1. Kon nos por imitá e amor ku Yehova tin pa nos?

YEHOVA stima nos mashá. (Huan 3:16) I nos ke imitá nos Tata amoroso. P’esei, nos ta hasi esfuerso pa nos “mustra sintimentu pa otro, kariño pa e rumannan [i] tierno kompashon” na tur hende, pero spesialmente na “nos rumannan den fe.” (1 Ped. 3:8; Gal. 6:10) Ora miembro di nos famia spiritual ta pasa den situashon difísil, nos ke yuda nan.

2. Kiko nos lo trata den e artíkulo akí?

² Tur hende ku ke forma parti di Yehova su famia lo haña nan ku situashon difísil. (Mar. 10:29, 30) I nos por tin sigur ku segun ku e fin ta mas serka nos lo haña nos ku mas difikultat. Kon nos por yuda otro? Laga nos wak kiko nos por siña for di e relatonan bíbliko di Lòt, Yòb i Noemí. Despues, nos lo papia di algun difikultat ku nos rumannan ta pasa aden i kon nos por yuda nan.

3. Segun 2 Pedro 2:7 i 8, ki mal desishon Lòt a tuma, i kiko tabata e resultado?

³ Lòt a disidí pa biba na Sódoma. Pero esei tabata un mal desishon. Aunke e region di Sódoma tabata masha bunita, e hendenan tabata masha inmoral. (Lesa 2 Pedro 2:7, 8.) Lòt a hañ’é ta paga un preis karu pa bai biba einan. (Gén. 13:8-13; 14:12) Ta parse ku su esposa su kurason a pega masha tantu na e stat òf na algun hende einan.  P’esei, ora Dios a disidí di destruí e region ku kandela i suafel, e esposa di Lòt a desobedesé Yehova. Anto pensa riba e dos yunan di Lòt. Nan tabata namorá dos hòmber ku tambe a muri den e stat ei. Lòt a pèrdè su kas, su kosnan balioso i mas tristu ainda, su kasá. (Gén. 19:12-14, 17, 26) Akaso Yehova a pèrdè pasenshi ku Lòt durante e tempu difísil ei? Nò.

4. Kon Yehova a tene pasenshi ku Lòt? (Wak e plachi riba portada.)

⁴ Lòt ta esun ku a skohe pa biba na Sódoma. Tòg, Yehova a tene kompashon kuné i a manda dos angel pa salba e i su famia. E angelnan a bisa Lòt pa sali mesora for di Sódoma, pero el a “tarda.” Nan a gar’é na su man i a yuda e i su famia hui for di e stat. (Gén. 19:15, 16) E angelnan a bis’é hui bai na e serunan. Pero, na lugá di obedesé Yehova, Lòt a pidi pa bai un otro stat den serkania. (Gén. 19:17-20) Yehova a tene pasenshi i a laga Lòt bai e stat ei. Poko tempu despues, Lòt a haña miedu di keda biba einan i el a bai biba den e serunan, kaminda Yehova a mand’é bai for di promé instante. (Gén. 19:30) Yehova sí tabatin pasenshi! Kon nos por imitá Yehova?

5-6. Kon nos por apliká 1 Tesalonisensenan 5:14 segun ku nos ta imitá Dios?

⁵ Meskos ku Lòt, un ruman den kongregashon por tuma mal desishon i hinka su mes den masha hopi problema. Si esei pasa, kiko nos lo hasi? Kisas nos tin gana di bis’é ku e ta kosechá loke el a sembra, kual ta bèrdat. (Gal. 6:7) Pero, nos por hasi algu mas mihó. Nos por yuda e ruman ei manera Yehova a yuda Lòt. Kon?

⁶ Yehova no a manda e angelnan pa djis spièrta Lòt, sino pa yud’é skapa e destrukshon di Sódoma tambe. Di mes manera, nos por hasi meskos si nos mira un di nos rumannan ta hasi algu ku lo hink’é den problema. Aunke nos spièrt’é, kisas nos tin ku dun’é yudansa práktiko tambe. Asta si e tarda pa apliká e konsehonan bíbliko ku a dun’é, nos mester tene pasenshi. Meskos ku e dos angelnan. En bes di legumai e ruman i alehá for di dje, dun’é yudansa práktiko. (1 Huan 3:18) Kisas nos lo tin ku gar’é na su man, na moda di papia, i yud’é apliká e bon konseho ku el a haña.—Lesa 1 Tesalonisensenan 5:14.

7. Kon nos por imitá e ehèmpel di Yehova?

⁷ Yehova por a keda enfoká riba Lòt su imperfekshonnan. En bes di esei, el a inspirá apòstel Pedro pa skirbi ku Lòt tabata un hòmber hustu. Nos ta masha kontentu ku Yehova ta pordoná nos erornan! (Sal. 130:3) I nos por imitá su ehèmpel. Kon? Si nos enfoká riba e bon kualidatnan ku nos rumannan tin, e ora ei nos por tene mas pasenshi ku nan. I nan, na nan turno, lo tin mas gana di aseptá nos yudansa.

