Historia di Bida

Cordando Riba Nos Creador For di Nos Hubentud Padilanti

SEGUN E RELATO DI DAVID Z. HIBSHMAN

“Si e fin di mi bida yega, mi ta spera di curason cu mi tabata fiel na Jehova. Mi ta rogu’é p’e cuida mi casá, David. Jehova, danki pa mi casá i tambe pa nos matrimonio. E ta asina maraviyoso, i nos ta asina felis!”

IMAGINA bo ki emocioná mi a keda ora cu despues di a dera mi casá na mart 1992, mi a haña e último frasenan aki den su dagboek. Djis un cincu luna promé, nos a celebrá Helen su di 60 aniversario den e ministerio di tempu completo.

Cla-cla mi ta corda e dia na 1931 cu ami cu Helen a sinta banda di otro n’e congreso na Columbus, Ohio, Merca. Helen no tabatin ni sikiera 14 aña, pero e tabatin mas aprecio p’e balor dje evento cu ami tabatin. Helen su entusiasmo a keda manifestá djis despues ora e cu su mama, kende tabata un biuda, a bira pionero, manera ta yama evangelisadó di tempu completo entre Testigonan di Jehova. Nan a bandoná nan cas confortabel pa bai predicá den áreanan rural den e parti zuid di Merca.

Mi Herencia Spiritual

Na 1910, mi mayornan a muda huntu cu nan dos yunan chikitu, di oost Pennsylvania bai Grove City, n’e parti west dje estado. Einan, nan a haci e pago inicial riba un cas modesto i nan a bira miembro activo di Iglesia Reformá. Djis despues di esei, nan a haña bishita di William Evans, un Studiante di Bijbel, manera tabata yama Testigonan di Jehova e tempu ei. Tata cu n’e tempu ei tabatin solamente 20 i picu aña, i Mama, kende tabata cincu aña mas yong, a scucha e homber gales amabel aki i a invit’é pa come. No a dura mashá, cu nan a aceptá e berdadnan bíblico cu nan tabata siña.

Pa ta mas cerca dje congregacion, Tata a muda cu e famia un 40 kilometer bai e stad Sharon. Algun  luna despues, sea ta den 1911 of 1912, Tata cu Mama a bautisá. Charles Taze Russell, e promé presidente di Sociedad Watch Tower, a duna e discurso di bautismo. Mi a nace dia 4 di december 1916 tempu cu mi mayornan tabatin cuater yu caba. Ora mi a nace, e anuncio tabata: “Un otro ruman homber pa ser stimá.” P’esei, mi nomber ta David, cu ta nificá: “Esun stimá.”

Ora mi tabatin cuater luna bieu, nan a hiba mi, mi promé congreso. E tempu ei, mi tata cu mi ruman hombernan tabata cana vários kilometer pa bai e reunionnan di congregacion miéntras cu Mama tabata bai cu ami i mi ruman muher den tram. E reunionnan tabata consistí di sesion di mainta i di atardi. Na cas, hopi bes combersacionnan tabata concentrá riba artículonan den E Toren di Vigilancia i E Epoca di Oro, un nomber cu Spierta! tabatin promé.

Nos A Saca Beneficio for di Ehempelnan Excelente

Hopi peregrino, manera tabata yama oradornan biahero e tempu ei, a bishitá nos congregacion. Generalmente nan tabata keda un of dos dia huntu cu nos. Un orador cu semper a keda den mi memoria ta Walter J. Thorn. El a corda riba su Magnífico Creador ‘den e dianan di su hubentud.’ (Eclesiástes 12:1) Ora mi tabata chikitu, mi tabata compañá mi tata ora e tabata mustra e hendenan e “Foto-Drama di Creacion,” un presentacion di potret i grabacion tocante e historia di humanidad cu a consistí di cuater parti.

Aunke ruman Evans cu su casá, Miriam, no tabatin yu, nan a bira mayor i welanan spiritual di nos famia. Semper William tabata yama Tata “Yu,” i e cu Miriam a implantá e spiritu di evangelisá den nos famia. Na principio di siglo 20, ruman Evans a biaha bai Wales bek pa introducí berdad bíblico den e área rondó di Swansea. Einan e tabata conocí como e predicadó di Merca.

