Sirbiendo Huntu cu e Vigilante

“Riba e toren di vigilancia, o Jehova, mi ta pará constantemente di dia, i na mi puesto di warda mi ta stacioná tur anochi.”—ISAIAS 21:8.

1. Di ki promesanan magnífico Jehova mes ta un testigo?

JEHOVA ta e Gran Dios di Propósito. E angel rebelde cu a bira Satanas e Diabel no por haci nada pa stroba Su propósito magnífico pa santificá Su mes nomber i establecé un glorioso gobernacion di Reino riba un tera paradísico. (Mateo 6:9, 10) Bou dje gobernacion ei, humanidad di berdad lo ricibí hopi bendicion. Dios “realmente [lo] traga morto pa semper, i e Señor Soberano Jehova siguramente lo limpia e lágrimanan for di tur cara.” Hende felis i uní lo disfrutá di pas i prosperidad pa tur eternidad. (Isaías 25:8; 65:17-25) Jehova ta su mes testigo dje promesanan magnífico aki!

2. Cua testigonan humano Jehova a lanta?

² Sin embargo, e Magnífico Creador tin tambe testigonan humano. Den tempu pre-cristian ‘un nubia di testigo,’ cuminsando cu Abel, a core e careda di awante, hopi bes apesar di masha hopi contratempu. Nan ehempel excelente ta animá cristiannan leal awe. Cristo Jesus ta e máximo ehempel di un testigo yen di curashi. (Hebreonan 11:1–12:2) Por ehempel, corda su testimonio final dilanti Poncio Pilato. Jesus a declará: “Pa esaki mi a nace, i pa esaki mi a bini na mundu, pa mi duna testimonio di e berdad.” (Juan 18:37) For di aña 33 E.C. bini ariba te n’e aña 2000 E.C. aki, cristiannan celoso a sigui Jesus su ehempel i a sigui duna testimonio, declarando yen di curashi “e cosnan magnífico di Dios.”—Echonan 2:11.

Orígen dje Sectanan Babilónico

3. Con Satanas a oponé e testimonio cu ta ser duná tocante Jehova i su boluntad?

³ Durante e milenionan e gran Adversario, Satanas e Diabel, di un manera malbado a busca pa desacreditá e testimonio di Dios su testigonan. Como “e tata di mentira,” e ‘dragon grandi aki, e colebra original,’ ta “gañando henter e tera habitá.” E tabata implacabel den su guera contra esnan cu ta “warda e mandamentunan di Dios,” foral den e último dianan aki.—Juan 8:44; Revelacion 12:9, 17.

4. Con Babilonia e Grandi a originá?

⁴ Rond di 4.000 aña pasá, despues dje Diluvio di dia di Noe, Satanas a lanta Nimrod, “un yagdó poderoso na oposicion cu Jehova.” (Génesis 10:9, 10) Nimrod su stad di mas grandi, Babilonia (Babel), a bira un centro di religion demoniaco. Ora Jehova a confundí e idioma dje constructornan dje toren di Babel, e hendenan a ser plamá rond mundu, i nan a hiba nan religion falsu huntu cu nan. Asina Babilonia a bira e fuente di un imperio mundial di religion falsu, yamá Babilonia e Grandi den e buki di Revelacion. E buki ei ta profetisá e destruccion dje antiguo sistema religioso aki.—Revelacion 17:5; 18:21.

Un Nacion di Testigo

5. Ki nacion Jehova a organisá pa ta su testigo, pero pakico el a permitié bai den exilio?

⁵ Rond di 500 aña despues dje tempu di Nimrod, Jehova a organisá e desendientenan di fiel Abraham den e nacion di Israel pa sirbi  como Su testigo riba tera. (Isaías 43:10, 12) Hopi persona dje nacion ei a sirbi Jehova lealmente. Sin embargo, durante siglonan, e creencianan falsu di nacionnan bisiña a corumpí Israel, i Jehova su pueblo di pacto a alehá for di dje i bai adorá dios falsu. P’esei, na aña 607 P.E.C., e ehércitonan di Babilonia, encabesá pa rey Nabucodonosor, a destruí Jerusalem i su tempel i a hiba mayoria dje hudiunan den exilio na Babilonia.

