AUNKE nos a heredá piká i morto for di nos promé mayornan, Adam ku Eva, Dios su propósito pa hende no a kambia. Den Beibel, Dios ta konfirmá bes tras bes ku su propósito no a kambia.

• “E hustunan lo heredá e tera, i lo biba den dje pa semper.” —Salmo 37:29.

• “E lo traga morto pa semper, i Señor DIOS lo seka awa di wowo for di tur kara.” —Isaías 25:8.

• “E último enemigu ku lo e kaba kuné ta morto.”—1 Korintionan 15:26.

• “Lo no tin morto mas; ni tristesa ni sklamashon ni doló lo no tin mas.”—Revelashon 21:4.

Kon Dios lo “traga morto” òf “kaba kuné”? Manera nos a kaba di mira den Beibel “e hustunan . . . lo biba . . . pa semper.” Pero Beibel ta bisa tambe ku “no tin hende hustu riba tera ku kontinuamente ta hasi bon.” (Eklesiástes 7:20) Akaso esei ke men ku Dios lo no tene kuenta ku su normanan moral haltu i permití hende imperfekto i pekadó biba pa semper? Sigur ku nò! Nunka lo e hasi esei pasobra Beibel ta bisa ku “Dios . . . no por gaña.” (Tito 1:2) Pues, kiko Dios lo hasi pa kumpli ku su propósito?

Amor a motivá Yehova Dios pa paga un reskate pa libra nos di morto. Básikamente, un reskate ta un preis ku bo ta paga pa kompensá un daño òf pa kumpli ku loke hustisia ta rekerí. E balor di e reskate mester ta ekivalente na e daño kousá. Komo ku nos ta hende pekadó i nos ta kondená na morto, Beibel ta bisa frankamente: “Di ningun manera un hende por redimí su ruman, ni paga Dios plaka di reskate p’e—pasobra e redenshon di su alma ta kostoso; e lo no por paga p’e nunka.”—Salmo 49:7, 8.

Ora un persona imperfekto muri, e por paga solamente pa su pikánan; e no por salba su mes ni paga pa e pikánan di otro hende. (Romanonan 6:7) Nos tabatin mester di un persona perfekto i sin piká pa ofresé su bida, no pa su mes pikánan sino pa nos pikánan.—Hebreonan 10:1-4.

Esaki ta eksaktamente loke Dios a proponé pa hasi. El a manda su yu, Hesus, for di shelu pa nase riba tera komo un hende perfekto i sin piká. (1 Pedro 2:22) Hesus a bisa ku el a bini pa “duna su alma komo reskate a kambio di hopi hende.” (Marko 10:45) El a muri pa kaba ku nos enemigu, morto, pa nos por haña bida.—Huan 3:16.

Awe e profesianan di Beibel ta kumpliendo. Nos ta biba den “tempunan krítiko, difísil pa trata kuné,” i esei ta mustra ku nos ta den “e último dianan” di e mundu malbado akí. (2 Timoteo 3:1) E último dianan lo terminá riba “e dia di huisio i di destrukshon di hende malbado.” (2 Pedro 3:3, 7) Pero hende ku ta stima Dios lo sobrebibí e destrukshon ei i lo disfrutá di “bida eterno.”—Mateo 25:46.

Tin miónes di hende ku lo haña oportunidat di biba pa semper ora nan ser resusitá. Hesus a mustra ku resurekshon ta posibel ora el a bishitá e stat Nain. E úniko yu di un biuda a muri i Hesus “a haña duele” i a lanta su yu for di morto. (Lukas 7:11-15) Ademas, apòstel Pablo a bisa: “Mi tin e speransa  akí den Dios . . . ku lo bai tin un resurekshon di tantu hende hustu komo inhustu.” E speransa akí ta real i un prueba grandi di Yehova su amor pa humanidat.—Echonan 24:15.

Míles di miónes di hende lo biba pa semper. Beibel ta bisa: “E hustunan lo heredá e tera, i lo biba den dje pa semper.” (Salmo 37:29) E tempu ei, nan lo eksperensiá loke apòstel Pablo a skirbi mas o ménos 2.000 aña pasá: “Morto, unda bo viktoria ta? Morto, unda bo pui ta?” (1 Korintionan 15:55) Por fin Dios lo a kaba ku nos enemigu di mas grandi, morto! Esta un konsuelo!