Con Bo Ta Mira Bo Mes?

E TABATA un homber orguyoso. Dor cu el a ser promové na un puesto haltu den gobiernu, e tabata gosa di tur e labiamentu i admiracion cu nan tabata basha riba dje. Pero pa su gran disgustu, un otro funcionario a nenga di dun’é e onor ei. Pa tuma vengansa, e funcionario orguyoso a traha un complot pa destruí tur hende den e imperio cu tabatin mésun antecedente étnico cu e ofensor. Esta un sentido trocí di su propio importancia!

E trahadó dje complot tabata Haman, un funcionario haltu den palacio dje rey perso Asuero. I e víctima di su hostilidad? Un hudiu cu yama Mardokeo. Aunke Haman su reaccion asesino tabata exagerá, e ta ilustrá e peliger i consecuencianan grave di orguyo. Su spiritu arogante no solamente a crea un crísis pa otronan, sino a hiba tambe na su humiyacion público i finalmente na su morto.—Ester 3:1-9; 5:8-14; 6:4-10; 7:1-10.

Adoradónan Berdadero No Ta Inmuno pa Orguyo

Jehova ta rekerí pa nos ta ‘modesto den cana cu nos Dios.’ (Mikéas 6:8) Bijbel ta contené vários relato di individuonan cu no a mantené un punto di bista balansá di nan mes. Esaki a hinca nan den hopi problema i dolor. Consideracion di algun dje ehempelnan aki por yuda nos mira e bobedad i peliger di pensamentu desbalansá.

E manera di pensa di Dios su profeta Jónas a bira asina desbalansá cu el a purba hui ora el a haña e comision di Dios pa spierta e pueblo malbado di Nínive tocante Jehova su huicio contra nan. (Jónas 1:1-3) Despues, ora su actividad di predicá a logra cu e ninivitanan a repentí, Jónas a rabia. E tabata asina preocupá cu su mes reputacion como profeta, cu bida di miles di ninivita tabata di poco of ningun importancia p’e. (Jónas 4:1-3) Si nos ta demasiado preocupá cu nos mes importancia, lo por ta difícil pa nos mantené un perspectiva imparcial i exacto di hende i sucesonan rond di nos.

Considerá tambe Uzías, kende tabata un bon rey di Huda. Ora su manera di pensa a bira desbalansá, el a purba poderá arogantemente di cierto responsabilidad di sacerdote. El a paga cu su salú i pérdida di aprobacion divino pa su accionnan inmodesto i masha presumido.—2 Crónicanan 26:3, 16-21.

Forma di pensa desbalansá casi a coge Jesus su apostelnan den las. Nan a bira masha preocupá tocante nan gloria i poder personal. Ora e tempu dje prueba grandi a yega, nan a bandoná Jesus i a hui. (Mateo 18:1; 20:20-28; 26:56; Marco 9:33, 34; Lucas 22:24) Nan falta di modestia i nan pensamentunan di cu nan ta masha importante, casi a pone nan perde for di bista Jehova su propósito i nan papel relacioná cu su boluntad.

Efectonan Perhudicial di Sinti Bo Muchu Importante

Un punto di bista desbalansá di nos mes por causa dolor i por daña nos relacion cu otro hende. Por ehempel, kisas nos ta sintá den un sala i nos ta ripará cu un pareha ta fluister cu otro i ta hari. Si nos ta egocéntrico, nos por asumí incorectamente cu nan ta papia poco-poco pasobra nan ta tene mofa di nos. Nos mente lo no permití nos duna nan conducta ningun otro posibel splicacion. Al fin i al cabo, di ken mas nan por ta papiando? Kisas nos ta rabia i ta dicidí cu nunca mas nos no ta papia cu e pareha ei. Asina un punto di bista desbalansá di nos propio  importancia por hiba na malcomprendimentu i daña relacion cu amigu, miembro di famia i otro hende.

