Jehova Lo No Tarda

“Asta si e [vision] tarda, keda den expectativa di dje; pasobra lo e ser realisá sin falta. Lo e no ta lat.”—HABACUC 2:3.

1. Ki determinacion Jehova su pueblo a demostrá, i kico esaki a impulsá nan pa haci?

“NA MI puesto di guardia lo mi keda pará.” Esei tabata e determinacion di Habacuc, profeta di Dios. (Habacuc 2:1) Jehova su pueblo di siglo 20 a mustra e mésun determinacion. P’esei, na un congreso histórico na september 1922, nan a respondé celosamente n’e yamada aki: “Esaki ta e dia di tur dia. Mira, e Rey ta reina! Boso ta su agentenan di publicidad. P’esei anunciá, anunciá, anunciá, e Rey i su reino.”

2. Ora a restorá cristiannan ungí na actividad vibrante despues di Guera Mundial I, kico nan por a declará?

² Despues di Guera Mundial I, Jehova a restorá e resto ungí na un estado di actividad vibrante. Mescos cu Habacuc, cada un di nan por a declará e ora ei: “Lo mi keda stacioná riba e baluarte; i lo mi vigilá, pa mira kico lo e papia mediante mi.” Hopi profecia ta ripití e palabranan hebreo pa “vigilá” i “guardia.”

“Lo E No Ta Lat”

3. Pakico nos tin cu sigui vigilá?

³ Segun cu Testigonan di Jehova ta proclamá Dios su spiertamentu awe, nan mester ta mas alerto cu nunca pa haci caso dje palabranan di conclusion di Jesus su gran profecia: “Sigui vigilá, pasobra boso no sa ki ora e doño di cas ta bini, sea lat den dia of meianochi of ora gai canta of mainta trempan; pa ora e yega di ripiente, e no haña boso drumí. Pero loke mi ta bisa boso, mi ta bisa tur: Sigui vigilá.” (Marco 13:35-37) Mescos cu Habacuc, i na armonia cu Jesus su palabranan, nos tin cu sigui vigilá!

4. Con nos situacion ta paralelo cu esun di Habacuc rond di aña 628 P.E.C.?

⁴ Habacuc a completá su buki probablemente rond di aña 628 P.E.C., asta promé cu Babilonia a bira e potencia mundial dominante. Pa hopi aña profetanan a proclamá Jehova su huicio contra Jerusalem apóstata. Pero tog no tabatin ningun indicacion cla ki dia lo a ehecutá e huicio ei. Ken lo a kere cu tabata falta 21 aña so i cu Babilonia lo tabata Jehova su ehecutor? Mescos awe, nos no sa ni ‘e dia ni e ora’ fihá p’e sistema aki caba, pero Jesus a spierta nos di antemano: “Demostrá cu boso ta cla, pasobra na un ora cu boso no ta pensa cu e ta, e Yu di hende ta bini.”—Mateo 24:36, 44.

5. Kico ta specialmente animante tocante Dios su palabranan registrá na Habacuc 2:2, 3?

⁵ Pa un bon motibu anto Jehova a duna Habacuc e comision stimulante aki: “Skirbi e vision, i pon’é cu claridad riba tabla, pa esun cu ta lesa na bos haltu for di dje por haci esei vlot. Pasobra e vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda, keda den expectativa di dje; pasobra lo e realisá sin falta. Lo e no ta lat.” (Habacuc 2:2, 3) Awe, maldad i violencia a bira pió na tur parti di tera, loke ta indicá cu nos ta pará na drempel “dje dia di Jehova, grandi i inspirador di temor.” (Joël 2:31) En  berdad, Jehova su propio palabranan di garantia ta un animacion: “Lo e no ta lat”!

