biaha, hóbennan ta preokupá tokante kiko nan lo bai hasi ku nan bida. Di un banda, nan tin maestro- i famianan, ku no ta den bèrdat, ku ta konsehá nan pa bai universidat ya asina nan por haña un bon trabou i gana hopi plaka. Si nan hasi esei, esei lo kita hopi tempu for di nan. Di otro un banda, mayor- i rumannan den e kongregashon por animá un hóben pa usa su bida pa sirbi Yehova. Kiko por yuda un hóben ku ta stima Yehova tuma e mihó desishon? Lo ta bon pa e lesa i meditá riba Efesionan 5:15-17. (Les’é.) Despues ku e lesa e versíkulonan ei, e por puntra su mes: ‘Kiko ta “e boluntat di Yehova”? Ki desishon lo agrad’é? Ki desishon lo yuda mi usa mi tempu di e mihó manera?’ Kòrda, ‘tempunan ta malu’ i e mundu akí ku ta den man di Satanas ta a punto di yega na su fin. P’esei, e kos di mas sabí ku nos por hasi ta di usa nos bida di un manera ku ta agradá Yehova.

6. Ki desishon Maria a tuma, i dikon esei tabata un bon desishon?

⁶ Pone e prioridatnan korekto. Tin biaha, pa usa nos tempu di e mihó manera nos tin ku skohe entre dos kos ku riba nan mes no ta malu. Laga nos wak esei na loke a pasa ora ku Hesus a bishitá Marta ku Maria. Sin duda nan tabata masha kontentu ku Hesus a bishitá nan. Marta tabata masha hospitalario mes. Pues, el a kuminsá prepará un kuminda tur afó. Mientrastantu, su ruman Maria a sinta na pia di Hesus pa skucha loke e tabata papia. Marta no a hasi nada malu, pero Hesus a bisa ku Maria “a skohe e mihó parti.” (Luk. 10:38-42) Ku tempu, Maria kisas a lubidá loke el a kome e dia ei, pero nos por tin sigur ku nunka el a lubidá loke el a siña for di Hesus. Meskos ku Maria a balorá e tempu ku el a pasa ku Hesus, nos tambe ta balorá e tempu ku nos ta pasa ku Yehova. Kon nos por usa e tempu ei di e mihó manera?

7. Dikon ta asina importante pa hasi orashon, studia i meditá?

⁷ No lubidá ku orashon, estudio i meditashon ta parti di nos adorashon. Ora nos ta hasi orashon, nos ta papia ku nos Tata den shelu ku ta stima nos masha tantu. (Sal. 5:7) Ora ku nos ta studia Beibel, nos ta haña “konosementu di Dios,” kende ta e Persona di mas sabí ku ta eksistí. (Pro. 2:1-5) Anto ora nos ta meditá, nos ta pensa riba Yehova  su bunita kualidatnan i ta kòrda riba e bunita promesanan ku e tin pa nos i pa henter humanidat. No tin un mihó manera pa usa nos tempu! Pero, kon bo por hasi bon uso di e tempu ku bo tin ku Yehova?

8. Kiko nos por siña for di e manera ku Hesus a usa su tempu den desierto?

⁸ Si ta posibel, buska un lugá ketu. Laga nos wak kon Hesus a hasi esei. Promé ku el a kuminsá ku su sirbishi aki riba tera, el a pasa 40 dia den desierto. (Luk. 4:1, 2) Ei e por a hasi orashon na Yehova i meditá riba kiko tabata Su boluntat p’e. Sin duda, esei a prepará Hesus pa e pruebanan ku pronto lo el a hañ’é kuné. Kiko nos por siña for di Hesus su ehèmpel? Si nos ta den un famia grandi, no tur biaha ta posibel pa nos por haña un lugá ketu den kas. Den e kaso ei, kisas nos por buska un lugá ketu pafó di kas. Esei ta loke un ruman ku yama Julie ta hasi ora ku e ke hasi orashon na Yehova. E ku su kasá ta biba den un apartamènt na Fransia, i ta hopi difísil pa e ta su so sin distraishon. Julie ta bisa: “Tur dia mi ta sali bai kana den parke. Ei mi por ta mi so, mi por konsentrá i mi por papia trankil asina ku Yehova.”

