1. Dikon nos mester tuma e spièrtamentu di Hesus na serio?

ORA Hesus a duna e profesia tokante e último dianan, el a bisa: “Presta atenshon na boso mes pa boso kurason nunka bira demasiado kargá ku . . . e inkietutnan di bida,” esta, ansiedat tokante e nesesidatnan di bida òf preokupashon ku e kosnan di bida. (Luk. 21:34) Dikon nos mester tuma e spièrtamentu ei na serio? Pasobra awendia nos ta enfrentá e mesun tipo di problema i sufrimentu ku tur otro hende.

2. Ki tipo di problema nos rumannan ta enfrentá?

² Tin biaha nos ta yen di strès debí ku nos tin vários problema na e mesun tempu. Laga nos wak algun ehèmpel. Un Testigu ku yama John, * ku ta sufri di múltiple sklerósis, a keda kibrá i masha tristu ora su kasá a bandon’é despues di 19 aña di matrimonio. Despues, su dos yu muhénan a stòp di sirbi Yehova. Bob ku su kasá, Linda, a enfrentá otro tipo di problema. Nan tur dos a pèrdè trabou, i despues nan a pèrdè nan kas. Huntu ku tur esei, dòkter a bisa ku Linda tin un malesa di kurason ku por ta mortal i tambe ku e tin artrítis severo.

3. Segun Filipensenan 4:6 i 7, di kiko nos por tin sigur?

³ Yehova ta nos Kreador i Tata amoroso. P’esei, nos por tin sigur ku e ta komprondé kiko strès por hasi ku nos. I e ke yuda nos enfrentá kualke problema ku nos tin. (Lesa Filipensenan 4:6, 7.) Beibel ta papia di vários sirbidó di  Dios ku a enfrentá difikultat ku a duna nan strès. Tambe e ta mustra kon Yehova a yuda nan den e situashonnan ei. Ban wak algun ehèmpel.

4. Ki problema Elías a enfrentá, i kon el a sinti tokante Yehova?

⁴ Profeta Elías a sirbi Yehova den un tempu masha difísil i a enfrentá problema serio. Akab, un rei di Israel ku no tabata fiel na Yehova, a kasa ku Yézabèl, un muhé malbado ku tabata adorá Baal. Nan dos huntu a yena e pais ku adorashon di Baal i a mata hopi profeta di Yehova. Pero Elías a logra skapa. I debí ku el a konfia den Yehova, el a sobrebibí un temporada di hamber severo. (1 Rei. 17:2-4, 14-16) Ademas di esei, el a konfia den Yehova ora el a enfrentá e profeta- i adoradónan di Baal, i a urgi e israelitanan pa sirbi Yehova. (1 Rei. 18:21-24, 36-38) Elías tabatin sufisiente prueba ku Yehova tabata proteh’é i yud’é durante henter e periodo duru ei.

5-6. Segun 1 Reinan 19:1-4, kon Elías a sintié, i kiko Yehova a hasi pa mustr’é ku e tabata stim’é?

⁵ Lesa 1 Reinan 19:1-4. Ora Reina Yézabèl a menasá di mata Elías, el a haña miedu i a hui bai Beerseba. El a bira asina desanimá ku “el a pidi pa e muri.” Dikon el a sintié asina? Pasobra e tabata un hende imperfekto ku “e mesun sintimentunan ku nos.” (Sant. 5:17) Kisas strès i  kansansio a lag’é sinti ku e no tabata por mas. Ta parse ku el a pensa ku tur su esfuerso pa promové adorashon berdadero tabata pòrnada, ku Israel no a mehorá i ku e tabata e úniko ku ainda tabata sirbi Yehova. (1 Rei. 18:3, 4, 13; 19:10, 14) Kisas nos ta haña straño ku e profeta fiel ei a sintié asina. Pero, Yehova sí a komprond’é.

⁶ Yehova no a skual Elías ora el a konta kon e tabata sintié; mas bien Yehova a yud’é rekobrá forsa. (1 Rei. 19:5-7) Mas despues, na un manera bondadoso Yehova a korigí Elías demostrando e Su poder ekstraordinario. Ademas, Yehova a bis’é ku ainda tabatin 7.000 israelita ku a nenga di adorá Baal. (1 Rei. 19:11-18) Sí, Yehova a mustra Elías, na un manera práktiko, kuantu e tabata stim’é.

