Fe Por Cambia Bo Bida

“SIGUR ta posibel pa tin bon balornan den bida sin un Dios.” Esei tabata e afirmacion di un agnóstico. El a bisa cu el a lanta su yunan cu balornan moral haltu, i nan, na nan turno, a lanta nan yunan cu e mésun normanan haltu, i tur, sin fe den Dios.

Esaki ta nificá cu fe den Dios ta innecesario? Ta parce cu e persona aki sí a haña cu ta asina. I ta berdad cu no ta tur hende cu no ta kere den Dios ta necesariamente mal hende. Apostel Pablo a papia di “hende dje nacionnan” cu no conocé Dios pero cu “ta haci di naturalesa e cosnan dje ley.” (Romanonan 2:14) Tur hende, incluso agnósticonan, a nace cu un concenshi. Hopi hende ta purba sigui e impulsonan di nan concenshi asta ora nan no ta kere den e Dios cu a duna nan e sentido ei di bon i malu.

Sin embargo, un fe sólido den Dios—unu cu ta basá riba Bijbel—ta un forsa muchu mas poderoso pa haci bon cu e guia dje concenshi riba su so. Un fe basá riba e Palabra di Dios, Bijbel, ta informá e concenshi, ta hacié mas skerpi den dicerní bon for di malu. (Hebreonan 5:14) Ademas, fe ta fortalecé hende pa mantené normanan haltu ora nan haña nan enfrentá cu preshon enorme. Por ehempel, durante siglo 20, hopi pais a haña nan bou dje poder di régimen político corupto, loke a obligá hende aparentemente decente pa cometé crueldadnan teribel. Sin embargo, esnan cu tabatin berdadero fe den Dios a nenga di comprometé nan principionan, asta ora nan a core riesgo di perde nan bida. Ademas, un fe basá riba Bijbel por cambia hende. E por rescatá bida di hende cu ta parce  perdí i yuda nan evitá eror serio. Considerá un par di ehempel.

Fe Por Cambia Bida di Famia

“Dor di bo fe bo a logra lo imposibel.” Asina un hues ingles a bisa ora el a dicta sentencia riba tutela dje yunan di John cu Tania. Dia cu autoridadnan a haña sa dje caso di John cu Tania, esakinan no tabata casá i nan bida na cas tabata teribel. John, kende tabatin problema cu droga i adiccion na wega di placa, a cuminsá cometé crímen pa financiá su bicionan. El a neglishá su yunan i nan mama. Pues, ta ki “milager” a sosodé?

Un dia, John a tende su subrino chikitu papia tocante Paradijs. Esei a lanta su curiosidad, i el a haci mayornan dje mucha pregunta. E mayornan ta Testigo di Jehova, i nan a yuda John siña tocante Paradijs for di Bijbel. Poco poco, John i Tania a desaroyá un fe basá riba Bijbel cu a cambia nan bida. Nan a legalisá nan union den matrimonio i a vence nan bicionan. E autoridadnan cu a inspeccioná nan cas di famia a haña algu cu a parce imposibel poco tempu promé: un famia felis den un cas limpi, un lugá aceptabel pa lanta yu. E hues tabatin rason ora el a atribuí e “milager” aki n’e fe nobo di John i Tania.

Miles di kilometer leu for di Inglatera, un esposa hóben den un pais di Cercano Oriente a hera di bira parti di un estadística masha lamentabel. E tabata planea pa djoin e miyones di personanan di tur aña kende nan matrimonio ta caba den divorcio. E tabatin un yu, pero su esposo tabata muchu mas grandi cuné. P’e motibu aki, su parientenan tabata sinta su tras p’e busca un divorcio, i en realidad el a cuminsá haci areglo pa esei. Sin embargo, e tabata studia Bijbel cu un Testigo di Jehova. Ora e Testigo a haña sa dje situacion, el a splik’é loke Bijbel ta bisa tocante matrimonio—por ehempel, cu matrimonio ta un don di Dios i cu no ta algu pa deshací di dje asina fácil. (Mateo 19:4-6, 9) E señora a pensa den su mes: ‘Ta masha straño con e señora aki, un hende desconocí, ta purba conserbá nos famia miéntras cu esnan yegá na mi kier kibr’é.’ Su fe nobo a yud’é conserbá su matrimonio.

Un estadística lamentabel cu ta afectá bida di famia tin di haber cu aborto. Un informe di Nacionnan Uní a calculá cu tur aña por lo ménos 45 miyon baby cu no a nace ainda ta ser abortá deliberadamente. Cada un dje casonan ei ta un tragedia. Conocimentu di Bijbel a yuda un señora na Filipínas evitá di contribuí n’e estadística ei.

Testigonan di Jehova a bishitá e señora, el a aceptá un foyeto pa studia Bijbel titulá Kico Dios Ta Rekerí di Nos? * i a cuminsá studia Bijbel. Lunanan despues, el a splica pakico el a aceptá e studio. E señora tabata na estado ora e Testigonan a bishit’é pa promé bes, pero e cu su casá a dicidí di abortá e baby. Sin embargo, e plachi di un baby cu no a nace ainda na página 24 dje foyeto a toca curason dje señora. E splicacion bíblico su tras cu bida ta sagrado pasobra ‘cu Dios ta e fuente di bida’ a convenc’é pa keda cu su baby. (Salmo 36:9) Awor e ta mama di un bunita criatura saludabel.

