“Ora mi primu a kuminsá pleita ku mi, mi a kohe na su garganta i kuminsá chok’é. Mi tabata kla pa mat’é.”—Paul.

“Na mi kas, mi tabata eksplotá pa delaster un kos chikitu. Tur loke tabata den mi kaminda, mi tabata dal kibra, muebel, ko’i hunga, etcetera.”—Marco.

Kisas nos no a yega na e ekstremonan menshoná ei. Pero bo no ta di akuerdo ku, tin biaha, ta difísil pa dominá bo mes? Wèl, e motibu prinsipal dikon ta difísil pa dominá nos mes ta pasobra nos a heredá piká for di Adam. (Rom. 5:12) Pa algun hende, manera Paul i Marco, ta un desafio pa dominá nan rabia. Otro hende tin difikultat pa dominá nan pensamentunan. Nan ta laga miedu òf otro pensamentu negativo dominá nan. Anto tin otro hende kisas tin difikultat pa resistí e deseo pa kometé inmoralidat seksual, pa hasi mal uso di alkohòl òf pa usa droga.

Hende ku no dominá nan pensamentu, deseo i manera di reakshoná por daña nan bida. Pero nos por evitá esei. Kon? Kultivando un di e aspektonan di “fruta di spiritu”: dominio propio. (Gal. 5:22, 23) Pa yuda nos ku esei, nos lo analisá tres pregunta: (1) Kiko dominio propio ta? (2) Dikon e ta importante? (3) Kon nos por kultiv’é? Despues nos lo mira kiko nos por hasi si, tin biaha, nos no tin dominio propio.

Un hende ku tin dominio propio no ta reakshoná riba kada impulso. Mas bien, e ta dominá su mes pa no bisa ni hasi nada ku ta desagradá Dios.

Hesus a demostrá loke dominio propio ta enserá: “Ora nan tabata insult’é, e no a insultá bèk. Ora e tabata sufri, e no a menasá, ma a laga su mes na enkargo di esun ku ta husga ku hustisia.” (1 Ped. 2:23) Hesus tabatin e dominio propio ei ora su enemigunan a hasi chèrchi di dje ora e tabata kologá na staka. (Mat. 27:39-44) Mas promé, el a demostrá dominio propio ora lider religioso a hasié yen di pregunta pa purba di koh’é den trampa ku su mes palabranan. (Mat. 22:15-22) I ora sierto hudiu rabiá a kohe piedra pa dal e kuné, e no a tuma vengansa. El “a skonde i sali bai for di tèmpel.”—Huan 8:57-59.

Ta posibel pa nos imitá Hesus su ehèmpel? Sí, te na un sierto grado. Apòstel Pedro a skirbi: “Kristu . . . a sufri pa boso, lagando un ehèmpel pa boso sigui su pasonan fielmente.” (1 Ped. 2:21) Aunke nos ta imperfekto, nos por sigui Hesus su ehèmpel i demostrá dominio propio. Dikon ta asina importante pa nos tin e kualidat ei?

Si nos ke agradá Yehova, nos mester tin dominio propio. Aunke nos tin hopi aña ta sirbi Yehova, nos por pèrdè nos amistat kuné si nos no kontrolá loke nos ta hasi i bisa.

Pensa riba e kaso di Moises. E tabata “masha humilde, mas ku tur hòmber ku tabatin riba superfisie di tera” e tempu ei. (Num. 12:3) Despues di vários dékada ta soportá ku pasenshi reklamo di e israelitanan, Moises no por a dominá su mes mas. El a rabia ora e pueblo a bolbe reklam’é tokante falta di awa. Tur rabiá el a bisa nan: “Skucha awor, boso rebeldenan; nos mester hasi awa sali for di e baranka akí pa boso?”—Num. 20:2-11.

Moises no a dominá su mes. E no a duna Yehova e onor pa e awa ku a sali milagrosamente for di e baranka. (Sal. 106:32, 33) P’esei, Yehova no a lag’é drenta Tera Primintí. (Num. 20:12) Probablemente te na e lastu dia di Moises su bida, a duel e ku e no a ehersé dominio propio.—Deu. 3:23-27.

