Mi a nase na 1954 na St. Paul, Minnesota, Merka. Mi mayornan no tabata ni riku ni pober, i nos tabata katóliko. Ami ta e di dos di sinku yu. Na mucha mi a bai skol katóliko, i mi tabata sirbidó di misa. Apesar di esei, mi no tabata sa mashá di Beibel. Aunke mi tabata kere ku mester tin un Dios ku a krea tur kos, mi a pèrdè tur fe den misa.

Durante e promé aña ku mi tabata studia lei, Testigunan di Yehova a yama na mi kas. Mi tabata labando paña, i e pareha amablemente a bisa ku nan lo bolbe. Ora nan a bini bèk, mi tabatin dos pregunta pa nan: “Dikon bon hende no ta bai dilanti den bida?” i “Kiko nos mester hasi pa nos ta felis?” Mi a tuma e buki E berdad cu ta hiba na bida eterna i un Tradukshon di Mundu Nobo di e Santu Skritura, ku tabatin kaft bèrdè yamativo. Ademas, mi a aseptá un estudio di Beibel. Esei realmente a habri mi wowo. Mi a keda masha impreshoná di sa ku e Reino di Dios ta e úniko gobièrnu ku por resolvé problema di humanidat. Mi a realisá ku tur  e añanan di gobernashon humano tabata un frakaso total, i nan a transformá mundu den un lugá yen di doló, sufrimentu, inhustisia i tragedia.

Na kuminsamentu di 1982, mi a dediká mi mes na Yehova, i mi a batisá algun luna despues na Kongreso “Bèrdat di Reino” ku a ser tené na St. Paul Civic Center. E siguiente siman, mi a bolbe na e edifisio ei pa pasa mi eksamen pa bira abogado. Na kuminsamentu di òktober, mi a haña sa ku mi a slag.

Na Kongreso “Bèrdat di Reino” mi a konosé Mike Richardson. E tabata traha na Bètel na Brooklyn i el a splika mi ku nan a habri un departamento hurídiko na sede mundial. Mi a kòrda e palabranan di e ofisial di Etiopia na Echonan 8:36 i a puntra mi mes: ‘Kiko ta stroba mi di traha na Departamento Hurídiko?’ Pues, mi a yena un aplikashon pa Bètel.

Mi mayornan no tabata masha kontentu ku mi a bira un Testigu di Yehova. Mi tata a puntra mi si mi trabou na Bètel lo tin benefisio pa mi karera komo abogado. Mi a splik’é ku mi trabou lo tabata boluntario i ku lo mi haña 75 dòler merikano pa luna, ku tabata loke e bètelitanan tabata haña.

Despues di kumpli ku mi obligashonnan di trabou, mi a kuminsá ku mi sirbishi na Bètel na Brooklyn, New York, na 1984. Mi asignashon tabata den Departamento Hurídiko. E eksperensia ku mi a haña na mi trabou, a prepará mi pa loke tabata na kaminda.

Na novèmber 1983 e organisashon a kumpra Stanley Theater, ku ta keda na Jersey City, New Jersey. E rumannan a pidi pèrmit pa renobá e edifisio su sistema di elektrisidat i di awa. Ora e rumannan a topa ku funshonario públiko, nan a splika ku Testigunan di Yehova ke usa Stanley Theater komo un lugá pa tene reunion. Esei a kousa un problema. Segun lei di Jersey City tokante kon pa usa edifisio, edifisio religioso mester ta den área residensial so. Pero, komo Stanley Theater tabata den área komersial, e funshonarionan a nenga nos e pèrmitnan. E rumannan a apelá e desishon pero esei a ser rechasá.

