Mi a nase na Mulhouse, nortost di Fransia, den un bario di klase trahadó konosí pa su violensia. E rekuerdonan ku mi tin di mi infansia ta di diskushonnan violento entre famianan den e área. Den nos famia, hende hòmber tabata menospresiá hende muhé i no tabata tene kuenta ku nan. Pa nan, hende muhé mester ta den kushina i nan deber ta pa kuida nan kasá i nan yunan.

Mi infansia no tabata fásil. Tempu mi tabatin dies aña, mi tata a fayesé debí na alkoholismo. Sinku aña despues, un di mi ruman hòmbernan mas grandi a kometé suisidio. Den e mesun aña ei, mi a presensiá un asesinato durante un diskushon den mi famia, i esei a shòk mi mashá. Algun famia di mi a siña mi kon pa usa kuchú i arma i kon pa bringa ora mester. M’a bira un mucha hòmber problemátiko, a tatua tur mi kurpa i a kuminsá bebe di mas.

Tempu mi tabatin 16 aña, mi tabata bebe 10 pa 15 serbes pa dia, i no a dura muchu ku mi a kuminsá usa droga. Pa mi por a kumpra esakinan, mi tabata bende sobrá di metal i hòrta kos. Ku 17 aña di edat, ya mi a kai será. Na tur, 18 biaha nan a sentensiá mi na kastigu di prizòn pa ladronisia i violensia.

Ora mi tabatin rònt di 20 aña, kos a bira pió. Mi tabata huma te ku 20 sigaria di mariwana pa dia i tabata usa heroina i otro droga. Vários biaha mi a hera di muri di un sobredósis. Mi a kuminsá dil den droga, i p’esei semper mi tabata kana armá. Un biaha, mi a purba di tira un hòmber, pero ménos mal ku e bala a dal den su hèspu di faha i bòns bai. Tempu mi tabatin 24 aña, mi mama a fayesé, i mi a bira asta mas agresivo. Hende ku tabata kana na pia tabata kore krusa kaya ora nan wak mi pasobra nan tabatin miedu di mi. Debí ku kada biaha mi tabata den pelea, hopi biaha mi tabata pasa wikènt na warda di polis òf na hospital pa gancha mi heridanan.

M’a kasa ku 28 aña, i manera bo por imaginá, mi no tabata trata mi kasá ku rèspèt. Mi tabata insult’é i batié. Nos no tabata hasi nada huntu. Mi tabata pensa ku lo tabata sufisiente si mi djis dun’é yen di hoya hòrtá. Pero despues algu inesperá a sosodé; el a kuminsá un estudio di Beibel ku Testigunan di Yehova.  Despues di su promé estudio, el a stòp di huma, nenga di tuma plaka hòrtá i duna mi tur su hoyanan bèk. Esei a hasi mi furioso. M’a prohibié di studia Beibel, mi tabata supla huma di sigaria den su kara i tabata hasi chèrchi di dje dilanti di tur bisiña.

Un anochi ku mi tabata stòm burachi, sin mi por a yuda, mi a pega nos apartamento na kandela. Mi kasá a salba mi i nos yu muhé di sinku aña for di e kandela. Ora mi a bini bei, mi a sinti mi hopi kulpabel. M’a pensa ku nunka Dios lo por pordoná mi. Mi a kòrda ku un biaha un pastor a bisa ku mal hende ta bai fièrnu. Asta mi sikiatra a bisa mi: “Tur kos a kaba pa bo! Bo ta un kaso pèrdí.”

Despues di e kandela, nos a bai biba serka e mayornan di mi kasá. Ora e Testigunan a bin studia Beibel ku mi kasá, mi a puntra nan: “Dios por pordoná mi pa tur mi pikánan?” Nan a habri Beibel i a lesa 1 Korintionan 6:9-11 pa mi. Ei e ta menshoná práktikanan ku Dios ta odia, pero e teksto ta agregá: “Ma esei ta loke algun di boso tabata.” E palabranan ei a sigurá mi ku mi por kambia. E Testigunan a lesa 1 Huan 4:8 i a sigurá mi ku Dios ta stima mi. Esei a animá mi mashá. M’a pidi nan duna mi lès di Beibel dos biaha pa siman, i mi a kuminsá bai nan reunionnan kristian. Konstantemente mi tabata hasi orashon na Yehova.

Denter di un luna, mi a stòp di bebe i usa droga. Pero ora mi a stòp, ta komo si fuera un guera a kuminsá den mi kurpa. Mi a sufri di, entre otro, pesadianan teribel, doló di kabes i kram. Pero na mes momento, mi a sinti ku Yehova tabata sostené mi i duna mi forsa. M’a sinti meskos ku apòstel Pablo, kende a skirbi lo siguiente tokante e yudansa ku Dios a dun’é: “Pa tur kos mi tin forsa pa medio di esun ku ta duna mi poder.” (Filipensenan 4:13) Ku tempu, mi a logra stòp di huma tambe.—2 Korintionan 7:1.

Ademas di a yuda mi drecha mi bida, Beibel a yuda mi mehorá mi bida di famia tambe. Mi a kambia e manera ku mi tabata trata mi kasá, i awor mi ta trat’é ku rèspèt, mi ta papia nèchi kuné i ta yam’é “danki.” Tambe mi a bira un mihó tata pa nos yu muhé. Despues di a studia Beibel pa un aña, m’a dediká mi bida na Yehova i a batisá, meskos ku mi kasá.

Mi tin sigur ku prinsipionan di Beibel a salba mi bida. Asta mi famianan ku no ta Testigu ta rekonosé ku si no ta pa e kambionan ku mi a hasi, lo mi por a muri di un sobredósis òf den un pelea.

Siñansanan di Beibel ku ta splika kiko ta mi responsabilidatnan komo esposo i tata a kambia mi bida di famia kompletamente. (Efesionan 5:25; 6:4) Nos a kuminsá hasi kos huntu komo famia. I awor, mi no ta manda mi kasá den kushina mas. Al kontrario, mi ta kontentu di por yud’é komo ku tur luna e ta dediká 70 ora na e trabou di prediká. I e na su turno ta kontentu di por yuda mi kumpli ku mi responsabilidatnan komo ansiano di kongregashon.

E amor i miserikòrdia di Yehova a ègt hasi un impakto riba mi. Mi tin e deseo fuerte pa papia tokante su kualidatnan ku tur hende ku ta ser konsiderá kaso pèrdí, pasobra hopi hende a pensa esei di mi. Mi sa ku Beibel tin e poder pa yuda kualke hende hiba un bida limpi i ku propósito. Beibel a siña mi stima i respetá tantu mi mes komo otro hende; hòmber i muhé.