Na 1928, ruman Evans a kita for di trabou i a cuminsá predicá den e cerunan di West Virginia. Mi dos ruman hombernan mas grandi, Clarence di 21 aña i Carl di 19 aña, a compañ’é. Nos tur cuater ruman homber a dedicá hopi aña den e ministerio di tempu completo. De facto, nos tur a sirbi como superintendente biahero di Testigonan di Jehova durante nos hubentud. No masha tempu pasá, Mama su ruman muher di mas chikitu, Mary, kende awor sigur ta den su 90 i picu aña, a skirbi mi: “Esta gradicidu nos tur ta cu ruman Evans tabatin celo p’e ministerio i cu el a bishitá Grove City!” Tanchi Mary ta un otro persona cu a corda su Creador for di su hubentud.

Asistiendo na Congresonan

Tata cu Clarence so por a bai e congreso di 1922 cu a marca historia na Cedar Point, Ohio. Sin embargo, rond di 1924, nos a haña auto i henter nos famia a bai e congreso na Columbus, Ohio. Mi a mayornan a spera cu nos, e muchanan, lo a usa nos mes cen di spar pa cumpra cuminda durante e ocho dianan di congreso. Mi mayornan su punto di bista tabata cu tur miembro di famia mester a siña sostené nan mes. P’esei, nos tabata cria galiña i conenchi i a cultivá cas di abeha. I nos tur cu ta mucha homber tabata parti korant.

Ora tabata tempu pa nos a bai congreso di 1927 na Toronto, Cánada, nos tabatin un ruman homber baby di seis luna, Paul. Ami tabatin e asignacion pa keda cas i cuida Paul huntu cu yudansa di mi tanta, miéntras mi mayornan a bai Toronto huntu cu e otro muchanan. Nan a paga  mi dies dollar, cu mi a usa pa cumpra un flus nobo pa mi mes. Semper nos a ser entrená pa bisti nechi pa reunion i pa cuida nos pañanan.

P’e tempu dje congreso memorabel di 1931 na Columbus, Ohio, Clarence cu Carl tabata casá i tabata traha pionero huntu cu nan esposanan. Nan tur dos tabata biba den trailer cu nan mes a traha. Carl a casa cu Claire Houston di Wheeling, West Virginia, i ta p’esei mi tabata sinta banda di Claire su ruman muher chikitu, Helen, n’e congreso di Columbus.

Ministerio di Tempu Completo

Mi tabatin 15 aña ora mi a caba scol secundario na 1932. I e siguiente aña, mi ruman homber Clarence, kende tabata traha pionero na South Carolina, a haña un auto segunda mano. Mi a aplicá p’e sirbishi di pionero i a cuminsá traha pionero huntu cu Clarence i su casá. E tempu ei, Helen tabata traha pionero na Hopkinsville, Kentucky, i mi a skirbié pa promé bes. Den su carta di contesta el a puntra: “Bo ta un pionero?”

Den mi carta—Helen a ward’é te na su morto casi 60 aña despues—mi a contestá: “Mi ta un pionero, i mi ta spera di por traha e trabou aki pa semper.” Den e carta ei, mi a conta Helen tocante distribucion dje foyeto E Reino, e Speransa pa Mundu na clero i funcionarionan di husticia den mi asignacion di predicá.

Na 1933, Tata a traha un tent riba wiel pa mi, esta, un trailer di 2,4 meter largu, 2 meter hanchu, cu muraya di paña di bela cu ta bai smal ariba i cu bentana dilanti i patras. Esei tabata mi humilde hogar p’e siguiente cuater añanan trahando pionero.

Na mart 1934, Clarence cu Carl i nan casánan, Helen i su mama, Clarence su cuñá i ami—nos ocho—tabata bai rumbo west pa nos asistí n’e congreso na Los Angeles, California. Algun di nan a biaha i drumi den mi trailer. Mi a drumi den auto, miéntras cu sobrá hende a huur lugá pa nan keda drumi. Dor cu nos tabatin problema cu auto, nos a yega Los Angeles riba e di dos dia dje congreso di seis dia. Einan, dia 26 di mart, finalmente ami cu Helen por a simbolisá nos dedicacion na Jehova mediante bautismo bou di awa.