8. Kiko kompashon lo motivá nos pa hasi?

⁸ Yòb tambe a sufri hopi, pero no debí na mal desishon manera tabata e kaso ku Lòt. Yòb a pèrdè tur su kosnan balioso, su státus i su salú. Pió ainda, tur su yunan a muri den un solo tiru. Meimei di tur e tragedianan ei, tres amigu falsu a bin bishit’é. Pero na lugá di konsol’é, nan no a mustr’é niun tiki kompashon. Dikon nan a komportá nan mes asina? Pasobra nan no a purba di komprondé e situashon ku Yòb tabata aden. P’esei,  nan a kore saka konklushon robes i a husga Yòb di un manera kruel. Kon nos por evitá di kometé un eror asina? Nos mester realisá ku ta Yehova so sa tur kos di un situashon ku un hende ta pasa aden. P’esei, skucha ku atenshon ora e hende ta konta bo su problema. No djis skucha ku bo orea; purba di sinti su doló den bo kurason. Asina ei so lo bo mustra berdadero empatia pa bo ruman.

9. Kiko nos lo evitá di hasi, i dikon?

⁹ Si nos tin kompashon, nos lo evitá di kana konta otro hende problema di nos rumannan. Un ruman ku ta hasi redu no ta edifiká un kongregashon; mas bien e ta bash’é abou. (Pro. 20:19; Rom. 14:19) E ruman ei ku ta papia sin pensa, no ta bondadoso i por hasi un hende ku ta sufri mas doló ainda. (Pro. 12:18; Efe. 4:31, 32) P’esei, e mihó kos ku kada un di nos por hasi ta di enfoká riba e bon kualidatnan di un persona i pensa kon nos por yud’é ku su pruebanan!

10. Kiko nos por siña for di loke Yòb 6:2 i 3 ta bisa?

¹⁰ Lesa Yòb 6:2, 3. No ta tur biaha Yòb a “kontrolá” su palabranan. Pero mas despues el a arepentí. (Yòb 42:6) Meskos por pasa ku un persona ku tin un problema ku ta dun’é hopi strès. E por bisa kos ku mas despues ta duel e. Kon nos tin ku reakshoná? En bes di kritik’é, nos mester mustr’é kompashon. Kòrda ku nunka tabata Yehova su intenshon pa hende tin e problema- i strèsnan ku nos tin awe. Pues ta komprendibel ora un sirbidó fiel di Yehova ku ta bou di strès bisa kos ku en realidat e no ke men. Asta si e bisa kos robes tokante Yehova òf nos, nos no  mester ta lihé pa rabia ni husg’é pa e kosnan ku el a bisa.—Pro. 19:11.

11. Kon e ansianonan por imitá Eliú ora di duna konseho?

¹¹ Tin biaha, un persona ku ta bou di strès lo tin mester di konseho bíbliko. (Gal. 6:1) Si bo ta un ansiano, kon ta e manera pa hasi esei? Purba di imitá Eliú. Ku empatia, el a skucha tur loke Yòb tabatin di bisa. (Yòb 33:6, 7) Ta te despues ku Eliú a komprondé loke Yòb tabata pensa, el a dun’é konseho. Di mes manera, skucha ku atenshon i purba di komprondé e persona su situashon. Si bo hasi esei, ta mas probabel ku bo konseho lo yega su kurason.

12. Kon e morto di Noemí su kasá i su yunan a afekt’é?

¹² Noemí tabata un sirbidó leal ku tabata stima Yehova. Pero, ora su kasá i su dos yu hòmbernan a muri, e tabata kier a kambia su nòmber pa “Mara,” ku ta nifiká “Marga” òf “Amargura.” (Rut 1:3, 5, 20, 21) Noemí su nuera, Rut, a keda na su banda durante tur su pruebanan. Rut no a djis duna Noemí yudansa práktiko; el a papia tambe palabra di konsuelo kuné. Rut a ekspresá su amor i sosten pa Noemí ku palabra simpel pero di kurason.—Rut 1:16, 17.

13. Dikon esnan ku nan kasá a muri mester di nos sosten?

¹³ Ora un miembro di nos famia spiritual su kasá muri, e mester di nos sosten. Un pareha kasá ta manera dos palu ku a krese banda di otro. Segun aña ta pasa, e raisnan ta mara den otro. Si ranka un di e palunan i e palu ei muri, e otro tambe ta ser afektá. Asina tambe ta pasa ora un hende su kasá muri; e por keda ku doló pa hopi tempu. Paula, * kende su kasá a muri repentinamente, a bisa: “Tur mi mundu a basha den otro; mi no tabata sa ki pa hasi. Mi a pèrdè mi mihó amigu. Mi tabata papia tur kos kuné. E tabata band’i mi den bon i den malu, i tabata kla pa skucha mi i seka mi lágrimanan. Ora el a muri, un parti di mi a muri kuné.”

