Bebe tabata hopi será ku su tata. Ku bon intenshon un amiga di e famia a bisa Bebe e palabranan ei, pero en bes di a konsol’é, Bebe a sinti ku e remarke ei a hasié mas doló. E tabata blo bisa den su mes: “Su morto no por tabata pa un bon kousa.” Ta bisto ku, añanan despues, ora Bebe tabata konta loke a sosodé den un buki, ainda e no por a konformá su mes.

Manera Bebe mes por a eksperensiá, por tuma hopi tempu pa un persona superá e doló di un pèrdida, spesialmente ora e tabata hopi será ku e defuntu. Ku bon motibu anto Beibel ta deskribí morto komo “e último enemigu.” (1 Korintionan 15:26) Morto ta dal nos tur, i nada no por par’é. Hopi biaha, e ta bini ònferwagt i ta ranka nos sernan kerí for di nos. Nos niun no ta liber di su gara. Pues no ta nada straño si nos no sa kon pa dil ku morto di un ser kerí i loke ta bini despues.

Kisas bo a yega di puntra bo mes: ‘Kuantu tempu ta dura pa superá e doló? Kon un persona por aliviá su tristesa? Kiko mi por hasi pa konsolá esnan ku a pèrdè un ser kerí? I tin speransa pa nos sernan kerí ku a fayesé?’