“Sigui Vigila”
“Sigui Vigila”
“P’esei, sigui vigilá, pasobra boso no sa riba ki dia boso Señor ta bini.”—MATEO 24:42.
1. Con esnan cu tin basta aña ta sirbi Jehova ta sinti tocante tur nan añanan di sirbishi dedicá? Cita un ehempel.
HOPI ruman cu tin basta aña ta sirbi Jehova, a siña e berdad tempu cu nan tabata hóben. Mescos cu e comerciante cu a descubrí un perla di gran balor i a bende tur loke e tabatin pa por cumpr’é, e studiantenan di Bijbel ansioso ei a nenga nan mes i a dedicá nan bida na Jehova. (Mateo 13:45, 46; Marco 8:34) Con nan ta sinti, ya cu kisas nan mester a warda mas cu nan a pensa pa mira Dios su propósitonan cumpli riba tera? Esei no ta duel nan! Nan ta di acuerdo cu ruman A. H. Macmillan, cu despues di mas cu 60 aña di sirbishi dedicá na Dios, a bisa: “Mi ta mas determiná cu nunca pa sigui den mi fe. El a duna mi bida sentido. Ainda e ta yuda mi enfrentá futuro sin miedu.”
2. (a) Ki conseho oportuno Jesus a duna su siguidónan? (b) Cua preguntanan nos lo considerá den e artículo aki?
2 Kico di abo? Sin importá bo edad, tuma e palabranan aki di Jesus na consideracion: “P’esei, sigui vigilá, pasobra boso no sa riba ki dia boso Señor ta bini.” (Mateo 24:42) E declaracion simpel ei ta contené un berdad profundo. Nos no sa ki dia Señor lo bini pa ehecutá huicio riba e sistema malu aki, ni no ta necesario pa nos sa tampoco. Pero nos mester hiba nos bida di tal manera cu ora Señor bini, nos lo no tin nada di lamentá. Ki ehempelnan nos tin den Bijbel relacioná cu esaki, cu lo yuda nos sigui vigilá? Con Jesus a ilustrá e importancia di haci esei? I ki evidencia nos tin awe cu ta proba cu nos ta biba den e último dianan dje mundu malbado aki?
Un Ehempel Spiertador
3. Den ki sentido hopi hende djawe ta parce esnan den tempu di Noe?
3 Den hopi sentido, hende djawe ta manera e homber i muhernan den dia di Noe. Tera tabata yená cu violencia e tempu ei, i tur inclinacion di hende su curason tabata “malu tur ora.” (Génesis 6:5) Atencion completo dje gran mayoria a bai na asuntunan di tur dia. Pero promé cu el a trece e gran Diluvio, Jehova a duna e hendenan un chens pa repentí. El a comisioná Noe pa predicá, i Noe a obedecé. El a sirbi como un “predicadó di husticia” pa kisas 40, 50 aña of mas. (2 Pedro 2:5) Sin embargo, e hendenan a ignorá Noe su mensahe di advertencia. Nan no a vigilá. P’esei, na final ta Noe cu su famia so a sobrebibí Jehova su ehecucion di huicio.—Mateo 24:37-39.
4. Den ki sentido nos por bisa cu e ministerio di Noe tabata exitoso, i con mescos por ta bisá di bo trabou di predicá?
4 Noe su ministerio tabata exitoso? No husga a base dje poco hendenan cu a reaccioná. De echo, Noe su predicacion a cumpli cu su propósito sin importá con e reaccion tabata. Di con? Dor cu el a duna e hendenan oportunidad amplio pa scoge si nan lo sirbi Jehova of no. Kico dje teritorio caminda abo ta predicá? Asta si no tin masha reaccion positivo, bo tin hopi éxito. Di con? Pasobra dor di predicá bo ta zona Dios su advertencia, i asina bo ta cumpli cu e comision cu Jesus a duna su siguidónan.—Mateo 24:14; 28:19, 20.
