DOREEN a keda di shòk ora dòkter a diagnostiká su kasá, Wesley, di apénas 54 aña di edat, ku un tumor selebral hopi agresivo. * Dòkter a dun’é solamente algun luna di bida. Doreen ta kòrda: “Mi no por a kere loke mi a tende. Mi a keda tur turdí pa simannan largu. Mi a sinti manera ku ta ku otro hende esei a sosodé i no ku nos. Mi no tabata prepará pa esei.”

Lamentablemente, e manera ku Doreen a reakshoná ta normal. Kualke persona por haña un malesa terminal na kualke momento. E bon ta ku hopi hende di buena gana ta tuma e responsabilidat di kuida un ser kerí ku tin un malesa terminal. Pero esei no ta nada fásil. Kiko miembronan di famia por hasi pa konsolá i kuida nan ser kerí ku ta den fase terminal? Kon miembronan di famia ku ta duna kuido por trata ku e diferente emoshonnan ku nan lo eksperensiá durante e periodo di e pashènt su malesa? Segun ku morto di e persona ta aserká, kiko nan por ferwagt? Pero promé, ban wak dikon e echo ku nan tin ku kuida un persona ku ta den fase terminal ta un reto awe.

Hopi kos a kambia debí na siensia médiko. Mas o ménos un siglo pasá, asta den paisnan mas desaroyá, hende tabata biba hopi ménos aña. Hende tabata muri fásilmente debí na malesanan kontagioso òf aksidente. Masha poko hende por a yega un hospital, i mayoria di biaha ta miembronan di famia mes tabata kuida nan i hende tabata muri na kas.

Awe, avansenan riba tereno di medisina ta laga dòkternan usa tratamentunan fuerte kontra malesa pa alargá bida. Hende ku ántes lo a muri rápidamente di un sierto malesa por biba vários  aña mas awe. Sinembargo, esei no ta nifiká ku nan lo kura. Hopi biaha, e pashèntnan ta sufri di malesa asina severo ku nan no por kuida nan mes. E tarea di kuida hende malu a bira mas kompliká i eksigente.

Komo resultado, mas i mas hende ta muri na hospital en bes di na kas. Hopi hende awe no sa di e proseso di morto, i masha poko hende a yega di mira un hende muri. Pues, miedu di loke ta deskonosí por stroba un hende di kuida un miembro di famia ku ta malu. Kiko por yud’é?

Manera a keda demostrá den e kaso di Doreen, hopi hende ta keda kibrá ora dòkter diagnostiká un ser kerí ku un malesa terminal. Pues ta normal ku lo bo sinti emoshonnan fuerte manera ansiedat, miedu i tristesa. Kiko por yuda bo prepará pa kuida un ser kerí? Un fiel sirbidó di Dios a pidié: “Siña nos konta nos dianan, pa nos por presentá na bo un kurason yen di sabiduria.” (Salmo 90:12) Sí, pidi Yehova Dios pa e siña bo kon pa ‘konta bo dianan’ na un manera sabí pa bo por usa e último dianan ku a keda bo ku bo ser kerí na e mihó manera posibel.

Esaki ta rekerí bon planifikashon. Si bo ser kerí por komuniká ainda i ta dispuesto pa papia tokante e asuntu, lo ta sabí pa puntr’é ken mester tuma desishon p’e ora ku e mes no por hasi esei mas. Kòmbersashonnan habrí tokante si e ke ser reanimá, si e ke bai hospital òf si e ke haña sierto tratamentunan por minimisá malkomprondementu i sintimentu di kulpa di parti di miembronan di famia kendenan ta haña nan obligá di tuma desishon pa un pashènt inkapasitá. Si e pashènt i su famia kòmbersá habrí ku otro i di antemano, e famia lo por enfoká riba dunamentu di kuido durante e malesa. Beibel ta bisa: “Pa falta di konseho plannan ta frakasá.”—Proverbionan 15:22.

