E ISRAELITANAN tabata preparando pa krusa Riu Hordan. No tabata falta hopi pa nan yega e tera ku Dios a primintí nan. Riba un dia, nan a haña bishita. Algun hende muhé estranhero a invitá e hòmbernan di Israel na un fiesta grandi. Sera amistat nobo, bailamentu i komementu—a parse ku e fiesta ei tabata un oportunidat ku nan no por a laga pasa. Pero, e muhénan ei tabatin diferente kustumber i norma moral kompará ku esnan ku e israelitanan a siña for di Yehova su Lei. Asina mes, algun di e hòmbernan di Israel por a pensa: ‘Ai, e diferensianan ei no ta bai afektá mi. Mi ta wak bon ki mi ta hasi.’

 Kiko a pasa? Beibel ta bisa: “E pueblo a kuminsá kometé fornikashon ku e yu muhénan di Moab.” Bon mirá, e muhénan ei tabata ke pa e israelitanan adorá nan diosnan falsu, i ta nèt esei e israelitanan a hasi! P’esei, ku rason Yehova “tabata rabiá ku Israel.”—Num. 25:1-3.

E israelitanan ei a kibra Yehova su Lei na dos manera: Nan a adorá imágen i nan a kometé inmoralidat seksual. Pa nan desobedensia, míles di nan a muri. (Éks. 20:4, 5, 14; Deu. 13:6-9) Loke a hasi e situashon mas tristu ainda ta ku esnan ku a muri ei tabata kasi pa drenta Tera Primintí. Si nan a obedesé Yehova, nan tur lo a krusa Riu Hordan i drenta Tera Primintí.—Num. 25:5, 9.

Pablo a menshoná e situashon ei ora el a skirbi: “E kosnan akí a sosodé ku nan komo ehèmpel, i nan a ser skirbí komo spièrtamentu pa nos ku ta biba na final di e tempu akí.” (1 Kor. 10:7-11) Nos por tin sigur ku Satanas a alegrá pa mira algun israelita kometé piká grave i keda sin drenta Tera Primintí. P’esei, ta hopi importante pa nos tuma e spièrtamentu ei na serio. Satanas lo keda masha kontentu si bo pèrdè bo oportunidat pa biba den e mundu nobo!

Satanas ke mira tur kristian kai den su trampanan. P’esei, e ta usa táktika ku e konosé bon i ku ya a funshoná ku hopi hende kaba. Manera nos a mira ku e israelitanan, el a usa inmoralidat seksual. Awe, inmoralidat ta keda un trampa peligroso. Un manera efektivo ku e por gara nos ta pa medio di pornografia.

Awe, un hende por wak pornografia sin ku niun otro hende sa. Hopi aña pasá, un hende ku tabata kier a wak pornografia mester a bai na un sine òf kaminda tabata bende buki òf revista pornográfiko. Hopi hende tabatin bèrgwensa pa otronan mira nan drenta e lugánan ei. Pero awe, pa medio di Internet, un hende por wak pornografia sintá na su trabou i asta den su outo. Ademas, den hopi pais, hòmber i muhé por yega na material pornográfiko sin tin ku sali for di nan kas.

Pero esei no ta tur. Tablet i smartphone ta fasilitá akseso na material pornográfiko. Un hende por kana riba kaya, kore den bùs òf trein i por mira imágen inmoral for di un pantaya den su plant’i man.

Awor ku ta asina fásil pa wak pornografia sin ku niun hende sa, pornografia ta kousa mas daño ku nunka. Hopi di esnan ku ta wak pornografia ta daña nan matrimonio, konsenshi i nan ta pèrdè rèspèt propio. I mas pió ainda, nan ta kore riesgo pa kibra nan amistat ku Yehova. Ku rason lo bo bisa ku pornografia ta kousa daño na esnan ku wak e. Den hopi kaso, e ta kousa masha doló emoshonal. Aunke e doló ei por bira ménos, kisas nunka lo e kita kompletamente.

Yehova por protehá nos for di e trampa ei di Satanas. Pero, si nos ke pa e protehá nos, nos tin ku hasi loke e israelitanan no a hasi—“obedesé” Yehova fielmente. (Éks. 19:5) Nos tin ku komprondé ku Yehova ta odia pornografia. Dikon nos ta bisa esei?