6. Con nos lo por sobrebibí e binidero dia di ehecucion di huicio?

⁶ Con anto, nos por sobrebibí e binidero dia di ehecucion di huicio? Jehova ta contestá esei dor di presentá e contraste aki entre e hustu i e inhustu: “Mira! Su alma a hincha; e no tabata recto den dje. Pero pa loke ta e hustu, pa su fieldad lo e sigui biba.” (Habacuc 2:4) Gobernante i pueblonan orguyoso i golos a mancha e páginanan di historia moderno cu sanger di miyones di víctima inocente, foral den e dos gueranan mundial i den bañonan di sanger étnico. Na contraste cu esei, Dios su sirbidónan ungí amante di pas a wanta den fieldad. Nan ta “e nacion hustu cu ta mantené conducta fiel.” E nacion aki, huntu cu su compañeronan, e “otro carnénan,” ta sigui e amonestacion: “Confia den Jehova pa semper, pasobra den Jah Jehova ta e Baranca di tempu indefiní.”—Isaías 26:2-4; Juan 10:16.

7. Na armonia cu Pablo su cita di Habacuc 2:4, kico nos tin cu haci?

⁷ Apostel Pablo, den su carta n’e cristiannan hebreo, a cita Habacuc 2:4, ora e ta bisa e pueblo di Jehova: “Boso tin mester di awante, afin cu, despues cu boso a haci e boluntad di Dios, boso por ricibí e cumplimentu dje promesa. Pasobra ainda ‘pa masha poco tempu,’ i ‘esun cu ta bini lo yega i lo no tarda.’ ‘Pero mi hustu lo biba pa causa di fe,’ i ‘si e hala atras, mi alma no tin placer den dje.’” (Hebreonan 10:36-38) Awor aki no ta tempu pa baha nos actividad of cai den e trampa dje estilo di bida materialista i loco pa placer dje mundu di Satanas. Tanten cu e “masha poco tempu” no a caba ainda, kico nos tin cu haci? Mescos cu Pablo, nos cu ta parti di Jehova su nacion santu tin cu ‘forsa padilanti pa loke ta mas ayá, den direccion dje meta’ di bida eterno. (Filipensenan 3:13, 14) I mescos cu Jesus, nos tin cu ‘wanta pa e goso cu tin poné nos dilanti.’—Hebreonan 12:2.

8. Ken ta e “homber” di Habacuc 2:5, i pakico lo e no tin éxito?

⁸ Habacuc 2:5 ta describí “un homber físicamente fuerte” cu na contraste cu Jehova su sirbidónan, ta keda sin yega su meta, maske el “a haci su alma espacioso mescos cu Sheol.” Ta ken e homber aki cu “no por ser satisfacé” ta? Goloso manera Babilonia di Habacuc su tempu, e “homber” simbólico aki, cu ta consistí di podernan político—sea ta facista, nazi, comunista of asta asina yamá democrático—ta bringa gueranan pa expandé su pais. Tambe e ta yena Sheol, e graf, cu almanan inocente. Pero e “homber” simbólico traicionero aki dje mundu di Satanas, cu ta burachi dje confiansa cu e tin den su propio importancia, lo no  tin éxito ora e purba “recogé tur e nacionnan pa su mes i trece tur e pueblonan huntu pa su mes.” Ta Jehova Dios so por uni henter humanidad, i lo e logra esaki mediante e Reino Mesiánico.—Mateo 6:9, 10.

E Promé dje Cincu Ainan Dramático

9, 10. (a) Kico Jehova ta anunciá awor mediante Habacuc? (b) Con e situacion ta awe relacioná cu ganashi inhustu?

⁹ Mediante su profeta Habacuc, awor Jehova ta anunciá un seri di cincu ai, esta, huicionan cu tin cu ser efectuá pa prepará e tera pa Dios su fiel adoradónan por biba ariba. E personanan ei di curason recto ta ‘lanta un dicho’ cu Jehova ta presentá. Nos ta lesa na Habacuc 2:6: “Ai di esun cu ta multiplicá loke no ta di dje—o pa cuantu tempu!—i cu ta haci debe pisá contra su mes!”