Normalmente, e tarea prinsipal di e persona ku ta duna kuido ta di konsolá. E persona ku ta muriendo mester sa ku bo ta stim’é i ku e no ta su so. Kon bo por hasi esei? Lesa algu p’e òf kanta kantika ku e ta gusta i ku ta anim’é. Hopi hende ta sinti nan bon ora un miembro di famia tene nan man i papia na un manera suave ku nan.

Ademas, ta bon pa bishitantenan bisa ken nan ta. Segun un rapòrt: “Parse ku e último sentido di e sinku sentidonan ku un [pashènt] ta pèrdè ta su oido. E por sigui tende hopi bon maske e ta parse na soño, pues no bisa nada den su presensia ku lo bo no bisa ora e ta lantá.”

 Si ta posibel, hasi orashon huntu. Beibel ta bisa ku na un okashon, apòstel Pablo i su kompañeronan tabata bou di preshon intenso i tabata asta teme pa nan bida. Kiko nan a hasi? Pablo a pidi su amigunan: “Boso tambe por yuda pa medio di boso orashonnan ferviente pa nos.” (2 Korintionan 1:8-11) Den situashonnan di hopi strès i durante malesa grave, ta masha importante pa hasi orashon di kurason.

E simpel echo ku bo sa ku bo ser kerí lo fayesé por angustiá bo. I esei no ta nada straño, pasobra morto no ta algu natural. Dios no a krea nos pa aseptá morto komo un parti normal di bida. (Romanonan 5:12) E Palabra di Dios ta yama morto un “enemigu.” (1 Korintionan 15:26) P’esei ta di komprondé, i ta asta algu normal, ku bo no ke pensa tokante morto di un ser kerí.

Sinembargo, ora miembronan di famia tin un idea di kiko por sosodé, esei por kalma nan i yuda nan enfoká riba hasi kosnan mas kómodo posibel pa e persona ku ta malu. Algun di e síntomanan ku por presentá ta ser menshoná den e kuadro “ E Último Simannan di Bida.” Klaru ku no ta tur loke e kuadro ta menshoná lo sosodé ku tur pashènt, i kisas nan lo no sosodé den e mesun sekuensia. Pero mayoria di pashènt ta eksperensiá por lo ménos algun di e kambionan ei.

Despues di morto di un ser kerí, lo ta sabí pa papia ku un bon amigu ku a yega di ofresé pa yuda. Esnan ku ta duna kuido i miembronan di famia kisas mester haña e siguransa ku nan ser kerí su prueba a pasa i ku e no ta sufri mas. E Kreador di hende kariñosamente ta sigurá nos ku “e mortonan no sa nada.”—Eklesiástes 9:5.

Ta masha importante pa nos konfia den Dios, no solamente durante e malesa terminal di un miembro di famia ma tambe durante e tristesa ku ta bini despues di su morto. Dios por konsolá bo mediante palabra di otro hende i mediante nan yudansa. Doreen a bisa: “Mi a siña pa no rechasá yudansa. De echo, nos no a spera di haña asina tantu yudansa. Ami ku mi kasá tabatin sigur ku ta Yehova ta esun ku a bisa nos: ‘Mi t’aki pa yuda boso pasa den e kos akí.’ Lo mi no lubidá esei nunka mas.”

Sí, Yehova Dios ta e mihó Persona ku por kuida nos. Komo Esun ku a krea nos, e ta komprondé nos doló i tristesa. E por i ke duna nos e yudansa i animashon nesesario pa nos por trata ku e situashon. Mihó ainda, el a primintí ku pronto lo e eliminá morto unabes i pa semper i resusitá e míles di miónes di hendenan ku ta den su memoria. (Huan 5:28, 29; Revelashon 21:3, 4) Anto e tempu ei, tur hende lo por ripití e palabranan di apòstel Pablo, kende a bisa: “Morto, unda bo viktoria ta? Morto, unda bo pui ta?”—1 Korintionan 15:55.