Cuantu Tempu Mas e Malbadonan Tin?
Cuantu Tempu Mas e Malbadonan Tin?
“Pakico [Jehova] bo ta . . . keda ketu ora un hende malbado ta guli un hende mas hustu cuné?”—HABACUC 1:13.
1. Na ki tempu e tera lo ta completamente yená cu conocimentu dje gloria di Jehova?
DIOS lo destruí e malbadonan un dia? Si ta asina, cuantu tempu mas nos tin cu warda? Hende rond mundu ta haci e preguntanan aki. Unda nos por haña contesta? Den e palabranan profético inspirá pa Dios tocante su tempu señalá. Nan ta sigurá nos cu pronto Jehova lo ehecutá huicio contra tur e malbadonan. E ora ei numa tera lo ta completamente “yená cu conocimentu dje gloria di Jehova, sí, mescos cu e awanan ta cubri laman.” Esei ta e promesa profético cu nos ta haña den Dios su Palabra Sagrado na Habacuc 2:14.
2. Ki tres huicio divino di ehecucion e buki di Habacuc ta contené?
2 E buki di Habacuc, skirbí rond di aña 628 P.E.C., ta consistí di un seri di tres huicio di ehecucion na man di Jehova Dios. A efectuá dos dje huicionan ei caba. E promé tabata Jehova su huicio contra e nacion rebelde di antiguo Huda. Kico dje di dos? Esei tabata e huicio cu Dios a ehecutá contra Babilonia opresivo. Sigur anto, nos tin tur motibu pa confia cu e di tres huicio divino lo tuma lugá. De facto, nos por spera su cumplimentu djis aki. Pa beneficio dje rectonan den e último dianan aki, Dios lo trece destruccion riba tur hende malbado. E último malbado lo hala su lastu rosea den e “guera dje gran dia di Dios e Todopoderoso,” cu ta acercá rápidamente.—Revelacion 16:14, 16.
3. Kico lo bini sigur contra e malbadonan den nos tempu?
3 E guera dje gran dia di Dios ta yegando mas i mas cerca. Mes sigur cu e huicionan di Jehova contra Huda i Babilonia a cumpli, asina sigur ta e ehecucion di huicio divino contra e malbadonan den nos tempu. Sin embargo, pakico no imaginá cu n’e momento aki nos ta den Huda den tempu di Habacuc? Kico ta pasando den e pais ei?
Un Tera den Confusion
4. Ki noticia spantoso Habacuc ta tende?
4 Visualisá e profeta di Jehova, Habacuc, sintá riba e dak plat di su cas, disfrutando dje bientu frescu djanochi. Banda di dje tin un instrumento musical. (Habacuc 1:1; 3:19, parti final di texto) Pero Habacuc ta tende un noticia spantoso. Rey Jehoiakim di Huda a mata Uriya i a laga tira cadaver dje profeta ei den e santana dje pueblo comun. (Jeremías 26:23) Ta berdad cu Uriya no a mantené su confiansa den Jehova. El a haña miedu i a hui bai Egipto. Pero, Habacuc sa cu e violencia di Jehoiakim no tabata impulsá pa un deseo di tene Jehova su onor na haltu. Esaki ta bisto for dje rey su falta di respet abierto pa ley divino i su odio contra profeta Jeremías i otronan cu ta sirbi Jehova.
5. Con e condicion spiritual di Huda ta, i con Habacuc ta reaccioná riba esaki?
5 Habacuc ta mira huma di censia ta bai laira for dje dak di casnan pegá ei banda. E hendenan no ta kimando censia como adoradó di Jehova. Nan ta bezig cu actonan religioso falsu patrociná dor dje rey malbado di Huda, Jehoiakim. Esta un bergwensa! Habacuc su wowo ta yena cu awa, i e ta roga: “Pa cuantu tempu, o Jehova, mi tin cu grita pa yudansa, sin cu bo ta tende? Pa cuantu tempu lo mi sclama na bo pa auxilio contra violencia, sin cu bo ta salba? Pakico bo ta haci mi wak loke ta perhudicial, i bo ta sigui mira nada otro sino afan penoso? I pakico tin plundermentu i violencia dilanti mi, i pakico pleitu ta sosodé i pakico contencion ta tuma lugá? P’esei ley ta perde su forsa, i husticia no ta sali nunca. Dor cu e malbadonan tin e hustunan rondoná, p’esei husticia ta sali trocí.”—Habacuc 1:2-4.
