1. Kiko nos ke men ku “e bèrdat”?

“KON bo a haña e bèrdat?” “Bo a lanta den e bèrdat?” “Kuantu tempu bo tin den e bèrdat?” Kisas algun ruman a yega di hasi bo e preguntanan ei. Òf kisas abo a yega di hasi nan e preguntanan ei. Pero, kiko nos ke men ku “e bèrdat”? Generalmente, nos ta us’é ora nos ta referí na loke nos ta kere aden, nos manera di adorá Dios i nos manera di biba. Ora nos bisa ku un hende ta “den e bèrdat,” nos ke men ku e sa loke Beibel ta siña i ta respetá su prinsipionan. Komo resultado, e ta liber di siñansa religioso falsu, i e tin e mihó bida ku un hende imperfekto por tin.—Huan 8:32.

2. Di akuerdo ku Huan 13:34 i 35, kiko kisas ta e promé kos ku ta atraé un hende na e bèrdat?

² Kiko ta e promé kos ku a atraé bo na e bèrdat? Kisas ta e bon kondukta di Testigunan di Yehova. (1 Ped. 2:12) Òf kisas ta e amor ku ta eksistí entre nan. Hopi hende ku a bini reunion pa promé biaha kisas no ta kòrda loke a ser bisá, pero nan ta keda kòrda e amor ku nan a mira entre e rumannan. I esei no ta sorprendé nos pasobra Hesus a bisa ku hende lo sa ken ta su disipelnan debí na e amor ku nan tin pa otro. (Lesa Huan 13:34, 35.) Pero si nos ke fe fuerte, nos mester hasi algu mas.

3. Kiko por pasa si nos fe den Dios ta basá solamente riba e amor ku nos rumannan ta demostrá?

³ Nos fe no mester ta basá solamente riba e amor ku kristian berdadero ta demostrá. Dikon nò? Imaginá ku  un ruman den kongregashon—kisas asta un ansiano òf un pionero—kometé un piká grave. Òf si un hende den bo kongregashon ofendé bo. Of si un ruman bira apóstata i bisa ku nos no tin e bèrdat. Kiko lo bo hasi? Lo bo trompeká i stòp di sirbi Yehova? E lès ta: Si bo fe ta basá solamente riba loke otro ruman ta hasi en bes di riba bo amistat ku Yehova, bo fe lo no ta fuerte. Bo fe no mester ta basá riba sintimentu i emoshon; e mester ta basá riba prueba sólido i rasonamentu lógiko. Bo mester proba pa bo mes ku Beibel ta siña e bèrdat tokante Yehova.—Rom. 12:2.

4. Di akuerdo ku Mateo 13:3-6, 20 i 21, kiko ta pasa ku algun hende ora nan haña nan ku prueba?

⁴ Hesus a papia tokante algun hende ku lo a aseptá e bèrdat “ku goso,” pero ku lo a pèrdè nan fe ora nan a haña nan ku problema. (Lesa Mateo 13:3-6, 20, 21.) Kisas nan no a komprondé ku sigui Hesus lo a enserá desafio i difikultat. (Mat. 16:24) Òf kisas nan a pensa ku bida di un kristian lo ta yen di bendishon, sin niun problema. Pero den e mundu imperfekto akí, nos lo haña nos ku problema. Nos sirkunstansia por kambia i esei por kita parti di nos goso pa un tempu.—Sal. 6:6; Ekl. 9:11.

5. Kon mayoria di nos rumannan ta demostrá ku nan ta konvensí ku nan tin e bèrdat?

⁵ Mayoria di nos rumannan ta demostrá ku nan ta konvensí ku nan tin e bèrdat. Dikon nos por bisa esei? Pasobra nada no ta debilitá nan fe, ni ora un ruman ofendé nan òf demostrá kondukta robes. (Sal. 119:165) Ku kada prueba nan fe ta bira mas fuerte, no mas suak. (Sant. 1:2-4) Kiko por yuda bo tin fe fuerte asina?

6. Riba kiko fe di e promé kristiannan tabata basá?

⁶ Fe di e promé kristiannan tabata basá riba nan konosementu di Skritura i siñansa di Hesukristu, esta, riba “e bèrdat ku ta pertenesé na e bon notisia.” (Gal. 2:5) E bèrdat ei ta konsistí di tur loke e kristiannan ei a kere aden, inkluso detaye tokante Hesus su sakrifisio di reskate i su resurekshon. Apòstel Pablo tabata konvensí ku e siñansanan ei tabata bèrdat. Dikon? Pasobra el a usa “loke tabatin skirbí den e Skritura” pa proba “ku Kristu mester a sufri i lanta for di morto.” (Echo. 17:2, 3) E promé kristiannan a aseptá e siñansanan ei i a buska yudansa di spiritu santu pa komprondé Palabra di Dios. Nan a proba pa nan mes ku e siñansanan ei tabata basá riba Skritura. (Echo. 17:11, 12; Heb. 5:14) Nan fe no tabata basá solamente riba sintimentu i emoshon, i nan no a sirbi Yehova djis pasobra nan tabata gusta di ta den kompania di otro kristian. Mas bien, nan fe tabata basá riba “konosementu eksakto di Dios.”—Kol. 1:9, 10.