14-15. Kon nos por konsolá un hende kende su kasá a muri?

¹⁴ Kon nos por konsolá un hende kende su kasá a muri? E promé kos importante ta di papia kuné, asta si bo ta sinti bo inkómodo òf no sa kiko pa bisa. Paula, menshoná anteriormente, a bisa: “Mi sa ku morto ta un tema ku ta laga hende sinti nan masha inkómodo. Nan tin miedu di bisa algu ku lo por ta ofensivo. Pero e kos mas pió ku bisa algu robes ta di keda sin bisa nada.” Esun ku a pèrdè su ser kerí no ta ferwagt ku nos lo bisa algu ku lo fria su doló. Paula a bisa: “Mi ta apresiá masha ora un amigu simplemente bisa mi: ‘Ta duel mi hopi di bo pèrdida.’”

¹⁵ William, kende a pèrdè su kasá den morto algun aña pasá, a bisa: “Mi ta gusta ora otro hende konta ki ta e kosnan ku nan ta kòrda di mi kasá; esei ta sigurá mi ku e tabata un persona stimá i respetá. E tipo di apoyo ei ta un gran yudansa pa mi. Nan palabranan ta konsolá mi, pasobra mi kasá tabata hopi presioso pa mi i un parti importante di mi bida.” Un biuda ku yama Bianca a splika: “Loke ta konsolá mi ta ora otronan resa ku mi i ta lesa un òf dos teksto di Beibel ku mi. Mi ta sinti mi mihó ora nan papia di mi kasá i ora nan skucha mi papia tokante dje.”

16. (a) Kiko nos tin ku keda hasi pa esnan ku a pèrdè un ser kerí? (b) Segun Santiago 1:27, ki responsabilidat nos tin?

 ¹⁶ Meskos ku Rut a keda ku Noemí, nos tambe tin ku sigui duna sosten na esnan ku a pèrdè un ser kerí. Paula, menshoná anteriormente, a bisa: “Asina ku mi kasá a muri mi a haña hopi apoyo. Segun ku tempu ta pasa, tur hende su bida ta bai na normalidat. Pero, esun di mi a kambia kompletamente. Ta bon ora otronan realisá ku un hende ku pèrdè un ser kerí mester di apoyo pa vários luna—tin biaha asta vários aña—despues di morto.” Klaru, tur hende ta diferente. Algun ta adaptá na e bida nobo basta lihé. Pero pa otro, kada kos ku ántes nan tabata hasi ku e ser kerí ta un rekuerdo doloroso di nan pèrdida. E manera ku hende ta rou ta varia di persona pa persona. P’esei, nos tin ku kòrda ku Yehova ta duna nos e privilegio i responsabilidat pa kuida esnan ku a pèrdè nan ser kerí.—Lesa Santiago 1:27.

17. Dikon esnan ku nan kasá a bai laga nan tambe mester di nos sosten?

¹⁷ Algun hende tin ku trata ku e angustia i strès ku ta bini ora nan kasá a bai laga nan. Wak e kaso di Joyce. Su esposo a bai lag’é pa un otro hende muhé. Joyce a bisa: “E doló di divorsio ta kasi mas pió ku e doló di bira biuda. Si mi kasá a muri den un aksidente òf debí na malesa, esei lo no tabata den su man. Pero, esei no tabata e kaso, el a skohe pa bai laga mi. Mi a sinti mi humiá.”

18. Kon nos por yuda esnan ku no tin un kasá mas?

 ¹⁸ Pa medio di algun gesto chikitu di bondat, nos por mustra esnan ku no tin un kasá mas, ku nos ta stima nan. Mas ku nunka, nan mester di bon amigu. (Pro. 17:17) Kon bo por mustra ku bo ta un bon amigu? Bo por invitá nan pa bin kome serka bo. Ademas, bo por palabrá pa pasa un ratu huntu ku nan òf pa traha huntu den sirbishi. Algu otro ku bo por hasi ta pa, de bes en kuando, invitá nan pa djòin bo den bo adorashon di famia. Si bo hasi esei, Yehova lo keda kontentu, pasobra e ta “serka di e hende di kurason kibrá” i e ta “un defensor di muhénan ku a pèrdè nan esposo.”—Sal. 34:18; 68:5, BPK.

19. Teniendo 1 Pedro 3:8 na mente, kiko bo ta determiná pa hasi?

¹⁹ Un djis aki, ora e Reino di Dios ta goberná tera, tur “e problemanan di ántes [lo] wòrdu lubidá.” Nos ta ansioso pa e dia ei yega ora “e kosnan di ántes lo no wòrdu rekordá mas ni bini na memoria.” (Isa. 65:16, 17) Te ora e dia ei yega, nos mester keda sostené otro. P’esei, laga nos mustra pa medio di loke nos ta hasi i bisa ku nos ta stima tur esnan ku ta parti di nos famia spiritual.—Lesa 1 Pedro 3:8.