7. Ki siguransa nos ta haña for di e manera ku Yehova a yuda Elías?

⁷ Bo ta den un situashon ku ta duna bo strès? Si esei ta e kaso, ta un konsuelo pa sa ku Yehova a komprondé e sintimentunan di Elías. Esei ta sigurá nos ku e ta komprondé nos sintimentunan ora nos tin problema i ta sinti nos kibrá. E sa nos limitashonnan, i asta sa kiko nos ta pensa i sinti. (Sal. 103:14; 139:3, 4) Si nos akudí na Yehova, meskos ku Elías a hasi, nos por tin sigur ku lo e yuda nos ku kualke problema ku ta duna nos strès.—Sal. 55:22.

8. Kon Yehova lo yuda bo ora bo tin strès?

⁸ Strès por laga bo pensa ku bo situashon lo no kambia nunka. E sintimentu negativo ei por desanimá bo. Si esei pasa, kòrda ku Yehova lo yuda bo. Kon? E ta pidi bo pa kont’é tur bo problemanan i kon bo ta sinti bo. I e ta sigurá bo ku lo e kontestá bo gritu pa yudansa. (Sal. 5:3; 1 Ped. 5:7) P’esei, ora bo tin problema ku ta kita bo pas, resa na Yehova. Lo e no papia ku bo manera el a papia ku Elías. Pero lo e papia ku bo pa medio di Beibel i e organisashon. E relatonan ku bo ta lesa den Beibel lo duna bo konsuelo i speransa. I bo rumannan den kongregashon lo animá bo.—Rom. 15:4; Heb. 10:24, 25.

9. Kon un amigu di konfiansa por yuda nos?

⁹ Yehova a bisa Elías pa duna Eliseo un parti di su trabou. Di e manera ei, Yehova a duna Elías un bon amigu ku lo a yud’é ora e tabata sintié hopi desanimá. Asina tambe, si bo tin un amigu di konfiansa i ta kont’é kon bo ta sinti bo, e por yuda bo ku bo emoshonnan. (2 Rei. 2:2; Pro. 17:17) Kiko awor si bo ta sinti ku bo no tin niun hende di konfiansa? Resa na Yehova i pidié yuda bo haña un ruman spiritualmente maduro ku por animá bo.

10. (a) Ki speransa e eksperensia di Elías ta duna nos? (b) Kon e promesa na Isaías 40:28 i 29 por yuda nos?

¹⁰ Yehova a yuda Elías trata ku e strès ku e tabatin i a yud’é sigui sirbié fielmente pa hopi aña. E eksperensia di Elías ta duna nos speransa. Kisas nos ta pasando den un periodo di hopi tenshon i nos ta sinti nos físikamente i emoshonalmente agotá. Pero, si nos konfia den Yehova, lo e duna nos e forsa ku nos tin mester pa sigui sirbié.—Lesa Isaías 40:28, 29.

11-13. Kiko a pasa ku tres sirbidó di Dios di pasado?

¹¹ Tabatin otro sirbidó di Yehova den tempu bíbliko ku tambe a sufri hopi. Por  ehèmpel, Ana mester a trata ku e bèrgwensa di no tin yu. I pa hasi e situashon pió, e mester a soportá tèrmentu di e otro esposa di su kasá. (1 Sam. 1:2, 6) E situashon a duna Ana asina tantu strès ku el a bira masha tristu; e tabata yora i a pèrdè apetit.—1 Sam. 1:7, 10.

¹² Rei David tambe a pasa den periodo duru. Laga nos wak algun di nan. E sintimentu di kulpa pa motibu di tur e erornan ku el a hasi tabata pisa su kurason. (Sal. 40:12) E mester a enfrentá e rebelion di su yu stimá Absalon, ku despues a muri a konsekuensia di esei. (2 Sam. 15:13, 14; 18:33) Ademas, un di su mihó amigunan a traishon’é. (2 Sam. 16:23–17:2; Sal. 55:12-14) Hopi di e salmonan ku el a skirbi ta ekspresá tantu su desanimashon komo su konfiansa firme den Yehova.—Sal. 38:5-10; 94:17-19.