Nan A Ignorá e Profetanan di Dios
5. (a) Ki condicionnan a reina na Huda den tempu di Habacuc, i con e pueblo a reaccioná na su mensahe profético? (b) Con e pueblo di Huda a desplegá hostilidad contra Jehova su profetanan?
5 Siglonan despues di Diluvio, e situacion den e reino di Huda a bira hopi serio. Idolatria, inhusticia, opresion i asta asesinato a bira comun. Jehova a lanta Habacuc pa advertí e pueblo cu si nan no repentí, nan lo a enfrentá calamidad na man dje caldeonan, esta e babilonionan. (Habacuc 1:5-7) Pero e pueblo a nenga di scucha. Kisas nan a razoná: ‘Ata profeta Isaías a advertí nos mescos mas cu shen aña pasá, i nada no a pasa ainda!’ (Isaías 39:6, 7) Hopi dje oficialnan di Huda tabata mas cu djis indiferente na e mensahe; nan tabata hostil contra e mensaheronan tambe! Na un ocasion nan a purba mata profeta Jeremías, anto nan lo a logra si Ahikam no a intervení. Ora un otro mensahe profético a pone rey Jehoiakim rabia, el a laga mata profeta Uriya.—Jeremías 26:21-24.
6. Con Jehova a fortalecé Habacuc?
6 Dios a inspirá Jeremías pa profetisá e desolacion di 70 aña di Huda. E mensahe di Habacuc no tabata ménos directo cu esun di dje, i e tabata mes impopular. (Jeremías 25:8-11) P’esei, nos por comprendé Habacuc su angustia ora el a sclama: “Pa cuantu tempu, o Jehova, mi tin cu grita pa yudansa, sin cu bo ta tende? Pa cuantu tempu lo mi sclama na bo pa auxilio contra violencia, sin cu bo ta salba?” (Habacuc 1:2) Bondadosamente, Jehova a contestá Habacuc cu e palabranan fortalecedor di fe aki: “E vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda, keda den expectativa di dje; pasobra lo e realisá sin falta. Lo e no ta lat.” (Habacuc 2:3) Pues Jehova tabatin un “tempu señalá” pa pone fin na inhusticia i opresion. Si el a parce di tarda, Habacuc no mester a descurashá ni baha su actividad. Mas bien, e mester a “keda den expectativa,” i biba cada dia cu un sentido di urgencia. E dia di Jehova lo no ta lat!
7. Di con Jerusalem tabata riba caminda pa un otro destruccion den promé siglo E.C.?
7 Rond di 20 aña despues cu Jehova a papia cu Habacuc, Jerusalem, capital di Huda, a ser destruí. Despues nan a reconstruyé, i hopi dje cosnan malu cu a angustiá Habacuc a keda corigí. Sin embargo, den promé siglo di Era Comun, e stad tabata riba caminda pa destruccion atrobe pa motibu di e infieldad dje habitantenan. Den su misericordia, Jehova a haci areglo pa hende cu e disposicion di curason corecto por sobrebibí. E biaha aki el a usa nada ménos cu Jesucristo como profeta pa duna nan e mensahe. Na aña 33 E.C., Jesus a bisa su siguidónan: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca. E ora ei laga esnan den Hudea cuminsá hui p’e cerunan.”—Lucas 21:20, 21.
8. (a) Kico lo por a sosodé algun cristian segun cu tempu a pasa despues dje morto di Jesus? (b) Con Jesus su palabranan profético tocante Jerusalem a cumpli?
8 Segun cu añanan a pasa, algun cristian na Jerusalem lo por a puntra nan mes ta ki dia precis e profecia di Jesus tabata bai cumpli. Con cu bai bin, mester tene na cuenta cuantu sacrificio algun di nan lo a haci sin duda. Kisas nan a nenga oferta di negoshi atractivo pa motibu di nan determinacion pa sigui vigilá. Nan a cansa cu transcurso di añanan? Nan a dicidí cu nan tabata perdiendo tempu, cu Jesus su palabranan a referí na un otro generacion, i no na di nan? Na aña 66 E.C. Jesus su profecia a cuminsá cumpli ora ehército romano a rondoná Jerusalem. Esnan cu a sigui vigilá a reconocé e señal, hui for dje stad i scapa di mester experenciá e desolacion di Jerusalem.
