Splicacion dje Buki di Daniel!

ESNAN presente n’e congreso tabata ansioso pa obtené nan ehemplar dje buki nobo di 320 página, Presta Atencion na e Profecia di Daniel! Kico nan a pensa dje buki? Wak kico algun di nan a bisa.

“Manera mayoria adolesente, ta difícil pa mi disfrutá di studia historia antiguo. P’esei, ora mi a ricibí mi ehemplar dje buki nobo, Presta Atencion na e Profecia di Daniel!, mi no tabata muchu excitá pa les’é, pero mi a purba. Esta robes mi actitud tabata! Ta un dje mihó bukinan cu mi a yega di topa. Bo no por pon’é abou! Ya mi no ta sinti cu mi ta lesando un relato cu a sosodé miles di aña pasá. Pa promé bes, mi ta sinti cu mi por pone mi mes den Daniel su sapatu. Mi por ègt visualisá loke lo a nificá pa ser kitá di bo famia, mandá un tera straño, i enfrentá prueba di integridad bes tras bes. Masha danki mes p’e buki aki.”—Anya.

“Loke mas ta yuda mi ta e mensahe indiscutibel di cu Jehova tin control absoluto riba asuntunan cu ta afectá su pueblo. Pa medio di e vision i soñonan di Daniel i esnan di otronan cu el a interpretá, ta bisto cu nunca nos Dios lo no permití sosodementunan desviá for di su propósito. Esaki ta fortificá e speransa cu nos tin den cuadronan profético di Bijbel tocante e mundu nobo cu lo e producí.”—Chester.

“Mi a disfrutá dje manera cu boso a duna Daniel bida. Dor dje manera cu boso a hala atencion na loke a interes’é i preocup’é, mi ta sinti cu mi conoc’é mihó. Awor mi por comprendé mihó di con Jehova a consider’é asina deseabel. Dor di tur su prueba i persecucionnan, e no a preocupá pa su mes. Su preocupacion principal tabata pa Jehova i Su bunita nomber. Danki cu boso a resaltá e puntonan aki.”—Joy.

“T’esaki nos tabata spera! Nunca promé no a keda mustrá cuantu cos den e buki di Daniel ègt ta aplicá na cada un di nos. Despues cu mi a lesa gran parti dje buki nobo e anochi despues cu mi a ricibié, mi mester a para un ratu i gradicí Jehova den oracion.”—Mark.

“Loke nos no a premirá ta e efecto cu e tabatin riba nos yunan. Nan tin cincu i tres aña. . . . Apesar cu semper e relatonan di Daniel, Hananías, Misael i Azarías tabata entre nan faboritonan di Mi buki di relato bíblico, e manera cu nan ta presentá den e buki Profecia di Daniel tabatin un efecto riba nan cu nos no a anticipá. Apesar cu nan ta asina chikitu, tog ta parce cu nan ta sinti un banchi emocional estrecho cu e hóbennan hustu ei. Esta ehempelnan excelente pa nos yunan! Boso a duna nos un herment fabuloso! Masha, masha danki!”—Bethel.

“Mi a sinti como si fuera mi tabata ei mes huntu cu e hóben hebreonan segun cu nan a enfrentá nan pruebanan di fe; i esei a animá mi pa examiná mi propio fe. E cuadro di repaso titulá “Kico Bo A Saca Afó?” ta graba e contenido dje capítulo den bo curason. Danki atrobe pa un obra maestro mas.”—Lydia.