Rosie ta bisa: “Mi tabata preokupá henter ora. Den mi kabes mi tabata mira mi problemanan mas grandi ku nan ta den realidat i semper mi tabata imaginá e pió kos ku por sosodé.” Kua tekstonan a yud’é? Un di nan ta Mateo 6:34: “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.” Awor Rosie ta bisa ku e palabranan ei di Hesus a yud’é stòp di preokupá tokante loke lo por sosodé mañan. Rosie ta sigui bisa: “Mi tabatin sufisiente problema kaba. Pakiko wòri tokante kos ku no a sosodé i ku probablemente lo no sosodé tampoko?”

Yasmine tambe a kuminsá sinti ku ansiedat ta tumando kontrol di su bida. E di: “Mi tabata yora vários biaha pa siman, i tin bes mi no por a drumi anochi. Pensamentunan negativo tabata kaba ku mi.” Kua teksto a yud’é? El a menshoná 1 Pedro 5:7: “Tira tur boso inkietut riba [Dios], pasobra e ta interesá den boso.” Yasmine ta bisa: “Mi a sigui hasi orashon i Yehova a kontestá mi orashonnan. Mi a sinti komo si fuera un karga pisá a wòrdu kitá for di mi lomba. Tempu-tempu, mi pensamentunan negativo sa bolbe, pero awor mi sa kon pa dil ku nan.”

Un hóben ku yama Isabella ta bisa: “Ami kier sa ku mi ta buska èksküs pa posponé kos pasobra e ta algu genétiko; mi tata tambe ta hasié. Mi ta keda sin hasi kos importante pa mi por keda sin hasi nada; mi ta djis rilèks i wak televishon. E kos ei ta un mal kustumber, pasobra e ta duna bo mas strès i pone ku bo no ta hasi nada bon.” Un prinsipio ku a yuda Isabella ta esun na 2 Timoteo 2:15, ku ta bisa: “Hasi tur bo esfuerso pa presentá bo mes na Dios komo un hende aprobá, un trahadó ku no tin nada di tene bèrgwensa di dje.” Isabella ta bisa: “Mi no tabata ke pa Yehova sinti bèrgwensa di mi trabou djis pasobra mi a laga pa despues loke mi por a hasi mesora.” El a mehorá hopi.

Kelsey ta bisa meskos: “Mi tabatin un proyekto ku mester a keda kla un sierto fecha pero mi tabata hasié te último momento. Mi tabata yora, pèrdè soño i preokupá. E kos ei no tabata bon pa mi.” Kelsey a haña yudansa na Proverbionan 13:16: “Tur hende prudente ta trata ku konosementu, ma un bobo ta manifestá lokura.” El a splika loke e teksto akí a siñ’é despues ku el a meditá riba dje: “Ta sabí pa ta práktiko i plania delantá. Awor mi ta skirbi mi skèdjel di trabou di kosnan pendiente den un skref riba mi lèsenar, i esei ta yuda mi plania sin laga nada te último momento.”

Kristen ta konta: “Mi esposo a bai laga mi ku kuater yu chikitu.” Kua prinsipio bíbliko a yud’é? Proverbionan 17:17 ku ta bisa: “Un amigu ta stima tur ora bai, i un ruman ta nasí pa tempu di atversidat.” Kirsten a buska yudansa den kongregashon. Kiko el a haña? “Mi amigunan a rondoná mi den diferente manera! Algun a laga saku di kompras i flor na mi porta di kas. Tres bes henter un trupa di ruman a yuda ami ku mi yunan muda. Un hende a yuda mi haña trabou. Mi amigunan semper tabat’ei pa mi.”

Delphine, ku nos a menshoná un ratu pasá, tambe a lucha ku soledat. Despues ku el a pèrdè tur kos, e ta konta: “Mi a sinti komo si fuera tur hende tabata bibando nan bida huntu miéntras ku ami tabata mi so i infelis.” Un teksto ku a yud’é ta Salmo 68:6: “Dios ta proveé un kas pa e solitario.” E ta splika: “Mi tabata sa ku e teksto no tabata ke men djis un kas literal awor akí. Mas bien, mi a bin komprondé ku Dios ta ofresé nos un kas spiritual, un lugá di berdadero siguridat kaminda bo por haña berdadero amistat i yudansa emoshonal serka hende ku ta stima Yehova. Pero mi tabata sa ku lo mi no por hala serka hende si mi no hala serka Yehova promé. Pues, Salmo 37:4 a yuda mi ku esei: ‘Deleitá bo mes den SEÑOR, i e lo duna bo e deseonan di bo kurason.’”

E ta konkluí: “Mi a realisá ku mi mester pega mas firme na Yehova. E ta e mihó amigu ku un hende por tin. Despues mi a traha un lista di aktividat ku lo mi por disfrutá di dje ku otro hende, di manera ku mi por forma amistat ku hende ku tambe ta stima Yehova. Mi a siña mira e bon den otro hende i trata nan komo si fuera ta kos bon so mi por mira den nan.”

Ta klaru ku amigunan ku ta sirbi Dios tambe ta imperfekto. Testigunan di Yehova ta lucha ku problema meskos ku tur otro hende. Pero e siñansanan di Beibel ta motivá hende pa yuda otronan ki ora ku ta posibel. Ta sabí pa haña amistat asina. Sin embargo, prinsipionan di Beibel por yuda nos tambe ku problema ku no tin solushon aktualmente, manera por ehèmpel malesa króniko i tristesa?