Un Ilustracion dje Necesidad pa Vigilá
9, 10. (a) Con lo bo resumí Jesus su ilustracion dje esclabonan cu a spera riba nan doño cu mester a bolbe di su casamentu? (b) Di con lo por tabata difícil p’e esclabonan spera riba nan doño? (c) Pakico tabata bon pa e esclabonan tene pacenshi?
9 Pa enfatisá e necesidad di vigilá, Jesus a compará su disipelnan cu esclabo cu ta warda pa nan doño bolbe di su casamentu. Nan tabata sa cu lo e bolbe riba un cierto anochi, pero ki ora? Durante e promé warda djanochi? E di dos? E di tres? Nan no tabata sa. Jesus a bisa: “Si e [doño] yega den e di dos warda, sí, of den e di tres, i haña nan [vigilando] asina, felis nan ta!” (Lucas 12:35-38) Djis imaginá con ansioso e esclabonan aki lo tabata. Sin duda cada zonido, cada sombra cu move lo a lanta nan expectativa: ‘Ta nos doño esaki lo ta?’
10 Kico si e doño yega durante e di dos warda djanochi, cu tabata core di mas o ménos nueb’or te meianochi? Tur e esclabonan lo tabata cla pa dun’é bon biní, asta esnan cu a traha duru for di mainta trempan? Of algun di nan lo tabata na soño? Kico si e doño a bolbe durante e di tres warda djanochi, e periodo di meianochi te mas o ménos tres or di mardugá? Algun dje esclabonan lo a desanimá, of asta disgustá dor cu nan doño a parce di tarda? * Ta e esclabonan cu tabata vigilá ora e doño a yega so lo a ser declará felis. Sin duda e palabranan na Proverbionan 13:12 lo a aplicá na nan: “Expectativa posponé ta haci e curason enfermo, pero e cos deseá ta un palu di bida ora e yega di berdad.”
11. Con oracion por yuda nos sigui vigilá?
11 Durante e periodo di aparente tardansa, kico lo a yuda e siguidónan di Jesus sigui vigilá? Ora e tabata den e hofi di Getsémani poco promé cu su aresto, Jesus a bisa tres di su apostelnan: “Sigui vigilá i haci oracion continuamente, pa boso no cai den tentacion.” (Mateo 26:41) Añanan despues Pedro, cu tabata presente na e ocasion ei, a duna su compañeronan cristian un conseho similar. El a skirbi: “E fin di tur cos a yega cerca. P’esei sea di sano huicio, i vigilante afin di haci oracion.” (1 Pedro 4:7) Pues, ta bisto cu oracion intenso mester ta parti di nos rutina cristian. Sí, nos mester roga Jehova continuamente p’e yuda nos sigui vigilá.—Romanonan 12:12; 1 Tesalonicensenan 5:17.
12. Kico ta e diferencia entre speculacion i keda den expectativa?
12 Nota cu Pedro a bisa tambe: “E fin di tur cos a yega cerca.” Con cerca? Ta imposibel pa sernan humano determiná e dia i ora exacto. (Mateo 24:36) Pero tin un diferencia entre permití nos mes cuminsá speculá, loke Bijbel no ta animá, i keda den expectativa dje fin. Esei sí Bijbel ta animá nos pa haci. (Compará cu 2 Timoteo 4:3, 4; Tito 3:9.) Cua ta un manera cu nos por keda den expectativa dje fin? Dor di presta atencion cuidadoso na e evidencia cu ta mustra cu e fin ta cerca. P’esei, laga nos repasá evidencia den seis diferente área, cu ta mustra cu nos ta bibando den e último dianan dje mundu malbado aki.