6. Kico a sosodé cu ley i husticia den Huda?
6 Sí, tur caminda tin plundermentu i violencia. Unda cu Habacuc wak, e ta mira afan penoso, pleitu i contencion. ‘Ley a perde su forsa,’ esta, el a bira impotente. I husticia? Wel, e “no ta sali nunca” victorioso! E no ta prevalecé nunca. En bes di esei, ‘e malbadonan ta rondoná e hustunan,’ i ta saca nan curpa for di medidanan legal intencioná pa protehá e inocentenan. En berdad, “husticia ta sali trocí.” E ta corumpí. Ki un situacion deplorabel!
7. Kico Habacuc ta determiná pa haci?
7 Habacuc ta pausa i ta refleccioná riba e situacion. Lo e entregá? Absolutamente cu no! Despues di repasá tur e persecucionnan di Dios su fiel sirbidónan, e homber leal aki ta renobá su determinacion pa keda firme i constante como profeta di Jehova. Habacuc lo sigui declará e mensahe di Dios, asta si esei lo nificá su morto.
Jehova Ta Efectuá un “Actividad” Increibel
8, 9. Ki “actividad” increibel Jehova ta efectuando?
8 Den vision, Habacuc ta mira e religiosonan falsu cu ta desonrá Dios. Scucha loke Jehova ta bisa nan: “Boso wak entre e nacionnan, i mira, i keda wak otro tur asombrá.” Probablemente, Habacuc ta puntra su mes pakico Dios ta papia asina cu e malbadonan ei. Anto e ta tende Jehova bisa nan: “Keda asombrá; pasobra tin un actividad cu un persona ta efectuá den boso dianan, cu boso lo no kere ni maske conta boso.” (Habacuc 1:5) Eigenlijk, ta Jehova mes ta bai efectuá e actividad aki cu nan no por kere. Pero kico e ta?
9 Habacuc ta scucha cu sumo atencion n’e siguiente palabranan di Dios, cu ta pará skirbí na Habacuc 1:6-11. Esaki ta Jehova su mensahe, i ningun dios falsu ni imágen sin bida por stroba su cumplimentu: “Aki mi ta lanta e caldeonan, e nacion amargá i impetuoso, cu ta bai n’e lugánan hanchu habrí dje tera pa tuma posesion di residencianan cu no ta pertenecé na dje. Spantoso i inspirador di temor e ta. For di dje su propio husticia i su propio dignidad ta sali. I su cabainan a resultá mas velos cu leopardo, i nan a resultá mas feros cu lobonan djanochi. I su cabainan di careda a rebultá e tera, i di leu su propio cabainan di careda ta bini. Nan ta bula manera águila cu ta bula bin lihé pa come algu. Den su totalidad e ta bini djis pa violencia. E reunimentu di nan cara ta manera bientu di oost, i e ta recogé prezu manera santu. I di su parti, e ta haci bofon asta di reynan, i alto funcionarionan ta co’i hari p’e. Di su parti, e ta asta hari tur lugá fortificá, i e ta montoná stof i ta captur’é. N’e tempu ei sigur lo e bai dilanti mescos cu bientu i lo pasa dor i realmente lo bira culpabel. E poder aki cu e tin ta debí na su dios.”
