ORA UN KALAMIDAT SOSODÉ, BO A YEGA DI PUNTRA BO MES: ‘NA UNDA DIOS TABATA?’ ÒF UN SUSESO TROUMÁTIKO DEN BO PROPIO BIDA A PONE BO DUDA SI DIOS TA INTERESÁ DEN BO?

Kisas bo ta pensa manera Sheila, kende ta biba na Merka, tabata pensa un tempu. El a lanta den un famia hopi religioso. El a bisa: “For di chikitu, mi tabata interesá den Dios pasobra e ta nos Kreador. Pero nunka mi tabata sinti ku mi tabata pegá kuné. Mi tabata pensa ku e ta wak mi, pero solamente djaleu. Mi no tabata pensa ku e ta odia mi, pero tampoko mi tabata pensa ku e ta stima mi.” Dikon Sheila tabata duda ku Dios ta stim’é? El a splika: “Mi famia tabata pasa den un tragedia tras di otro, i tabata parse ku nunka Dios no tabata yuda nos.”

Meskos ku Sheila, kisas bo sa ku Dios Todopoderoso ta eksistí. Pero, kisas tòg bo ta duda si realmente e ta interesá den bo. Si ta asina, bo no ta bo so. Yòb, kende tabata un hende hustu, tabatin fe den e poder i sabiduria di e Kreador, pero tòg e tabatin su dudanan. (Yòb 2:3; 9:4) Despues ku Yòb a pasa den un tragedia tras di otro i tabata parse ku no tin alivio na kaminda, el a puntra Dios: “Pakiko bo ta skonde bo kara, i ta konsiderá mi bo enemigu?”—Yòb 13:24.

Kiko Beibel ta bisa? Akaso Dios ta kulpabel di nos tragedianan? Tin prueba ku Dios ta interesá den hende en general i den kada un di nos? Nos mes por haña sa si di bèrdat Dios ta interesá den nos, si e ta komprondé nos, ta sinti pa nos òf ta yuda nos ku nos problemanan?

E manera ku hende a ser kreá ta siña nos ku Dios ta interesá den kada un di nos. Nos lo bai wak esei den e siguiente artíkulonan. (Romanonan 1:20) I nos lo analisá kiko Beibel ta siña nos tokante Dios su interes den nos. Mas bo siña konosé Dios mediante e manera ku nos a ser kreá i Beibel, mas sigur lo bo ta ku “e ta interesá den [bo].”—1 Pedro 5:7.