1. Di akuerdo ku Filipensenan 2:3, kiko lo yuda nos tin bon relashon ku otro persona?

HUMILDAT ta yuda nos aseptá Yehova su normanan; e ta laga nos realisá ku Yehova semper sa kiko ta mihó pa nos. (Efe. 4:22-24) Ora nos ta humilde, nos ta pensa ku loke Yehova ke ta mas importante ku loke nos ke i ku otro persona ta superior na nos. Komo resultado, nos lo tin mihó relashon ku Yehova i ku nos rumannan.—Lesa Filipensenan 2:3.

2. Kiko Apòstel Pablo a rekonosé, i kiko nos lo analisá den e artíkulo akí?

² Si nos no tene kuidou, hende orguyoso i egoista * den mundu di Satanas por influensiá nos. Parse ku ta esei a pasa ku algun kristian di promé siglo pasobra Apòstel Pablo a skirbi lo siguiente pa e romanonan: “Mi ta bisa kada un di boso pa no pensa mas di su mes di loke ta nesesario; sino pensa di tal manera ku boso ta demostrá ku boso tin sano huisio.” (Rom. 12:3) Pablo a rekonosé ku ta importante pa nos tin un grado di balor propio. Pero, humildat ta yuda nos tin un opinion balansá di nos mes. Den e artíkulo akí, nos lo analisá tres área den kua humildat lo yuda nos evitá di pensa ku nos ta mas importante ku otro persona: (1) nos matrimonio, (2) nos responsabilidatnan den Yehova su organisashon i (3) nos uso di ret sosial.

3. Dikon ta normal ku lo tin desakuerdo den matrimonio, i kon algun kristian ta reakshoná ora esei sosodé?

³ Yehova ke pa esposo i esposa ta felis huntu. Pero komo ku nos tur ta imperfekto, ta normal ku lo tin desakuerdo den matrimonio. De echo, Pablo a skirbi ku “esnan ku kasa lo haña nan ku difikultat.” (1 Kor. 7:28) Algun kristian ta pleita konstantemente ku nan kasá, i nan por yega na e konklushon ku mihó nan no a kasa ku otro. Si nan laga e pensamentu di mundu influensiá nan, nan lo pensa ku e úniko solushon ta divorsio i ku loke ta mas importante ta di buska nan propio felisidat.

4. Ku kiko nos mester tene kuidou?

⁴ Nos mester tene kuidou pa nos no kuminsá pensa ku nos matrimonio lo no funshoná. Nos sa ku e úniko base bíbliko pa divorsio ta inmoralidat seksual. (Mat. 5:32, nota) P’esei, ora nos haña nos ku e difikultatnan ku Pablo a menshoná, nos no mester permití orguyo laga nos pensa: ‘Mi kasá no ta tene kuenta ku mi. Mi no ta hañando e amor ku mi meresé. Kisas lo mi ta mas felis ku un otro hende.’ Bo a ripará ku e enfoke di e pensamentunan ei ta semper riba mi? Segun sabiduria di mundu, bo mester hasi loke bo kurason ta bisa i buska bo felisidat, asta si esei ke men ku bo tin ku divorsiá. Pero, sabiduria di Dios ta bisa bo pa ‘no buska bo mes interes so, ma tambe interes di otro hende.’ (Flp. 2:4) Yehova ke pa bo protehá bo matrimonio, i no pa bo kibr’é. (Mat. 19:6) E ta ferwagt pa bo pensa promé riba loke E ke, i no riba loke abo ke.

5. Di akuerdo ku Efesionan 5:33, kon esposo i esposa mester trata otro?

⁵ Esposo i esposa mester trata otro ku  amor i rèspèt. (Lesa Efesionan 5:33.) Beibel ta siña nos ku ta mihó pa enfoká riba duna ku riba risibí. (Echo. 20:35) Ki kualidat lo yuda un pareha kasá demostrá amor i rèspèt? Humildat. Esposo i esposa ku ta humilde no ta buska nan mes benefisio, sino “esun di e otro persona.”—1 Kor. 10:24.

6. Kiko nos ta siña for di loke Steven ku Stephanie a bisa?

⁶ Humildat a yuda hopi pareha kristian haña mas felisidat den nan matrimonio. Por ehèmpel, un esposo ku yama Steven a bisa: “Si boso ta mira otro komo tim, boso lo traha huntu, spesialmente ora tin problema. En bes di pensa ‘kiko ta mihó pa mi?’ lo bo pensa ‘kiko ta mihó pa nos?’” Su esposa, Stephanie, ta pensa meskos. El a bisa: “Niun hende no ke biba ku un rival. P’esei, ora tin desakuerdo tokante algu, nos ta identifiká e problema. Despues nos ta hasi orashon, purba di haña prinsipio di Beibel ku nos por apliká i papia tokante e asuntu. Nos ta ataká e problema, i no otro.” Sin duda, esposo i esposa lo ta mas felis si nan no pensa ku nan ta mas importante ku nan kasá.