10. Ken Jehova ta bai lanta?
10 Ki un spiertamentu profético for dje Haltísimo! Jehova ta bai lanta e caldeonan, e nacion salbahe di Babilonia. Durante su marcha atrabes dje “lugánan hanchu habrí dje tera,” lo e conkistá hopi, hopi residencia. Esta un horor! E multitud caldeo ta “spantoso i inspirador di temor,” masha teribel mes. E ta traha su propio leynan inflexibel. ‘For di dje su propio husticia ta sali.’
11. Con lo bo describí e binimentu dje forsanan babilónico contra Huda?
11 E cabainan di Babilonia ta mas lihé cu leopardo velos. Su cabayeria ta mas feros cu lobo hambrá cu ta yag parti anochi. Anshá pa bai, ‘su cabainan di careda ta rebultá e tera’ impacientemente cu nan pata. Leu ayá na Babilonia nan ta coge rumbo pa Huda. Bulando manera un águila cu ta bula bin lihé pa un cuminda sabroso, un djis e caldeonan lo baha riba nan víctima. Esaki lo ta djis un asalto, manera un invasion efectuá dor di un par di soldá? No, no! “Den su totalidad e ta bini djis pa violencia,” manera un enorme ehército cu ta basha bini pa desbaratá tur cos. Nan cara ta briya di ansioso cu nan ta, i riba cabai nan ta bai den direccion west, rumbo pa Huda i Jerusalem, moviendo mes lihé cu bientu di oost. E ehército babilónico ta tuma asina tantu prizonero cu nan ta “recogé prezu manera santu.”
12. Ki actitud e babilonionan tin, i di kico e inmenso enemigu aki “realmente lo bira culpabel”?
12 E ehército caldeo ta haci bofon di reynan i ta cherche alto funcionarionan; niun di nan no tin poder pa para su avance implacabel. E ta “hari tur lugá fortificá,” pasobra tur forti ta cai ora e babilonionan “montoná stof” dor di traha un ceru di tera for di cua nan ta atacá nan. Na Jehova su tempu señalá, e enemigu inmenso ‘sigur lo bai dilanti mescos cu bientu.’ Dor di atacá Huda cu Jerusalem, e “realmente lo bira culpabel” di a haci daño n’e pueblo di Dios. Despues di un victoria relámpago, e comandante caldeo lo broma: ‘E poder aki ta debí na nos dios.’ Pero mare e por sa!
Un Base Sólido pa Speransa
13. Di con Habacuc ta yen di speransa i confiansa?
13 Awor cu Habacuc ta comprendé Jehova su propósito mas mihó, speransa ta lanta den su curason. Yená cu pleno confiansa, e ta alabá Jehova den oracion. Segun Habacuc 1:12, e profeta ta bisa: “Abo no ta di hopi tempu pasá, o Jehova? O mi Dios, mi Santu, abo no ta muri.” En berdad, Jehova ta Dios “for di tempu indefiní pa tempu indefiní,” sí, pa semper.—Salmo 90:1, 2.
14. Ki curso e apóstatanan di Huda a sigui?
14 Refleccionando riba e vision cu Dios a dun’é i contentu cu e comprendimentu penetrante cu el a haña, e profeta ta agregá: “O Jehova, bo a pon’é pa huicio; i, o Baranca, bo a fund’é pa reprendementu.” Dios a dicta huicio contra e apóstatanan di Huda, i nan lo ricibí reprendementu, esta, castigu severo, na man di Jehova. Eigenlijk, nan mester a acudí na dje como nan Baranca, e único berdadero fortalesa, refugio i Fuente di salbacion. (Salmo 62:7; 94:22; 95:1) Sin embargo, e lidernan apóstata di Huda no ta hala cerca di Dios, i nan ta sigui oprimí Jehova su adoradónan inofensivo.
15. Den ki sentido Jehova su “wowonan ta demasiado puru pa mira loke ta malu”?
15 E situacion aki ta afligí Jehova su profeta mashá. P’esei, e ta bisa: “Bo wowonan ta demasiado puru pa mira loke ta malu; i bo no por mira afan penoso.” (Habacuc 1:13) Sí, Jehova su “wowonan ta demasiado puru pa mira loke ta malu,” esta, pa tolerá malecho.
