Historia di Bida

Jehova Ta Mi Refugio i Fortalesa

SEGUN E RELATO DI MARCEL FILTEAU

“Si bo casa cuné, bo ta bai prizon sigur.” Asina hende a bisa e mucha muher cu ken mi tabatin plan di casa. Laga mi splica di con nan a bisa un cos asina.

TEMPU mi a nace na 1927, e provincia canades Quebec tabata un apoyadó ferviente di catolicismo. Rond di cuater aña despues, Cécile Dufour, un minister di tempu completo di Testigonan di Jehova, a cuminsá bishitá nos cas den e stad di Montreal. Pa e motibu aki, nos bisiñanan a menas’é hopi bes. De facto, nan a arest’é i maltrat’é hopi bes pa motibu cu el a predicá e mensahe di Bijbel. No a dura mashá cu nos a mira e berdad dje palabranan di Jesus: “Boso lo ta obheto di odio di parti di tur nacion pa causa di mi nomber.”—Mateo 24:9.

N’e tempu ei, hopi hende no por a imaginá nan cu un famia frances-canades lo por a bandoná nan religion católico. Aunke nunca mi mayornan no a bira Testigo bautisá, no a dura mashá cu nan a comprendé cu e siñansanan di Iglesia Católico no tabata na armonia cu Bijbel. P’esei, nan a animá nan ocho yunan pa lesa literatura cu e Testigonan a publicá, i nan a apoyá nos cu a tuma un posicion na fabor di berdad bíblico.

Tumando un Posicion den Tempunan Difícil

Na 1942, tempu cu mi tabata bai scol ainda, mi a cuminsá interesá di berdad den studio di Bijbel. N’e tempu ei actividad di Testigonan di Jehova tabata prohibí na Cánada, pasobra nan a sigui e ehempel di cristiannan di promé i no a enbolbé nan den guera dje nacionnan. (Isaías 2:4; Mateo 26:52) Nan a pone mi ruman  homber mayó, Roland, traha den un campo di trabou forsá pasobra el a nenga di carga arma durante e guera mundial cu tabata andando.

Rond di e tempu ei, Tata a duna mi un buki na frances cu a relatá e sufrimentunan dje Testigonan aleman pa motibu cu nan a nenga di apoyá e campañanan militar di Adolf Hitler. * E buki a duna mi e motivacion pa identificá mi mes cu ehempel di hendenan asina íntegro i cu curashi, i mi a cuminsá asistí na e reunionnan di Testigonan di Jehova cu tabata ser tené den un cas privá. Djis despues mi a haña invitacion pa participá den e trabou di predicá. Bon conciente cu nan por a arestá mi i manda mi prizon, mi a aceptá e invitacion.

Despues di a pidi Dios fortalesa den oracion, mi a bati na mi promé porta. Un señora amabel a contestá, anto despues di introducí mi mes mi a lesa e palabranan di 2 Timoteo 3:16 p’e: “Tur Scritura ta inspirá di Dios i ta probechoso.”

“Lo bo ta interesá pa sa mas tocante Bijbel?” mi a puntr’é.

“Sí,” e señora a contestá.

Pues, mi a bis’é cu lo mi trece un amiga cu sa mas di Bijbel cu mi, i mi a haci esei e siguiente siman. Despues dje promé experencia ei, mi tabatin mas confiansa, i mi a siña cu no ta riba nos mes forsa nos ta cumpli cu e ministerio. Ta manera apostel Pablo a bisa, nos ta hacié cu yudansa di Jehova. Sí, ta vital pa nos reconocé cu “e poder mas ayá di loke ta normal [ta] di Dios i no loke ta bini di nos mes.”—2 Corintionan 4:7.

Despues di esei, e trabou di predicá a bira un parti regular di mi bida i esei tabata e caso tambe cu aresto i estadia den prizon. Nada straño anto, cu nan a bisa mi futuro bruid: “Si bo casa cuné, bo ta bai prizon sigur”! Tog, e experencianan ei no tabata ègt dje duru ei. Generalmente, despues di pasa un anochi den prizon, un compañero Testigo tabata paga fiansa pa nos sali liber.

