Bo Ta Ser Motiva na Accion Manera Jesus?

“El a mira un multitud grandi, pero el a sinti duele di nan, pasobra nan tabata manera carné sin wardadó. I el a cuminsá siña nan.”—MARCO 6:34.

1. Di con ta di comprendé cu tin hende ta desplegá cualidadnan admirabel?

ATRABES di historia, hopi hende a manifestá cualidadnan admirabel. Esei ta di comprendé. Jehova Dios ta poseé i ta desplegá amor, bondad, generosidad i otro cualidadnan cu nos ta balorá. Hende ta creá den Dios su imágen. Pues, ta di comprendé cu hopi hende ta desplegá un grado di amor, bondad, compasion i otro cualidadnan divino, mescos cu mayoria hende ta mustra cu nan tin concenshi. (Génesis 1:26; Romanonan 2:14, 15) Pero kisas bo ta realisá sí, cu algun hende ta desplegá e cualidadnan aki mas lihé cu otro.

2. Cua ta algun bon obra cu hende por haci, kisas pensando cu nan ta imitá Cristo?

² Casi sigur bo conocé hende cu sa bishitá of yuda hende enfermo regularmente, ta mustra compasion pa esnan desabilitá, of ta yuda hende pober cu generosidad. Ademas, pensa riba tur esnan cu ta ser motivá dor di compasion pa dedicá nan bida na traha den colonia di leproso of casnan di huérfano, esnan cu ta traha como boluntario na hospital of casnan di cuido, of esnan cu ta lucha pa yuda hende sin cas of refugiado. Probablemente algun di nan ta sinti cu nan ta imitá Jesus, esun cu a pone e ehempel pa cristiannan. Den e Evangelionan nos ta lesa cu Cristo a cura  enfermonan i alimentá esnan cu hamber. (Marco 1:34; 8:1-9; Lucas 4:40) Jesus su despliegue di amor, ternura i compasion ta manifestacionnan dje “mente di Cristo,” i e na su turno tabata imitá su Tata celestial.—1 Corintionan 2:16.

3. Kico nos mester considerá pa nos tin un punto di bista balansá dje bon obranan di Jesus?

³ Pero, bo a nota cu hopi di esnan cu e amor di Jesus a conmové awe ta pasa por alto un aspecto clave dje mente di Cristo? Nos por haña un comprendimentu penetrante den e asuntu aki si nos considerá Marco capítulo 6 a fondo. Ei nos ta lesa cu e hendenan a trece esnan enfermo pa Jesus cura nan. Den e contexto, nos ta siña tambe cu ora Jesus a mira cu e miles di hendenan cu a bini cerca dje a haña hamber, el a alimentá nan milagrosamente. (Marco 6:35-44, 54-56) Jesus a demostrá su compasion amoroso di forma remarcabel dor di cura esnan enfermo i alimentá esnan cu hamber, pero ta eseinan tabata e formanan principal den cua el a yuda otronan? I cua ta e mihó manera pa nos imitá su ehempel perfecto di amor, bondad i compasion, mescos cu e a imitá Jehova?

Motivá pa Respondé na Necesidad Spiritual

4. Na ki ocasion e relato na Marco 6:30-34 a tuma lugá?

⁴ Jesus a sinti duele di esnan rond di dje, principalmente dor di nan necesidad spiritual. Tal necesidad tabata di mayor importancia, mas importante cu necesidad físico. Considerá e relato na Marco 6:30-34. E incidente registrá ei a tuma lugá cantu di laman di Galilea, poco promé cu e Pascu hudiu di aña 32 E.C. E apostelnan tabata excitá, i cu bon motibu. Nan a bolbe cerca Jesus despues di a caba di completá un gira extenso, sin duda ansioso pa cont’é nan experencianan. Pero, un multitud a forma. E tabata asina grandi cu Jesus i su apostelnan no por a come ni sosegá. Jesus a bisa e apostelnan: “Boso, ban den privá, na un lugá solitario i sosegá un poco.” (Marco 6:31) Nan a subi un boto, posiblemente cerca di Capernaum, anto a nabegá bai un lugá solitario na otro banda dje laman di Galilea. Pero e multitud a core cantu di awa anto yega promé cu e boto. Con Jesus lo a reaccioná? El a rabia dor cu nan a kita su privacidad? Absolutamente cu no!