6. Ki bon nobo Jehova su vigilante profético a declará, i na ki tempu esei a cumpli?

⁶ Ki un triunfo pa religion falsu! Pero, Babilonia su dominio a dura masha corticu. Rond di 200 aña promé cu e suceso, Jehova a manda: “Bai, pone un vigilante pa e por bisa precis loke e ta mira.” Kico e vigilante aki tabatin pa anunciá? “El a cai! Babilonia a cai, i tur e imágennan grabá di su diosnan el a kibra na werki riba tera!” (Isaías 21:6, 9) Dicho echo, na aña 539 P.E.C., e declaracion profético a cumpli. E nacion poderoso di Babilonia a cai, i pronto Dios su pueblo di pacto por a bolbe na nan patria.

7. (a) Kico e hudiunan a siña for di Jehova su disiplina? (b) Den ki trampa e hudiunan despues di exilio a cai, i cu ki resultado?

⁷ E hudiunan cu a regresá a siña un bon les pa bandoná idolatria i religion spiritista. Pero, den transcurso di añanan, nan a cai den otro trampanan. Algun a cai den e trampa di filosofia griego. Otronan a bin enfatisá tradicion humano riba e Palabra di Dios. Nacionalismo a seducí otronan. (Marco 7:13; Echonan 5:37) Pa tempu cu Jesus a nace, e nacion a alehá atrobe for di adoracion puru. Aunke algun hudiu individual a respondé n’e bon nobo cu Jesus a declará, e nacion den su totalidad a rechas’é i p’esei Dios a rechasá nan. (Juan 1:9-12; Echonan 2:36) Israel no tabata Dios su testigo mas, i na aña 70 E.C., Jerusalem i su tempel a ser destruí atrobe, e biaha aki p’e ehército romano.—Mateo 21:43.

8. Ken a bira Jehova su testigo, i pakico Pablo su spiertamentu n’e testigo aki tabata oportuno?

⁸ Miéntras tantu, un “Israel [cristian] di Dios” a nace, i esaki awor a sirbi como Dios su testigo n’e nacionnan. (Galationan 6:16) Mashá lihé, Satanas a traha complot pa corumpí e nacion spiritual nobo aki. Yegando na fin dje promé siglo, por a nota influencianan di forma secta den e congregacionnan. (Revelacion 2:6, 14, 20) Pablo su spiertamentu tabata oportuno: “Tene cuidou: kisas por tin un hende cu lo hiba boso como su víctima mediante filosofia i engaño bano segun tradicion di hende, segun e cosnan elemental di mundu i no segun Cristo.”—Colosensenan 2:8.

9. Net manera Pablo a spierta, ki desaroyonan a hiba n’e existencia di cristiandad?

⁹ Cu tempu, filosofia griego, ideanan religioso babilónico i mas despues, “sabiduria” humano manera e teoria di evolucion i crítica textual di Bijbel, a contaminá e religion di hopi persona cu a bisa di ta cristian. Tabata manera Pablo a predicí: “Mi sa cu despues di mi baimentu lobonan opresivo lo drenta meimei di boso i lo no trata e tou cu ternura, i for di den boso mes lo lanta hombernan i papia cosnan trocí pa lastra e disipelnan tras di nan mes.” (Echonan  20:29, 30) Como resultado dje apostasia aki, cristiandad a cuminsá forma.

10. Ki desaroyonan a mustra claramente cu no ta tur hende a entregá n’e adoracion corupto cu a ser practicá den cristiandad?