7. Ki aktitut un ruman hòmber mester tin si e haña un asignashon?

⁷ Pa nos, ta un privilegio pa sirbi Yehova den kualke manera posibel. (Sal. 27:4; 84:10) Si un ruman hòmber ta dispuesto pa hasi mas den organisashon di Yehova, e ta hasi algu bon. Beibel mes ta bisa: “Si un hòmber ta hasi esfuerso pa bira un superintendente, e ta deseá un trabou ekselente.” (1 Tim. 3:1) Pero, si e haña un asignashon, e no mester pensa ku e ta masha importante. (Luk. 17:7-10) Su meta mester ta pa sirbi su rumannan ku humildat.—2 Kor. 12:15.

8. Kiko nos ta siña for di e ehèmpelnan di Diótrefes, Uzías i Absalon?

⁸ Beibel ta papia tokante hende ku a pensa ku nan ta masha importante. Diótrefes no tabata modesto; el a purba di ta “na promé lugá” den kongregashon. (3 Huan 9) Uzías a demostrá ku e ta orguyoso ora el a purba di kumpli ku un asignashon ku Yehova a asigná solamente na e saserdotenan. (2 Kró. 26:16-21) Absalon, na un manera sutil, a purba di gana kurason di e pueblo pa e por a bira rei. (2 Sam. 15:2-6) E relatonan ei ta mustra klaramente ku Yehova no ta gusta hende ku ta buska nan mes onor. (Pro. 25:27) Orguyo i ambishon ta hiba solamente na desaster.—Pro. 16:18.

9. Ki ehèmpel Hesus a pone?

⁹ Di otro banda, laga nos wak e ehèmpel ku Hesus a pone. Beibel ta bisa ku “aunke [Hesus] tabata eksistí den forma di Dios, [e] no a pensa mes ku e mester a gara un puesto, esta, ku lo e mester tabata igual ku Dios.” (Flp. 2:6) Despues di Yehova, Hesus ta e persona di mas poderoso. Asina mes, e no a pensa mas di su mes di loke ta nesesario. El a bisa su disipelnan: “Esun ku ta komportá su mes komo esun di mas chikitu meimei di boso tur, esei ta esun ku ta grandi.” (Luk. 9:48) Ta masha dushi pa sirbi huntu ku pionero, sirbidó ministerial, ansiano i superintendente di sirkuito ku ta humilde, meskos ku Hesus! Ora nos komo sirbidó di Yehova ta humilde, nos ta demostrá e amor ku ta identifiká e pueblo di Dios.—Huan 13:35.

10. Kiko bo mester hasi si bo ta haña ku e ansianonan no ta hasi nada tokante e problemanan den bo kongregashon?

 ¹⁰ Kisas den bo kongregashon tin algun problema i bo ta haña ku e ansianonan no ta hasi nada. Kiko bo mester hasi? En bes di keha, sea humilde i apoyá e rumannan ku ta dirigí nos. (Heb. 13:17) Algu ku por yuda bo ta di pensa riba e siguiente preguntanan: ‘E problemanan ku mi ta mira di bèrdat ta asina serio? Esaki ta e momento korekto pa korigí nan? Ta ami ta esun ku mester korigí nan? Si mi ta sinsero ku mi mes, mi ta purba di kontribuí na union den kongregashon òf mi ta buska mi mes onor?’

11. Di akuerdo ku Efesionan 4:2 i 3, kiko lo ta e resultado ora nos ta sirbi Yehova ku humildat?

¹¹ Pa Yehova, humildat ta bal mas ku abilidat, i nos union ta bal mas ku ser produktivo. P’esei, hasi esfuerso pa sirbi Yehova ku humildat. Asina ei, lo bo kontribuí na union den kongregashon. (Lesa Efesionan 4:2, 3.) Den ki manera nos por demostrá humildat? Prediká mas tantu posibel. Buska manera pa sirbi otro ruman i sea amabel ku nan. Mustra hospitalidat na tur ruman, inkluso esnan ku no tin responsabilidat den kongregashon. (Mat. 6:1-4; Luk. 14:12-14) Ora ku bo ta traha ku humildat den kongregashon, otro ruman lo tuma nota no solamente di bo abilidat pero tambe di bo humildat.

