Mi mama tabatin 17 aña ora mi a nase na 1960. Promé ku mi a nase, ya mi tata a bai laga nos. Ami ku mi mama tabata biba serka mi welanan na Burg, un pueblito ku ta situá na loke ántes tabata Repúblika Demokrátiko di Alemania, òf Alemania Oriental. Meskos ku hopi otro hende, nos tabata ateista i Dios no tabata nifiká nada pa nos.

Segun ku mi tabata krese, mi tawela tabata gusta pasa tempu ku mi. Nos tabata hasi hopi kos huntu. Por ehèmpel, e tabata manda mi subi palu pa kòrta rama. Mi tabata gusta aventura tempu mi tabata mucha. Mi bida tabata masha dushi i sin ningun preokupashon.

Un dia, tempu mi tabatin shete aña, algu masha teribel a pasa ku mi. Mi a kaba di kuminsá mi di dos aña na skol. Na kaminda pa kas, mi a subi un palu di koriente i ora mi tabata na un haltura di ocho meter, koriente a dal mi i manda mi leu. Ora mi a spièrta, mi tabata den hospital i mi no por a sinti mi brasanan. Nan tabata asina kimá i e heridanan tabata asina teribel ku e dòkternan mester a amputá nan pa evitá ku mi sanger lo a venená. Manera lo bo por imaginá, mi mama i mi welanan a keda hopi kibrá. Pero komo mucha, mi no a ègt komprondé kon esaki lo a bai afektá mi bida.

Despues ku mi a sali hospital, mi a bolbe bai skol. Na skol, e muchanan tabata tenta mi, pusha mi i asta tira kos riba mi pasobra mi no por a defendé mi mes. Nan komentarionan kruel i humiante a hasi mi hopi doló. Despues di esaki, nan a manda mi un skol na Birkenwerder ku tabata manera un internat pa mucha ku tin desabilidat físiko. Komo ku e skol tabata hopi leu for di kas, mi mama i mi welanan no por a afòrt pa bishitá mi. Ta den fakansi so mi tabata wak nan. E siguiente dies añanan, mi a krese sin mi mama i mi welanan.

Mi a siña hasi hopi kos ku mi pianan. Bo por imaginá bo kiko ke men usa bo tenchinan pa kome ku un fòrki òf kuchara? Di un manera òf otro mi a bira ábil den esei. Algu otro ku mi a siña hasi ku mi pia ta skeiru djente i peña kabei. Asta ora mi ta papia ku hende mi a kuminsá hasi gesto ku mi pianan. Ke men, mi pianan a bira manera mi mannan!

Tempu mi tabata tiner, mi tabata gusta lesa kuenta di siensia fikshon. Tin bes mi tabata imaginá ku mi tabatin brasa di alta-teknologia ku ta  permití mi hasi tur kos. Tempu mi tabatin 14 aña mi a kuminsá huma pasobra mi tabata pensa ku esaki lo a laga mi sinti mi sigur di mi mes i ku mi ta meskos ku tur otro hende. Ta komo si fuera mi tabata bisa: “Sí, mi tambe por hasi esei. Hende ku ta huma ta hende grandi, sea nan tin brasa òf nò.”

Mi tabata tene mi mes okupá ku diferente aktividat sosial. Mi a asta bira miembro di e asina yamá Hubentut Aleman Liber, un organisashon sosialista di hóbennan ku gobièrnu tabata spònser. Mi tabata traha komo sekretario, ku tabata un posishon respetá entre e miembronan lokal. Tambe mi a djòin un klup di kanto, mi tabata skirbi poema i tambe partisipá den deporte pa hende desabilitá. Despues di un stazje, mi a kuminsá traha na un kompania den mi pueblo. Segun ku mi tabata krese, mi tabata bisti mi protésisnan mas i mas pasobra mi kier a sinti mi mes manera un hende kompleto.

Un dia mi tabata warda na stashon di trein pa mi bai trabou, anto un hòmber a aserká mi. El a puntra mi si mi por imaginá ku un dia Dios lo duna mi mi brasanan bèk. Mi a keda un poko asombrá. Di mes mi tabata ke mi brasanan bèk! Pero pa mi esei tabata difísil i imposibel pa kere. Komo un ateista, mi tabata konvensí ku Dios no ta eksistí. For di e momento ei, mi a buska un manera pa evitá e hòmber ei.

Algun tempu despues, un kolega di trabou a invitá mi pa bai bishitá su famia. Ora nos tabata bebe kòfi, su mayornan a kuminsá papia tokante Dios, Yehova. Pa promé bes den mi bida mi a tende ku Dios tin un nòmber. (Revelashon 4:11) Pero, den mi mes, mi a rechasá e idea akí i a pensa: ‘No por tin un Dios, sin importá ki su nòmber ta. Mi ta bai mustra e hendenan akí ku nan ta robes.’ Sigur di mi mes, mi a aseptá un kurso di Beibel. Pero, pa mi sorpresa, mi no por a proba ku Dios no ta eksistí.