¹⁰ Esnan cu di berdad tabata deboto na adoracion puru tabatin cu “hiba un lucha duru pa e fe cu una bes pa semper a ser entregá n’e santunan.” (Hudas 3) E dunamentu di testimonio na fabor di adoracion puru i pa Jehova lo a caba na nada for di tera? No. Segun cu e tempu a acercá p’e destruccion dje rebelde Satanas i tur su obranan, a bira bisto cu no ta tur hende a entregá n’e adoracion apóstata practicá den cristiandad. Den e último parti di siglo 19, na Pittsburgh, Pennsylvania, Merca, un grupo di studiante sincero di Bijbel a ser organisá i a bira e núcleo dje clase moderno di Dios su testigo. E cristiannan aki a hala atencion n’e evidencia bíblico cu e conclusion dje sistema di mundu actual tabata cerca. Di acuerdo cu cumplimentu di profecia bíblico, e “conclusion” dje mundu aki a cuminsá na 1914 i tabata marcá pa cuminsamentu dje promé guera mundial. (Mateo 24:3, 7) Tin evidencia fuerte cu despues dje aña ei a tira Satanas i su ehército di demoño for di shelu. Siglo 20, cargá cu problema, a duna prueba cla cu Satanas ta activo i cu e señal di Jesus su presencia real den poder di Reino celestial ta cumpliendo remarcablemente.—Mateo, capítulo 24 i 25; Marco, capítulo 13; Lucas, capítulo 21; Revelacion 12:10, 12.

11. Kico Satanas a purba haci, pero con e intento aki a fracasá?

¹¹ Na juni 1918, Satanas a purba desesperadamente pa eliminá e studiantenan di Bijbel aki, cu e tempu ei tabata predicá den vários pais. Tambe el a trata na destruí nan corporacion legal, Watch Tower Bible and Tract Society. A encarcelá funcionarionan responsabel di Sociedad, acusando nan falsamente di actonan subversivo, mescos cu nan a haci cu Jesus den promé siglo. (Lucas 23:2) Pero na 1919, e funcionarionan aki a sali liber, i esei a permití nan sigui cu nan ministerio. Mas despues, a exonerá nan completamente di tur acusacion.

Un “Vigilante” na Warda

12. Ken awe ta forma Jehova su clase di vigilante, i ki actitud nan a demostrá?

¹² P’esei, ora “e tempu di fin” a cuminsá, atrobe Jehova tabatin un vigilante riba esena, alertando hende pa sucesonan cu tin di haber cu e cumplimentu di Su propósitonan. (Daniel 12:4; 2 Timoteo 3:1) Te awe, e clase ei di vigilante—cristiannan ungí, e Israel di Dios—ta actua na armonia cu Isaías su descripcion dje vigilante profético: “El a presta atencion estricto, cu un disposicion hopi atento. I el a grita manera un leon: ‘Riba e toren di vigilancia, o Jehova, mi ta pará constantemente di dia, i na mi puesto di warda mi ta stacioná tur anochi.’” (Isaías 21:7, 8) Esaki sí ta un vigilante cu ta tuma su tarea na serio!

13. (a) Ki mensahe Jehova su vigilante a proclamá? (b) Den ki sentido por bisa cu Babilonia e Grandi a cai?

¹³ Kico e vigilante aki a mira? Atrobe, Jehova su vigilante, su clase di testigo, a anunciá: “El a cai! Babilonia a cai, i tur e imágennan grabá di su diosnan [Jehova] a kibra na werki riba tera!” (Isaías 21:9) E biaha aki, despues di Guera Mundial I, ta Babilonia e Grandi, e imperio mundial di religion falsu, ta esun cu ta ser tumbá for di su puesto prominente di autoridad. (Jeremías 50:1-3; Revelacion 14:8) Nada straño! E Guera Grandi, manera a yam’é e tempu ei, a cuminsá den cristiandad, caminda miembronan di clero na ámbos banda a fomentá e conflicto dor di animá e mihó di nan hubentud pa bai guera. Esta un bergwensa! Na 1919, Babilonia e Grandi no por a stroba e Studiantenan di Bijbel, manera Testigonan di Jehova tabata conocí e tempu ei, di scapa for di nan estado inactivo i cuminsá un campaña mundial di duna testimonio cu ta continuá te ainda. (Mateo 24:14) Esei a marca un caida pa Babilonia e Grandi, mescos cu e liberacion di Israel den siglo 6 P.E.C. a marca caida di Babilonia di antigwedad.

