Dios a primintí Profeta Abraham ku un di su desendientenan lo trese bendishon pa “tur e nashonnan di e tera.” (Génesis 22:18) Ta ken e desendiente ei a resultá di ta?

Kasi 2.000 aña pasa, Dios a duna Hesus, kende tabata un desendiente di Abraham, poder pa hasi hopi milager impreshonante. E milagernan ei a indiká ku e promesa ku Dios a hasi na Abraham lo kumpli mediante Hesus.—Galationan 3:14.

E milagernan ku Hesus a hasi a yuda identifik’é komo esun ku Dios a skohe pa bendishoná humanidat. Ademas, e milagernan ei a demostrá kon Dios lo usa Hesus pa bendishoná humanidat pa semper den futuro. Ban wak kon e milagernan ku Hesus a hasi ta resaltá algun di su bunita kualidatnan.

Kariño—Hesus a kura hende malu.

Un biaha, un leproso a supliká Hesus pa kur’é, bisando: “Si bo ke, bo por kura mi.” Hesus a mishi kuné i a kontest’é: “Mi ke.” I mesora e lepra a kita for di dje.—Marko 1:40-42.

Generosidat—Hesus a perkurá kuminda pa hende ku hamber.

Hesus no tabata ke pa hende pasa hamber. Na mas ku un okashon, el a hasi milager pa alimentá míles di hende ku solamente algun pida pan i piská chikitu. (Mateo 14:17-21; 15:32-38) Tur hende a keda satisfecho despues di a kome i ainda a sobra hopi kuminda.

Kompashon—Hesus a resusitá hende ku a muri.

Un biuda, ku no tabatin niun hende mas pa kuid’é, a pèrdè su úniko yu hòmber. Hesus “a haña duele di dje” i a resusitá su yu.—Lukas 7:12-15