N’e congreso, Joseph F. Rutherford, n’e tempu ei presidente di Sociedad Watch Tower, a reuní personalmente cu cada pionero. El a animá nos dor di bisa cu nos ta luchadónan balente p’e berdad bíblico. N’e ocasion ei, a haci percuracion pa duna pioneronan yudansa financiero pa asina nan por a sigui den nan ministerio.

Un Educacion pa Bida Largu

Ora nos a regresá for dje congreso na Los Angeles, nos tur a compartí e mensahe di Reino cu hende di condadonan di South Carolina, Virginia, West Virginia i Kentucky. Añanan despues, Helen a skirbi tocante e tempu ei: “No tabatin congregacion pa dependé riba dje, ni amigunan pa yuda, pasobra di berdad nos tabata stranhero den un pais straño. Pero awor mi sa cu mi tabata hañando un educacion. Mi tabata birando ricu.”

El a puntra: “Kico un mucha muher hóben ta haci cu su tempu ora e ta leu di su amistadnan i ambiente di cas? Wel, no tabata dje desagradabel ei. Mi no por corda cu mi a yega di sinti mi aburí. Mi a lesa masha hopi. Nunca mi no a keda sin ta al dia cu nos lesamentu i studiamentu di literatura bíblico. Mi a keda pegá na mi mama, mi a siña manehá e tiki placa cu nos tabatin, haci compras, cambia tayer, cushiná, cose i predicá. Mi no  tin niun tiki duele i cu goso lo mi haci mescos atrobe.”

Aunke Helen su mama tabatin un cas bunita, e cu Helen tabata contentu pa biba den un trailer chikitu durante e añanan ei. Despues dje congreso di 1937 na Columbus, Ohio, salú di Helen su mama a bai atras i el a bai hospital. Na november 1937, el a muri den su asignacion na Philippi, West Virginia.

Matrimonio i Mas Sirbishi

Dia 10 di juni 1938, mi cu Helen a casá durante un ceremonia simpel den e cas caminda el a nace na Elm Grove, cerca di Wheeling, West Virginia. Nos kerido ruman Evans, kende a introducí mi famia n’e berdad vários aña promé cu mi a nace, a duna e discurso di matrimonio. Ami cu Helen a planea pa despues di casamentu, nos bolbe bai traha pionero na oost Kentucky. Pero pa nos sorpresa, nos a haña invitacion pa bai haci e trabou di zona. E trabou aki a enbolbé bishitá gruponan di Testigo di Jehova na west Kentucky i partinan di Tennessee pa yuda nan den nan ministerio. N’e tempu ei, den tur e lugánan cu nos a bishitá tabatin solamente un 75 proclamadó di Reino.

Den e tempu ei, nacionalismo a troce e manera di pensa di hopi hende, i mi a verwagt cu denter di poco tempu nan lo a hinca mi den prizon pa motibu di mi neutralidad cristian. (Isaías 2:4) Sin embargo, danki na mi registro di actividad di predicá, mi a ricibí un permit for dje cuerpo di civilnan cu ta scoge hende pa servicio militar, asina mi por a sigui den e ministerio di tempu completo.

Ora nos a cuminsá den e ministerio biahero, casi tur hende tabata haci remarke riba e echo cu nos ta yong. Na Hopkinsville, Kentucky, un ruman muher cristian a cuminda Helen cu un abraso fuerte i a puntra: “Bo ta corda mi?” Na 1933, Helen a dun’é testimonio den un tienda di cunucu cu su casá tabata manehá. E tabata un maestra di zondagschool, pero despues cu el a lesa e buki cu Helen a laga p’e, el a para dilanti su klas i pidi nan despensa, pasobra el a siña nan doctrinanan no-bíblico. Despues di a retirá for di e iglesia, el a cuminsá proclamá berdadnan bíblico den su comunidad. Ami cu Helen a sirbi n’e parti west di Kentucky tres aña largu, i e ruman muher ei i su casá a haci nan cas nos cas.