14. Cua revista Jehova su clase di vigilante a usa principalmente, i con Jehova a bendicioná su uso?

¹⁴ Semper e clase di vigilante a cumpli cu su  tarea cu celo i cu un deseo fuerte pa haci loke ta corecto. Na juli 1879, e Studiantenan di Bijbel a cuminsá publicá e revista aki, e tempu ei conocí como Zion’s Watch Tower and Herald of Christ’s Presence (E Toren di Vigilancia di Síon i Anunciadó dje Presencia di Cristo). Tur edicion for di 1879 te 15 di december 1938, tabatin riba nan portada e palabranan “‘Vigilante, Kico dje Anochi?’—Isaías 21:11.” * Pa 120 aña E Toren di Vigilancia a sigui vigilá fielmente sucesonan mundial i nan nificacion profético. (2 Timoteo 3:1-5, 13) Dios su clase di vigilante i nan compañeronan, “e otro carnénan,” a usa e revista aki pa proclamá vigorosamente na humanidad cu e vindicacion di Jehova su soberania pa medio dje Reino di Cristo ta tras di porta. (Juan 10:16) Jehova a bendicioná e uso dje testigo aki? Wel, for dje promé edicion di 6.000 ehemplar na 1879, e circulacion mundial di E Toren di Vigilancia a crece bira mas cu 22.000.000 ehemplar na 132 idioma. Di esakinan, 121 ta ser publicá simultáneamente. Ta masha apropiado cu e revista religioso mas ampliamente distribuí riba tera ta esun cu ta engrandecé e nomber dje Dios berdadero, Jehova!

Un Limpiesa Progresivo

15. Ki limpiesa progresivo a cuminsá asta promé cu 1914?

¹⁵ Durante un periodo di mas o ménos 40 aña, te ora Cristo su gobernacion celestial a cuminsá na 1914, e Studiantenan di Bijbel a ser librá for di hopi dje doctrinanan no-bíblico di cristiandad, manera bautismo di baby, inmortalidad dje alma humano, purgatorio, tormento den candela di fiernu i un Dios trinitario. Pero a tuma mas tempu pa caba cu tur idea incorecto. Por ehempel, den añanan ’20 hopi Studiante di Bijbel tabata cana cu un borstspeld den forma di un emblema di crus cu corona, i nan tabata celebrá Pascu i otro dianan di fiesta pagano. Sin embargo, pa adoracion por ta puru, mester deshací di tur rastro di idolatria. E Palabra di Dios, Bijbel Santu, mester ta e único base pa un cristian su fe i su moda di biba. (Isaías 8:19, 20; Romanonan 15:4) Ta incorecto pa agregá cos n’e Palabra di Dios of pa kita algu for di dje.—Deuteronomio 4:2; Revelacion 22:18, 19.

16, 17. (a) Ki idea eróneo e clase di vigilante tabatin pa algun década? (b) Kico ta e splicacion corecto dje “altar” i dje “pilar” den “Egipto”?

¹⁶ Un ehempel lo enfatisá con importante e principio aki ta. Na 1886 ora C. T. Russell a publicá un buki cu a bin haña e título E Plan Divino di Epocanan, e volúmen aki tabata contené un cuadro cu tabata relacioná e épocanan di humanidad cu e Gran Piramid di Egipto. E rumannan a pensa cu e monumento aki di fárao Khufu tabata e pilar na cua Isaías 19:19, 20 a referí: “Riba e dia ei lo resultá di tin un altar pa Jehova meimei dje tera di Egipto, i un pilar pa Jehova banda di su frontera. I e mester resultá di ta pa un señal i pa un testimonio pa Jehova di ehércitonan den e tera di Egipto.” Ki relacion e piramid lo por tabatin cu Bijbel? Wel, como un ehempel, supuestamente e largura di cierto gang den e Gran Piramid a indicá e tempu p’e “tribulacion grandi” di Mateo 24:21 cuminsá, manera nan a comprend’é e tempu ei. Algun Studiante di Bijbel a dedicá nan mes completamente na midi e diferente rasgonan dje piramid pa determiná cosnan manera e dia cu nan lo a bai shelu!