¹⁰ Aki e énfasis ta riba ganashi inhustu. Den e mundu rond di nos, hende ricu ta bira mas ricu, i hende pober ta bira mas pober. Bendedó di droga i estafadónan ta acumulá fortunanan grandi, miéntras cu hopi hende comun ta muri di hamber. Segun informe, un cuart dje poblacion di mundu ta biba bou dje nivel di pobresa. Den hopi pais, condicionnan di bida ta spantoso. Esnan cu ta anhelá husticia riba tera ta sclama: “O pa cuantu tempu” caba e maldadnan aki ta multiplicá! Sin embargo, e fin ta cerca! Sí, e vision ‘lo no ta lat.’

11. Kico Habacuc ta bisa tocante dramamentu di sanger humano, i pakico nos por bisa cu tin gran culpa di sanger riba tera awe?

¹¹ E profeta ta bisa e malbado: “Debí cu bo mes a plunder hopi nacion, tur esnan cu a resta di e pueblonan lo plunder abo, debí n’e dramamentu di sanger di hende i n’e violencia contra e tera, e pueblo i tur cu ta biba aden.” (Habacuc 2:8) Esta un culpa di sanger nos ta haña riba tera awe! Jesus a declará masha cla: “Tur esnan cu ta coge spada lo perecé pa spada.” (Mateo 26:52) Sin embargo, den e siglo 20 aki so, nacion i gruponan étnico culpabel di sanger tabata responsabel pa e matansa di mas cu shen miyon hende. Ai di esnan cu ta participá den e bañonan di sanger aki!

E di Dos Ai

12. Kico ta e di dos ai cu Habacuc a registrá, i di con nos por ta sigur cu ganashi desonesto lo no yuda nos cu nada?

¹² E di dos ai, skirbí na Habacuc 2:9-11, ta cai riba “esun cu ta obtené mal ganashi pa su cas, pa asina pone su neshi na haltu, pa asina e libra for dje gara di loke ta calamitoso!” Ganashi desonesto lo no sirbi pa nada, manera e salmista ta mustra bon cla: “No tene miedu pasobra un hende ta gana rikesa, pasobra e gloria di su cas ta aumentá, pasobra ora e muri e no por hiba absolutamente nada; su gloria lo no bai abou huntu cuné.” (Salmo 49:16, 17) P’esei Pablo su conseho sabí ta notabel: “Duna ordu na esnan cu ta ricu den e sistema actual di cosnan pa no ta halsá, i pa pone nan speransa, no den rikesa insigur, sino den Dios, cu ta percurá pa nos tur cos ricamente pa nos por disfrutá di nan.”—1 Timoteo 6:17.

13. Pakico nos tin cu sigui proclamá Dios su spiertamentu?

¹³ Ta masha importante anto pa proclamá Dios su mensahenan di huicio awe! Ora e fariseonan a reclamá pasobra e multitud a aclamá Jesus como “Esun cu ta bini como Rey den e nomber di Jehova,” el a bisa: “Mi ta bisa boso: Si esakinan keda ketu, e piedranan mes lo sclama.” (Lucas 19:38-40) Di igual manera, si e pueblo di Dios awe keda sin exponé e maldad cu ta existí den e mundu aki, ‘for di e muraya un piedra mes lo sclama cu lástima.’ (Habacuc 2:11) P’esei laga nos sigui proclamá Dios su spiertamentu cu curashi!