5. Kico Jesus a sinti pa e multitud cu a bini cerca dje, i con el a respondé na esei?

⁵ Jesus su curason a ser conmoví ora el a mira e multitud di miles di hende aki, incluso hende enfermo, sperand’é ansiosamente. (Mateo 14:14; Marco 6:44) Marco a enfocá riba loke a lanta Jesus su compasion i e manera cu el a respondé, dor di skirbi: “El a mira un multitud grandi, pero el a sinti duele di nan, pasobra nan tabata manera carné sin wardadó. I el a cuminsá siña nan hopi cos.” (Marco 6:34) Jesus a mira mas cu djis un boshi di hende. El a mira hende individual cu necesidad spiritual. Nan tabata manera carné cu ta dual indefenso, sin un wardadó pa guia nan na sabana berde of pa protehá nan. Jesus tabata sa cu e lidernan religioso di curason duru, cu lo mester tabata wardadónan atento, en realidad a despreciá e pueblo comun i a neglishá nan necesidad spiritual. (Ezekiel 34:2-4; Juan 7:47-49) Jesus kier a trata nan otro: e kier a yuda nan mas tantu posibel. El a cuminsá siña nan tocante e Reino di Dios.

6, 7. (a) A base dje manera cu Jesus a respondé na necesidad dje hendenan kico e Evangelionan ta revelá cu tabata prioridad? (b) Kico a motivá Jesus pa predicá i siña otronan?

⁶ Wak den ki secuencia un relato paralelo ta pone loke a pasa, i con e ta duna di comprendé kico tabata mas importante. Lucas, un dokter cu masha interes den e bienestar físico di otronan, a skirbi e relato. “E multitudnan . . . a sigui [Jesus]. I el a ricibí nan amablemente i a cuminsá papia cu nan tocante e reino di Dios, i el a cura esnan cu tabatin mester di curacion.” (Lucas 9:11; Colosensenan 4:14) Aunke esei no ta e caso cu tur e relatonan di milager, kico e relato inspirá di Lucas a mencioná promé e biaha aki? E echo cu Jesus a siña e hendenan.

⁷ De echo, esaki ta cuadra cu e énfasis cu nos ta haña na Marco 6:34. E versículo ei ta mustra  bon cla cua tabata e manera principal cu Jesus a ser motivá pa expresá su duele. El a siña e hendenan, i asina a respondé na nan necesidad spiritual. Mas promé durante su ministerio, Jesus a bisa: “Na otro stadnan mi tin cu declará e bon nobo dje reino di Dios, pasobra ta pa esaki mi a ser mandá.” (Lucas 4:43) Tog, lo ta robes pa nos pensa cu Jesus a proclamá e mensahe di Reino djis como un deber, como si fuera el a cumpli di un manera mecánico cu e trabou di predicá cu e tabatin pa haci. No, su compasion amoroso pa e hendenan tabata un motivacion clave pa el a compartí e bon nobo cu nan. E mihó cos cu Jesus por a haci pa nan—asta pa esnan enfermo, esnan cu demoño a molestiá, esnan pober of esnan cu hamber—tabata di yuda nan conocé, aceptá i stima e berdad tocante e Reino di Dios. Tal berdad tabata di mayor importancia dor di e rol cu e Reino ta hunga den vindicá Jehova su soberania i percurá bendicionnan permanente pa hende.

