1. Kiko por pone ku un hende ta konsehá nos, i dikon ta importante pa tuma konseho?

DE BES en kuando nos tur mester di konseho. Tin biaha, nos ta pidi un hende ku nos ta respetá pa konseho. Otro biaha, kisas un ruman ta preokupá pa nos i ta duna nos un konseho promé ku nos “dal un paso robes” i lamentá despues. (Gal. 6:1) Nos por haña konseho tambe ora nos haña korekshon despues ku nos a kometé un eror grave. Sea kual sea e manera ku nos ta risibí konseho, nos mester asept’é pasobra esei por nifiká nos bida.—Pro. 6:23.

2. Segun Proverbionan 12:15, dikon nos mester tuma konseho?

² Nos teksto sentral ta animá nos pa “tende e palabranan di hende sabí.” (Pro. 22:17) Niun hende na mundu no sa tur kos; semper lo tin un hende ku tin mas konosementu òf eksperensia ku nos. (Lesa Proverbionan 12:15.) Pues, ora nos tuma konseho, nos ta mustra ku nos ta humilde, ta rekonosé nos limitashonnan i ta realisá ku nos mester di yudansa pa logra nos metanan. Yehova a inspirá Rei Sálomon pa skirbi: “Ku hopi konsehero [plannan] ta wòrdu lográ.”—Pro. 15:22.

3. Den ki maneranan nos por risibí konseho?

³ Nos por haña konseho di manera dirèkt òf indirèkt. Un konseho dirèkt ta mané ora un ansiano òf un otro ruman madurá hala nos atenshon riba algu ku nos tin ku mehorá. Si un hende ta stima nos asina hopi pa duna nos un konseho for di Beibel, lo mínimo ku nos por hasi ta di skucha e konseho i tum’é na serio. Pero, nos por haña  konseho di manera indirèkt tambe. Esei ta ora ku den Beibel òf den nos publikashonnan nos ta lesa algu ku ta pone nos para i pensa kiko nos tin ku mehorá.—Heb. 4:12.

4. Segun Eklesiástes 7:9, kiko nos no mester hasi ora nos ta haña konseho?

⁴ Si nos ta sinsero, ta hopi difísil pa aseptá konseho dirèkt. Dikon? Wèl, aunke nos sa bon-bon ku nos ta imperfekto, ora un ruman hala nos atenshon riba algu ku nos mester drecha, kisas esei no ta kai den bon tera serka nos. (Lesa Eklesiástes 7:9.) Nos por kuminsá bini ku yen di èksküs pa hustifiká nos mes. Nos por rabia ku e ruman ku a duna nos konseho i pensa ku ta pa malu el a hasié òf ta pasó e no gusta nos. Nos por te asta kuminsá kritiká e ruman mes, pensando: ‘Ki mishi é ta bin duna mi konseho? Semper e tin ko’i bisa mi. E mes tin yen di kos di drecha.’ Anto si nos ta haña ku e konseho no ta pa nos, nos por ignor’é òf bai papia ku otro hende sperando ku nan ta bisa òf konsehá nos loke nos ke tende.

5. Kiko nos lo bai wak den e artíkulo akí?

⁵ Den e artíkulo akí, nos lo bai wak algun hende den Beibel ku a nenga konseho i algun ku a aseptá konseho. Nos lo bai wak tambe kiko lo yuda nos tuma konseho i saka benefisio for di nan.

6. Kiko nos ta siña for di loke Rei Rehoboam a hasi?

⁶ Ban kuminsá ku Rehoboam. Ora el a bira rei di Israel, e pueblo a pidié suavisá e karga ku su tata, Sálomon, a pone riba nan. Na promé instante, Rehoboam a hasi algu bon. El a pidi e ansianonan di Israel konseho. Nan a bis’é ku si e hasi loke e pueblo a pidi, e pueblo lo sirbié pa semper. (1 Rei. 12:3-7) Pero, ta parse ku Rehoboam no a gusta e konseho ku el a haña, pues el a bai buska konseho serka e hòmbernan ku a lanta huntu kuné. E hòmbernan ei probablemente tabatin 40 i piku aña, pues nan tabatin un tiki eksperensia den bida. (2 Kró. 12:13) Pero, nan a dun’é un mal konseho. Nan a bis’é pa hasi karga di e pueblo mas pisá. (1 Rei. 12:8-11) Kiko Rehoboam lo hasi ku e dos konsehonan ei? Na lugá di hasi orashon na Yehova i puntr’é kua di e konsehonan e mester sigui, e mes a skohe esun ku el a gusta; esun di e hòmbernan mas yòn. Konsekuensia di e desishon ei a pone ku tantu Rehoboam komo e pueblo a sufri. Nos tambe por haña un konseho ku no ta loke nos ke tende. Pero, si e ta basá riba Beibel, nos mester asept’é.