7. Kon nos fe den e bèrdatnan di Beibel lo yuda nos?

⁷ E bèrdatnan di Beibel no ta kambia nunka. (Sal. 119:160) Por ehèmpel, nan no ta kambia si un ruman a ofendé nos òf kometé piká serio. I nan no ta kambia tampoko ora nos tin problema. P’esei, nos mester konosé e siñansanan di Beibel bon i ta konvensí ku nan ta e bèrdat. Meskos ku un anker ta mantené un boto stabil durante tormenta fuerte, asina tambe nos fe basá riba e bèrdatnan di Beibel lo mantené nos stabil durante  momento difísil. Kiko bo mester hasi pa bo bira mas konvensí ku bo tin e bèrdat?

8. Di akuerdo ku 2 Timoteo 3:14 i 15, kiko ta e kosnan ku a konvensé Timoteo ku e tabatin e bèrdat?

⁸ Timoteo tabata konvensí ku e tabatin e bèrdat. Kon el a yega na e konklushon ei? (Lesa 2 Timoteo 3:14, 15.) Su mama i su wela tabata e proménan ku a siñ’é “e skrituranan santu.” Pero sin duda, e mes tambe a dediká tempu i energia pa studia nan. Tur e faktornan ei a konvensé Timoteo ku nan tabata e bèrdat. Despues, e, su mama i su wela a tende tokante e siñansanan kristian. Sin duda, Timoteo a keda masha impreshoná pa e amor ku tabata eksistí entre e siguidónan di Kristu, i e tabatin un deseo fuerte di ta den kompania di su rumannan i yuda nan. (Flp. 2:19, 20) Sinembargo, su fe no tabata basá riba su amor pa su rumannan, sino riba e echonan ku a fortalesé su amistat ku Yehova. Bo tambe tin ku studia Beibel i yega na konklushon lógiko tokante loke e ta bisa tokante Yehova.

9. Di ki tres bèrdat básiko bo mester konvensé bo mes?

⁹ Pa kuminsá, bo mester konvensé bo mes di por lo ménos tres bèrdat básiko. Promé: Yehova Dios ta Kreador di tur kos. (Éks. 3:14, 15; Heb. 3:4; Rev. 4:11) Di dos: Beibel ta Dios su mensahe pa humanidat. (2 Tim. 3:16, 17) I di tres: Yehova tin un grupo di sirbidó organisá bou di guia di Kristu—Testigunan di Yehova. (Isa. 43:10-12; Huan 14:6; Echo. 15:14) Pa konvensé bo mes di e bèrdatnan básiko ei, bo no mester sa delaster un kos tokante Beibel. Bo meta mester ta pa usa bo “kapasidat di pensa” pa bo bira mas konvensí ku bo tin e bèrdat.—Rom. 12:1.

10. Despues ku nos a konosé e bèrdat, kiko nos mester por?

¹⁰ Unabes ku bo a konvensé bo mes di e tres bèrdatnan básiko tokante Dios, Beibel  i e pueblo di Dios, bo mester por usa Beibel pa proba e bèrdatnan ei na otro hende. Dikon? Pasobra komo kristian, nos tin e responsabilidat di siña e bèrdatnan ku nos a siña na hende ku ke skucha nos. * (1 Tim. 4:16) I segun ku nos ta trata di konvensé otro hende ku loke Beibel ta siña ta e bèrdat, nos fe ta bira mas fuerte.

11. Kon nos por imitá Apòstel Pablo ora nos ta siña otro hende?

¹¹ Apòstel Pablo a siña hende “tantu for di Lei di Moises komo for di buki di e Profetanan, a fin di konvensé nan tokante Hesus.” (Echo. 28:23) Kon nos por imitá Pablo? Ora nos ta siña otro hende, nos mester hasi mas ku djis bisa nan loke Beibel ta siña. Nos mester yuda nos studiantenan di Beibel rasoná a base di Skritura di manera ku nan por hala serka Yehova. Nos no ke pa nan aseptá e bèrdat djis pasobra nan gusta nos amistat, sino pasobra nan a konvensé nan mes ku tur loke nan ta siñando tokante nos Dios ku ta stima nos ta realmente e bèrdat.

12-13. Mayornan, kiko boso por hasi pa yuda boso yunan keda den e bèrdat?

¹² Si bo ta un mayor, sin duda bo ke pa bo yunan keda den e bèrdat. Kisas bo ta pensa ku si nan tin bon amigu den kongregashon, nan lo krese den sentido spiritual. Pero, bon amistat so no ta sufisiente pa bo yunan konvensé nan mes ku nan tin e bèrdat. Nan mester tin un amistat ku Yehova i ta konvensí ku loke Beibel ta siña ta e bèrdat.

