Dios Su Palabra Profetico Ta Duna Speransa  pa Futuro

DANKI na e Palabra di Dios, Bijbel Santu, cristiannan berdadero ta mira futuro cu fe, speransa i optimismo. Protehá den nan relacion cu Jehova Dios, nan ta anhelá pa futuro. Manera e discurso di apertura na e Congresonan di Distrito “Dios Su Palabra Profético” a splica, Testigonan di Jehova ta studiantenan diligente di profecia bíblico pa hopi aña caba. Pues, kico Jehova tabatin pa su pueblo n’e congresonan aki? Cu Bijbel den man, tur esnan presente tabata ansioso pa sa. E tema pa cada un dje dianan di congreso ta poné como un subtema separá.

PROME DIA: Cana den e Lus dje Palabra di Dios

E discurso “E Palabra di Dios A Guia Nos” a splica cu Jehova su pueblo ta manera un homber cu ta cuminsá un biahe den scuridad di anochi. Segun solo ta sali, e ta mira sombra so, pero ora solo ta briya na haltu, e ta mira tur detaye. Manera Proverbionan 4:18 a profetisá, Jehova su pueblo ta mira nan caminda bon cla awor bou dje lus radiante dje berdad di Dios su palabra profético. Nan no ta trompecá pa nan cuenta den scuridad spiritual.

E discurso clave, “Presta Atencion na Dios Su Palabra Profético,” a corda e oyentenan cu Jehova ta scapa esnan cu ta acudí na dje di tur e decepcion i desilusionnan cu esnan cu ta bai tras di mesías i profetanan falsu ta pasa aden. Den un contraste skerpi, e credencialnan dje berdadero Mesías, Jesucristo, ta abrumador! Por ehempel, Jesus su transfiguracion milagroso a duna un bista di antemano di dje como rey entronisá dje Reino di Dios. For di dia cu el a ricibí poder pa reina na 1914, Jesus ta e “strea di dia” tambe, mencioná na 2 Pedro 1:19. E orador a bisa: “Como e Strea di Dia Mesiánico, e ta anunciá cu un dia of era nobo ta habri pa henter humanidad obediente.”

Como introduccion pa e programa di atardi, e discurso “Briya Como Iluminadó” a amplia riba Efesionan 5:8, caminda apostel Pablo ta consehá nos pa “sigui cana como yunan di lus.” Cristiannan ta iluminadó, no djis dor cu nan ta compartí e Palabra di Dios cu otro hende, sino tambe dor di imitá Jesus den aplicá e siñansa di Bijbel den nan bida.

Pa nos ta iluminadónan asina, nos mester “Haña Deleite den Lesa e Palabra di Dios.” E tópico aki a keda tratá den un simposio di tres parti. Despues di cita Abraham Lincoln, cu a yama Bijbel “e mihó regalo cu Dios a yega di duna hende,” e promé orador a puntra e auditorio kico nan custumber di lesa ta revelá tocante e profundidad di nan aprecio pa e Palabra di Jehova. El a animá e oyentenan pa nan lesa Bijbel cuidadosamente, i tuma tempu pa visualisá relatonan bíblico i conectá puntonan nobo cu cosnan cu nan a yega di siña caba.

E siguiente parti dje simposio a enfatisá e necesidad di studia, i no djis lesa di forma casual, si nos kier asimilá “cuminda sólido.” (Hebreonan 5:13, 14) E orador a bisa cu studiamentu ta edificá nos foral si nos ‘prepará nos curason’ di antemano, manera e sacerdote israelita Esdras a haci. (Esdras 7:10) Pero di con studiamentu ta asina importante? Dor cu e tin un influencia directo riba nos relacion cu Jehova. P’esei, studiamentu di Bijbel mester ta precioso, agradabel i refrescante, apesar cu e ta rekerí disiplina i esfuerso mental. Con nos por haña tempu pa studia na un forma significativo? Dor di ‘cumpra tempu oportuno’ for di cosnan ménos importante, segun e orador final dje simposio. (Efesionan 5:16) Sí, e clave pa haña tempu ta di haci mihó uso posibel dje tempu cu nos tin.

E discurso “Dios Ta Duna Poder na Esun Cansá” a reconocé cu hopi hende ta cansá awendia. Pa nos por tin “poder mas ayá di loke ta normal” p’e ministerio cristian, nos mester dependé riba Jehova, esun cu “ta dunando poder na esun cansá.” (2 Corintionan 4:7; Isaías 40:29) Algun yudansa pa fortalecé nos ta, e Palabra di Dios, oracion, e congregacion cristian, participacion regular den e ministerio, superintendentenan cristian i e ehempel fiel di otronan. E tema “Sea Maestro en Bista dje Tempu” a resaltá e necesidad cu tin pa cristiannan ta maestro ademas di ser predicadó, i pa nan traha duru pa desaroyá e “arte di siña.”—2 Timoteo 4:2.

