Delphine, ku nos a menshoná den e artíkulo anterior, a sinti ku su preokupashonnan tabata lanta su deseo pa bebe di mas. Beibel no ta kondená uso moderá di alkohòl, pero e ta bisa: “No anda ku esnan ku ta gusta dal nan biña.” (Proverbionan 23:20) Bebementu di mas por hiba na problema serio di salú, e por kibra òf daña relashon, i tur aña, miónes di hende ta muri sin ta na nodi. Hende por evitá hopi di e problemanan akí si nan sigui e konsehonan sabí di Beibel.

Delphine a hasi esei. Awor e ta bisa: “Mi a realisá ku alkohòl no tabata yuda mi ku mi ansiedat. Mi a apliká e palabranan sabí di Filipensenan 4:6, 7 ku ta bisa: ‘No sea anshá tokante nada; mas bien . . . laga Dios sa kiko ta boso petishonnan.’ Tur anochi ora mi tabata sinti ku ansiedat tabata ataká mi i yen kos tabata keda pasa den mi mente, mi tabata roga Yehova i kont’é tur mi sintimentunan, inkluso mi rabia, doló i desesperashon. Mi tabata suplik’é p’e yuda mi haña manera pa mi sinti mas positivo. Mainta ora mi lanta, mi tabata hasi sigur ku mi a deshasí di e sintimentunan ei di bèrdat. E kustumber di hasi orashon a yuda mi konsentrá riba loke mi tin i no riba loke mi no tin. Mi a skohe pa nunka mas bebe alkohòl. E pas ku mi a haña tabata asina presioso, ku mi no por a riska pèrd’é.”

Inmoralidat ta un di e kousanan prinsipal di doló di kurason i problema grandi den bida. Pero e prinsipionan di Beibel por yuda nos evitá e tipo di problemanan ei. Beibel ta menshoná algun di e kosnan prinsipal ku ta hiba na inmoralidat, por ehèmpel flirtmentu inapropiá i pornografia. Un hóben ku yama Samuel ta konta: “Tabata hopi fásil pa flirt. Tin bes mi no tabata sinti mi ni atraí na e persona, pero mi tabata sa ku e sí gusta mi, i esei tabata lanta mi gana di flirt kuné.” Hende tabata akusá Samuel di a flirt asina tantu, ku asta ora e no tabatin intenshon di flirt, el a disidí di flirt djis pa malu numa. Pero e kos ei a preokup’é. Awor e ta bisa: “E kos ei ta malu pasobra e ta desaroyá tendensia masha egoista den bo.”

Samuel a lesa un artíkulo pa hóben riba e website jw.org i a pensa riba loke Proverbionan 20:11 ta bisa: “Te asta un mucha ta konosí pa su echonan, si su kondukta ta puru i rekto.” Kon e teksto ei a yud’é? Samuel a realisá ku su flirtmentu no tabata ni puru ni rekto. Awor e ta bisa: “Mi a siña ku un hóben ku ta flirt ta desaroyando kualidatnan ku lo hasié un mal kasá. Mi a kuminsá pensa kon mi futuro esposa lo sintié si e mira mi ta flirt ku un otro hende muhé. Esei a laga mi realisá ku e kos ei ta malu. E echo ku flirtmentu ta fásil no ke men ku e ta bon.” Samuel a kambia. Ora ku el a stòp ku flirtmentu, esei a yud’é evitá inmoralidat tambe.

Antonio tabata den un peliger asta mas grandi. E tabata adikto na pornografia. Maske e tabata kasá ku un señora ku e ta stima mashá, kada bes e tabata entregá na pornografia. El a bisa ku el a pensa riba 1 Pedro 5:8 i esei a yud’é di bèrdat. E ta bisa: “Mantené boso sano huisio i sea alerta. Boso atversario, Diabel, ta kana rònt manera un leon ku ta grita, buskando ken e por habraká.” Antonio ta bisa: “Tin imágen pornográfiko tur kaminda den e mundu akí, i nan por keda pegá den nos mente. E teksto ei a ègt yuda mi pensa riba e fuente di e tentashonnan ei. Mi mester a siña kòrda mi mes ku imágen pornográfiko ta bini di un fuente despresiabel, esta Diabel. Awor mi sa ku ta Yehova so por yuda mi ‘mantené mi sano huisio i keda alerta’ di manera ku mi por bringa e kosnan ku ta ataká mi mente, kurason i matrimonio.” Antonio a risibí e yudansa ku e tabatin mester i awor por fin e no ta wak pornografia mas. Esei a yud’é evitá otro problema mas grave.

Klaramente, Beibel ta duna konseho práktiko ku por yuda nos evitá problema grave. Pero kiko di problema ku a krea rais kaba i ku no ke disparsé? Laga nos wak kon e Palabra di Dios por yuda nos resolvé e tipo di problemanan akí.