9. Apesar ku Hesus tabatin un bida drùk, kon el a mustra ku el a balorá su amistat ku Yehova?

⁹ Hesus tabatin un bida hopi drùk. Unda ku el a bai tabatin hende ta siguié, i nan tabata ke pasa tempu kuné i tabata ke su atenshon. Un biaha, “henter e stat a bin para dilanti di porta” pa mir’é. Asina mes, Hesus a hasi sigur ku semper e tabatin tempu pa kuida su amistat ku su Yehova. Promé ku solo a sali, el a bai na “un lugá solitario” kaminda e por a pasa tempu su so ku su Tata.—Mar. 1:32-35.

10-11. Segun Mateo 26:40 i 41, ki konseho Hesus a duna su disipelnan den Hòfi di Getsémani, pero kiko a sosodé?

¹⁰ E anochi promé ku Hesus a muri i na final di su sirbishi, un biaha mas el a buska un lugá trankil kaminda e por a meditá i hasi orashon. Anto el a hañ’é den Hòfi di Getsémani. (Mat. 26:36) Riba e anochi ei, Hesus a duna su disipelnan un konseho masha importante tokante orashon.

¹¹ Laga nos wak kiko tur a pasa. Ora ku nan a yega Hòfi di Getsémani, tabata hopi lat; kisas despues di meianochi. Hesus a pidi su disipelnan pa “keda lantá,” anto el a bai hasi orashon. (Mat. 26:37-39) Pero miéntras ku e tabata hasi orashon, nan a pega soño. Ora el a bini  bèk, el a bolbe bisa nan atrobe pa “keda vigilá i hasi orashon kontinuamente.” (Lesa Mateo 26:40, 41.) Hesus tabata sa ku nan tabata bou di hopi strès i ku nan tabata kansá. El a komprondé pa nan i a bisa ku “e karni ta débil.” Hesus a bai hasi orashon dos biaha mas i tur dos biaha ku el a bolbe, el a haña su disipelnan na soño en bes di ta hasi orashon.—Mat. 26:42-45.

12. Ki nos por hasi si tin biaha nos ta sinti nos asina di strès òf muchu kansá pa hasi orashon?

¹² Skohe e momento adekuá. Kisas tin biaha nos ta sinti nos asina di strès òf kansá ku nos no tin forsa pa hasi orashon. Si bo a yega di sinti bo asina, no preokupá, bo no ta bo so. Kiko bo por hasi? Algun ruman ku tabatin kustumber di hasi orashon na Yehova na final di dia, a mira ku ta hopi mas mihó pa hasi orashon un tiki mas trempan ora ku nan ta ménos kansá. Tin otro a ripará ku nan ta konsentrá mihó si nan hasi orashon den un sierto posishon, manera sintá òf na rudia. Pero, kiko awor si bo ta sinti bo demasiado anshá i desanimá pa hasi orashon? Bisa Yehova kon bo ta sinti bo. Bo por tin sigur ku nos Tata miserikòrdioso lo komprondé bo.—Sal. 139:4.

13. Kon nos aparatonan elektróniko por distraí nos ora nos ta pasa tempu ku Yehova?

¹³ No laga nada distraí bo ora bo ta studia. Orashon no ta e úniko manera ku nos ta fortalesé nos amistat ku Yehova. Algu otro ku nos por hasi ta di studia su Palabra i asistí na e reunionnan di kongregashon. Kiko bo por hasi pa usa e tempu ku bo a pone pa studia i bai reunion di e mihó manera? Puntra bo mes: ‘Kiko ta distraí mi durante reunion i ora mi ta studia?’ Kisas ta yamada, mail òf mensahenan ku ta drenta? Awe míles di miónes di hende ta usa telefòn òf aparatonan por estilo. Algun investigadó a bisa ku e simpel echo di tin un telefòn den bo serkania por stroba bo di konsentrá. Un eksperto a bisa: “Bo no ta konsentrá mas riba loke bo ta hasiendo. Bo mente ta otro kaminda.” Promé ku asamblea i kongreso, hopi biaha nos ta skucha e anunsio ku ta bisa pa nos  ahustá nos aparatonan elektróniko di tal manera ku nan no ta stroba otronan den e ouditorio. Nos lo no por hasi mesun kos ora ku nos ta nos so ku Yehova pa asina evitá ku nos aparatonan elektróniko ta distraí nos òf interumpí nos tempu ku Yehova?

14. Segun Filipensenan 4:6 i 7, kon Yehova lo yuda nos konsentrá?

¹⁴ Pidi Yehova yuda bo konsentrá. Si durante reunion òf bo estudio bo ripará ku bo mente ta dual, pidi Yehova yuda bo. Si tin algu ta preokupá òf anshá bo, no ta fásil pa bo pone esei un banda i konsentrá riba kosnan spiritual. Pero ta importante pa bo hasi esei. Pidi Yehova pa duna bo e pas ku no solamente ta protehá bo kurason pero tambe bo mente.—Lesa Filipensenan 4:6, 7.

