Paradeis! Foyetonan di biahe masha kolorido ta duna nos gana di bula bai un “paradeis” leu kaminda nos por relahá i lubidá tur nos problemanan. Pero nos sa di eksperensia ku ora nos regresá kas, nos ta haña e problemanan kaminda nos a bai laga nan.

Apesar di esei, hende ta fasiná ku e idea di paradeis. Nos no por evitá di pensa: ‘Akaso “paradeis” ta djis un dushi fantasia? Si ta asina, dikon nos ta dje fasiná ei kuné? Paradeis por bira realidat un dia?’

Atraves di siglonan, hende tabata masha interesá den e idea di un paradeis. Pa hopi hende, nan interes a lanta debí ku Beibel ta hasi menshon di “un hòfi parti pariba, na Edén.” Kiko a hasi e hòfi ei asina atraktivo? E relato ta konta nos ku for di suela Yehova Dios “a hasi nase tur palu ku ta agradabel pa bista i bon pa kuminda.” E hòfi ei tabata un lugá agradabel i bon, i e kos di mas interesante tabata “e palu di bida meimei di e hòfi.”—Génesis 2:8, 9.

E relato na Génesis ta menshoná tambe kuater riu ku tabata sali for di e hòfi. Te awe, nos konosé dos di e riunan ei: Tigris (òf Hidekel) i Eufrates. (Génesis 2:10-14) E dos riunan ei ta pasa kaminda awe ta Irak—ku un tempu tabata parti di Persia di antigwedat—bai basha den Golfo Pérsiko.

P’esei no ta straño ku e idea di paradeis riba tera ta un parti importante di e herensia kultural di Persia. Por ehèmpel, den e Museo di Arte di Filadelfia, na Pennsylvania, Merka, tin un tapeit di Persia di siglo 16 i den e diseño tin un hòfi yen di flor i palu rondoná pa un muraya. E palabra perso pa “hòfi rondoná pa muraya” ta nifiká tambe “paradeis,” i e esena riba e tapeit ta kuadra ku e deskripshon di e Hòfi di Edén komo un lugá bunita i yen di mata.

De echo, hopi idioma i kultura rònt mundu tin kuentanan tokante paradeis. Segun ku hende a plama bai na tur parti di tera, nan a bai ku diferente vershon di e relato original ku, despues di siglonan, a mesklá ku e kreensia- i leyendanan di e lugá lokal. Te ku awe, hende, sin pensa dos bes, ta deskribí lugánan hopi bunita komo un paradeis.

Algun eksploradó a yega di bisa ku nan a haña e paradeis pèrdí. Por ehèmpel, na 1881, Charles Gordon, un general di ehérsito di Inglatera, a bishitá e islanan Seychelles. E tabata asina impreshoná ku e bunitesa i abundansia di mata di e Vallée de Mai, un lugá ku awor ta riba lista di Patrimonio Mundial, ku el a yam’é Hòfi di Edén. Durante siglo 15, e nabegante italiano Christoffel  Columbus a pensa ku e tabata serka di deskubrí e Hòfi di Edén ora el a yega e isla Hispañola, ku awor ta forma República Dominicana i Haiti.

Mapping Paradise, un buki moderno di historia, tin detaye di mas ku 190 mapa antiguo, i hopi di nan ta mustra Adam ku Eva den Edén. Por ehèmpel, tin un mapa straño basá riba un kopia di siglo 13 di e manuskrito di Beato di Liébana. Te ariba di e mapa tin un rektángulo chikitu ku paradeis nèt meimei i djei ta sali kuater riu, yamá “Tigris,” “Eufrates,” “Pison” i “Gihon,” ku ta bai na kada un skina. Supuestamente esei ta representá kon kristianismo a plama na tur kuater skina di mundu. E tipo di plachinan ei ta mustra ku aunke hende no sa unda e Paradeis original tabata, tòg semper nan a keda interesá den e idea di e paradeis ei.

John Milton, un poeta ingles di siglo 17, ta konosí pa su poema E Paradeis Pèrdí, basá riba e relato  den Génesis tokante e piká di Adam i e echo ku Dios a sak’é for di Edén. Den e poema akí, Milton a hala atenshon na e promesa ku hende lo bolbe haña chèns di biba pa semper riba tera. El a skirbi: “E ora ei henter e tera lo ta un paradeis.” Mas despues, Milton a skirbi un di dos parti titulá: E Paradeis Rekobrá.

Ta bisto ku e konsepto di un paradeis riba tera ku no ta eksistí mas ta un idea ku ta kore manera un liña kòrá durante historia humano. Pero dikon hende awor no ta papia mas di esei? Básikamente ta pasobra, manera Mapping Paradise ta splika, “teólogonan . . . deliberadamente a bira lomba pa e asuntu di unda paradeis tabata situá.”

Hopi baidó di misa ta siña ku al final nan ta bai shelu, i no un paradeis riba tera. Ma Beibel ta bisa na Salmo 37:29: “E hustunan lo heredá e tera, i lo biba den dje pa semper.” Komo ku nos mundu awe no ta nada paresido na un paradeis, kon nos por tin sigur ku e promesa akí lo kumpli un dia? *

Yehova Dios, kende a krea e Paradeis original, a primintí ku lo e bolbe hasi e tera un paradeis. Kon lo e hasi esei? Kòrda ku Hesus a siña nos pa pidi den orashon: “Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:10) E Reino ei ta un gobièrnu mundial den man di Hesukristu ku lo remplasá tur gobièrnu humano. (Daniel 2:44) Bou di e gobernashon di e Reino ei, Dios lo kumpli ku su boluntat di tin un paradeis riba tera.

Hopi tempu pasá, profeta Isaías a deskribí, bou di inspirashon di Dios, e kondishonnan ku lo eksistí den e Paradeis primintí, kaminda tur e problemanan i konfliktonan ku ta pone hende sufri awe lo no t’ei mas. (Isaías 11:6-9; 35:5-7; 65:21-23) Nos ta animá bo pa tuma djis un par di minüt pa lesa e tekstonan ei den bo propio Beibel. Esei lo yuda bo haña un idea di loke Dios ta bai hasi pa hende ku ta obedesé su normanan. E hendenan ku lo biba e tempu ei lo disfrutá di dos kos ku Adam a pèrdè: bida den un paradeis i e aprobashon di Dios.—Revelashon 21:3.

Dikon nos por tin sigur ku e speransa di ku tera lo bira un paradeis ta un realidat i no un fantasia? Pasobra Beibel ta bisa nos: “E shelunan ta e shelunan di SEÑOR, ma tera el a duna na e yunan di hende.” E speransa di Paradeis ta un promesa ku “Dios, kende no por gaña, a primintí hopi tempu pasá.” (Salmo 115:16; Tito 1:2) Esta un bunita speransa Beibel ta duna nos: bida eterno den Paradeis!