TUR aña, mas ku seis mion hende ta biaha bai den un mondi di seder isolá na e península Shima, na Hapon. Nan ta bai e Gran Santuario di Ise, kaminda pa un dos mil aña kaba hende ta adorá Amaterasu Omikami, e diosa shinto di solo. Promé, e personanan akí ta laba nan man i boka pa purifiká nan mes. Despues, nan ta para dilanti di e sala di adorashon di e santuario i ta hasi e siguiente ritual: nan ta bùig, klap nan man i resa na e diosa. * E religion shinto ta permití su fielnan tin otro religion tambe, i tin budista, hende ku ta yama nan mes kristian i otronan ku no tin problema pa partisipá den e ritualnan shinto na e santuario akí.

Hopi religion grandi tin santuario, * i miónes di hende sa bishitá nan. Na paisnan ku ta konsiderá nan mes kristian tin masha hopi misa i santuario ku hende a dediká na Hesus, Maria i e santunan. Ademas, tin santuarionan kaminda susesonan bíbliko òf supuesto milagernan den tempu resien a tuma lugá òf kaminda nan ta warda relikianan religioso. Hopi hende ta bai na un santuario pasobra nan ta kere ku, na e lugánan akí ku pa nan ta sagrado, tin mas chèns ku nan orashonnan ta ser skuchá. Otro hende ta hasi biahenan largu di peregrinashon pa bai un lugá sagrado asina pa mustra ku nan ta personanan deboto.

Awor, ta bèrdat ku un hende tin mas chèns ku Dios ta tend’é i kontest’é si e hasi orashon na un santuario? Dios ta keda kontentu ku hende ku ta hasi biahenan di peregrinashon pa bai lugánan asina? Es mas, kristiannan mester adorá Dios na un santuario? E kontestanan pa e preguntanan akí lo mustra nos kon nos tin ku mira adorashon na santuario i kon Dios ke pa nos ador’é.

Un kòmbersashon ku Hesus tabatin ku un muhé samaritano ta laga nos komprondé kiko Dios ta pensa di adorashon na santuario òf e asina yamá lugánan sagrado. Ta asina ku Hesus tabata biahando den Samaria i na dado momento el a para na un pos serka di e stat Sikar pa e sosegá. Einan, el a kuminsá papia ku un señora ku a bin saka awa for di pos. Segun ku nan tabata papia, e señora a hala atenshon na un diferensia grandi ku tabatin entre e hudiunan i e samaritanonan. El a bisa: “Nos antepasadonan a adorá Dios riba e seru akí; pero boso ta bisa ku ta Herúsalèm ta e lugá kaminda hende mester ador’é.”—Huan 4:5-9, 20.

E seru ku e señora a referí na dje tabata Seru Gerizim, ku tabata un 50 kilometer nort di Herúsalèm. Un tempu, e samaritanonan tabatin un tèmpel riba e seru ei; den dje nan tabata  selebrá fiestanan, manera Pasku Hudiu. Pero, en bes di enfoká riba e diferensia entre hudiu i samaritano, Hesus a bisa e muhé samaritano: “Kere mi: Lo yega e ora ku ni riba e seru akí ni na Herúsalèm boso lo no adorá e Tata.” (Huan 4:21) Esei tabata un deklarashon sorprendente, spesialmente biniendo di un hudiu! Dikon hende lo a stòp di adorá Dios na e tèmpel na Herúsalèm?

Hesus a sigui bisa: “Lo yega e ora, i ta awor, ku e adoradónan berdadero lo adorá e Tata ku spiritu i ku bèrdat, pasobra, en realidat, e Tata ta buska esnan ku ke ador’é asina.” (Huan 4:23) Pa hopi siglo, e magnífiko tèmpel di Herúsalèm tabata e sentro di adorashon di e hudiunan. Tres bes pa aña nan tabata bai einan pa hasi sakrifisio na nan Dios, Yehova. (Éksodo 23:14-17) Pero Hesus a bisa ku tur esaki lo a kambia i ku “adoradónan berdadero” lo adorá Dios “ku spiritu i ku bèrdat.”