Pensa riba esaki: E leinan ku Yehova a duna Israel tabata úniko. Niun otro nashon tabatin e mesun leinan. E leinan ei tabata manera un muraya ku tabata protehá e israelitanan for di e otro nashonnan i e kosnan repugnante ku nan tabata hasi. (Deu. 4:6-8) Den e leinan un kos a bini bon kla padilanti: Yehova ta odia inmoralidat seksual.

Despues ku Yehova a menshoná e kosnan inmoral ku e nashonnan bisiña tabata praktiká, el a bisa e israelitanan: “Boso no  mester hasi manera nan . . . ta hasi na tera di Kanan, kaminda mi ta hiba boso. . . . E tera a wòrdu kontaminá, p’esei mi a bishitá su inikidat riba dje.” Pa Yehova, e Dios santu di Israel, e manera di biba di e kananeonan tabata asina repugnante ku e pais unda nan a biba a bira impuru, kontaminá.—Lev. 18:3, 25.

Yehova a kastigá e kananeonan, pero otro pueblo a sigui praktiká inmoralidat seksual. Mas ku 1.500 aña despues, Pablo a bisa ku e nashonnan unda e kristiannan tabata biba “a pèrdè tur sentido moral.” De echo, e nashonnan ei “a entregá nan mes na kondukta sinbèrgwensa pa praktiká ku golosidat tur sorto di impuresa.” (Efe. 4:17-19) Awe e situashon no ta niun tiki diferente. Hopi hende ta hiba un bida inmoral i no ta sinti niun tiki bèrgwensa. Te asina leu ku ta posibel, nos ku ta kristian berdadero mester evitá di wak e práktikanan ei.

Pornografia ta un falta di rèspèt pa Dios. El a krea hende den su imágen i semehansa. El a duna nos un sentido di desensia, esta, e kapasidat di sinti ora algu ta bon òf robes. Ku bon motibu, Dios a pone lei enkuanto relashon seksual. El a establesé ku sèks ta algu ku lo a duna plaser na un esposo i su esposa. (Gén. 1:26-28; Pro. 5:18, 19) Pero, kiko esnan ku ta produsí òf promové pornografia ta hasi? Nan ta ignorá Yehova su normanan moral kompletamente. Sí, nan ta falta Yehova rèspèt i lo e bai husga nan.—Rom. 1:24-27.

Pero kiko awor di esnan ku intenshonalmente ta lesa òf wak pornografia? Algun di nan ta haña ku pornografia no ta nada malu. Pero en realidat, nan ta apoyá esnan ku no ta respetá Yehova su normanan. Kisas esei no tabata nan intenshon ora nan a kuminsá wak pornografia. Sinembargo, Beibel ta bisa bon kla ku hende ku ta adorá e Dios berdadero mester odia pornografia ku tur nan forsa. Salmo 97:10 ta bisa: “Boso ku ta stima SEÑOR, odia maldat.”

Asta esnan ku no ke wak pornografia ta haña esei hopi difísil. Nos ta imperfekto i nos tin ku lucha kontra deseo inmoral.  I nos kurason imperfekto por purba di konvensé nos ku wakmentu di pornografia no ta dje malu ei. (Yer. 17:9) Si esei ta bo kaso, sa ku hopi hende ku a bira kristian a logra gana e bataya ei. Wak kon e Palabra di Dios por yuda bo pa no kai den e trampa ei di Satanas.

Manera ya nos a mira, hopi israelita a laga mal deseo hiba nan na piká. Meskos por pasa awe. Santiago, Hesus su ruman parti di mama, a deskribí e peliger den e siguiente manera: “Kada hende ta . . . ser atraí i sedusí pa su mes deseo. Anto ora nutri e deseo, e ta duna lus na piká.” (Sant. 1:14, 15) Unabes ku un hende laga mal deseo krese den su kurason, e chèns ta hopi grandi pa e peka. P’esei, si nos tin pensamentu inmoral, nos tin ku deshasí di nan, no keda pensa riba nan.

Si pensamentu robes pasa den bo mente, tuma akshon mesora. Hesus a bisa: “Si bo man òf bo pia ta pone bo trompeká, kap e benta afó. . . . Asina tambe, si bo wowo ta pone bo trompeká, sak’é benta afó.” (Mat. 18:8, 9) Hesus no tabata ke men ku un hende mester a mutilá su mes literalmente. El a usa e ilustrashon ei pa mustra ku un hende mesora mester kita e kosnan ku por pon’é trompeká. Kon nos por apliká e konseho ei den e asuntu di pornografia?