E discurso final dje dia, “Esnan Cu Ta Lucha Contra Dios Lo No Prevalecé,” a mencioná intentonan recien sin base den algun pais pa calificá Testigonan di Jehova como un culto peligroso. Pero nos no tin nodi tin miedu, pasobra Isaías 54:17 ta bisa: “‘Ki arma cu nan forma contra bo lo no tin éxito, i ki lenga cu lanta contra bo den huicio, lo bo condená. Esaki ta e posesion hereditario dje sirbidónan di Jehova, i nan husticia ta bini di mi,’ ta e expresion di Jehova.”

DI DOS DIA: Cosnan Cu e Scritura Profético A Duna Nos di Conocé

Despues di considerá e texto di Bijbel pa e dia ei, esnan reuní a gosa dje di dos simposio dje congreso, titulá “Glorificá Jehova Como  Cargadónan di Lus.” E promé discurso a mustra cu e meta di un cristian ta di glorificá Jehova dor di predicá tur caminda. E siguiente parti a mencioná e necesidad di dirigí hende receptivo na e organisacion di Dios. Con? Dor di tuma cincu pa dies minuut promé of despues di cada studio di Bijbel pa mustra con Dios su organisacion ta funcioná. E di tres discurso dje simposio a enfatisá e necesidad di glorificá Dios cu obranan excelente.

E discurso “Stima Jehova Su Recordatorionan Masha Hopi Mes” a cubri algun versículo selectá di Salmo 119. Sin duda, nos tin mester di recordatorio, pasobra nos tur tin e tendencia di lubidá. P’esei, ta masha importante pa nos desaroyá un amor pa Jehova su recordatorionan, mescos cu e salmista!

Despues a bini algu masha special—e discurso di bautismo titulá “Obedecé e Palabra Profético Ta Hiba na Bautismo.” A recordá e candidatonan pa bautismo cu no ta djis dor di bautisá nan ta imitá Cristo, sino tambe dor di sigui su pasonan cu sumo cuidou i atencion. (1 Pedro 2:21) Esta un privilegio grandi e nobonan aki tin di por tuma parti n’e cumplimentu di Juan 10:16, caminda Jesus a profetisá cu lo e recogé “otro carné” pa sirbi banda di su disipelnan ungí cu spiritu!

Pa cuminsá e programa di atardi, e discurso “Tende Loke e Spiritu Tin di Bisa” a splica cu Jehova su spiritu ta papia cu nos via Bijbel, “e esclabo fiel i discreto” i nos concenshi entrená a base di Bijbel. (Mateo 24:45) P’esei, cristiannan no tin nodi tende un stem literal for di shelu pa nan sa con pa agradá Dios. E siguiente consideracion, “Apoyá Siñansa Cu Ta di Acuerdo cu Debocion na Dios,” a spierta cristiannan pa nan no presta atencion na e ideanan kibradó di moralidad cu e mundu aki ta propagá. Sí, un curiosidad desenfrená por exponé nos na informacion perhudicial cu ta bini di apóstatanan i otro agentenan di Satanas. Ta muchu mas mihó pa nos lesa Bijbel regularmente, como tambe tur e artículonan den E Toren di Vigilancia i Spierta!

Cu e título “Sigui Retené e Patronchi di Palabranan Saludabel,” e siguiente discurso a enfatisá e importancia pa nos ta bon familiarisá cu e “patronchi” of marco bíblico dje berdad. (2 Timoteo 1:13) Capta e patronchi aki ta e clave, no solamente pa ta deboto na Dios, sino tambe pa identificá loke no ta armonisá cu e berdad.