E tèmpel hudiu tabata un edifisio ku tabata situá na un lugá geográfiko spesífiko. Pero ora Hesus a papia di spiritu i bèrdat, e no tabata referí na kosnan literal. Loke Hesus tabata ke men ta ku adorashon berdadero lo no a dependé di un sierto edifisio òf lugá spesífiko, sea ku ta riba Seru Gerizim, na e tèmpel na Herúsalèm òf kualke otro lugá sagrado.

Papiando ku e muhé samaritano, Hesus a bisa tambe ku “e ora” pa e kambio den e manera di adorá Dios ‘lo a yega.’ E ora a yega ora ku Hesus, pa medio di su morto komo sakrifisio, a pone un fin na e sistema hudiu di adorá Dios ku tabata basá riba e Lei di Moises. (Romanonan 10:4) Pero, Hesus a bisa tambe: “E ora . . . ta awor.” Dikon? Pasobra komo e Mesías, ya kaba e tabata reuniendo disipelnan ku lo a obedesé e mandamentu ku el a duna siguientemente: “Dios ta un Spiritu, i esnan ku ta ador’é mester ador’é ku spiritu i ku bèrdat.” (Huan 4:24) Pero, kiko adorá Dios ku spiritu i bèrdat ta enserá?

Ora Hesus a bisa ku hende mester adorá Dios ku spiritu, e no tabata papia di un forma di adorashon yen entusiasmo na un manera eksagerá. Mas bien, e tabata ke men ku nos mester laga e spiritu santu di Dios guia nos pa esaki por, entre otro kosnan, yuda nos komprondé Beibel. (1 Korintionan 2:9-12) Anto e bèrdat ku Hesus a referí na dje ta un konosementu eksakto di siñansanan bíbliko. P’esei, e lugá no ta importante; mas bien, pa nos adorashon ta aseptabel pa Dios, e mester ta konforme loke Beibel ta siña i guiá pa spiritu santu.

Awor kon kristiannan mester mira biahenan di peregrinashon ku hende ta hasi pa bai un santuario i e adorashon ku nan ta rindi einan? Teniendo kuenta ku Hesus a bisa ku adoradónan berdadero mester adorá Dios ku spiritu i bèrdat, ta bisto ku adorashon ku hende ta rindi na kualke santuario òf lugá sagrado no tin balor pa nos Tata selestial. Ademas, Beibel ta bisa nos kiko Dios ta pensa di venerashon di imágen. E ta bisa: “Hui di idolatria” i “keda leu for di dios falsu.” (1 Korintionan 10:14; 1 Huan 5:21) Ta p’esei, un kristian berdadero lo no rindi adorashon na ningun lugá ku hende ta konsiderá santu òf ku ta promové idolatria. Pues, mirando e propósito di santuario, kristiannan berdadero no ta rindi adorashon na lugánan asina.

Sinembargo, esaki no ta nifiká sí ku e Palabra di Dios ta prohibí hende di tin un lugá preferí pa hasi orashon, studia òf meditá. Un lugá di reuní ku ta na òrdu i digno ta yuda hende siña i kompartí kosnan spiritual ku otro. No ta malu tampoko pa traha algu manera un plachi grabá pa graf na memoria di un persona ku a fayesé. Esaki kisas ta simplemente un muestra di kariño òf un manera pa kòrda e defuntu. Pero si un hende ta konsiderá un lugá asina komo un lugá santu òf ta venerá imágen òf relikia, e ora ei sí e ta bai direktamente kontra e palabranan di Hesus.

Pues, bo no tin ku bai na un santuario pensando ku einan tin mas chèns ku Dios lo skucha bo orashon. Tampoko Dios lo no keda kontentu ni lo bo haña bendishonnan spesial serka dje pasobra bo a hasi un biahe di peregrinashon pa bai un santuario. Beibel ta bisa nos ku Yehova Dios, e “Señor di shelu i tera, no ta biba den tèmpel ku man di hende a traha.” Pero esei no ke men ku Dios ta leu di nos. Nos por hasi orashon na dje unda ku nos ta i lo e skucha nos pasobra “e no ta masha leu for di kada un di nos.”—Echonan 17:24-27.