Dios a bisa Adam: “E dia ku bo kome di [e palu], lo bo muri sigur.” (Génesis 2:17) Si Dios a krea Adam pa bira bieu i muri, no tabatin niun motibu pa dun’é e spièrtamentu ei. Adam tabata sa ku si e no kome for di e palu, lo e no a muri nunka.

Adam ku Eva no tabatin nodi di kome for di e palu pa keda na bida, pasobra tabatin hopi palu di fruta den e hòfi. (Génesis 2:9) Si nan no a kome di e fruta, e promé pareha lo a mustra obedensia na Esun ku a duna nan bida. Ademas, nan lo a demostrá ku nan ta rekonosé ku ta Dios tin derecho di bisa nan kiko pa hasi.

Pa nos komprondé dikon Adam ku Eva a muri, nos tin ku analisá un kòmbersashon ku a afektá nos tur. Satanas e Diabel a usa un kolebra pa konta un mentira malisioso. Beibel ta bisa: “Awor e kolebra tabata mas astuto ku tur otro bestia di sabana ku SEÑOR Dios a traha. I el a bisa e muhé: ‘Di bèrdat Dios a bisa: “Bo no mag kome di ningun palu di e hòfi”?’”—Génesis 3:1.

Eva a kontest’é: “Di fruta di e palunan di e hòfi nos por kome, ma di fruta di e palu ku ta keda meimei di e hòfi, Dios a bisa: ‘Boso no mester kome di dje ni mishi kuné, pa boso no muri.’” Despues e kolebra a bis’é: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.” Pues, Satanas a bisa ku Yehova ta un mentiroso ku no tabata ke pa Adam ku Eva haña algu bon.—Génesis 3:2-5.

Eva a kere e mentira ei. El a keda opservá e palu i el a wak ku e fruta tabata mustra asina bon ku el a kome e fruta. Beibel ta sigui bisa: “I el a duna su esposo tambe ku tabata huntu kuné, i el a kome.”—Génesis 3:6.

Dios lo mester a sintié masha tristu ora el a wak ku su yunan, kendenan el a stima, a desobedes’é deliberadamente! Kiko Dios a hasi? Yehova a bisa Adam: “Lo bo . . . bolbe na tera, pasobra for di dje bo a wòrdu tuma; pasobra stòf bo ta, i na stòf lo bo bolbe.” (Génesis 3:17-19) Pa motibu di esaki, “tur e dianan ku Adam a biba tabata 930 aña, i el a muri.” (Génesis 5:5) Adam no a bai shelu ni ningun otro kaminda. E no tabata eksistí promé ku Yehova a kre’é di stòf. Pues ora el a muri, el a pèrdè su bida i su kurpa a bolbe bira stòf. El a stòp di eksistí. Esta tristu!

Debí ku Adam ku Eva a desobedesé Yehova deliberadamente, nan a pèrdè perfekshon i e posibilidat di biba pa semper. Nan kurpa a kambia; nan a bira imperfekto i pekadó. Pero ora Adam ku Eva a peka i a desobedesé Dios, nan no a afektá nan mes so. Djei padilanti, tur nan yunan lo a nase imperfekto i pekadó. Romanonan 5:12 ta bisa: “Pa medio di un hende [Adam] piká a drenta mundu, i morto pa medio di piká, i asina morto a pasa pa tur hende pasobra nan tur a peka.”

Beibel ta deskribí piká i morto komo “e velo ku ta tapa tur pueblo, sí, e mantel ku ta habri over di tur nashon.” (Isaías 25:7) E velo ei ta tapa hende meskos ku serena venenoso ku nos no por skapa for di dje. P’esei, “den Adam tur ta muri.” (1 Korintionan 15:22) E pregunta ku ta lanta awor ta e mesun pregunta ku apòstel Pablo a hasi: “Ken lo libra mi di e kurpa ku ta hiba mi na e morto akí?” Tin un persona ku por libra nos?—Romanonan 7:24.