Manera Hesus a profetisá, e bon notisia di e Reino di Dios lo ser prediká rònt mundu. (Mateo 24:14) E buki bíbliko di Daniel ta bisa nos ku e Reino akí ta un gobièrnu di Dios. Kapítulo 2 di e buki akí tin un profesia ku ta papia di algun gobièrnu, òf reino, poderoso ku lo a bini na poder un tras di otro, for di tempu di Babilonia te den nos tempu. Versíkulo 44 ta profetisá loke lo pasa despues:

“E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí, ma e mes lo dura pa semper.”

Tantu e profesia akí komo otronan ta profetisá ku e Reino di Dios lo remplasá tur gobièrnu humano i lo trese stabilidat i òrdu riba tera. Kon bida lo ta bou di e Reino akí? Ban wak algun di e bunita promesanan ku pronto lo kumpli.

• LO NO TIN GUERA MAS

  Salmo 46:9: “[Dios] ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.”

  Imaginá kon mundu lo ta si tur e rekursonan i konosementu ku hende ta usa pa traha arma ser usá pa yuda hende! E promesa ei lo bira realidat bou di e Reino di Dios.

• LO NO TIN MALESA MAS

  Isaías 33:24: “Ningun habitante lo no bisa: ‘Mi ta malu.’”

  Pensa un ratu riba un mundu kaminda ningun hende lo sufri mas di problema di kurason, kanser, diabétis ni ningun otro malesa. Lo no tin mester di hospital ni remedi mas. Tur hende lo tin salú perfekto.

• LO NO TIN HAMBER MAS

  Salmo 72:16: “Lo tin abundansia di maishi den e tera, [i] riba kabes di e serunan.”

  E tera lo produsí sufisiente kuminda i tur hende lo tin akseso na dje. Lo no tin hamber ni malnutrishon mas.

• LO NO TIN DOLÓ, NI TRISTESA NI MORTO MAS

  Revelashon 21:4: “[Dios lo] seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”

  Hende lo ta perfekto i lo biba pa semper den un paradeis riba tera. Esei ta loke nos amoroso Kreador, Yehova Dios, a primintí.

Akaso tur esaki ta parse muchu bon pa ta bèrdat? Aunke mayoria di hende mesora lo bai di akuerdo ku e bida eterno ku Beibel ta primintí ta algu masha bunita, tòg nan no ta kere ku hende por biba pa semper, pasobra nan no konosé ningun hende ku tin bida eterno.

Hende a bira esklabo di piká i morto, i mester a biba asina tantu tempu ta lucha ku doló, sufrimentu i problema ku nan ta pensa ku e manera di biba akí ta normal. Pero no ta esei ta loke nos Kreador, Yehova Dios, tabatin na mente pa hende.

Pa yuda nos komprondé ku e ta kumpli sigur ku tur loke e primintí, Dios a bisa: “E lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaías 55:11.

Beibel ta bisa ku Yehova Dios “no por gaña.” (Tito 1:2) Ya ku ta Dios a primintí tur e kosnan bunita akí, lo ta sabí di nos parti pa analisá e siguiente preguntanan: Di bèrdat ta posibel pa hende biba pa semper den Paradeis riba tera? Kiko nos tin ku hasi pa biba pa semper? E siguiente artíkulonan lo kontestá e preguntanan ei.