Ki lès nos por siña? Aunke ku nos ta sirbi Yehova pa hopi tempu, nunka nos mester papia ku falta di rèspèt ku un hende ku a iritá nos òf ku mester di korekshon. (Efe. 4:32; Kol. 3:12) Segun ku edat ta subi i nos krekechénan ta oumentá, ta difísil pa nos demostrá pasenshi na sierto momento. Pero kòrda riba Moises. No permití un momento di falta di dominio propio daña nos bon reputashon ku Yehova. Kon nos por kultivá e kualidat asina importante ei?

Pidi Yehova pa spiritu santu. Dikon? Pasobra dominio propio ta un aspekto di fruta di Dios su spiritu santu, i Yehova ta duna su spiritu santu na esnan ku pidié. (Luk. 11:13) Pa medio di Yehova su spiritu santu, E por duna nos e poder ku nos mester. (Flp. 4:13) E por yuda nos kultivá tambe otro aspekto di fruta di spiritu ku ta fortalesé nos dominio propio, manera amor.—1 Kor. 13:5.

Evitá tur kos ku por stroba bo di ehersé dominio propio. Por ehèmpel, keda leu for di website òf entretenimentu ku ta promové kondukta robes. (Efe. 5:3, 4) De echo, nos tin ku evitá tur kos ku por hinka nos den tentashon pa hasi kos robes. (Pro. 22:3; 1 Kor. 6:12) Por ehèmpel, si un hende  ta lucha kontra deseo inmoral, lo ta mihó pa e evitá tur buki i pelíkula romántiko.

Kisas nos ta haña ku ta difísil pa sigui e konseho ei. Pero, si nos realmente hasi esfuerso, Yehova lo duna nos e poder ku nos mester pa dominá nos mes. (2 Ped. 1:5-8) Lo e yuda nos dominá loke nos ta pensa, bisa i hasi. Paul i Marco, menshoná anteriormente, ta prueba di esei. Nan a siña dominá nan personalidat violento. Wak e ehèmpel tambe di un otro ruman, ku tin kustumber di rabia ku otro shofùr i te asta zundra nan. Kiko el a hasi pa e por tin mas dominio propio? El a bisa: “Tur dia mi tabata hasi orashon ferviente. Mi tabata studia artíkulo tokante dominio propio i purba di kòrda teksto bíbliko for di kabes. Aunke mi tin un par di aña ta purba di mehorá, tur mainta mi ta kuminsá mi dia bisando mi mes: ‘Mi meta awe ta pa keda kalmu.’ I ora mi tin afsprak, mi ta sali trempan. Asina ei mi ta evitá ku mi ta haña strès den tráfiko.”

Sa sosodé ku tin biaha nos ta keda sin ehersé dominio propio. Ora esei pasa, kisas nos tin bèrgwensa di hasi orashon na Yehova. Pero ta na e momentonan ei nos mester hasi mas orashon. P’esei, hasi orashon mesora na Yehova. Rog’é pa e pordoná bo i yuda bo. Sea determiná pa no kometé e mesun eror. (Sal. 51:9-11) Yehova lo no ignorá bo orashon sinsero pa pordon. (Sal. 102:17) Apòstel Huan ta kòrda nos ku e sanger di Dios su Yu “ta limpia nos di tur piká.” (1 Huan 1:7; 2:1; Sal. 86:5) Kòrda tambe ku Yehova mes ta bisa nos pa pordoná otro bes tras bes. Pues, no duda ku lo e hasi meskos pa bo.—Mat. 18:21, 22; Kol. 3:13.

Yehova a bira masha tristu ora Moises no a ehersé dominio propio den desierto. Sinembargo, Yehova a pordon’é. I Palabra di Dios ta referí na Moises komo un di e mihó ehèmpelnan di fe. (Deu. 34:10; Heb. 11:24-28) Yehova no a laga Moises drenta Tera Primintí, pero lo e ta kontentu di risibié den Paradeis aki riba tera i dun’é e oportunidat di biba pa semper. I Yehova ta ofresé e mesun oportunidat ei na tur hende ku ta hasi esfuerso pa demostrá e kualidat importante di dominio propio.—1 Kor. 9:25.