Seis Diferente Area di Evidencia Convincente
13. Con e profecia di Pablo registrá na 2 Timoteo capítulo 3 ta convencé bo cu nos ta bibando den “e último dianan”?
13 Di promé, nos ta mira cumplimentu bon cla di apostel Pablo su profecia tocante “e último dianan.” Pablo a skirbi: “Den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecidu, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios, teniendo un forma di debocion piadoso pero resultando falsu na su poder; i apartá bo di esakinan. Pero hende malbado i impostornan lo bai di malu pa pió, engañando i siendo engañá.” (2 Timoteo 3:1-5, 13) Nos no ta mira e profecia aki cumpli den nos tempu? Ta esnan cu ta ignorá e echonan so por bisa cu no! *
14. Con e palabranan na Revelacion 12:9 tocante e Diabel ta cumpliendo awe, i kico lo pasa cuné pronto?
14 Di dos, nos ta mira e efectonan dje expulsion di Satanas i su demoñonan for di shelu, cumpliendo cu loke Revelacion 12:9 ta bisa. Ei nos ta lesa: “E dragon grandi a ser tirá abou, e colebra original, esun yamá Diabel i Satanas, cu ta gañando henter e tera habitá; el a ser tirá abou n’e tera, i su angelnan a ser tirá abou huntu cuné.” Esaki a hiba na “ai,” esta, calamidadnan grandi pa tera. Sin duda tabatin hopi calamidad riba humanidad, particularmente di 1914 padilanti. Pero e profecia aki ta agregá cu ora e Diabel ser bentá na tera, e sa “cu e tin un periodo di tempu corticu.” (Revelacion 12:12) Durante e periodo aki, Satanas ta haci guera contra e siguidónan ungí di Cristo. (Revelacion 12:17) No tin duda di cu nos a mira e efectonan di su atake den nos tempu. * Pero pronto Satanas lo ser cerá den e abismo “p’e no gaña e nacionnan mas.”—Revelacion 20:1-3.
15. Con Revelacion 17:9-11 ta duna evidencia cu nos ta biba den e tempu di fin?
15 Di tres, nos ta biba den tempu dje di ocho i último “rey” mencioná den e profecia na Revelacion 17:9-11. Aki apostel Juan ta mencioná shete rey cu ta representá shete potencia mundial: Egipto, Asiria, Babilonia, Medo-Persia, Grecia, Roma i e potencia mundial dòbel Anglo-Americano. Ademas e ta mira “un di ocho rey” cu ta “sali dje shetenan.” Actualmente e di ocho rey aki—e último cu Juan a mira—ta representá Nacionnan Uní. Juan ta bisa cu e di ocho rey aki “ta bai na destruccion,” i despues no tin mas mencion di ningun otro rey terenal. *
16. Con e echonan cu ta cumpli relacioná cu e imágen den e soño di Nabucodonosor ta indicá cu nos ta biba den e último dianan?
16 Di cuater, nos ta biba den e periodo di tempu simbolisá dor di e pianan dje imágen den e soño di Nabucodonosor. Profeta Daniel a interpretá e soño misterioso aki di un imágen enorme cu forma di hende. (Daniel 2:36-43) E cuater partinan di metal dje imágen ta representá vários potencia mundial, cuminsando cu e cabes (e Imperio Babilónico) te na e pianan cu e tenchinan (e gobiernunan cu ta goberná awe). Tur e potencianan mundial cu e imágen a representá a aparecé caba. Nos ta biba den e periodo simbolisá dor di pia dje imágen. No tin mencion di otro potencia cu tin cu bini ainda. *
17. Con nos actividad di predicá e Reino ta duna evidencia adicional cu nos ta biba den e tempu di fin?
17 Di cincu, nos ta mira con un obra di predicacion mundial ta ser efectuá, cu segun Jesus, lo a tuma lugá net promé cu e fin dje sistema aki. Jesus a declará: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Awe, e profecia ei ta riba caminda pa cumpli, manera nunca promé. Ta berdad cu ainda tin teritorio no-trahá. I kisas na Jehova su debido tempu un porta grandi cu ta hiba na mas actividad lo habri. (1 Corintionan 16:9) Sin embargo, Bijbel no ta declará cu Jehova lo warda te ora tur hende riba tera ricibí un testimonio personalmente. Mas bien, mester predicá e bon nobo na Jehova su satisfaccion. E ora ei e fin lo yega.—Compará cu Mateo 10:23.