 E di Tres Ai i e Cuestion di Culpa di Sanger

14. Pa ki culpa di sanger e religionnan di mundu ta responsabel?

¹⁴ E di tres ai anunciá mediante Habacuc ta trata cu e cuestion di culpa di sanger. Habacuc 2:12 ta bisa: “Ai di esun cu ta construí un stad cu dramamentu di sanger, i cu a establecé un pueblo sólidamente cu inhusticia!” Den e sistema di cosnan aki, hopi bes inhusticia i dramamentu di sanger ta cana samsam. Ta remarcabel cu e religionnan di mundu ta responsabel pa e bañonan di sanger mas horibel den historia. Por ehempel, e crusadanan, ora cu e asina yamá cristiannan a bringa contra moslimnan; e Inkisicion católico na Spaña i na Latinoamérica; Europa su Guera di Trinta Aña entre protestant i católico; i e mas sangriente di tur, e dos gueranan mundial di nos siglo, di cua tur dos a cuminsá den e teritorio di cristiandad.

15. (a) Kico e nacionnan ta sigui haci cu respaldo of consentimentu di iglesia? (b) Nacionnan Uní por pone fin n’e armamentu dje mundu aki?

¹⁵ Un dje rasgonan mas malbado dje di dos guera mundial tabata e Holocausto nazi, cu a causa morto di miyones di hudiu i otro hende inocente na Europa. Ta poco tempu pasá numa e herarkia católico romano na Francia a confesá cu nan no a haci nada pa impedí cu cientos di miles di víctima a ser mandá pa e kambernan di gas nazi. Sin embargo, e nacionnan ta sigui prepará pa drama sanger, cu apoyo of consentimentu di iglesia. E revista Time (su edicion internacional), papiando dje Iglesia Ortodox Ruso, a declará recientemente: “Tambe e iglesia rebibá ta ehercé influencia crucial den un área cu un tempu tabata inconcebibel: e makinaria ruso di guera. . . . Bendicioná avion di guera i baraknan a bira casi un rutina. Na november, den e Monasterio Danilovsky di Moscú, sede dje Patriarca ruso, iglesia a bai asina leu di consagrá e arsenal nuclear di Rusia.” Nacionnan Uní lo por pone un paro n’e rearmamentu dje mundu aki cu instrumentonan demoniaco di guera? No! Un ganadó dje Premio Nobel di Pas a comentá den e korant The Guardian di Londen, Inglatera: “Loke realmente ta perturbá bo ta cu e cincu miembronan permanente dje Conseho di Siguridad di Nacionnan Uní, ta e cincu suministradónan principal di arma na mundu.”

16. Kico Jehova lo haci contra nacionnan cu ta instigá guera?

¹⁶ Jehova lo ehecutá huicio contra nacionnan cu ta instigá guera? Habacuc 2:13 ta declará: “Mira! No ta for di Jehova di ehércitonan cu pueblonan lo traha cu afan djis pa candela, i cu gruponan nacional lo cansa nan mes djis pornada?” “Jehova di ehércitonan”! Sí, Jehova tin ehércitonan di angel celestial, cu lo e usa pa caba cu hende i nacionnan cu ta promové guera!

17. Te na ki grado e conocimentu di Jehova lo yena e tera despues dje ehecucion di su huicio riba gruponan nacional violento?

¹⁷ Kico lo pasa despues cu Jehova ehecutá huicio contra e gruponan nacional violento ei? Habacuc 2:14 ta duna e contesta: “Tera lo ta yená cu conocimentu dje gloria di Jehova, sí, mescos cu e awanan ta cubri laman.” Ki un prospecto magnífico! Na Armagedon, e soberania di Jehova lo ser vindicá pa semper. (Revelacion 16:16) E ta sigurá nos cu lo e ‘glorificá e lugá di su pia,’ e tera aki riba cua nos ta biba. (Isaías 60:13) Henter humanidad lo ta educá den Dios su caminda di bida, di manera cu conocimentu dje propósitonan glorioso  di Jehova lo yena e tera mescos cu océano ta yena e profundidadnan di laman.