Si bo haña bo ku pornografia, no pensa: ‘Ai, e no ta bai afektá mi.’ Bira kit’é for di bo bista mesora. Paga e televishon, e kòmpiuter, e smartphone i e tablet di biaha. Enfoká di nobo riba algu limpi. Hasiendo esei lo yuda bo kontrolá bo pensamentunan; na lugá di laga bo deseonan robes kontrolá bo.

Imágen i pensamentu pornográfiko por keda grabá den un hende su mente pa basta tempu, i ora ménos e ta spera nan ta bini bèk na su mente. Ora esei sosodé, kisas e por haña gana di hasi algu impuru, manera masturbá. Si bo a logra di stòp di wak  pornografia, pero de bes en kuando, imágen òf esena inmoral ta bini bèk na bo mente, ta bon pa bo keda kòrda ku esei ta algu ku por pasa i ku bo tin ku ta prepará pa lucha kontra nan.

Bira mas determiná pa tur loke bo ta hasi i pensa ta di akuerdo ku e boluntat di Dios. Hasi meskos ku apòstel Pablo, e tabata determiná pa “gòlpia [su] kurpa i . . . domin’é manera un esklabo.” (1 Kor. 9:27) No laga deseo robes kue bo den su gara. “Transformá [bo] mes dor di renobá [bo] mente, pa [bo] por komprobá pa [bo] mes kiko ta e boluntat di Dios, ku ta bon, agradabel i perfekto.” (Rom. 12:2) Kòrda: Pensa i hasi kos di akuerdo ku e boluntat di Dios ta duna mas satisfakshon ku bai tras di deseo inmoral.

Purba di siña algun teksto bíbliko for di kabes. Djei, ora un pensamentu robes bini na bo mente, fòrsa bo mes pa pensa riba e tekstonan ei. Por ehèmpel: Salmo 119:37; Isaías 52:11; Mateo 5:28; Efesionan 5:3; Kolosensenan 3:5 i 1 Tesalonisensenan 4:4-8. E tekstonan ei por yuda bo haña Yehova su punto di bista tokante pornografia i komprondé ki aktitut e ta ferwagt di bo.

Kiko si bo ta sinti un gana inkontrolabel di wak pornografia òf pensa riba kosnan inmoral? Kiko bo tin ku hasi? Sigui Hesus su ehèmpel mas mihó ku bo por. (1 Ped. 2:21) Despues ku Hesus a batisá, Satanas a keda purba di hink’é den tentashon. Kiko Hesus a hasi? El a keda resistí. El a usa teksto bíbliko un tras di otro; el a nenga di kai den e tentashonnan ku Satanas a bini kuné. Hesus a bis’é: “Bai for di aki, Satanas!” anto Satanas a bai lag’é. Hesus nunka a stòp di lucha, i bo tambe no mester stòp. (Mat. 4:1-11) Satanas i su mundu lo sigui purba di yena bo mente ku pensamentu inmoral, pero no stòp di lucha. Bo por gana e lucha kontra pornografia. Ku yudansa di Yehova, bo por derotá bo enemigu.

Sigui resa na Yehova i pidié yuda bo. Pablo a bisa: “Laga Dios sa kiko ta [bo] petishonnan; i e pas di Dios ku ta surpasá tur komprondementu lo protehá [bo] kurason i [bo] mente pa medio di Kristu Hesus.” (Flp. 4:6, 7) Dios lo duna bo pas pa bo sigui firme den bo lucha kontra piká. Si bo hala serka Yehova, “lo e hala serka [bo].”—Sant. 4:8.

E mihó protekshon ku bo por tin kontra di kualke trampa di Satanas ta di mantené un bon relashon ku e Soberano di universo. Hesus a bisa: “E gobernante di mundu [Satanas] ta bini. E no tin poder riba mi.” (Huan 14:30) Dikon Hesus tabatin asina tantu konfiansa? El a yega di bisa un biaha: “Esun ku a manda mi ta ku mi; e no a laga mi pa mi kuenta, pasobra semper mi ta hasi loke ta agrad’é.” (Huan 8:29) Si bo hasi esfuerso pa hasi loke ta agradá Yehova, nunka lo e laga bo pa bo kuenta. P’esei, evitá e trampa di pornografia i Satanas lo no por vense bo.