8. Con Jesus a sinti tocante su trabou di predicá i siña otronan?

⁸ Jesus su predicacion activo tocante e Reino tabata un dje motibunan básico cu el a bini na tera. Ora su ministerio terenal tabata cerca di yega su fin, Jesus a bisa Pilato: “Pa esaki mi a nace, i pa esaki mi a bini na mundu, pa mi duna testimonio di e berdad. Tur hende cu ta di parti dje berdad ta scucha mi bos.” (Juan 18:37) Den e dos artículonan anterior nos a nota cu Jesus tabata un hende di sintimentu tierno, interesá den otronan, acercabel, cu consideracion, cu confiansa den hende i, mas cu tur, cu amor. Nos tin cu capta e aspectonan ei di su personalidad si di berdad nos kier comprendé e mente di Cristo. Ta mes importante tambe pa nos realisá cu e prioridad cu el a duna na su trabou di predicá i siña otronan tambe ta parti di e mente di Cristo.

El A Urgi Otronan pa Duna Testimonio

9. Pa ken predicá i siña otro hende mester tabata prioridad?

⁹ No ta Jesus so mester a duna prioridad na predicá i siña otronan como un expresion di amor i compasion. El a urgi su siguidónan pa nan imitá su motivacion, prioridad i accionnan. Por ehempel, despues cu Jesus a seleccioná su 12 apostelnan, kico nan mester a haci? Marco 3:14 i 15 ta conta nos: “El a forma un grupo di diesdos, cu tambe el a yama ‘apostel,’ pa nan por sigui cuné i p’e por manda nan predicá i pa nan tin autoridad di expulsá demoño.” Bo ta capta kico e apostelnan su prioridad mester tabata?

10, 11. (a) Ora Jesus a despachá e apostelnan, kico el a bisa nan haci? (b) N’e ocasion cu Jesus a despachá e apostelnan, kico a ricibí énfasis?

¹⁰ Despues, en berdad Jesus a duna e diesdosnan abilidad pa cura otronan i saca demoño. (Mateo 10:1; Lucas 9:1) Anto el a manda nan haci un gira na “e carnénan perdí dje cas di Israel.” Pa haci kico? Jesus a instruí nan: “Segun cu boso ta bai, predicá, bisando: ‘E reino di shelu a yega cerca.’ Cura hende enfermo, lanta hende morto, haci leprosonan limpi, expulsá demoñonan.” (Mateo 10:5-8; Lucas 9:2) I kico nan a haci, de facto? “Pues nan a sali i [1] a predicá p’e hendenan por repentí; i [2] nan tabata expulsá hopi demoño i hunta hopi hende enfermo cu zeta i cura nan.”—Marco 6:12, 13.

¹¹ Ya cu no ta tur biaha predicacion ta ser mencioná promé, ta posibel cu nos ta dunando muchu importancia na e asuntu di prioridad of motivacion, pa loke ta e secuencia mencioná aki riba? (Lucas 10:1-9) Wel, nos no mester pasa por haltu cuantu biaha siñamentu ta ser mencioná promé cu curacion. Wak e contexto den e caso aki. Net promé cu el a despachá e 12 apostelnan, Jesus a ser conmoví dor di e condicion cu e multitud tabata aden. Nos ta lesa: “Jesus a cuminsá haci un gira den tur e stad i pueblonan, siñando den nan snoanan i predicando e bon nobo di reino i curando tur sorto di malesa i tur sorto di enfermedad. Ora el a mira e multitudnan, el a haña duele di nan, pasobra nan tabata soyá i plamá manera carné sin wardadó. E ora ei el a bisa su disipelnan: ‘Sí, e cosecha ta grandi, pero e trahadónan ta poco. P’esei, roga  e Doño dje cosecha pa manda trahadó na su cosecha.’”—Mateo 9:35-38.