16. Con lo bo resumí loke Habacuc 1:13-17 ta bisa?
16 P’esei Habacuc tin algun pregunta na mente cu ta pone bo para pensa. E ta puntra: “Pakico bo ta mira esnan cu ta trata traidoramente, i ta keda ketu ora un hende malbado ta guli un hende mas hustu cuné? I pakico bo ta haci hende terenal mescos cu piscá di laman, mescos cu cosnan cu ta lastra, riba cua no tin ningun hende ta goberná? Tur e cosnan aki el a bin ariba cuné cu un simpel anzue; e ta lastra nan bai cuné den su reda, i e ta recogé nan den su tarai. Ta p’esei e ta alegrá i ta contentu. Ta p’esei e ta ofrecé sacrificio na su reda i ta ofrecé huma di sacrificio na su tarai; pasobra ta via nan su porcion ta bon zetá, i su cuminda ta saludabel. Ta p’esei lo e haci su reda bashí, i lo e tin cu mata nacionnan constantemente, miéntras cu e no ta mustra ningun compasion?”—Habacuc 1:13-17.
17. (a) Con e babilonionan ta cumpli cu Dios su propósito dor di invadí Huda cu Jerusalem? (b) Kico Jehova lo revelá na Habacuc?
17 Ora e babilonionan invadí Huda i su stad capital, Jerusalem, nan lo ta actuando segun nan propio deseo. Nan lo no sa cu nan ta sirbiendo como e instrumento cu Dios ta usa pa ehecutá su huicio hustu contra un pueblo infiel. Ta fácil pa mira pakico lo tabata duru pa Habacuc comprendé cu Dios lo a usa e babilonionan malbado pa ehecutá Su huicio. E caldeonan cruel ei no ta adoradó di Jehova. Nan ta mira hende manera simpel ‘piscá i cosnan cu ta lastra,’ cu t’ei pa ser capturá i dominá. Pero, e asuntunan aki lo no confundí Habacuc pa hopi tempu mas. Djis aki Jehova lo revelá na su profeta cu e babilonionan lo no keda sin castigu pa nan plundermentu golos i pa nan culpa den dramamentu di sanger descontrolá.—Habacuc 2:8.
Cla pa Tende Kico Mas Jehova Tin di Bisa
18. Kico nos por siña for di Habacuc su actitud, manera e ta ser reflehá na Habacuc 2:1?
18 Sin embargo, awor aki Habacuc ta warda pa tende kico mas Jehova tin di bis’é. E profeta ta declará decididu: “Na mi puesto di guardia lo mi keda pará, i lo mi keda stacioná riba e baluarte; i lo mi vigilá, pa mira kico lo e papia mediante mi i kico lo mi contestá ora mi ser reprendé.” (Habacuc 2:1) Habacuc ta sumamente interesá den loke Dios lo bisa ainda mediante dje como profeta. Su fe den Jehova como un Dios cu no ta tolerá maldad ta pon’é puntra su mes di con maldad ta prevalecé, pero e ta dispuesto pa laga ahustá su manera di pensa. Pues anto, ke tal di nos? Ora nos ta puntra nos mes di con cierto cosnan malbado ta ser tolerá, nos confiansa den Jehova Dios su husticia mester yuda nos mantené nos balansa i warda riba dje.—Salmo 42:5, 11.
19. Conforme cu Dios su palabra na Habacuc, kico a sosodé cu e hudiunan rebelde?
19 Conforme cu Dios su palabra na Habacuc, el a ehecutá huicio contra e nacion hudiu rebelde dor di permití e babilonionan invadí Huda. Na aña 607 P.E.C., nan a destruí Jerusalem i e tempel, a mata tantu bieu como hóben i a tuma hopi prezu. (2 Crónicanan 36:17-20) Despues di un exilio largu na Babilonia, un resto di hudiu fiel a regresá nan patria i cu tempu a reconstruí e tempel. Sin embargo, despues e hudiunan a bolbe bira infiel na Jehova, foral ora nan a rechasá Jesus como e Mesías.
