Hesus a bira Sumo Saserdote na momento ku el a batisá na aña 29 di promé siglo. Kon nos por sa esei? Wèl, na momento ku el a batisá el a demostrá ku e tabata dispuesto pa sakrifiká su bida riba e altar simbóliko ku a representá Dios su “boluntat.” (Gal. 1:4; Heb. 10:5-10) E altar simbóliko ei a kuminsá eksistí despues ku Hesus a batisá. Den pasado, altar tabata un parti importante di tèmpel. P’esei, nos por bisa ku e gran tèmpel spiritual a kuminsá eksistí na momento ku Hesus a batisá. E gran tèmpel spiritual di Yehova ta representá tur loke ta permití nos ador’é na e manera korekto a base di e sakrifisio di Hesus.—Mat. 3:16, 17; Heb. 5:4-6.

Meskos ku e tèmpel den pasado tabatin mester di un sumo saserdote, e gran tèmpel spiritual tambe tabatin mester di un. Pa kumpli ku e tarea ei, Yehova a ungi Hesus “ku spiritu santu i ku poder.” (Echo. 10:37, 38; Mar. 1:9-11) Pero, kon nos sa ku Hesus a ser apuntá komo Sumo Saserdote promé ku su morto i resurekshon? Nos ta yega na e konklushon ei ora nos analisá e ehèmpel di Aron i di e sumo saserdotenan despues di dje.

E Lei ku Yehova a duna Moises a bisa ku ta solamente e sumo saserdote por a drenta Santísimo di e tabernakel i, mas despues, Santísimo di e tèmpel. Un kortina a separá Santísimo for di Lugá Santu. E sumo saserdote tabata pasa dor di e kortina ei solamente riba Dia di Ekspiashon. (Heb. 9:1-3, 6, 7) Aron i su susesornan a ser apuntá komo sumo saserdote promé ku nan a pasa “dor di e kortina” literal di e tabernakel. Asina tambe, Hesus mester a ser apuntá komo Sumo Saserdote di e gran tèmpel spiritual di Yehova promé ku el a muri; anto despues el a pasa “dor di e kortina, es desir, su karni” pa biba den shelu. (Heb. 10:20) P’esei, Apòstel Pablo a skirbi ku Hesus “a bini komo un sumo saserdote” i despues “a drenta e tènt mas grandi i mas perfekto, no trahá pa man di hende” anto kaba a drenta “shelu mes.”—Heb. 9:11, 24.

Tin diferensia entre e momento ku e pakto nobo a bira bálido i e momento ku el a ser inougurá?

Nò. Dikon nò? Pasobra pa balidá, òf legalisá, e pakto ei tabata nesesario pa dal tres paso. E mesun pasonan ei tambe lo a inougurá e pakto, esta, lag’é drenta na vigor. Kiko e pasonan ei tabata?

Promé, Hesus a presentá dilanti Yehova. Di dos, el a ofresé e balor di su sakrifisio. Anto di tres, Yehova a aseptá e balor di Hesus su sanger dramá. E pakto nobo a kuminsá funshoná despues ku a dal tur tres paso.

Beibel no ta spesifiká na ki momento Yehova a aseptá e balor di Hesus su sakrifisio. Pues, nos no por bisa ku eksaktitut na ki momento e pakto nobo a bira bálido i a drenta na vigor. Pero loke sí nos sa ta ku Hesus a subi na shelu dies dia promé ku Pentekòste. (Echo. 1:3) Dado momento durante e periodo kòrtiku ei, el a presentá e balor di su sakrifisio i Yehova a asept’é. (Heb. 9:12) Loke a sosodé na Pentekòste ta un prueba kla i visibel ku e pakto nobo a kuminsá funshoná na e momento ei.—Echo. 2:1-4, 32, 33.

Komo resúmen, e pakto nobo a bira bálido i a ser inougurá despues ku Yehova a aseptá e balor di Hesus su sanger dramá i a hinka e ungínan den e pakto ei. Na e momento ei, e pakto, kual su Mediador ta Sumo Saserdote Hesus, a kuminsá funshoná.—Heb. 7:25; 8:1-3, 6; 9:13-15.