Decisionnan Importante

Na april 1943, mi a dedicá mi mes na Jehova i a simbolis’é mediante bautismo bou di awa. Anto na augustus 1944, mi a asistí na mi promé congreso grandi, na Buffalo, New York, Merca, djis na otro banda dje frontera di Cánada. E asistencia tabata 25.000 persona, i e programa a lanta mi deseo pa traha como pionero, manera ta yama ministernan di tempu completo di Testigonan di Jehova. Na mei 1945, nan a kita e prohibicion riba e trabou di Testigonan di Jehova na Cánada, i mi a cuminsá traha pionero e siguiente luna.

 Mi participacion den e ministerio a aumentá, pero mi estadianan den prizon tambe. Un biaha nan a cera mi den un cel huntu cu Mike Miller, un fiel sirbidó di Jehova pa hopi tempu. Nos a cai sinta papia riba e flur di beton. Nos combersacion spiritualmente edificante a fortalecé mi masha tantu mes. Tog, despues a pasa den mi mente e pregunta: ‘Con lo a bai si tabatin un malcomprendimentu entre nos dos i nos no tabata papia cu otro?’ E tempu cu mi a pasa den prizon huntu cu e kerido ruman aki a siña mi un dje lesnan di mas bunita di mi bida: nos tin mester di nos rumannan i p’esei, nos mester ta bondadoso cu otro i pordoná otro. Di otro forma, manera apostel Pablo a skirbi: “Si boso ta sigui morde i devorá otro, wak pa boso no eliminá otro.”—Galationan 5:15.

Na september 1945, mi a haña invitacion pa sirbi n’e oficina di sucursal di Sociedad Watch Tower na Toronto, Cánada, cu nos ta yama Betel. E programa spiritual einan tabata realmente edificante i fortalecedor di fe. E siguiente aña mi a haña asignacion pa traha na e hacienda di Betel, situá un 40 kilometer nort dje oficina di sucursal. Miéntras mi tabata piki strawberry huntu cu e hóben Anne Wolynec, mi a ripará cu e no tabata solamente bunita físicamente, sino cu e tabatin tambe amor i celo pa Jehova. Nos a cuminsá namorá i a casa na januari 1947.

P’e siguiente dos aña i mei nos a traha pionero na Londen, Ontario, i despues di esei n’e isla Cape Breton, unda nos a yuda forma un congregacion. Anto na 1949, nos a haña invitacion p’e di 14 klas dje Scol Bíblico di Galad di Watchtower, i ei nos a haña entrenamentu pa bira misionero.

Trabou di Misionero na Quebec

Graduadonan canades dje klasnan anterior di Galad, a haña asignacion pa habri e trabou di predicá na Quebec. Na 1950, nos, huntu cu 25 otro studiante for dje di 14 klas a djoin nan. E aumento den e actividad di misionero aki a intensificá e persecucion i violencia di multitud desordená cu lidernan di Iglesia Católico Romano tabata instigá.

Despues di dos dia cu nos a yega na nos promé asignacion di misionero den e stad Rouyn, polis a arestá Anne i hink’é patras den auto di polis. Esaki tabata un experencia nobo p’e, ya cu el a bini for di un pueblo chikitu den e provincia di Manitoba, Cánada, unda masha poco biaha el a mira un oficial di polis. Naturalmente, e tabata spantá i a corda e palabranan: “Si bo casa cuné, bo ta bai prizon sigur.” Sin embargo, promé cu polis a bai cuné, nan a haña mi tambe i nan a hinca mi den auto huntu cu Anne. “Esta contentu mi ta di mira bo!” el a sclama. Tog, e tabata asombrosamente trankil, i a remarcá: “Wel, e mésun cos a sosodé cu e apostelnan pasobra nan a predicá tocante Jesus.” (Echonan 4:1-3; 5:17, 18) Mas lat den dia nan a laga nos liber bou di fiansa.

Rond di un aña despues dje incidente ei, miéntras nos tabata den e ministerio di cas pa cas den nos asignacion nobo na Montreal, mi a tende un bochincha den caya i mi a mira un multitud desordená i rabiá ta tira piedra. Miéntras mi a bai pa yuda Anne cu su compañera, polis a yega n’e sitio. En bes di arestá e miembronan dje multitud desordená, polis a arestá Anne cu su compañera! Miéntras nan tabata den prizon, Anne a recordá e Testigo nobo ei cu nan tabata experenciando e realidad di Jesus su palabranan: “Boso lo ta obheto di odio di parti di tur hende pa causa di mi nomber.”—Mateo 10:22.