18. Evidentemente, kico lo ta e caso cu algun dje ungínan ora e tribulacion grandi cuminsá, i con nos por determiná esaki?
18 Di seis, e cantidad di berdadero disipel ungí di Cristo ta menguando, apesar cu evidentemente algun di nan lo ta riba tera ainda ora e tribulacion grandi cuminsá. Mayoria dje resto ta basta avansá den edad, i den transcurso di añanan e cantidad di esnan berdaderamente ungí a baha. Tog, refiriendo na e gran tribulacion, Jesus a declará: “A ménos cu e dianan ei ser cortá, ningun carni lo ser salbá; pero pa causa dje scogínan e dianan ei lo ser cortá.” (Mateo 24:21, 22) Pues, ta bisto cu algun dje “scogínan” di Cristo lo ta riba tera ainda ora e tribulacion grandi cuminsá. *
Kico Ta na Caminda?
19, 20. Di con awor ta mas urgente cu nunca pa nos keda lantá i sigui vigilá?
19 Kico futuro tin wardá pa nos? Tin tempu excitante na caminda. Pablo a avisá cu “e dia di Jehova ta bini exactamente manera un ladron den anochi.” Tocante hende cu ta parce sofisticá, e ta bisa: “Ki ora cu nan ta bisando: ‘Pas i siguridad!’ e ora ei destruccion repentino lo bini riba nan instantáneamente.” P’esei Pablo ta urgi su lectornan: “Laga nos no sigui drumi manera e otronan, sino laga nos keda lantá i mantené nos huicio.” (1 Tesalonicensenan 5:2, 3, 6) Definitivamente, esnan cu ta conta riba institucionnan humano pa trece pas i siguridad ta ignorando realidad. Hende asina ta morto na soño!
20 E destruccion dje sistema di cosnan aki lo sosodé masha di ripiente. P’esei, keda den expectativa dje dia di Jehova. Dios mes a bisa Habacuc: “Lo e no ta lat”! Sí, nunca tabata asina urgente pa nos sigui vigilá.
[Nota]
^ par. 10 E doño no a haci ningun afsprak cu su esclabonan. Como tal, e no tabatin cu duna cuenta na nan di loke e ta haci of laga, ni e no a debe su esclabonan ningun splicacion pa cualkier aparente tardansa.
^ par. 13 Pa un consideracion detayá dje profecia aki, mira capítulo 11 dje buki Conocimentu cu Ta Hiba na Bida Eterno, publicá dor di Watchtower Bible and Tract Society di New York, Inc.
^ par. 14 Pa mas informacion, mira página 180-6 dje buki Revelacion—su gran culminacion ta cerca!, publicá dor di Watchtower Bible and Tract Society di New York, Inc.
^ par. 15 Mira Revelacion—su gran culminacion ta cerca!, página 251-4.
^ par. 16 Mira capítulo 4 dje buki Presta Atencion na e Profecia di Daniel!, publicá dor di Watchtower Bible and Tract Society di New York, Inc.
^ par. 18 Den e comparacion di carné cu cabritu, e Yu di hende ta yega den su gloria durante e periodo dje tribulacion grandi, anto e ta sinta pa husga. E ta husga e hendenan a base di si nan a apoyá e rumannan ungí di Cristo of no. E base pa huicio aki lo no tin ningun nificacion si ora e huicio tuma lugá, tur e rumannan di Cristo a bai laga e esenario terenal for di hopi tempu caba.—Mateo 25:31-46.
Bo Ta Corda?
• Ki ehempelnan bíblico por yuda nos sigui vigilá?
• Con Jesus a ilustrá e necesidad di keda alerta?
• Cua seis área di evidencia ta proba cu nos ta biba den e último dianan?
[Preguntanan di Estudio]
[Plachinan na página 9]
A. H. Macmillan a sirbi Jehova fielmente pa casi seis década
[Plachi na página 10]
Jesus a compará su disipelnan cu esclabo cu ta sigui vigilá