Segun ku nos tabata analisá profesianan di Beibel, poko poko mi kreensianan ateista a kuminsá suak. Mi a bin siña ku hopi profesia a kumpli kaba aunke nan a ser skirbí sientos òf asta míles di aña promé. Un biaha, nos a kompará e manera ku mundu ta aworakí ku loke tin pará na Mateo kapítulo 24, Lukas kapítulo 21 i 2 Timoteo kapítulo 3. Meskos ku un kombinashon di síntoma por yuda un dòkter hasi un diagnósis korekto di un pashènt su malesa, asina tambe e kombinashon di e susesonan menshoná den e profesianan akí a yuda mi mira ku nos ta bibando den loke Beibel ta yama “e último dianan.” * Mi a keda asombrá. Ku mi propio wowonan mi a mira kumplimentu di e profesianan akí.

Mi tabata konvensí ku loke mi tabata siña ta e bèrdat. Mi a kuminsá hasi orashon na Yehova i a stòp di huma aunke ku mi tabata huma pisá pa mas ku un dékada. Mi a sigui ku mi kurso di Beibel pa mas o ménos un aña. Dia 27 di aprel 1986, mi a batisá den sekreto den un badkuip pasobra e tempu  ei Testigunan di Yehova tabata prohibí na Ost Alemania.

Pa motibu ku Testigunan tabata prohibí na Alemania, nos tabata reuní den gruponan chikitu na kasnan privá, i mi tabata konosé solamente algun Testigu. Riba un dia, na un manera inesperá, mi a haña pèrmit di outoridat di gobièrnu pa mi biaha bai Wèst Alemania kaminda Testigunan di Yehova no tabata prohibí. Pa promé bes den mi bida, mi por a asistí na un kongreso basá riba Beibel i por a mira míles di mi ruman hòmber- i muhénan kristian. Esei tabata un eksperensia úniko.

Despues ku e Muraya di Berlin a kai, Testigunan di Yehova no tabata prohibí mas na Alemania. Finalmente, nos tur por a adorá Yehova libremente. Pues mi kier a dediká mas tempu den e trabou di predikashon. Pero mi tabatin ripara pa kòmbersá ku otro hende. Mi tabata sinti mi ménos ku otro hende debí na mi desabilidat, i tambe pasobra mi a pasa mi hubentut den un internat pa mucha ku desabilidat. Pero, na 1992 mi a purba di prediká 60 ora pa luna. Mi a eksperensiá hopi goso i a bai asina bon ku mi a disidí di sigui hasi esaki tur luna pa kasi tres aña largu.

Semper mi ta tene na mente e palabranan di Beibel ku ta bisa: “Ken ta débil sin ku mi tambe ta sinti mi débil?” (2 Korintionan 11:29) Apesar di mi desabilidat, ainda mi tin mi mente i mi stèm. Pues mi ta hasi mi bèst pa yuda otro hende. Komo ku mi no tin mi brasanan, mi ta komprondé pa otro hende ku tin un ke otro limitashon. Mi sa kiko ke men sinti ku bo tin masha gana di hasi algu ku gewon bo no por hasi. Mi ta purba di animá esnan ku ta sinti asina. Mi ta hopi kontentu ku mi por yuda otro hende di e forma akí.

Mi tin ku atmití ku tin bes mi ta sinti mi deprimí. Simplemente mi ke ta un persona kompleto. Mi por hasi hopi kos di tur dia riba mes, pero nan ta kosta mi hopi mas tempu, esfuerso i energia ku normal. Mi dicho di tur dia ta: “Pa tur kos mi tin forsa pa medio di esun ku ta duna mi poder.” (Filipensenan 4:13) Tur dia Yehova ta duna mi e forsa ku mi tin mester pa mi hasi mi kosnan. Mi a siña ku Yehova no ta stòp di yuda mi. P’esei, hamas lo mi ke stòp di sirbié.

Yehova a bendishoná mi ku un famia; loke mi tabata sinti falta di dje den mi infansia i hubentut. Mi tin un maravioso esposa, Elke, kende ta masha amoroso i ta tene hopi konsiderashon ku mi. Ademas, miónes di Testigu di Yehova a bira mi rumannan spiritual, mi famia mundial.

Tambe mi ta haña konsuelo den Dios su promesa di Paradeis kaminda lo e hasi “tur kos nobo,” inkluso mi brasanan. (Revelashon 21:5) Mi ta komprondé e promesa akí mas mihó ora mi pensa riba loke Hesus a hasi tempu e tabata aki riba tera. Den un fregá di wowo el a kura hende ku tabatin man i pia mankaron, i asta el a kura un hòmber su orea ku a ser kitá afó ku spada. (Mateo 12:13; Lukas 22:50, 51) Yehova su promesanan i Hesus su milagernan ta konvensé mi ku pronto lo mi ta un hòmber kompleto atrobe.

Pero e bendishon di mas grandi ku mi a haña ta ku mi a siña konosé Yehova Dios. El a bira mi tata i mi amigu, mi konsuelo i mi forsa. Mi ta sinti meskos ku Rei David, kende a skirbi: “SEÑOR ta mi fortalesa . . . i mi ta wòrdu yudá; p’esei mi kurason ta regosihá.” (Salmo 28:7) E bèrdat maravioso akí mi ta tene na dje henter mi bida. Aunke mi no tin brasa, mi ta bras’é ku tur mi forsa.