Na dado momento, tabatin rond di 1.700 caso contra Testigo di Jehova pendiente pa bai corte na Quebec. Generalmente nan tabata acusá nos di ta distribuí literatura cu ta promové lantamentu contra gobiernu of di ta distribuí literatura sin permit. Esei a pone cu e Departamento Legal di Sociedad Watch Tower a tuma accion contra e gobiernu di Quebec. Despues di hopi aña di debate legal, Jehova a duna nos dos victoria grandi den Corte Supremo di Cánada. Na december 1950, nos a keda absolvé dje acusacion di cu nos literatura ta fomentá lantamentu contra gobiernu, i na october 1953, nos derecho pa distribuí literatura bíblico sin permit a keda confirmá. Pues, den  un manera masha cla, nos a mira con Jehova en berdad ta un lugá di “refugio i fortalesa, un yudansa cu por haña fácilmente durante angustia.”—Salmo 46:1.

Ta remarcabel cu e cantidad di Testigo na Quebec a aumentá di 356 na 1945, tempu ami a cuminsá traha pionero, te na mas cu 24.000 awe! A sosodé precis manera e profecia bíblico a predicí: “Ki arma cu nan forma contra bo lo no tin éxito, i ki lenga cu lanta contra bo den huicio, lo bo condená.”—Isaías 54:17.

Nos Trabou na Francia

Na september 1959, ami cu Anne a haña invitacion pa bai sirbi na Betel na Paris, Francia, unda mi a haña asignacion pa supervisá e departamento di imprenta. Promé cu nos a yega na januari 1960, un empresa comercial tabata haci e trabou di imprenta. Como cu e tempu ei E Toren di Vigilancia tabata prohibí na Francia, tur luna nos tabata druk e revista den forma di un foyeto di 64 página. E foyeto tabata yama Boletin Interno di Testigonan di Jehova, i e tabata contené e artículonan pa studia durante e luna ei den e congregacionnan. Di 1960 pa 1967, e cantidad di persona cu tabata participá den e trabou di predicá a aumentá di 15.439 te na 26.250.

Cu tempu mayoria misionero a ser asigná di nobo pa bai predicá na otro lugá. Algun a bai paisnan di abla frances na Africa i otronan a bai Quebec bek. Dor cu Anne no tabata sinti bon i mester a operá, nos a bolbe Quebec. Despues di a haña tratamentu médico pa tres aña, Anne a bira bon. E tempu ei, mi a haña asignacion pa haci e trabou di circuito, bishitando un congregacion diferente tur siman pa duna animacion spiritual.

Trabou di Misionero na Africa

Un par di aña despues, na 1981, nos tabatin e goso di ricibí un asignacion nobo como misionero na Zaire, cu awor ta República Democrático di Congo. E pueblo tabata pober, i nan a pasa hopi trabou. Ora nos a yega, tabatin 25.753 Testigo, pero awe e cantidad ei a aumentá te pasa 113.000, i na 1999, un total di 446.362 persona a asistí n’e Memorial dje morto di Cristo!

Na 1984, gobiernu a duna nos un pida tereno di mas of ménos 200 hectar pa traha un oficina di sucursal nobo. Anto, na december 1985, nos a tene un congreso internacional den e capital, Kinshasa, na cua a asistí 32.000 delegado for di rond mundu. Despues di esei, oposicion instigá dor di clero a interumpí nos trabou na Zaire. Dia 12 di mart 1986, e rumannan cu tabata hiba delantera, a haña un carta cu a declará e asociacion di Testigonan di Jehova di Zaire ilegal. E presidente dje pais n’e tempu ei, defuntu Mobutu Sese Seko, a firma e prohibicion aki riba tur nos actividadnan.

Debí n’e desaroyonan repentino aki, nos mester a aplicá e conseho bíblico: “Spiertu ta esun cu a mira e calamidad i a sconde su mes.” (Proverbionan 22:3) Nos a haña maneranan pa obtené papel, ink, film, plachi pa druk i kímico for di exterior pa druk nos publicacionnan na Kinshasa. Tambe nos a desaroyá nos mes red di distribucion. Una bes nos tabata organisá, nos sistema a funcioná mihó cu e servicio di post di gobiernu!