Di Cuater i di Cincu Ai

18. Kico ta e di cuater ai anunciá mediante Habacuc, i con esaki ta reflehá den e estado moral dje mundu djawe?

¹⁸ Habacuc 2:15 ta describí e di cuater ai cu e palabranan aki: “Ai di esun cu ta duna su compañeronan algu di bebe, agregando na dje bo furia i rabia, pa haci nan burachi, cu e propósito di mira nan partinan bergonsoso.” Esaki ta indicá e condicion inmoral i rebelde dje mundu moderno. Su inmoralidad, respaldá asta dor di gruponan religioso permisivo, a sink na un nivel mas degradá cu nunca promé. Plaganan manera AIDS i otro malesanan transmití sexualmente, ta plama mundialmente, causando sufrimentu i morto. En bes di reflehá “e gloria di Jehova,” e generacion egoista djawe ta sak mas i mas den degradacion, rumbo pa ser ehecutá dor dje huicio di Dios. E mundu delincuente aki, “saciá cu desonor en bes di cu gloria,” ta na punto di bebe for dje conchi dje furia di Jehova, cu ta representá su boluntad relacioná cu mundu. ‘Lo tin bergwensa riba su gloria.’—Habacuc 2:16.

19. E introduccion dje di cincu ai cu Habacuc a anunciá ta relacioná cu kico, i pakico e palabranan tin nificacion den e mundu djawe?

¹⁹ E introduccion dje di cincu ai ta duna un spiertamentu serio contra adoracion di imágennan tayá. Jehova ta laga e profeta declará e palabranan potente aki: “Ai di esun cu ta bisa e pida palu: ‘O spierta!,’ na un piedra muda: ‘O lanta for di soño! E mes lo duna instruccion’! Mira! E ta furá cu oro i plata, i no tin ningun rosea den dje.” (Habacuc 2:19) Te na e dia djawe, tantu cristiandad como e asina yamá paganismo ta buig pa nan crucifiho,  la bírgen, ídolo i otro imágennan den forma di hende i bestia. Ningun di esakinan por lanta for di soño pa salba nan adoradónan ora Jehova bini pa ehecutá huicio. Nan furu di oro i di plata ta bira totalmente insignificante na comparacion cu e magnificencia dje Dios eterno, Jehova, i e glorianan di su creacion bibu. Laga nos alabá su nomber sin igual pa semper!

20. Den ki areglo di tempel nos tin e privilegio di sirbi gososamente?

²⁰ Sí, nos Dios, Jehova, ta digno di tur alabansa. Cu un sintimentu di reverencia profundo p’e, laga nos haci caso dje spiertamentu serio aki contra idolatria. Pero scucha! Jehova ta papiando ainda: “Jehova ta den su tempel santu. Keda ketu su dilanti, henter tera!” (Habacuc 2:20) Sin duda e profeta tabatin e tempel di Jerusalem na mente. Sin embargo, awe nos tin e privilegio di adorá den un areglo di tempel spiritual hopi mas magnífico, caminda nos Señor Jesucristo ta instalá como Sumo Sacerdote. Aki, den e pationan terenal dje tempel ei, nos ta reuní, sirbi i haci oracion, rindiendo Jehova e onor cu su nomber glorioso ta merecé. I ta ki un goso pa nos di por rindi adoracion di curason na nos amoroso Tata celestial!

Bo Ta Corda?

• Con bo ta mira Jehova su palabranan: “Lo e no ta lat”?

• Den nos tempu, kico e ainan anunciá mediante Habacuc ta nificá?

• Pakico nos tin cu sigui proclamá Jehova su spiertamentu?

• Den e patio di cua tempel nos tin e privilegio di sirbi?

[Preguntanan di Estudio]

[Plachi na página 15]

Mescos cu Habacuc, Dios su sirbidónan djawe sa cu Jehova lo no tarda

[Plachi na página 18]

Bo ta apreciá e privilegio di adorá Jehova den e patio di su tempel spiritual?

[Rekonosementu pa Potrèt na página 16]

U.S. Army photo