Durante mi promé siman na Bètel, e organisashon a hiba e kaso korte. Debí ku mi a kaba di traha dos aña pa korte na St. Paul, Minnesota, mi tabata bon konosí ku e tipo di  kasonan asina. Un di nos abogadonan a bisa ku Stanley Theater a ser usá pa vários evento públiko, for di pasamentu di pelíkula te na ponementu di konsierto di ròk. E ora ei, dikon lo ta ilegal pa pone un evento religioso? Korte a analisá e asuntu i a disidí ku Jersey City no a respetá nos derecho di libertat religioso i a ordená e stat pa duna nos e pèrmitnan nesesario. Mi a kuminsá mira kon Yehova tabata bendishoná e manera ku e organisashon tabata usa medio legal pa e obra sigui padilanti. Mi tabata hopi kontentu ku mi por a partisipá den esei.

E rumannan a kuminsá un proyekto di renobashon grandi. Na 8 di sèptèmber 1985, ménos ku un aña despues ku e renobashon a kuminsá, tabata posibel pa tene graduashon di e 79 klas di Galaad na Stanley Theater. Pa ami, tabata un gran privilegio pa traha pa e Reino komo parti di un tim hurídiko, i esei a hasi mi muchu mas felis ku kualke otro trabou ku mi a hasi komo abogado promé ku mi a bini Bètel. Na e momento ei mi no tabata sa ku Yehova lo a usa mi pa hopi mas kaso hurídiko.

Den e añanan ‘80, dòkter i hospital no tabata respetá derecho di Testigunan di Yehova adulto pa haña tratamentu sin sanger. Pa hende muhé na estado esei tabata un desafio grandi, pasobra hopi biaha hues tabata haña ku hende muhé na estado no tabatin e derecho di nenga transfushon pasobra si e mama muri, e yu ta keda sin su mama.

Riba 29 di desèmber 1988, Ruman Denise Nicoleau a pèrdè hopi sanger despues ku el a duna lus na su yu hòmber. Su hemoglobina a baha bou di 5,0 i su dòkter tabata ke pa e tuma sanger. Ruman Denise a nenga. Siguiente dia, hospital a purba di haña òrdu di korte pa outorisá e dòkternan pa dun’é sanger. Hues a duna hospital e outorisashon ei sin ku a tene un oudiensia ni a informá Ruman Denise ku su esposo di nada.

Djabièrnè 30 di desèmber, hospital a duna Ruman Denise sanger apesar di protesta di su esposo i otro famia ku tabata presente. E anochi ei, vários miembro di famia i algun ansiano a ser arestá. Nan a ser akusá di stroba e personal di hospital di pasa pa duna Ruman Denise transfushon. Djasabra mainta, 31 di desèmber, e rumannan su aresto ya kaba tabata den notisia di New York i Long Island.

Nos a apelá e kaso, i djaluna mainta mi a papia ku Milton Mollen, un hues di Korte Supremo.  Mi a kont’é detaye di e kaso i mi a enfatisá ku e otro hues a firma e òrdu sin tene un oudiensia. Hues Mollen a pidi mi pa bolbe na su ofisina mas atardi pa papia mas tokante e asuntu i e leinan ku ta apliká den e kaso ei. Mi superintendente, Philip Brumley, a kompañá mi bai na e ofisina di Hues Mollen. E hues a pidi e abogado di hospital pa e tambe t’ei. Nos diskushon tabata masha intenso. Dado momento, Ruman Brumley a skirbi un nota pa mi ku tabata bisa: “Baha bo bos.” Esei tabata un bon konseho pasobra den mi esfuerso pa purba di proba ku e abogado di hospital tabata robes, mi tabata birando demasiado agitá.

Despues di mas o ménos un ora, Hues Mollen a bisa ku e kaso lo tabata e promé ku lo e atendé e siguiente dia. Segun ku nos tabata sali for di su ofisina, el a bisa: “E abogado di hospital ei lo tin trabou duru mañan.” Esei a nifiká ku lo no tabata fásil pa e abogado ei proba su kaso. Na e momento ei, mi a sinti ku Yehova tabata bisando mi ku chèns tabata grandi ku nos lo a gana e kaso ei. Tabata maravioso pa mira kon Yehova tabata usa nos pa kumpli ku su boluntat.