Imaginá bo cu Jehova ta considerá bo deseabel. Esta un gran onor! E discurso “‘Cosnan Deseabel’ Ta Yenando e Cas di Jehova,” basá riba e profecia di Ageo, tabata sumamente animante, pasobra el a garantisá e oyentenan cu cada miembro dje “multitud grandi” ta berdaderamente deseabel pa Jehova. (Revelacion 7:9) P’esei Jehova lo scapa nan ora e “sagudí” e nacionnan pa último biaha durante e binidero “gran tribulacion.” (Ageo 2:7, 21, 22; Mateo 24:21) Pero miéntras tantu, Jehova su pueblo mester keda vigilá den sentido spiritual, manera a ser splicá den e parti “Textonan Profético Ta Spierta Nos pa Keda Alerto.” E orador a cita e palabranan aki di Jesus: “P’esei, sigui vigilá, pasobra boso no sa riba ki dia boso Señor ta bini.” (Mateo 24:42) Con nos por mantené nos vigilancia spiritual? Dor di keda ocupá den Jehova su sirbishi, haci oracion constantemente i keda den expectativa di Jehova su gran dia.

E discurso final dje dia tabata titulá “E Palabra Profético den e Tempu di Fin.” Nos lo keda cord’é pa añanan largu. Di con? Dor cu e orador a anunciá publicacion di un buki nobo—Presta Atencion na e Profecia di Daniel! E orador di: “E publicacion aki di 320 página, yen di bunita plachi, ta trata delaster un parti dje buki di Daniel.” E ta un evidencia masha fortalecedor di cu Jehova ta tirando lus riba su Palabra profético!

DI TRES DIA: Dios Su Palabra Profético No Ta Faya Nunca

E último dia dje congreso a cuminsá cu e simposio “Palabranan Profétco pa e Tempu Señalá.” E tres partinan a examiná e tres pronunciacionnan  cu profeta Habacuc a haci di Jehova su ehecucionnan di huicio. Esun promé tabata contra Huda rebelde, i esun di dos tabata contra Babilonia opresivo. Esun último, cu mester cumpli ainda, ta aplicá n’e destruccion inminente di tur hende malbado. Papiando di Armagedon, e último ruman den e simposio a lanta un midí saludabel di temor di Dios den su oyentenan ora el a bisa: “Berdaderamente, lo ta algu inspirador di temor ora Jehova los e forsa completo di su gran poder.”

“Laga Nos Apreciá Nos Patrimonio Spiritual” tabata título di e drama bíblico conmovedor dje congreso. E presentacion aki, cu a yuda nos examiná nos mes profundamente, a mustra e contraste cu tabatin entre e actitud cu Jacob i Esau tabatin pa cosnan spiritual. Esau a despreciá su patrimonio spiritual, i el a ser duná na Jacob cu sí a apreci’é. A puntra esnan presente: “[Ki patrimonio spiritual] Jehova a duna nos?” E orador a contestá: “E berdad di su Palabra, Bijbel; e speransa di bida eterno; i e onor di represent’E como proclamadónan dje bon nobo.”

E siguiente parti tabata titulá “Kico Nos Patrimonio Precioso Ta Nificá pa Bo?” Nos ta mustra e actitud corecto pa nos patrimonio spiritual si nos ta pone Jehova su sirbishi i privilegionan spiritual promé cu interesnan personal of material. Asina nos ta edificá nos bida rond di nos relacion cu Jehova, na contraste skerpi cu Adam, Esau i e israelitanan infiel.

E discurso público “Haciendo Tur Cos Nobo—Manera A Ser Profetisá,” a combiná cuater profecia clave tocante e “shelu nobo” i e “tera nobo.” (Isaías 65:17-25; 66:22-24; 2 Pedro 3:13; Revelacion 21:1, 3-5) Claramente, Jehova tabatin un cumplimentu mayor dje profecianan ei na mente; mayor cu esun cu su pueblo restorá a experenciá na 537 P.E.C. Sí, e tabatin na mente e gobiernu dje Reino (e “shelu nobo”) i su súbditonan terenal (e “tera nobo”) cu lo habitá un glorioso paradijs global.

E discurso “Nos Expectativanan Segun Cu e Palabra di Dios Ta Guia Nos” a trece e congreso na un conclusion emocionante i motivador. El a corda tur presente cu “e tempu cu a keda” pa completá e trabou di proclamacion di Reino “ta reducí.” (1 Corintionan 7:29) Sí, nos ta net na drempel dje cumplimentu di Jehova su decreto contra Satanas i henter su sistema malbado. Laga nos sinti mescos cu e salmista cu a canta: “Nos alma mes ta sperando riba Jehova. Nos yudante i nos escudo e ta.” (Salmo 33:20) Esta un speransa glorioso tin den futuro pa esnan cu ta basa nan speransanan riba Dios su palabra profético!

[Plachi na página 7]

Un drama emocionante a profundisá aprecio pa e patrimonio spiritual di Jehova su sirbidónan

[Plachi na página 7]

Hopi di esnan cu a obedecé Dios su palabra profético a bautisá