Reflekshoná un ratu riba e relashon hopi pegá ku yunan oochi idéntiko tin ku otro. Nan tin un laso íntimo ku ta masha spesial. E direktora di Twin Studies Center, Nancy Segal, kende tambe ta un oochi, a bisa ku algun oochi “ta komprondé otro hopi bon sin duna splikashon.” Un señora a deskribí e relashon ku ta eksistí entre e ku su ruman muhé oochi di e siguiente manera: “Nos sa tur kos di otro.”

Kon bini oochinan ta komprondé otro asina bon? Aunke e ambiente ku nan a lanta aden i e manera ku nan a lanta ta kontribuí na esei, tin estudio ta indiká ku nan genenan ku ta hopi paresido na otro ta hunga un ròl masha importante.

ALGU PA PENSA ARIBA: Ta Dios a krea tur e genenan maravioso akí. P’esei, nos por konkluí ku no tin ningun persona ku ta komprondé nos mas mihó ku Dios. Ku rason salmista David a bisa: “Bo a wef mi, forma mi den barika di mi mama. Mi wesunan no tabata skondí pa bo, tempu ku mi a wòrdu trahá na sekreto. . . . Bo wowonan a mira mi supstansia sin forma [òf èmbrio]; . . . tur [su partinan] tabata skirbí den bo buki.” (Salmo 139:13, 15, 16) Ta Dios so konosé i ta komprondé nos komposishon genétiko, pero no ta esei so, e sa tambe kiko tur nos a pasa aden ku a forma nos personalidat. P’esei nos por tin sigur ku no tin ningun persona ku ta komprondé nos mas mihó ku Dios.

David a resa: “O SEÑOR, bo a saminá mi i bo konosé mi. Bo sa ki ora mi ta sinta i ki ora mi ta lanta; bo ta komprondé mi pensamentunan djaleu. Promé ku tin un palabra riba mi lenga, ya bo konosé esaki kaba, o SEÑOR.” (Salmo 139:1, 2, 4) Ademas, Yehova konosé nos sintimentunan di mas profundo i asta “ta komprondé tur intenshon di e pensamentunan.” (1 Krónikanan 28:9; 1 Samuel 16:6, 7) Kiko e versíkulonan akí ta siña nos tokante Dios?

Nos Kreador no solamente ta wak kiko nos ta hasi sino tambe ta komprondé pakiko nos ta hasi esei, maske kisas nos no ta ekspresá tur nos pensamentu- i sintimentunan ora nos ta hasi orashon na dje. Ademas, e sa kiko nos lo hasi si nos sirkunstansia ta diferente. Sin duda, debí na e echo ku Dios mes a krea nos ku e kapasidat di stima, nos por tin sigur ku e ta deseá òf asta ta ansioso pa haña sa i komprondé nos pensamentu- i intenshonnan ku ta bon i ku ta pone nos reakshoná na un manera amoroso.—1 Huan 4:7-10.

Beibel ta sigurá nos:

• “Yehova su wowo ta riba e hustunan, i su orea ta habrí pa nan súplika.”—1 PEDRO 3:12.

• Dios ta primintí: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.”—SALMO 32:8.

Bo ta kere ku si bo sa ku Dios ta komprondé bo situashon, esei lo yuda bo enfrentá problema ku éksito? Wak kiko a pasa ku Anna, di Nigeria. El a bisa: “Pa motibu di mi sirkunstansianan hopi difísil, mi tabata duda ku ta bale la pena pa sigui biba. Ora dòkter a konstatá ku mi tin kanser na pechu, mi tabata un biuda i mi mester a lanta mi yu muhé mi so. Mi yu muhé tabatin waterhoofd (akumulashon di awa den selebro) i e tabata den hospital. Tabata algu hopi duru pa mi ku mi mester tabata den hospital na e mesun momento ku mi yu muhé pa mi operá, haña kimoterapia i bestraling.”

Kiko a yuda Anna? “Mi tabata meditá riba tekstonan manera Filipensenan 4:6 i 7, ku ta bisa ku ‘e pas di Dios ku ta surpasá tur komprondementu lo protehá boso kurason i boso mente.’ Kada bes ku mi tabata kòrda riba e teksto akí, mi tabata sinti mi hopi pegá ku Yehova pasobra e ta komprondé mi mas mihó ku ami ta komprondé mi mes. Mi a haña hopi animashon tambe di mi kerido rumannan spiritual di e kongregashon kristian.

Aunke mi ta lucha ketu bai ku mi salú, e situashon di ami ku mi yu muhé a mehorá. I nos a siña pa ta positivo ora nos ta enfrentá problema pasobra nos sa ku Yehova semper ta ku nos. Santiago 5:11 ta sigurá nos: ‘Nos ta proklamá ku esnan ku a perseverá ta felis! Boso a tende di e perseveransia di Yòb i boso sa di e bendishon ku Yehova a dun’é, i na esaki boso a mira ku Yehova tin masha kariño, kompashon i miserikòrdia.’” Yehova a komprondé Yòb su situashon bon bon, i nos por tin sigur ku e ta komprondé kualke situashon ku nos ta pasa aden mesun bon tambe.