Esnan cu ta tuma nan mes muchu na serio por bira bromadó cu constantemente ta broma tocante nan supuesto gran talento, echo i posesionnan. Of kisas nan ta dominá combersacionnan dor di semper tin algu di mencioná tocante nan mes. Abla asina ta revelá un falta di amor berdadero i por ta masha iritante. P’esei, hopi bes personanan presumido ta alehá nan mes for di otro hende.—1 Corintionan 13:4.

Den nos ministerio público como Testigo di Jehova, nos por topa hende cu ta ridiculisá i rechasá nos. Nos tin cu corda cu oposicion asina ta realmente dirigí, no contra nos personalmente, sino contra Jehova, e Fuente di nos mensahe. Sin embargo, un punto di bista trocí di nos propio importancia por hiba na consecuencianan serio. Añanan pasá, un ruman homber a tuma atake verbal di un doño di cas como algu personal i a zundr’é bek. (Efesionan 4:29) Nunca mas despues di esei e ruman homber no a participá den e ministerio di cas pa cas. Sí, orguyo por pone nos perde nos dominio propio ora nos ta predicá. Laga nos haci esfuerso pa no permití esaki sosodé nunca. Mas bien, laga nos busca Jehova su yudansa humildemente pa nos sigui apreciá e privilegio cu nos tin di por participá den e ministerio cristian.—2 Corintionan 4:1, 7; 10:4, 5.

Si nos tin un actitud di cu nos ta importante, esei por stroba nos tambe di aceptá conseho cu nos tin masha mester di dje. Algun aña pasá den un pais centroamericano, un mucha homber tiener a duna un discurso den e Scol di Ministerio Teocrático den e congregacion cristian. Ora e superintendente di scol a dun’é algun conseho bastante franco, e hóben rabiá a tira su Bijbel abou i a sali bai for di Salon di Reino cu e intencion di no bolbe nunca mas. Pero despues di un par di dia, el a dominá su orguyo, a reconciliá cu e superintendente di scol i a aceptá su conseho humildemente. Cu tempu, e hóben aki a crece na madures cristian.

Ser inmodesto i tuma nos mes muchu na serio por daña nos relacion cu Dios. Proverbionan 16:5 ta spierta: “Tur hende cu ta orguyoso di curason ta algu repugnante pa Jehova.”

Un Punto di Bista Balansá di Nos Mes

Ta bisto anto cu nos no mester tuma nos mes muchu na serio. Naturalmente, esaki no ta nificá cu nos no mester ta serio den loke nos ta bisa of haci. Bijbel ta indicá cu superintendentenan i sirbidónan ministerial—eigenlijk, tur hende den congregacion—mester ta serio. (1 Timoteo 3:4, 8, 11; Tito 2:2) P’esei, con cristiannan por desaroyá i mantené un punto di bista modesto, balansá i serio di nan mes?

Bijbel ta duna vários ehempel animante di individuonan cu a mantené un punto di bista balansá di nan mes. Jesucristo su ehempel di humildad ta sobresalí den esakinan. Pa cumpli cu boluntad di su Tata i trece salbacion pa humanidad, Dios su Yu a bandoná su posicion celestial glorioso boluntariamente i a bira un homber humilde riba tera. Apesar cu el a ser insultá, abusá i a muri un morto bergonsoso, el a mantené su dominio propio i dignidad. (Mateo 20:28; Filipensenan 2:5-8; 1 Pedro 2:23, 24) Con bin Jesus por a haci esaki? El a dependé completamente riba Jehova i tabata decididu pa cumpli cu e boluntad di Dios. Jesus a studia e Palabra di Dios diligentemente, a haci oracion ferviente i a haci esfuerso vigoroso den e ministerio. (Mateo 4:1-10; 26:36-44; Lucas 8:1; Juan 4:34; 8:28; Hebreonan 5:7) Si nos sigui Jesus su ehempel, esei por yuda nos desaroyá i mantené un punto di bista balansá di nos mes.—1 Pedro 2:21.