Fe Ta Yuda Esnan Despreciá

Na Etiopia, dos homber mal bistí a cana drenta un reunion di adoracion cu Testigonan di Jehova tabata tene. Na fin dje reunion, un Testigo a introducí su mes na nan di un manera amigabel. E hombernan a pidié un limosna. E Testigo no a duna nan placa, sino algu mihó. El a animá nan pa desaroyá fe den Dios, algu cu ta “di hopi mas balor cu oro.” (1 Pedro 1:7) Un di nan a reaccioná faborabel i a cuminsá studia Bijbel. Esaki a cambia su bida. Segun cu el a crece den fe, el a stop di huma, bebe di mas, cometé inmoralidad i usa khat (un stimulante adictivo). El a siña mantené su mes en bes di cana pidi placa i awor e tin un bida limpi i productivo.

Na Italia, nan a sentenciá un homber di 47 aña na dies aña di prizon i a cer’é den un hospital  hudicial sikiátrico. Un Testigo di Jehova cu ta autorisá pa drenta institucionnan di prizon pa duna asistencia spiritual, a studia Bijbel cuné. E homber a progresá lihé. Fe a cambia su bida asina tantu cu awor otro prezunan ta acudí na dje pa conseho riba con pa trata cu nan problemanan. Su fe basá riba Bijbel a yud’é gana e respet, aprecio i confiansa dje autoridadnan di prizon.

Den añanan recien korantnan a informá di guera civil na Africa. E relatonan di hobencitonan cu ta ser entrená como soldá ta particularmente spantoso. Hende ta droga, maltratá i forsa e muchanan aki pa participá den conducta inhumano contra nan famianan pa garantisá asina cu nan único lealtad ta na e partido pa cua nan ta bringando. Fe basá riba Bijbel ta suficiente fuerte pa cambia e bida di hóbennan asina? Den por lo ménos dos caso, e tabata.

Na Liberia, Alex a sirbi como sirbidó di misa den Iglesia Católico. Pero ora e tabatin 13 aña, el a djoin un partido den guera i a bira un notorio soldá hubenil. P’e haña curashi den bataya, el a acudí na bruheria. Alex a mira con nan a mata hopi di su compañeronan, pero e a sobrebibí. Na 1997 el a topa Testigonan di Jehova i a haña cu nan sí no a menospreci’é. Mas bien, nan a yud’é siña loke Bijbel ta bisa tocante violencia. Alex a bandoná e ehército. Segun cu su fe a cuminsá crece, el a sigui e mandamentu bíblico: “Lagu’é apartá for di loke ta malu i haci loke ta bon; lagu’é busca pas i sigui tras di dje.”—1 Pedro 3:11.

Miéntras tantu, un ex-soldá hubenil cu yama Samson a pasa n’e stad caminda Alex tabata biba awor. E tabata un mucha di koor pero na 1993 el a bira soldá i a haña su mes enbolbí den uso di droga, spiritismo i inmoralidad. Na 1997 nan a sak’é for di servicio militar. Samson tabata bayendo Monrovia pa djoin un forsa special di siguridad ora cu un amigu a sinta su tras p’e studia Bijbel cu Testigonan di Jehova, i como resultado, el a desaroyá un fe basá riba Bijbel. Esaki a dun’é e curashi p’e bandoná su actividadnan relacioná cu guera. Awor tantu Alex como Samson ta hiba un bida pacífico i moralmente limpi. Tin otro cos cu no ta fe basá riba Bijbel cu por cambia bida di hende cu a ser maltratá asina?

E Clase di Fe Corecto

Esakinan ta djis un par dje hopi, hopi ehempelnan cu nos por cita pa ilustrá e poder di fe genuino basá riba Bijbel. Claro cu no ta tur hende cu ta djis bisa cu nan ta kere den Dios ta cumpli cu e normanan haltu di Bijbel. En berdad algun ateista kisas ta hiba un mihó bida cu algun hende cu ta bisa di ta cristian. Esei ta pasobra fe basá riba Bijbel ta encerá mas cu djis bisa cu bo ta kere den Dios.

Apostel Pablo a yama fe “e expectativa sigur di cosnan sperá, e demostracion evidente di realidadnan aunke nan no ta ser contemplá.” (Hebreonan 11:1) P’esei, fe ta incluí un creencia firme—basá riba evidencia irefutabel—den cosnan cu bo no ta mira. E ta encerá foral e echo cu bo no tin ni e mínimo duda cu Dios ta existí, cu e ta interesá den nos i cu lo e bendicioná esnan cu ta haci su boluntad. E apostel a bisa tambe: “Esun cu ta acudí na Dios mester kere cu e ta existí i cu e ta bira e recompensador di esnan cu ta busk’é cu empeño.”—Hebreonan 11:6.

Tabata e clase di fe aki cu a cambia bida di John, Tania i e otro personanan mencioná den e artículo aki. El a hiba nan na acudí cu pleno confiansa na Bijbel, e Palabra di Dios, pa guia ora di tuma decision. El a yuda nan haci sacrificio temporal pa nan no sigui un bida cu ta cumbiní nan pero cu ta robes. Aunke cada un dje experencianan tabata diferente, tur a cuminsá e mésun manera. Un Testigo di Jehova a studia Bijbel cu e individuonan aki, i nan a bin experenciá e berdad di loke Bijbel ta bisa: “E palabra di Dios ta bibu i ta ehercé poder.” (Hebreonan 4:12) E poder dje Palabra di Dios a yuda cada individuo desaroyá e fe firme cu a cambia nan bida pa mas mihó.

Testigonan di Jehova ta activo den mas cu 230 pais i isla. Nan ta invitá bo pa aceptá un studio di Bijbel. Pakico? Pasobra nan ta convencí cu un fe basá riba Bijbel por trece cambionan grandi den bo bida tambe.

[Nota]

[Plachinan na página 3]

Un fe basá riba Bijbel ta cambia bida pa mas mihó

 [Rekonosementu pa Potrèt na página 2]

Kaft di Biblia nieświeska di Szymon Budny, 1572