20. Con Pablo a usa Habacuc 1:5 relacioná cu e rechaso di Jesus?
20 Segun Echonan 13:38-41, apostel Pablo a mustra hudiunan na Antiokia kico lo a nificá rechasá Jesus i asina despreciá su sacrificio di rescate. Citando Habacuc 1:5 for dje version Septuaginta na griego, Pablo a spierta: “Soru pa loke ta ser bisá den e Profetanan no sosodé cu boso: ‘Mofadónan, contempl’é, i straña riba dje, i disparcé, pasobra mi ta obra un obra den boso dia, un obra cu di ningun manera boso lo no kere ni maske si un hende conta boso en detaye.’” Conforme cu loke Pablo a cita, un di dos cumplimentu di Habacuc 1:5 a tuma lugá ora e ehército romano a destruí Jerusalem i su tempel na aña 70 E.C.
21. Con e hudiunan di Habacuc su tempu a mira e “obra” di Dios di laga e babilonionan destruí Jerusalem?
21 Pa e hudiunan den tempu di Habacuc, Dios su “obra” di laga e babilonionan destruí Jerusalem tabata inconcebibel, pasobra e stad ei tabata e sede di Jehova su adoracion i e lugá caminda su rey ungí tabata entronisá. (Salmo 132:11-18) Como tal, nunca promé nan no a destruí Jerusalem. Nunca nan no a kima su tempel. Nunca nan no a conkistá e cas real di David. Tabata increibel cu Jehova lo a permití un cos asina sosodé. Pero via Habacuc, Dios a duna basta spiertamentu cu e sucesonan spantoso aki lo sosodé. I historia ta proba cu nan a tuma lugá manera Dios a pronosticá.
Dios Su “Obra” Increibel den Nos Tempu
22. Kico Jehova su “obra” increibel ta encerá den nos tempu?
22 Acaso Jehova ta bai haci un “obra” increibel den nos tempu? Bo por tin sigur cu lo e hacié, maske esei por parce increibel pa hende cu ta duda. E biaha aki, Jehova su obra increibel lo ta e destruccion di cristiandad. Mescos cu antiguo Huda, e ta pretendé di ta adorá Dios, pero a bira completamente corupto. Jehova lo soru pa djis akí eliminá tur rastro dje sistema religioso di cristiandad, i tambe henter “Babilonia e Grandi,” e imperio mundial di religion falsu.—Revelacion 18:1-24.
23. Kico Dios su spiritu a impulsá Habacuc pa haci siguientemente?
23 Jehova tabatin mas trabou pa Habacuc haci promé cu e destruccion di Jerusalem na aña 607 P.E.C. Kico mas Dios lo a conta su profeta? Wel, Habacuc lo a tende cosnan cu lo a impuls’é pa coge su instrumento musical i haci oracion na Jehova den forma di canticanan di lamento. Pero promé, Dios su spiritu lo a impulsá e profeta pa proclamá ainan dramático. Sigur nos lo apreciá si nos por adkerí un bon comprendimentu dje nificacion profundo dje palabranan profético ei pa Dios su tempu señalá. P’esei, laga nos sigui presta atencion na Habacuc su profecia.
Bo Ta Corda?
• Ki condicionnan a existí den Huda den tempu di Habacuc?
• Ki “actividad” increibel Jehova a efectuá den tempu di Habacuc?
• Ki base pa speransa Habacuc tabatin?
• Ki “obra” increibel Dios lo efectuá den nos tempu?
[Preguntanan di Estudio]
[Plachi na página 9]
Habacuc a puntra su mes di con Dios a permití maldad prevalecé. Abo tambe?
[Plachi na página 10]
Habacuc a profetisá calamidad p’e tera di Huda na man di Babilonia
[Plachi na página 10]
Ruinanan arkeológico di Jerusalem, cu a ser destruí na aña 607 P.E.C.