7. Kiko nos ta siña for di loke a pasa ku Rei Uzías?

⁷Rei Uzías tampoko no a aseptá konseho. El a drenta un parti di e tèmpel unda solamente e saserdotenan tabatin mag di drenta i a purba di kima sensia. E saserdotenan a bis’é: “No ta toka bo, Uzias, pa kima sensia na SEÑOR, ma na e saserdotenan.” Kiko el a hasi? El a bira “masha rabiá.” Pero dikon e no a aseptá e konseho? Aparentemente el a sinti ku debí ku e tabata rei, e por a hasi loke e tabata ke. Pero, Yehova no a mira e kos ei asina. Si Uzias tabata humilde, a aseptá e konseho i a sali for di e tèmpel mesora, kisas Yehova lo a pordon’é. Pero debí ku el a hasi algu ku e no tabatin mag, el a haña lepra i a keda “un leproso te dia di su morto.” (2 Kró. 26:16-21) Kiko nos ta siña? Ku ni  maske ken nos ta, si nos nenga di aseptá konseho for di Beibel, nos ta pèrdè Yehova su aprobashon.

8. Kiko Yòb a hasi ora el a haña konseho?

⁸ Den Beibel nos ta lesa di hendenan ku sí a aseptá konseho, i Yehova a bendishoná nan pa esei. Un di nan tabata Yòb. E tabata stima Yehova i kier a agrad’é. Pero Yòb no tabata perfekto. Ora e tabata bou di hopi preshon, el a papia algun kos sin pensa. P’esei, tantu Eliú komo Yehova a dun’é konseho. Kiko Yòb a hasi? E tabata humilde i a aseptá konseho. El a bisa ku el a papia sin pensa i lo “hala [su] palabranan atras, i ta arepentí den stòf i shinishi.” Debí ku Yòb tabata humilde, Yehova a bendishon’é.—Yòb 42:3-6, 12-17.

9. Kiko Moises a hasi ora el a haña korekshon, i dikon e ta un bon ehèmpel pa nos?

⁹Moises ta un bon ehèmpel di un hende ku a aseptá korekshon despues di a kometé un eror grave. Un biaha, el a rabia asina pisá i no a onra Yehova. P’esei, el a pèrdè e privilegio di drenta e Tera Primintí. (Num. 20:1-13) Ora Moises a papia ku Yehova pa wak si lo E por kambia di idea, Yehova a bis’é: “No papia ku mi mas di e asuntu akí.” (Deu. 3:23-27) Pero Moises no a bira amargá, el a aseptá Yehova su desishon i Yehova a sigui us’é pa guia Israel. (Deu. 4:1) Tantu Yòb komo Moises ta bon ehèmpel pa nos. Yòb a kambia su manera di mira kosnan i no a bini ku èksküs. Anto Moises a demostrá ku el a aseptá Yehova su korekshon dor di keda fiel aunke el a pèrdè e privilegio tan presioso di drenta e Tera Primintí.

10. (a) Segun Proverbionan 4:10-13, dikon ta bon pa nos tuma konseho? (b) Kiko algun ruman a bisa tokante e konseho ku nan a haña?

¹⁰ Si nos imitá hendenan manera Yòb i Moises, lo bai bon ku nos. (Lesa Proverbionan 4:10-13.) Hopi di nos rumannan a hasi esei. Emanuel ku ta biba na Congo, a haña konseho serka algun ruman. El a bisa: “Rumannan spiritualmente maduro den mi kongregashon a ripará ku mi tabata a punto di daña mi amistat ku Yehova, i nan a bin yuda mi. M’a sigui nan konseho anto esei a skapa mi di hopi problema.” * Megan, un pionero na Canada, a bisa: “No ta tur biaha e konsehonan ku m’a haña ta loke mi tabatin gana di tende. Pero mi tabatin mester di nan.” Marko di Kroasia a bisa: “Un par di tempu pasá, m’a pèrdè un privilegio den kongregashon. Ora mi wak bèk, mi ta realisá ku e konseho ku m’a haña a yuda mi drecha mi amistat bèk ku Yehova.”

11. Kiko Ruman Karl Klein a bisa tokante aseptá konseho?

¹¹ Un otro hende ku a benefisiá ora el a aseptá konseho tabata Ruman Karl Klein, kende tabata miembro di Kuerpo Gobernante. Den su historia di bida, el a konta kon un biaha el a haña un konseho fuerte for di Ruman Joseph F. Rutherford, kende tabata un bon amigu di dje. Ruman Klein a atmití ku na promé instante e konseho ei no a kai den bon tera serka dje. El a bisa: “E siguiente biaha ku [Ruman Rutherford] a mira mi, el a kumindá mi tur kontentu: ‘Karl, kumbai!’ Pero komo ku ainda mi tabata sinti mi di hùrt, apénas m’a habri boka pa kumind’é. El a bisa mi: ‘Karl, tene kuidou pa bo  no kai den Diabel su trampa!’ Yen di bèrgwensa m’a kontest’é: ‘Mi no ta rabiá Ruman Rutherford.’ Pero e tabata sa ku esei no tabata e kaso. P’esei el a bolbe spièrta mi: ‘Mi ta komprondé, pero tene kuidou pa bo no kai den Diabel su trampa.’ I e tabatin tur su rason. Ora nos karga renkor kontra un ruman, foral ora e bisa nos algu ku e tin derecho di bisa . . . ta fásil pa nos kai den e trampanan di Diabel.” * (Efe. 4:25-27) Ruman Klein a aseptá e konseho di Ruman Rutherford, i nan a keda bon amigu di otro.