¹³ Mayornan, si boso ke siña boso yunan e bèrdat tokante Dios, boso mester ta un ehèmpel pa nan siendo bon studiante di Beibel. Tuma tempu pa meditá riba loke boso ta siña. Asina ei so boso por siña boso yunan pa hasi meskos. Mustra boso yunan kon pa usa nos hèrmènt pa studia Beibel, * meskos ku boso lo hasi ku un studiante. Di e manera ei, boso lo yuda boso yunan stima Yehova i tambe konfia ku e ta usa “e esklabo fiel i prudente” pa yuda nos komprondé Beibel. (Mat. 24:45-47) No keda kontentu ku siña boso yunan e bèrdatnan básiko di Beibel so. Siña nan tambe “e kosnan profundo di Dios,” teniendo na kuenta nan edat i kapasidat, i asina ei nan lo kultivá fe fuerte.—1 Kor. 2:10.

14. Dikon nos mester studia profesia bíbliko? (Wak tambe e kuadro “ Bo Por Splika e Profesianan Akí?”)

¹⁴ Profesia bíbliko ta un parti importante di Palabra di Dios; nan ta yuda nos fe den Yehova bira mas fuerte. Ki profesia a fortalesé bo fe? Kisas bo ta pensa riba esnan tokante “e último dianan.” (2 Tim. 3:1-5; Mat. 24:3, 7) Pero tin otro profesia ku ya a kumpli ku tambe por yuda bo bira mas konvensí. Por ehèmpel, bo por splika kon e profesianan na Daniel kapítulo 2 òf esnan na kapítulo 11 ya a kumpli i te ainda ta kumpliendo? * Si bo fe ta basá kompletamente riba Beibel, lo e no debilitá. Pensa riba e ehèmpel di e rumannan na Alemania ku a ser persiguí durante Segundo Guera Mundial. Aunke e komprondementu dje profesianan tokante e último dianan no tabata masha kla, nos rumannan tabatin fe fuerte basá riba loke nan a siña for di Palabra di Dios.

15-17. Ora gobièrnu nazi a persiguí nos rumannan, kiko a yuda nan perseverá?

¹⁵ Gobièrnu nazi na Alemania a manda míles di nos rumannan kampo di konsentrashon. Tantu Hitler komo un ofisial prominente, Heinrich Himmler, tabata odia Testigunan di Yehova. Un ruman a konta ku Himmler a bisa un grupo di ruman den kampo di konsentrashon: “Bo Yehova por reina den shelu, pero aki riba tera ta nos ta manda! Nos lo mustra boso ken lo dura mas tantu, boso òf nos!” Kiko a yuda e sirbidónan di Yehova keda fiel?

¹⁶ E Studiantenan di Beibel ei tabata sa ku e Reino di Dios a kuminsá goberná na 1914. I e oposishon intenso for di e mundu di Satanas no a sorprendé nan. E pueblo di Yehova tabata konvensí ku niun gobièrnu humano por stroba Yehova di kumpli ku su boluntat. Hilter nunka lo por a kaba ku adorashon berdadero ni  forma un gobièrnu ku por ta mas fuerte ku e Reino di Dios. Nos rumannan tabata konvensí ku, di un manera òf otro, e gobièrnu di Hitler lo yega na su fin.

¹⁷ I nan tabatin rason! No a tarda masha ku e régimen nazi a kaba na nada. Heinrich Himmler—e hòmber ku a bisa “aki riba tera ta nos ta manda”—mester a hui pa su bida. Durante su huida, el a topa ku un hende ku e tabata konosé: Ruman Lübke, kende tabata prezu un tempu. Totalmente derotá Himmler a puntr’é: “Studiante di Beibel, kiko ta bai pasa awor?” Ruman Lübke a splik’é ku Testigunan di Yehova semper tabata sa ku nan lo a haña nan libertat i ku e régimen nazi lo a frakasá. Himmler, kende a bisa asina tantu kos malu tokante Testigunan di Yehova, no por a bisa nada na e momento ei. Poko despues di e enkuentro ei, el a kometé suisidio. Kiko ta e lès? Si nos studia Beibel, inkluso su profesianan, nos lo tin fe fuerte den Dios i lo para firme den tempu di prueba.—2 Ped. 1:19-21.

18. Di akuerdo ku Huan 6:67 i 68, dikon nos mester tin “konosementu eksakto i pleno disernimentu” manera Pablo a skirbi?

¹⁸ Kada un di nos mester demostrá amor; esei ta loke ta identifiká nos komo kristian berdadero. Pero nos mester tin “konosementu eksakto i pleno disernimentu” tambe. (Flp. 1:9) Sino, nos ta kore e riesgo di ser influensiá pa “tur bientu di siñansa . . . di hende ku ta usa triki,” inkluso apóstata. (Efe. 4:14) Den promé siglo, ora hopi disipel a stòp di sigui Hesus, Apòstel Pedro tabata kompletamente konvensí ku Hesus tabatin “e palabranan ku ta hiba na bida eterno.” (Lesa Huan 6:67, 68.) Aunke e tempu ei Pedro no tabata komprondé tur detaye di Hesus su siñansanan, el a keda leal pasobra el a komprondé ku Hesus tabata Kristu. Bo tambe por bira mas konvensí ku loke Beibel ta siña ta e bèrdat. Si bo hasi esei, bo fe lo por wanta kualke prueba, i lo bo por yuda otro hende haña fe fuerte.—2 Huan 1, 2.