 ¹⁷ Pa algun década a duna hopi balor n’e asina yamá Bijbel den Piedra aki, te ora e edicionnan di Toren di Vigilancia di 15 di november i 1 di december 1928, a splica cu Jehova no tabatin mester di un monumento di piedra cu fáraonan pagano a construí i cu tabata contené señalnan demoniaco di astrologia, pa confirmá e testimonio cu Bijbel ta duna. Mas bien, e revistanan a mustra cu Isaías su profecia mester tabatin un aplicacion spiritual. Mescos cu na Revelacion 11:8, “Egipto” ta símbolo dje mundu di Satanas. E “altar pa Jehova” ta recordá nos dje sacrificionan aceptabel cu cristiannan ungí ta haci tanten cu nan ta residentenan temporal riba e mundu aki. (Romanonan 12:1; Hebreonan 13:15, 16) E pilar “banda di [Egipto] su frontera” ta referí n’e congregacion di cristiannan ungí, cu ta “un pilar i apoyo dje berdad” i cu ta para como un testimonio den “Egipto,” e mundu cu nan ta cerca di bandoná.—1 Timoteo 3:15.

18. (a) Con Jehova a sigui clarificá asuntunan pa studiantenan sincero di Bijbel? (b) Ora un cristian ta haña un clarificacion bíblico difícil pa comprendé, kico lo ta un actitud sabí p’e?

¹⁸ Segun cu añanan ta pasa, Jehova ta sigui duna nos mas clarificacion dje berdad, incluso un comprendimentu mas cla di su palabra profético. (Proverbionan 4:18) Den añanan recien, a animá nos pa wak atrobe cu un comprendimentu mas profundo na—entre otro—e generacion cu lo no pasa bai promé cu e fin yega, e comparacion dje carné i cabritunan, e cos repugnante i ki ora lo e para den un lugá santu, e pacto nobo, e transfiguracion i e vision di tempel dje buki di Ezekiel. Tin bes por ta difícil pa comprendé e splicacionnan actualisá ei, pero e motibunan pa nan ta bira cla na nan debido tempu. Ora un cristian no ta comprendé completamente e splicacion nobo di un texto, e ta haci bon di ripití humildemente e  palabranan di profeta Mikéas: “Lo mi mustra un actitud di spera pa e Dios di mi salbacion.”—Mikéas 7:7.

19. Con e resto ungí i nan otro compañeronan carné a mustra curashi manera leon den e último dianan aki?

¹⁹ Corda cu e vigilante “a grita manera un leon: ‘Riba e toren di vigilancia, o Jehova, mi ta pará constantemente di dia, i na mi puesto di warda mi ta stacioná tur anochi.’” (Isaías 21:8) E resto ungí a mustra curashi manera leon desenmascarando religion falsu i mustrando hende e caminda pa libertad. (Revelacion 18:2-5) Como “e esclabo fiel i discreto,” nan a percurá Bijbel, revista i otro publicacionnan den un gran cantidad di idioma, esta, “alimento n’e debido tempu.” (Mateo 24:45) Nan a hiba delantera den recogé e “multitud grandi . . . for di tur nacion i tribu i pueblo i lenga.” E sanger rescatador di Jesus a haci esakinan tambe limpi i nan ta demostrá di tin curason di leon, esta, curashi den rindi “sirbishi sagrado na [Dios] di dia i anochi.” (Revelacion 7:9, 14, 15) Aña pasá, kico tabata e fruta dje grupo chikitu di Testigonan ungí di Jehova cu ainda ta riba tera i nan compañeronan, e multitud grandi? Nos siguiente artículo lo conta nos esei.

[Nota]

Bo Ta Corda?

• Ki testigonan Jehova a lanta atrabes di añanan?

• Kico ta orígen di Babilonia e Grandi?

• Pakico Jehova a permití Jerusalem, e stad capital di su nacion di testigonan, ser destruí na aña 607 P.E.C. i 70 E.C.?

• Ki spiritu Jehova su clase di vigilante i nan compañeronan a demostrá?

[Preguntanan di Estudio]

[Plachi na página 7]

“Riba e toren di vigilancia, o Jehova, mi ta pará constantemente”

[Plachinan na página 10]

Jehova su clase di vigilante ta tuma nan tarea na serio