Konseho di Beibel: “Laga boso manera di biba ta liber di amor pa plaka, i keda kontentu ku loke boso tin.”—Hebreonan 13:5.

Awe tin hopi kos ku hende ta bisa ku nos mester tin. Pero Beibel ta konsehá nos pa “keda kontentu ku loke [nos] tin.” Kon nos por hasi esaki?

Evitá “amor pa plaka.” “Amor pa plaka” por pone hende hasi kualke kos: sakrifiká nan salú, famia, amistat, norma i balor i asta nan dignidat. (1 Timoteo 6:10) Pero esei no ta bale la pena. Dikon nò? Pasobra al fin i al kabo, un hende ku ta stima plaka “lo no keda satisfecho.”—Eklesiástes 5:10.

Hende ta mas importante ku kos material. Aunke kos material por ta nesesario, e kosnan ei no por stima òf apresiá nos. Solamente hende por hasi esei. Un berdadero amigu por duna nos mas felisidat den bida.—Proverbionan 17:17.

Konseho di Beibel: “Un kurason kontentu ta un bon remedi.”—Proverbionan 17:22.

Meskos ku “un bon remedi,” alegria por yuda nos trata ku malesa. Pero kon nos por ta kontentu ora nos ta malu?

Sea gradisidu. Si nos ta keda pensa riba nos salú, “tur e dianan” lo parse malu. (Proverbionan 15:15) En bes di esei, Beibel ta bisa pa “mustra ku boso ta gradisidu.” (Kolosensenan 3:15) Sea gradisidu pa asta e kosnan chikitu den bida. Por ehèmpel, un bunita bahada di solo, aire fresku òf un sonrisa di un ser kerí. E kosnan ei por hasi bo mas felis.

Hasi kos pa otro hende. “Tin mas felisidat den duna ku den risibí,” i esei ta konta asta si nos tin problema ku salú. (Echonan 20:35) Ora otro hende mustra apresio pa loke nos a hasi pa nan, esei ta hasi nos felis i nos lo no pensa muchu riba nos malesa. Ora nos yuda otro hende pa nan ta felis, nos tambe lo ta felis.

Konseho di Beibel: “Sigui hasi sigur kiko ta e kosnan mas importante.”—Filipensenan 1:10.

Pareha kasá ku no ta pasa sufisiente tempu huntu por alehá for di otro. Nan mester mira nan matrimonio komo un di e kosnan di mas importante den bida.

Hasi kos huntu. En bes di buska nan mes interes so, ta bon pa pareha kasá plania pa hasi kos huntu. Beibel ta bisa ku “dos ta mihó ku un.” (Eklesiástes 4:9) Boso por hasi vários kos huntu, entre otro, kushiná, hasi ehersisio, bai kome huntu òf kuminsá un hòbi huntu.

Demostrá bo kasá ku bo ta stim’é. Beibel ta animá esposo ku esposa pa stima i respetá otro. (Efesionan 5:28, 33) Un sonrisa kaluroso, un abraso kariñoso òf un regalo chikitu por yuda fortalesé un matrimonio. I klaru, pareha kasá mester mustra interes seksual solamente den otro.—Hebreonan 13:4.