Den e dianan ei, nos tabata tene asambleanan chikitu, i A. H. Macmillan a sirbi na un di esakinan. Dor cu el a yega di keda na cas di Helen su mayornan ora Helen tabata chikitu, durante e congreso el a scoge pa keda huntu cu nos den nos cas móbil di 5 meter largu, den cua nos tabatin un cama extra. E tambe a corda riba su Magnífico Creador den e dianan di su hubentud, ya cu el a dedicá su bida na Jehova na aña 1900, tempu cu e tabatin 23 aña di edad.

Na november 1941, e trabou di rumannan biahero a ser suspendé pa un periodo di tempu corticu, i mi a haña asignacion pa bai traha pionero na Hazard, Kentucky. Nos a traha atrobe huntu cu Carl i su casá, Claire. Akinan, Joseph Houston, Helen su subrino, a djoin nos i el a cuminsá traha pionero. El a sigui den e trabou di tempu completo pa 50 aña te dia cu el a muri di ripiente di un atake di curason na 1992, miéntras e tabata traha fielmente n’e sede mundial di Testigonan di Jehova na Brooklyn, New York.

Na 1943 nos a haña asignacion pa bai Rockville, Connecticut. Esaki tabata como si fuera un mundu diferente pa mi cu Helen, pasobra nos a custumbrá predicá den zuid. Na Rockville, Helen a conducí regularmente 20 studio di Bijbel na cas pa siman. Cu tempu nos a huur un sala modesto pa un Salon di Reino, i a organisá e núcleo di un congregacion chikitu.

Miéntras nos tabata sirbi na Rockville, nos a haña invitacion pa asistí n’e di cincu klas dje Scol Bíblico di Galad di Watchtower na South Lansing, New York. Afortunadamente, nos a haña sa cu Aubrey cu Bertha Bivens, amigunan for di tempu cu nos a traha pionero na Kentucky, lo tabata nos compañeronan di klas.

Scol i Nos Asignacion Nobo

Aunke nos tabata basta yong ainda, mayoria di nos compañeronan di klas tabata asta mas yong. Sí, nan tabata cordando riba nan Magnífico Creador den nan hubentud. Nos a gradua na juli  1945, djis promé cu Guera Mundial II a terminá. Miéntras nos tabata warda riba nos asignacion di misionero, nos a traha huntu cu e Congregacion Flatbush na Brooklyn, New York. Finalmente, dia 21 di october 1946, huntu cu seis otro compañero di klas, incluso famia Bivens, nos a bula bai nos cas nobo na Guatemala City, Guatemala. N’e tempu ei, den henter e pais centroamericano ei tabatin ménos cu 50 Testigo di Jehova.

Na april 1949, nan a manda un par di nos, esta dje misioneronan, Quetzaltenango, e di dos stad mas grandi i importante den e pais. E stad aki tabata situá mas cu 2.300 meter riba nivel di laman, i e aire di ceru tabata friu i puru. Den un resúmen di nos actividad akinan, Helen a skirbi: “Nos tabatin e privilegio di predicá den un cantidad di stad i pueblo. Nos tabata lanta banda di cuat’or di mardugá i coge un bus (cu hopi bes a pone paña di bela en bes di bentana) pa bai un stad cu ta keda leu. Einan nos tabata predicá rond di ocho ora promé cu nos bolbe cas anochi.” Awe den hopi dje lugánan ei tin congregacion, incluso seis na Quetzaltenango.

Djis despues tabatin un yamada pa misioneronan bai sirbi na Puerto Barrios na costa caribeño, e di tres stad mas grandi di Guatemala. Nos kerido compañeronan Bivens cu kendenan nos a sirbi cincu aña na Guatemala, tabata entre esnan cu a muda bai e asignacion nobo aki. E despedida tabata doloroso i el a laga un bashí den nos bida. Ora ami cu Helen so a keda den e cas di misionero, nos a muda pa un apartamento chikitu. Na 1955, ami cu Helen a aceptá un asignacion nobo pa bai un stad mas tropical, esta, Mazatenango. Mi ruman homber mas chikitu, Paul, i su casá Dolores, kendenan a gradua na Galad na 1953, a sirbi einan djis un par di tempu promé cu nos a yega.