¹³ Poko tempu despues, un salmista ku tabata sirbi na “e santuario di Dios,” probablemente un desendiente di e levita Asaf, a bira masha desanimá. El a kuminsá envidiá e manera ku hende malbado tabata biba. El a sintié infelis i no tabata satisfecho ku su situashon. El a asta kuminsá haña ku sirbi Dios no tabata bale la pena.—Sal. 73:2-5, 7, 12-14, 16, 17, 21.

14-15. Kiko nos ta siña for di e tres ehèmpelnan bíbliko ei?

¹⁴ E tres sirbidónan ei di Yehova a akudí na dje pa yudansa. Nan a hasi orashon ferviente i a deshogá nan mes na dje. Nan a papia abiertamente kuné i a bis’é kiko tabata angustiá nan. I nan no a stòp di bai Yehova su lugá di adorashon.—1 Sam. 1:9, 10; Sal. 55:22; 73:17; 122:1.

 ¹⁵ Ku kompashon Yehova a kontestá kada un di nan. Ana a haña pas mental. (1 Sam. 1:18) David a skirbi: “Hopi ta e aflikshonnan di e hustu, ma SEÑOR ta libr’é for di nan tur.” (Sal. 34:19) E salmista a sinti ku Yehova “a kohe [su] man drechi tene” i a gui’é ku konseho amoroso. El a kanta: “Pa loke t’ami, ta bon pa mi keda serka di Dios; mi a hasi Señor DIOS mi refugio.” (Sal. 73:23, 24, 28) Kiko nos ta siña for di e ehèmpelnan ei? Tin biaha, nos lo sinti nos kargá debí na hopi problema. Pero, nos por mira lus na horizonte si nos meditá kon Yehova a yuda su otro sirbidónan, akudí na dje den orashon i obedes’é den tur kos.—Sal. 143:1, 4-8.

16-17. (a) Dikon nos no mester isolá nos mes? (b) Kon nos por rekobrá forsa?

¹⁶ E tres ehèmpelnan ei ta siña nos un otro lès importante: No isolá nos mes di Yehova i su pueblo. (Pro. 18:1) Nancy a sufri hopi ora su kasá a bai lag’é. El a bisa: “Tin dia mi no tabata ke mira ni papia ku niun hende. Pero, mas mi tabata isolá mi mes, mas tristu mi tabata sinti mi.” Kos a kambia ora Nancy a disidí di buska manera pa yuda otro hende. El a  konta: “Mi tabata skucha ora nan tabata splika mi nan doló. Mi a ripará ku ora mi tabata pone mi mes den nan sapatu, mi no tabata sinti asina tantu duele di mi mes mas.”

¹⁷ Nos reunionnan por yuda nos rekobrá forsa. Ora nos ta asistí na nan, nos ta duna Yehova un oportunidat mas pa ‘yuda i konsolá’ nos. (Sal. 86:17) Na e reunionnan, Yehova ta fortalesé nos pa medio di su spiritu santu, su Palabra i su pueblo. Ademas, na e reunionnan nos por duna i risibí animashon. (Rom. 1:11, 12) Un ruman ku yama Sophia a bisa: “Ta Yehova i e rumannan a yuda mi sigui padilanti. E reunionnan tabata e kos di mas importante pa mi. Mi a ripará ku mas mi ta den sirbishi i mas mi hasi den e kongregashon, mas fásil ta bira pa mi trata ku strès i preokupashon.”

18. Kiko Yehova por duna nos ora nos ta sinti nos desanimá?

¹⁸ Ora nos ta sinti nos desanimá, laga nos kòrda ku Yehova no solamente ta primintí di eliminá strès pa semper den futuro, sino ku for di aworakí e ta duna nos yudansa. E ta duna nos “tantu e deseo komo e poder” pa vense desanimashon i desesperashon.—Flp. 2:13.

19. Ki siguransa Romanonan 8:37-39 ta duna nos?

¹⁹ Lesa Romanonan 8:37-39. Apòstel Pablo ta sigurá nos ku nada no por separá nos for di e amor di Dios. Kon nos por yuda nos rumannan ku ta lucha ku strès? E siguiente artíkulo lo mustra kon nos, meskos ku Yehova, por mustra kompashon na nan i duna nan yudansa.