“Abo ku ta skucha orashon, serka bo tur hende ta bini.”​—Salmo 65:2.

Tin hende ta hasi orashon pasobra nan ta bisa ku esei ta pone nan sinti mihó, aunke nan no ta kere ku tin un persona ta skucha nan. Pero orashon no ta djis algu ku nos ta hasi pa pone nos sinti bon ora nos tin problema. Beibel ta sigurá nos ku Yehova * “ta serka di tur esnan ku ta sklama na dje, serka di tur esnan ku ta sklama na dje den bèrdat . . . E lo tende nan sklamashon.”​—Salmo 145:18, 19.

P’esei, nos por tin sigur ku Yehova Dios ta tende orashon di su adoradónan. Yen di amor e ta bisa: “Boso lo sklama na mi i bin hasi orashon na mi, i lo mi skucha boso.”​—Yeremías 29:12.

“Perseverá den orashon.”​—Romanonan 12:12.

Beibel ta animá nos pa “hasi orashon kontinuamente” i pa “sigui resa tur ora bai.” Nos por mira bon kla ku Yehova Dios ke pa nos hasi orashon na dje.​—Mateo 26:41; Efesionan 6:18.

Dikon Dios ke pa nos resa na dje? Wèl, laga nos wak un ehèmpel. No ta asina ku tur tata lo keda kontentu si su yu puntr’é: Papi por yuda mi ku algu? Klaru ku un tata hopi biaha sa kaba kiko su yu tin mester òf kiko e ta sinti, pero ora e tende su yu bis’é e palabranan ei, e ta mira ku su yu ta konfi’é i tin un bon relashon kuné. Asina tambe, ora nos resa na Yehova Dios, nos ta mustr’é ku nos ta konfi’é i ke tin un bon relashon kuné.​—Proverbionan 15:8; Santiago 4:8.

“Tira tur [bo] inkietut riba dje, pasobra e ta interesá den [bo].”​—1 Pedro 5:7.

Dios ke pa nos hasi orashon na dje pasobra e ta stima nos i ta interesá den nos. E sa kiko tur ta preokupá nos i tur loke nos ta pasa aden, i e ke yuda nos.

Henter su bida, Rei David a pidi Yehova Dios pa yud’é. Ademas, el a bis’é loke e ta sinti i pensa. (Salmo 23:1-6) Kiko Dios tabata sinti pa David? Dios a stima David i a skucha su orashonnan. (Echonan 13:22) Den nos kaso tambe, Dios ta skucha nos orashonnan pasobra e ta stima nos.

Un di e eskritornan di e salmonan ku tin den Beibel a bisa e palabranan ei. E tabatin sigur ku Dios a tende su orashonnan, i esei a yud’é masha hopi mes. E tabata sinti ku e tin un bon amistat ku Dios i a haña forsa pa trata ku problema i tristesa den bida.​—Salmo 116:1-9.

Ora nos ta sigur ku Dios ta tende nos orashonnan, nos lo sigui resa na dje. Ban wak e ehèmpel di Pedro. Pedro ta biba den e parti nort di Spaña. Su yu hòmber di 19 aña a haña un aksidente di outo i a fayesé. Pedro tabata masha tristu mes. Pero el a hasi orashon na Dios i a bisa Dios presis loke e tabata sinti; bes tras bes, el a pidi Dios pa konsol’é i sosten’é. Kiko tabata e resultado? Pedro a bisa: “Yehova a kontestá mi orashonnan pasobra e rumannan kristian a konsolá i sostené ami ku mi kasá.”

Ta bèrdat ku orashon no a duna nan nan yu bèk, pero orashon a yuda nan masha hopi mes. Su kasá, María del Carmen, a bisa: “Orashon a yuda mi ku mi tristesa. Mi tabata sa ku Yehova Dios ta komprondé mi pasobra ora mi tabata resa na dje mi a sinti un pas i trankilidat.”

Pues, tantu Beibel komo e ehèmpelnan ku nos a mira ta mustra bon kla ku Dios ta tende nos orashonnan. Ta bèrdat sí ku Dios no ta kontestá tur orashon. Dikon nò? Ban wak e siguiente artíkulo.