12. Kiko Beibel ta bisa tokante amistat? Splika.

¹² Yehova ke pa nos pasa bon den kompania di nos famia- i amigunan. (Sal.  133:1) De echo, Hesus tabatin bon amigu. (Huan 15:15) Ademas, Beibel ta deskribí e benefisionan di tin berdadero amigu. (Pro. 17:17; 18:24) I e ta bisa nos tambe ku no ta bon pa nos isolá nos mes. (Pro. 18:1) Hopi hende ta pensa ku ret sosial ta un manera pa haña hopi amigu i pa no sinti nan isolá. Pero, nos mester tene kuidou ora nos ta usa ret sosial.

13. Dikon algun hende ku ta usa ret sosial por sinti nan solitario i deprimí?

¹³ Algun estudio a mustra ku hende ku ta pasa hopi tempu ta wak potrèt i lesa komentario riba ret sosial despues por sinti nan solitario i deprimí. Dikon? Un motibu kisas ta ku generalmente hende ta pone e mihó potrèt di nan mes, di nan amigunan i di lugá impreshonante ku nan a bai riba ret sosial. Un persona ku ta wak e potrètnan ei por kuminsá pensa ku su bida no ta dje interesante ei i te asta laf. Un ruman muhé di 19 aña a atmití: “Ora m’a wak tur e kosnan leuk ku otro hende ta hasi den wikènt miéntras ami ta laf na kas, m’a sinti mi infelis.”

14. Kon e konseho na 1 Pedro 3:8 ta yuda nos usa ret sosial na un manera sabí?

¹⁴ Ta klaru ku nos por usa ret sosial na un manera bon, por ehèmpel pa keda den kontakto ku famia i amigu. Pero, bo a ripará ku loke algun hende ta pone riba ret sosial ta djis pa impreshoná otro hende? Ta parse ku loke nan ta buska ta pa nan ta e sentro di atenshon. Tin hende asta ta pone komentario ònbeskòp i vulgar riba nan potrèt òf di otro hende. Niun di e kosnan ei no ta kuadra ku e kualidatnan ku nos komo kristian mester kultivá, manera humildat i amor.—Lesa 1 Pedro 3:8.

15. Ki konseho di Beibel ta yuda nos evitá di hasi nos mes parse di ta masha importante?

¹⁵ Si bo ta usa ret sosial, puntra bo mes: ‘E komentario, potrèt òf vidio ku mi ta pone por duna otro hende e impreshon ku mi ta broma? Nan por hasi otro hende yalurs?’ Beibel ta bisa: “Tur loke tin den mundu—deseo di karni, deseo di wowo i kana broma ku loke bo tin—no ta bini di e Tata, sino di mundu.” (1 Huan 2:16)  Un otro vershon di Beibel ta tradusí e ekspreshon “kana broma ku loke bo tin” komo “ke parse di ta importante.” Nos komo kristian no mester sinti nos importante i no mester di atmirashon di otro hende. Nos ta sigui e konseho di Beibel: “Laga nos no konsiderá nos mes demasiado importante, ni instigá kompetensia ku otro ni envidiá otro.” (Gal. 5:26) Si nos ta humilde, nos lo no ser kontaminá ku e spiritu orguyoso di e mundu akí.

16. Dikon nos no mester ta orguyoso?

¹⁶ Nos mester kultivá humildat pasobra hende orguyoso no ta demostrá ku nan tin “sano huisio.” (Rom. 12:3) Hende orguyoso gusta pleita i ta pensa ku nan ta mas importante ku otro hende. Ademas, loke nan ta pensa i hasi generalmente ta hasi tantu nan mes komo otro hende doló. Si nan no kambia nan manera di pensa, Satanas lo siega i korumpí nan mente. (2 Kor. 4:4; 11:3) Di otro banda, un hende humilde tin sano huisio. E tin un punto di bista balansá di su mes i ta rekonosé ku na hopi manera otro hende ta superior na dje. (Flp. 2:3) Anto e sa ku “Dios ta oponé hende orguyoso, ma e ta duna bondat inmeresí na hende humilde.” (1 Ped. 5:5) Un hende ku tin sano huisio lo no ke Yehova komo su enemigu.

17. Kiko nos mester hasi pa nos keda humilde?

¹⁷ Pa nos keda humilde, nos mester apliká e konseho di Beibel pa “kita e personalidat bieu ku su práktikanan, i bisti e personalidat nobo.” Esei ta eksigí hopi esfuerso. Nos mester studia e ehèmpel di Hesus i purba di imit’é mas tantu posibel. (Kol. 3:9, 10; 1 Ped. 2:21) Pero, e esfuerso ei ta bale la pena. Ora nos kultivá humildat, nos bida di famia lo ta mas felis, e kongregashon lo ta mas uní i nos lo sa kon pa usa ret sosial na un manera korekto. I mas ku tur kos, nos lo tin Yehova su bendishon i aprobashon.