12. Ki propósito adicional e obranan milagroso di Jesus i e apostelnan por a sirbi?

¹² Dor cu nan tabata cuné, e apostelnan por a absorbá algu di e mente di Cristo. Nan por a sinti cu pa nan ta berdaderamente amoroso i compasivo cu e pueblo, nan lo mester a predicá i siña nan tocante e Reino tambe. Esei mester a bira un rasgo principal di nan bon obranan. Na armonia cu esaki, e obranan excelente di tipo físico, manera cura esnan enfermo, a logra mas cu djis yuda esnan den necesidad. Manera bo mes por imaginá, curacion of cuminda producí milagrosamente lo a atraé algun hende. (Mateo 4:24, 25; 8:16; 9:32, 33; 14:35, 36; Juan 6:26) Pero, mas cu yuda nan den sentido físico, tal obranan a haci e observadónan reconocé cu Jesus tabata e Yu di Dios i “e profeta” cu Moises a profetisá.—Juan 6:14; Deuteronomio 18:15.

13. E profecia na Deuteronomio 18:18 a enfatisá cua rol pa “e profeta” cu mester a bini?

¹³ Pakico ta significativo cu Jesus tabata “e profeta”? Wel, kico tabata e rol clave profetisá pa “e profeta”? E mester a bira famoso dor di efectuá curacion milagroso of dor di producí cuminda na un forma compasivo pa esnan hambrá? Deuteronomio 18:18 a profetisá: “Lo mi lanta pa nan un profeta for di meimei di nan rumannan, semehante na bo [Moises]; i berdaderamente lo mi pone mi palabranan den su boca, i lo e siguramente papia cu nan tur loke mi mand’é.” Pues, pareu cu e apostelnan a siña tin sintimentu tierno i expresá esaki, nan por a comprendé cu nan mester a duna evidencia di e mente di Cristo den nan trabou di predicá i siña hende tambe. Esei ta e mihó cos cu nan por a haci pa hende. Via tal medio, esnan enfermo i pober por a obtené beneficio permanente, no djis beneficio limitá na un bida humano corticu, of na un of dos cuminda.—Juan 6:26-30.

Desaroyá e Mente di Cristo Awe

14. Kico nos predicacion tin di haci cu si nos tin e mente di Cristo?

¹⁴ Ningun di nos lo no considerá cu e mente di Cristo ta algu pa promé siglo so, esta, pa Jesus cu su promé disipelnan, di ken apostel Pablo a skirbi: “Nos sí tin e mente di Cristo.” (1 Corintionan 2:16) I nos lo admití mesora cu nos tin e obligacion di predicá e bon nobo i haci disipel. (Mateo 24:14; 28:19, 20) Tog ta beneficioso pa nos refleccioná riba nos propio motivacion pa cumpli cu e trabou ei. Nos no mester hacié djis dor di un sentido di deber. Amor pa Dios ta un motibu primordial pakico nos ta participá den e ministerio, i ser berdaderamente manera Jesus, kier men entre otro, cu ta compasion ta motivá nos pa predicá i siña.—Mateo 22:37-39.

15. Di con compasion ta un parti apropiado di nos ministerio público?

¹⁵ Ta cierto cu no semper ta fácil pa sinti compasion pa esnan cu no ta compartí nos creencianan, foral ora nos topa apatia, rechaso of oposicion. Pero, si nos perde nos amor i compasion pa hende, nos lo por perde un di nos motivacionnan esencial pa participá den e ministerio cristian. Con anto nos por cultivá compasion?  Nos lo por purba mira hende manera Jesus a mira nan, “soyá i plamá manera carné sin wardadó.” (Mateo 9:36) E descripcion ei no ta cuadra cu hopi hende djawe? Wardadónan religioso falsu a neglishá i ciega nan den sentido spiritual. Como resultado, nan no sa di e guia sano cu tin den Bijbel, ni di e condicionnan paradísico cu e Reino di Dios lo trece riba nos tera pronto. Nan ta enfrentá e problemanan di bida diario—incluso pobresa, problema di famia, enfermedad i morto—sin cu nan tin e speransa di Reino. Nos tin loke nan tin mester: e bon nobo salbadó di bida tocante e Reino di Dios cu ta establecí den shelu awor!