Miles di Testigo a ser arestá i hopi a ser torturá brutalmente. Tog, cu excepcion di algun, nan a para firme i a keda fiel. Nan a arestá mi tambe i mi a mira e condicionnan teribel cu e rumannan a soportá den prizon. Hopi biaha polis secreto i autoridadnan a oprimí nos den tur manera, pero semper Jehova a percurá un salida pa nos.—2 Corintionan 4:8.

Nos a sconde mas of ménos 3.000 caha di literatura den depósito di un comerciante. Sin embargo, cu tempu un di su empleadonan a informá polis secreto, i nan a arestá e comerciante. Pa casualidad, ora nan tabata na caminda pa prizon, nan a topa mi den mi auto. E comerciante a bisa nan cu ta ami ta e persona cu a haci e areglo cuné pa warda e literatura. E polis a para i a puntra mi tocante e asuntu, i nan a acusá mi di a pone literatura ilegal den depósito dje homber aki.

“Boso tin un dje bukinan?” mi a puntra.

 “Naturalmente cu sí,”nan a contestá.

“Mi por a wak e?” mi a puntra.

Nan a trece un ehemplar pa mi, i mi a mustra nan e página parti paden cu ta bisa: “Imprimí na Merca dor di Watch Tower Bible & Tract Society.”

“Loke boso tin den boso man ta propiedad di Merca i e no ta pertenecé na Zaire,” mi a recordá nan. “Boso gobiernu a pone un prohibicion riba e corporacion legal dje asociacion di Testigonan di Jehova di Zaire i no riba Watch Tower Bible & Tract Society. P’esei, boso mester tene masha cuidou cu loke boso ta haci cu e publicacionnan aki.”

Nan a permití mi bai pasobra nan no tabatin ordu di hues pa detené mi. E anochi ei, nos a bai cu dos truck n’e depósito i a saca tur e literatura for di einan. Ora autoridadnan a bini e siguiente dia, nan a rabia mashá pasobra nan a haña e lugá completamente bashí. Anto nan tabata busca mi, ya cu awor sí nan tabatin un ordu di hues pa arestá mi. Nan a haña mi, i dor cu nan no tabatin auto, mi mes a core bai prizon! Un otro Testigo a compañá mi pa asina e por a bai cu mi auto promé cu nan pone beslag riba dje.

Despues di un interogacion di ocho ora, nan a dicidí pa deportá mi. Pero mi a mustra nan un fotocopia di un carta di gobiernu cu ta confirmá cu mi a ser nombrá pa likidá e propiedadnan di e asociacion di Testigonan di Jehova di Zaire cu awor ta prohibí. Pues, nan a permití mi sigui cu mi actividad na Betel.

Despues di a sirbi cuater aña bou di preshon dje prohibicion riba e trabou na Zaire, mi a haña úlcera na stoma cu tabata sangra i cu a peligrá mi bida. Decision a cai cu mi mester a bai Sur Africa pa tratamentu, unda e sucursal a soru bon pa mi, i mi a recuperá. Despues di a sirbi ocho aña na Zaire, loke realmente tabata un experencia memorabel i felis, nos a muda bai e sucursal di Sur Africa na 1989. Na 1998 nos a bolbe nos pais natal i for di e tempu ei nos ta sirbi atrobe n’e Betel di Cánada.

Contentu di Por Sirbi

Ora mi wak atras riba mi 54 añanan den e ministerio di tempu completo, mi ta masha contentu cu mi a usa mi vigor hubenil den Jehova su sirbishi precioso. Aunke Anne mester a soportá hopi circunstancia difícil, e no a keha sino mas bien tabata un apoyo grandi den tur nos actividadnan. Huntu, nos tabatin e privilegio di yuda hopi hende siña conocé Jehova, i awor vários di nan ta den e ministerio di tempu completo. Esta un goso ta, pa mira algun di nan yunan i asta nan nietunan sirbi nos gran Dios, Jehova!

Mi ta convencí cu e mundu aki no por ofrecé nada cu por ta compará cu e privilegio i bendicionnan cu Jehova a duna nos. Ta cierto cu nos a wanta hopi prueba, pero nan tur a yuda edificá nos fe i confiansa den Jehova. En berdad el a resultá di ta un toren di fortalesa, un lugá di refugio i un yudansa cu ta fácil pa haña durante problema.

[Nota]

[Plachinan na página 26]

Trahando pionero huntu na 1947; huntu cu Anne awe

[Plachi na página 29]

E hendenan cu nos a topa na Zaire a stima berdad bíblico