15. Kiko ta un benefisio di pasa tempu ku Yehova?

¹⁵ Si bo tuma tempu pa papia ku Yehova, pa skuch’é i pensa riba dje, esei lo benefisiá bo masha tantu mes. Kon asina? Di promé, lo bo tuma mihó desishonnan den bo bida. Beibel ta bisa ku “esun ku anda ku hende sabí lo ta sabí.” (Pro. 13:20) P’esei, mas tantu tempu bo pasa ku Yehova, e Persona di mas sabí ku ta eksistí, mas sabí lo bo bira. E ora ei lo bo komprondé mas mihó kiko ta hasié kontentu, i lo bo evitá di tuma desishonnan ku ta hasié tristu.

16. Dikon pasa tempu ku Yehova lo yuda nos bira mihó maestro?

¹⁶ Di dos, lo bo bira un mihó maestro. Ora nos ta studia Beibel ku un hende, un di e metanan di mas importante ku nos tin ta pa yud’é stima Yehova. Mas nos papia ku Yehova, mas nos ta stim’é i mas mihó nos por yuda nos studiante stim’é. Esei tambe ta loke Hesus a hasi. E tabata papia di su Tata ku asina un amor i kariño, ku su disipelnan tambe a haña gana di stima Yehova.—Huan 17:25, 26.

17. Kon orashon i estudio por yuda nos hasi nos fe mas fuerte?

¹⁷ Di tres, bo fe lo bira mas fuerte. Pensa kiko ta sosodé ora ku bo pidi Yehova pa guia, konsuelo òf yudansa. Kada bes ku e kontestá bo, bo fe den dje ta bira mas fuerte. (1 Huan 5:15) Un otro kos ku por hasi bo fe mas fuerte ta estudio personal. Kòrda ku “fe ta bini despues ku un hende tende e palabra.” (Rom. 10:17) Sinembargo, pa bo fe por ta fuerte, bo tin ku hasi mas ku djis  siña tokante Yehova. Kiko mas bo tin ku hasi?

18. Splika dikon nos tin ku meditá.

¹⁸ Bo mester meditá riba loke bo ta siña. Pensa loke a pasa ku e eskritor di Salmo 77. E tabata preokupá pasobra el a sinti ku e i e otro israelitanan a pèrdè Yehova su aprobashon. E preokupashon ei a pone ku e no por a drumi anochi. (Versíkulo 2-8) Kiko el a hasi? El a bisa Yehova: “Lo mi meditá riba tur bo obranan, i keda pensa riba bo echonan.” (Versíkulo 12) Klaru ku e salmista tabata sa e kosnan ku Yehova a hasi pa Su pueblo den pasado, pero tòg el a puntra su mes: “Dios a lubidá di ta miserikòrdioso? El a kita su kompashon den su rabia?” (Versíkulo 9) E salmista a meditá riba Yehova su obranan i e echo ku Yehova a mustra miserikòrdia i kompashon den pasado. (Versíkulo 11) Debí na esei, e salmista a bira konvensí ku Yehova lo no bandoná Su pueblo. (Versíkulo 15) Di mes manera, bo fe tambe lo bira mas fuerte ora bo meditá riba loke Yehova a hasi pa su pueblo i pa bo mes.

19. Kiko ta un otro benefisio di pasa tempu ku Yehova?

¹⁹ Di kuater, i esun di mas importante, lo bo stima Yehova mas ainda. Amor ta e kualidat ku mas lo yuda bo obedesé Yehova, hasi sakrifisio ku ta agrad’é i wanta kualke prueba. (Mat. 22:37-39; 1 Kor. 13:4, 7; 1 Huan 5:3) No tin nada mas importante ku tin un amistat será ku Yehova, kende nos stima mashá.—Sal. 63:1-8.

20. Ki bo tin pensá di hasi pa saka tempu pa pasa ku Yehova?

²⁰ Nunka lubidá ku orashon, estudio i meditashon ta parti di bo adorashon. Meskos ku Hesus, buska un lugá ketu pa pasa tempu ku Yehova. Pone tur distraishon un banda. Pidi Yehova yuda bo konsentrá ora bo ta studiando òf ora bo ta na reunion. Si bo usa bo tempu awor di e mihó manera, Yehova lo rekompensá bo ku bida eterno den su mundu nobo.—Mar. 4:24.