16. Pakico nos lo kier compartí e bon nobo cu otronan?

¹⁶ Ora bo meditá asina riba e necesidad spiritual di esnan rond di bo, bo curason no ta pone bo kier haci tur loke bo por pa conta nan tocante Dios su propósito amoroso? Sí, nos obra ta un obra di compasion. Si nos ta sinti pa hende, mescos cu Jesus a sinti, esei lo ta bisto den nos tono di bos, nos expresion di cara i nos forma di siña. Tur esei lo haci nos mensahe mas atractivo pa esnan cu ta “corectamente dispuesto pa bida eterno.”—Echonan 13:48.

17. (a) Cua ta algun manera cu nos por mustra nos amor i compasion pa otronan? (b) Di con e asuntu no ta di sea haci bon obra of participá den e ministerio público?

¹⁷ Claro cu nos amor i compasion mester ta bisto den henter e curso di nos bida. Esaki ta incluí ser bondadoso cu esnan ménos privilegiá, esnan enfermo i esnan pober, i haci te caminda nos por pa aliviá nan sufrimentu. E ta encerá nos esfuerso den echo i den palabra pa calma e duele di esnan cu a perde sernan kerí den morto. (Lucas 7:11-15; Juan 11:33-35) Tog, tal manifestacionnan di amor, bondad i compasion no mester bira e enfoke principal di nos bon obranan, manera den e caso di algun hende humanitario. Loke ta di beneficio na un alcanse muchu mas largu ta esfuersonan motivá pa e mésun cualidadnan divino, pero expresá dor di participá den e obra cristian di predicá i siña otronan. Corda kico Jesus a bisa di e lidernan religioso: “Boso ta duna e décimo dje yerba buena i dje eneldo i dje comino, pero boso a pasa por haltu dje asuntunan di mas peso dje Ley, esta, husticia i misericordia i fieldad. Ta esaki ta e cosnan cu tabata obligatorio pa haci, tog sin pasa por haltu dje otro cosnan.” (Mateo 23:23) Den caso di Jesus, no tabata un asuntu di sea esun of e otro: sea yuda hende cu nan necesidadnan físico of siña nan cosnan spiritual cu ta duna bida. Jesus a haci tur dos. Tog ta keda claro cu su trabou di siña tabata primordial, pasobra e bon cosnan cu el a logra di tal manera por tabata di beneficio eterno.—Juan 20:16.

18. Na kico nos consideracion di e mente di Cristo mester motivá nos?

¹⁸ Esta gradicidu nos por ta cu Jehova a revelá nos e mente di Cristo! Pa medio dje Evangelionan nos por haña un mihó conocimentu dje pensamentu, sintimentu, cualidad, actividad i prioridadnan dje homber mas grandi cu hamas a biba. Ta keda na nos pa lesa, meditá i pone na práctica loke Bijbel ta revelá tocante Jesus. Corda, pa di berdad nos actua manera Jesus, promé nos tin cu siña pensa, sinti i evaluá asuntunan manera Jesus, te asina leu cu nos por como hende imperfecto. Pues, laga nos sea determiná pa cultivá i desplegá e mente di Cristo. No tin mihó manera pa biba, ni pa trata hende, ni pa nos i otronan hala mas cerca di esun di ken Jesus ta un refleccion perfecto, esta Jehova, nos tierno Dios.—2 Corintionan 1:3; Hebreonan 1:3.

Con Lo Bo Respondé?

• Ki comprendimentu penetrante Bijbel ta duna nos dje manera cu hopi bes Jesus a respondé na hende den necesidad?

• Kico Jesus a enfatisá ora el a dirigí su siguidónan?

• Con nos por manifestá “e mente di Cristo” den nos actividadnan?

[Preguntanan di Estudio]

 [Plachi di henter página na página 23]

[Plachi na página 24]

Kico ta e mihó cos cu cristiannan por haci pa otro hende?