ABO a yega di pasa den algu asina? Si esei ta e kaso, sin duda bo ta komprondé kiko e sobrebibientenan di un kalamidat ta pasa aden: shòk, konfushon, ansiedat, pesadia i difikultat pa aseptá loke a sosodé. Hopi víktima ta asina desanimá i kansá ku nan ta sinti ku bida no tin sentido mas.

Si bo a pèrdè tur kos den un kalamidat, kisas bo tambe ta sinti ku bo no por mas. Bo por asta kuminsá sinti ku no ta bale la pena pa sigui biba. Pero Beibel sí ta siña ku ta bale la pena pa sigui biba i ku tin bon motibu pa konfia den un mihó futuro.

Eklesiástes 7:8 ta bisa: “Fin di un asuntu ta mihó ku su prinsipio.” Si bo a bira víktima di un kalamidat i bo tin ku kuminsá di nobo, kisas bo ta sinti ku nunka mas bo bida lo bira normal bèk. Pero ku pasenshi i esfuerso, bo situashon por mehorá.

Beibel ta profetisá ku e tempu lo yega ku “e zonido di yoramentu lo no wòrdu tendí mas.” (Isaías 65:19) E palabranan akí lo kumpli ora e Reino di Dios kombertí tera den un paradeis. (Salmo 37:11, 29) Nunka mas lo tin kalamidat. I tur e mal rekuerdo- i dolónan físiko lo disparsé pa semper, pasobra e Dios Todopoderoso ta primintí: “E kosnan di ántes lo no wòrdu rekordá mas ni bini na memoria.”—Isaías 65:17.

Pensa riba esaki: Nos Kreador a hasi tur loke ta nesesario pa nos por tin “un futuro i un speransa,” esta, pa nos por biba na pas bou di su gobièrnu perfekto. (Yeremías 29:11) Bo ta kere ku e speransa akí por duna bo un bon motibu pa biba? Sally, kende nos a menshoná den e promé artíkulo, a bisa: “Ora bo pensa riba tur e kosnan maravioso ku e Reino di Dios ta bai hasi den futuro, esei por yuda bo stòp di pensa riba pasado i enfoká riba presente.”

Lo bo ke haña sa kiko mas e Reino di Dios lo hasi pronto? Nos ta animá bo pa buska mas informashon tokante e tópiko ei. Pasobra si bo hasi esei, lo bo mira ku ta bale la pena pa sigui biba apesar di loke bo a sufri, i ku pronto lo no tin niun kalamidat mas. Mientrastantu, Beibel su konsehonan práktiko por yuda bo trata ku bo situashon despues di un kalamidat.