Kico Ta e Yabi pa Exito?

DOS yoncuman creativo tabata preparando metódicamente un mashin straño, pa un prueba crucial. Di ripiente, un ráfaga violento di bientu a coge e aparato frágil, zwai e manda laira i a dal e abou kibra na werki cu un zonido horibel. Decepcioná, e hombernan a keda boca habrí. Tur nan trabou duru i minucioso tabata bentá tur machicá den un boshi trocí di palu i metal.

Pa Orville i Wilbur Wright, loke a sosodé e october ei na 1900 no tabata e promé contratempu frustrante den nan intento pa construí un mashin cu ta bula i cu ta mas pisá cu aire. Ya nan a dedicá algun aña i basta placa na experimentá.

Pero, finalmente nan persistencia a duna fruta. Dia 17 di december 1903, na Kitty Hawk, North Carolina, Merca, e rumannan Wright a logra lansa un prototipo impulsá pa motor cu a bula 12 seconde—corticu na comparacion cu vuelonan djawe, pero suficiente largu pa cambia mundu pa semper!

Exito den mayoria actividad ta dependé principalmente di perseverá cu pacenshi. Solamente cu esfuerso consistente bo ta logra mayoria cos di balor, sea ta dominá un idioma nobo, siña un fishi of asta cera un amistad. Autor Charles Templeton ta bisa: “Nuebe di cada dies biaha bo por atribuí éxito directamente na un solo cos: trabou duru.” E columnista Leonard Pitts, Jr., ta remarcá: “Nos ta papia di talento, nos ta kere cu ta suerte, pero masha hopi bes nos ta ignorá e cosnan mas importante. E trabou duru i e hopi fracasonan. E yegamentu trempan i kedamentu te lat.”

Esaki ta confirmá loke Bijbel a declará hopi tempu pasá: “Man di esnan diligente ta esun cu lo goberná.” (Proverbionan 12:24) Ser diligente ta nificá cu nos ta perseverá den nos esfuersonan. Esaki ta necesario si nos kier alcansá loke nos ta pone nos dilanti pa haci. Kico ta perseverancia? Con nos por perseverá den nos empeño pa logra nos metanan, i den kico nos mester perseverá? E siguiente artículo lo contestá e preguntanan aki.

[Rekonosementu pa Potrèt na página 3]

U.S. National Archives photo