Pa 1958 nos tabatin mas cu 700 Testigo, 20 congregacion i tres circuito na Guatemala. Ami cu Helen a bolbe cuminsá participá den e trabou di superintendente biahero, bishitando gruponan chikitu di Testigo i diferente congregacion, incluso esun na Quetzaltenango. Anto na augustus 1959, nos a haña invitacion pa bolbe bek Guatemala City, unda nos a biba n’e oficina di sucursal. Mi a haña asignacion pa traha na sucursal, miéntras cu Helen a sigui den e sirbishi di misionero pa 16 aña mas. Despues e tambe a cuminsá traha den e oficina di sucursal.

Mas Bendicion

Antes tabata parce cu semper mi tabata esun mas yong entre esnan cu tabata sirbi Jehova. Awor, hopi bes mi ta esun di mas bieu, manera tabata e caso ora mi a asistí n’e scol pa personal di sucursal na Patterson, New York, na 1996. Mescos cu den mi hubentud mi a ricibí hopi yudansa for di hende mas grandi, den décadanan recien mi tabatin e privilegio di yuda hopi hóben cu ta deseá di corda riba nan Creador den nan hubentud.

Jehova ta sigui basha su bendicion riba su pueblo aki na Guatemala. Na 1999 tabatin mas cu 60 congregacion na Guatemala City. I den nort, zuid, oost i west tin hopi mas congregacion i miles di proclamadó dje bon nobo dje Reino di Dios. E ménos cu 50 proclamadó di Reino cu nos a topa ora nos a yega rond di 53 aña pasá, a aumentá te na mas cu 19.000!

Hopi Motibu pa Ta Gradicidu

Niun hende su bida no ta sin problema, pero semper nos por tira nos “carga riba Jehova mes.” (Salmo 55:22) Hopi bes e ta sostené nos mediante apoyo di compañeronan amoroso. Por ehempel, un par di aña promé cu su morto, Helen a regalá mi un plakat chikitu den un leshi grabá cu e texto bíblico na Hebreonan 6:10: “Dios no ta inhustu pa asina e no corda bo trabou i amor cu  bo a manifestá pa cu E mes dor di a rindi sirbishi na Su pueblo i ta sirbi nan ainda.”—Weymouth.

E nota cu el a agregá ta bisa en parti asina aki: “Mi bida, cu excepcion di TUR MI AMOR, tin masha poco cu mi por duna bo . . . E texto aki ta pas asina bon cu bo, i mi ta pidi bo pa pon’é riba bo lesenar. No pasobra ta ami a duna bo e, sino pasobra e ta aplicá na bo den bo añanan largu di sirbishi.” Te n’e dia djawe, e plakat ta riba mi lesenar den oficina n’e sucursal di Guatemala.

Desde mi hubentud mi a sirbi Jehova, i awor cu mi ta di edad avansá, mi ta gradicí Jehova pa mi salú cu ta permití mi cumpli cu mi responsabilidadnan asigná. Hopi bes ora mi ta haci mi lesamentu regular di Bijbel, mi ta topa cu textonan cu mi ta pensa cu mi kerida Helen lo a subrayá den su Bijbel. Esaki mi a pensa ora mi a bolbe lesa Salmo 48:14: “E Dios aki ta nos Dios pa tempu indefiní, asta pa semper. E mes lo guia nos te ora nos muri.”

Ta un placer pa mi compartí cu otro hende e vision dje dia di resureccion, riba cua hende di tur nacion anterior lo yama bon biní bek na nan sernan kerí for di morto, den un mundu nobo. Esta un prospecto! Lo tin lágrimanan di goso n’e tempu ei ora nos corda cu en berdad Jehova ta e Dios “cu ta consolá esnan abatí”!—2 Corintionan 7:6.

[Plachi na página 25]

Pará di robes pa drechi: Mama, Tata, tanchi Eva i mi rumannan Carl cu Clarence, 1910

[Plachinan na página 26]

Huntu cu Helen na 1947 i na 1992