Dikon Tin Asina Tantu Odio?
Dikon tin asina tantu odio den mundu awe? Pa haña sa e kontesta, nos tin ku komprondé kiko odio ta, dikon hende ta kuminsá odia otro hende i dikon tin odio tur kaminda.
Kiko Odio Ta?
Odio ta un sintimentu profundo di disgustu òf rabia pa un persona òf grupo di hende. E no ta djis un sintimentu di rabia temporal; e ta un sintimentu ku ta persistí.
DIKON UN PERSONA TA KUMINSÁ ODIA OTRO HENDE?
Tin vários motibu. Hopi bes, un persona ta kuminsá odia otro hende no pa motibu di loke nan a hasi, sino pa motibu di ken nan ta. Kisas nan ta odia e hendenan ei, pasobra nan ta pensa ku e hendenan ei ta malbado òf peligroso, i ku nan no por kambia. Nan por mira hende ku nan ta odia komo inferior, un menasa i e kousa di nan problemanan. Un persona ku ta odia otro hende kisas tambe a yega di ta víktima di violensia, inhustisia òf algu otro ku a pone e persona kultivá un rabia profundo.
DIKON TIN ODIO TUR KAMINDA?
Un persona por odia hende ku nunka e no a yega di konosé. Por ehèmpel, sin ku un persona sa, e por adoptá e punto di bista di hende ku e ta respetá òf di su famia- i amigunan. P’esei, si un persona kuminsá odia un grupo di hende, mas hende por adoptá su punto di bista, i nan tambe ta kuminsá odia e grupo di hende ei.
Ora nos komprondé kon fásil ta pa un persona influensiá un otro persona pa kuminsá odia un grupo di hende, e ora ei nos ta komprondé dikon mundu ta yen di odio. Sinembargo, pa vense odio nos mester haña sa kon odio a kuminsá. Beibel por yuda nos ku esei.
BEIBEL TA BISA NOS KON ODIO A KUMINSÁ
NO TA HENDE A KUMINSÁ ODIA PROMÉ. Odio a kuminsá ora un angel den shelu a rebeldiá kontra Dios. Na e momento ei, el a ser yamá Satanas e Diabel. Diabel “tabata un matadó for di kuminsamentu” di su rebelion. E ta “un gañadó i e tata di mentira,” i el a sigui promové odio i violensia. (Huan 8:44; 1 Huan 3:11, 12) Segun Beibel, Satanas ta malisioso, rabiá i agresivo.—Yòb 2:7; Revelashon 12:9, 12, 17.
DI NATURALESA, HENDE IMPERFEKTO TIN E INKLINASHON PA ODIA OTRO HENDE. E promé hòmber, Adam, a sigui Satanas su rebelion. Komo resultado, tur hende a heredá piká i imperfekshon. (Romanonan 5:12) Adam su promé yu hòmber, Kain, a mata su mes ruman hòmber Abel pa motibu di odio. (1 Huan 3:12) Ta bèrdat ku awe tin hopi hende ku ta mustra amor i kompashon. Pero, komo ku tur hende a heredá piká, hopi hende ta egoista, envidioso i orguyoso. E kualidatnan ei ta hiba na odio.—2 Timoteo 3:1-5.
INTOLERANSIA TA HIBA NA MAS ODIO AINDA. E mundu ku nos ta biba aden ta fomentá odio dor di promové aktitut i komportashon di hende ku ta sin miserikòrdia i ku ta kousa otro daño. Intoleransia, prehuisio, palabra ofensivo, tèrmentu i vandalismo ta sigui bira mas popular pasobra “henter mundu ta den poder di e Malbado,” Satanas e Diabel.—1 Huan 5:19.
Sinembargo, Beibel ta hasi mas ku djis bisa nos kon odio a kuminsá. E ta mustra nos tambe kiko ta e solushon.
Otro Artíkulo Interesante
PREGUNTA KU BEIBEL TA KONTESTÁ
Ta Dios A Krea Diabel?
Di unda Satanas a bini? Haña sa dikon Hesus a bisa ku Diabel “no a keda firme den e bèrdat.”
PREGUNTA KU BEIBEL TA KONTESTÁ
Kiko Tabata e Promé Piká?
Adam i Eva a desobedesé Dios i a pasa nan kondishon pekaminoso, meskos ku un malesa genétiko, pa tur nan desendientenan.