Nos a traha te anochi lat pa prepará loke nos lo a bisa e siguiente dia. Komo ku korte tabata djis un par di blòk for di Bètel na Brooklyn, mayoria di e rumannan di Departamento Hurídiko a kana bai einan. Un pènel di kuater hues a skucha nos defensa, i nan a anulá e òrdu di e otro hues. Korte Supremo a dikta na su fabor i a bisa ku ta kontra derecho humano pa firma un òrdu sin skucha punto di bista di e pashènt.

Poko despues, Korte Supremo di New York tambe a bisa ku Ruman Denise tabatin e derecho di haña tratamentu médiko sin sanger. Esei tabata un di e kuater kasonan relashoná ku e kuestion di sanger ku a ser tratá na diferente Korte Supremo di Merka i ku mi tabatin e privilegio di partisipá den dje. (Wak e kuadro “ Viktoria den Korte Supremo.”) Mi a yuda tambe otro abogado di Bètel ku kaso ku tin di haber ku kustodia di yu, divorsio i lei tokante uso di tereno i edifisio.

Ora mi a konosé Dawn, e tabata un mama divorsiá ku tres yu. E tabata traha i tabata pionero. El a pasa den hopi difikultat den bida, i mi a keda masha impreshoná pa su determinashon di sirbi Yehova. Na 1992, nos a asistí na Kongreso di Distrito “Kargadónan di Lus” na New York City, i mi a pidié pa nos konosé otro mihó. Un aña despues nos a kasa, pero mi a sigui traha pa Bètel. Dawn ta un regalo di Yehova, pasobra e ta masha spiritual i e tin un bon sentido di humor. Mi por bisa ku el a hasi bon na mi tur e dianan di nos bida huntu.—Pro. 31:12.

Ora nos a kasa, e muchanan tabatin 11, 13 i 16 aña. Mi tabata ke ta un bon tata pa nan, pues mi a tuma tempu pa lesa i apliká tur loke mi a haña den nos publikashonnan tokante ser un tata di kriansa. Durante e añanan tabatin algun desafio, pero mi ta masha kontentu ku e muchanan a aseptá mi komo nan amigu ku nan ta konfia i nan tata ku ta stima nan. E amigunan di nos yunan semper tabata bon biní na nos kas, i nos tabata gusta di tin e tinernan yen di energia ei rònt di nos.

Na 2013, ami ku Dawn a muda pa Wisconsin pa kuida nos mayornan di edat. Pa mi sorpresa, mi sirbishi na Bètel no a terminá. Nan a pidi mi pa sigui yuda nos organisashon den vários kaso hurídiko.

Na sèptèmber 2018, mi a nota ku tabatin algu straño ku mi garganta. Mi dòkter a eksaminá mi, pero e no por saka afó kiko tabata e problema. Mas despues, un otro dòkter a sugerí pa mi bai serka un neurólogo. Na yanüari 2019, e neurólogo a bisa mi ku kisas mi tabatin un malesa ku no ta masha komun, i ku tempu lo e afektá henter mi kurpa.

Tres dia despues, mi a bai skats riba eis i mi a kai kibra mi pòls drechi. Henter mi bida mi tabata skats i mi tabata bon den dje. Pues, mi a realisá ku mi tabata pèrdiendo mi abilidat di kontrolá mi moveshonnan. Mi a keda sorprendí kon lihé e malesa a empeorá i a bira mas i mas difísil pa mi papia, move i asta guli.

Tabata un privilegio pa usa mi eksperensia komo abogado pa yuda promové interes di Reino. I tabata un privilegio pa skirbi hopi artíkulo den revista profeshonal i di a duna charla na seminario médiko hurídiko rònt mundu. Na e okashonnan ei, mi por a defendé e derecho di e pueblo di Yehova di skohe tratamentu médiko i operashon sin sanger. Asina mes, mi ta di akuerdo ku loke Lukas 17:10 ta bisa: ‘Mi ta esklabo ku no ta sirbi pa nada. Loke mi a hasi ta loke mi tabatin deber di hasi.’