Considerá tambe e excelente ehempel dje yu di rey Saul, Jonatan. Debí na desobedencia di su tata, Jonatan a perde e oportunidad di sigui Saul como rey. (1 Samuel 15:10-29) Jonatan tabata amargá pa motibu dje pérdida aki? El a bira yalurs riba David, e yoncuman cu mester a goberná na su lugá? Aunke Jonatan tabata hopi mas bieu cu David i probablemente mas experenciá cuné, cu modestia i humildad el a cumpli cu e areglo di Jehova i a apoyá David lealmente.  (1 Samuel 23:16-18) Tene un perspectiva cla di Dios su boluntad i ser dispuesto pa someté na dje lo yuda nos pa ‘no pensa mas di nos mes cu ta necesario pa pensa.’—Romanonan 12:3.

Jesus a siña nos e balor di desplegá modestia i humildad. El a ilustrá esaki dor di bisa su disipelnan cu ora nan ta na un fiesta di casamentu, nan no mester scoge “e lugá mas prominente” pasobra kisas un persona mas distinguí cu nan lo por bini i kisas nan lo sufri e humiyacion di tin cu bai na e lugá mas abou. Haciendo e les masha cla, Jesus a agregá: “Tur hende cu ta halsa su mes lo ser humiyá i esun cu humiyá su mes lo ser halsá.” (Lucas 14:7-11) Nos ta demostrá sabiduria dor di haci caso di Jesus su conseho i ‘bisti nos mes cu humildad di mente.’—Colosensenan 3:12; 1 Corintionan 1:31.

Bendicionnan di un Punto di Bista Balansá

Teniendo un spiritu modesto i humilde ta permití Jehova su sirbidónan haña berdadero goso den nan ministerio. Ancianonan ta mas acercabel ora nan humildemente ta “trata e tou cu ternura.” (Echonan 20:28, 29) E ora ei, henter e congregacion ta sintié mas cómodo pa papia cu nan i busca yudansa cerca nan. Dor di esei e congregacion por uni mas den un spiritu di amor, calor di amistad i confiansa.

Un actitud di no tuma nos mes demasiado na serio ta permití nos cera bon amistad. Modestia i humildad lo evitá cu nos ta desaroyá un spiritu competitivo i di purba sobresalí riba otronan den echo of cosnan material. E cualidadnan divino aki lo yuda nos bira hende cu mas consideracion, i asina nos lo ta den mihó posicion pa consolá i apoyá esnan den necesidad. (Filipensenan 2:3, 4) Ora amor i bondad conmové hende, generalmente nan ta reaccioná faborabel. I no ta un relacion inegoista asina ta bira e fundeshi riba cua ta forma amistadnan? Esei ta e bendicion cu ta resultá dor cu nos no tabata inmodesto, tumando nos mes muchu na serio!—Romanonan 12:10.

Un punto di bista balansá di nos mes ta hacié mas fácil pa nos admití nos fayo ora nos ofendé un hende. (Mateo 5:23, 24) Esaki ta resultá den mihó relacionnan cu ta permití reconciliacion i respet mutuo. Si esnan den puesto di supervision, manera ancianonan cristian, ta modesto i humilde, nan tin chens di haci hopi cos bon pa otronan. (Proverbionan 3:27; Mateo 11:29) Un persona humilde ta haña tambe cu ta mas fácil p’e pordoná otronan cu peca contra dje. (Mateo 6:12-15) Lo e no bula reaccioná riba tur supuesto ofensa, i lo e confia cu Jehova lo rectificá asuntunan cu di otro manera no por ser corigí.—Salmo 37:5; Proverbionan 3:5, 6.

E mayor bendicion cu un punto di bista modesto i balansá di nos mes ta duna, ta e echo cu nos ta disfrutá di Jehova su fabor i aprobacion. “Dios ta oponé esnan halsá, pero e ta duna bondad inmerecí na esnan humilde.” (1 Pedro 5:5) Laga nos nunca cai den e las di pensa cu nos ta mihó di loke nos realmente ta. Mas bien, laga nos reconocé humildemente nos posicion den Jehova su areglo di cosnan. Tin bendicionnan magnífico ta spera tur cu cumpli cu su rekisito ‘pa ta modesto den cana cu Dios.’

[Plachi na página 22]

Jonatan a apoyá David humildemente