12. Kon humildat ta yuda nos aseptá konseho? (Salmo 141:5)

¹² Kiko por yuda nos aseptá konseho? Nos mester ta humilde i kòrda ku nos ta imperfekto i ku hopi biaha nos ta hasi kos sin pensa. Manera nos a mira kaba, Yòb tabatin un punto di bista robes. Pero, despues el a kambia su manera di pensa i Yehova a bendishon’é pa esei. Dikon? Pasobra Yòb tabata humilde i a aseptá e konseho ku Eliú a dun’é aunke ku Eliú tabata hopi mas yòn kuné. (Yòb 32:6, 7) Humildat tambe lo yuda nos tuma konseho asta ora nos ta sinti ku e konseho no ta pas pa nos òf ora esun ku duna nos konseho ta hopi mas yòn ku nos. Un ansiano na Canada a bisa: “Nos no ta mira nos mes manera otro hende ta mira nos. P’esei, kon nos por progresá si niun hende duna nos konseho?” Anto esei ta bèrdat, pasó nos tur tin ku mehorá nos kualidatnan kristian i nos manera di prediká i di siña hende.—Lesa Salmo 141:5.

13. Kon nos mester mira konseho ku nos ta haña?

¹³Mira konseho komo muestra di Yehova su amor. Yehova ke nos bon. (Pro. 4:20-22) E ta mustra nos kuantu e ta stima nos ora ku e ta duna nos konseho pa medio di su Palabra, un publikashon basá riba Beibel òf un ruman spiritualmente maduro. Anto Hebreonan 12:9 i 10 ta bisa ku e ta hasi tur e kosnan ei “pa nos mes bon.”

14. Kiko nos tin ku focus riba dje ora nos haña konseho?

¹⁴Focus riba e konseho i no e manera ku a bis’é. Tin biaha nos ta sinti ku e manera ku nos a haña konseho no ta di e mihó manera. Ta klaru ku un hende ku duna konseho mester dun’é na un manera ku ta fásil pa aseptá. * (Gal. 6:1) Pero, esun ku ta haña e konseho mester focus  riba loke a wòrdu bisá i no riba e manera ku a bis’é. Puntra bo mes: ‘Aunke mi no a gusta e manera ku e hende a duna mi e konseho, kisas e tin rason den algu? Mi por pasa por alto di e ruman su imperfekshonnan i tòg saka algu for di su konseho ku lo benefisiá mi?’ Lo ta hopi sabí di nos parti pa purba di saka e bon lèsnan for di tur konseho ku nos ta haña.—Pro. 15:31.

15. Dikon nos mester pidi konseho?

¹⁵ Beibel ta animá nos pa pidi konseho. Proverbionan 20:18 ta bisa: “Traha plan dor di buska konseho.” Pues, lo ta hopi sabí di nos parti pa pidi konseho! Esnan ku ta pidi konseho en bes di sinta warda pa otronan duna nan konseho, hopi biaha ta progresá mas den sentido spiritual. Pues, dal e promé paso pa pidi konseho.

16. Den ki situashon nos por pidi konseho?

¹⁶ Wak algun situashon kaminda nos por pidi un ruman konseho. (1) Un ruman muhé ta pidi un publikadó eksperensiá pa djòin e na un estudio i despues e ta puntr’é riba kiko e por mehorá. (2) Un ruman muhé soltero ke kumpra paña, e ta pidi un ruman muhé maduro su opinion tokante un karson ku el a gusta. (3) Un ruman hòmber ta bai duna su promé diskurso públiko. E ta pidi un diskursante eksperensiá skucha su diskurso i pa bis’é kiko e tin ku mehorá. Asta rumannan ku tin hopi aña ta duna diskurso por pidi konseho for di diskursantenan eksperensiá i apliká e konsehonan.

17. Kiko nos mester hasi pa benefisiá di konseho?

¹⁷ Sí, tardi òf trempan, nos tur lo haña konseho sea dirèkt òf indirèkt. Ora esei sosodé, kòrda loke nos a siña. Keda humilde. Konsentrá riba e konseho, no riba e manera ku a bis’é. Anto apliká e konseho ku bo a haña. Nos niun no ta nase sabí. Pero, ora nos ta “skucha konseho i aseptá disiplina,” Beibel ta primintí ku nos lo bira sabí.—Pro. 19:20.