Curpa Chikitu, Curason Grandi

CON lo ta si bo mester papia cu hende straño tocante e Reino di Dios, anto bo ta midi 76 centimeter so di haltura? Laura por conta bo. Cu 33 aña di edad, ta esei e ta midi, 76 centimeter so. E cu su ruman muher María, di 24 aña i 86 centimeter haltu, ta biba na Quito, Ecuador. Laga nan conta di e obstáculonan cu nan ta enfrentá den nan ministerio cristian.

“Nos ta cana como mei kilometer pa coge un bus pa nos bai nos teritorio di predicá, of pa bai e reunionnan cristian. Di caminda cu e ta laga nos, nos ta cana mei kilometer mas pa coge un otro bus. Desafortunadamente, tin cincu cachó brabu ta biba riba e caminda ei. Nos tin hopi miedu di cachó, pasobra nan por parce mes grandi cu cabai. Nos ta bai cu un palu pa core cu nan si ta necesario, anto promé cu nos subi bus nos ta scond’é un caminda, pa nos tin e ora di cana bai cas bek.

Subi bus ta un stap grandi pa nos, literalmente. Nos ta para riba un ceritu di tera n’e parada di bus pa nos por subi mas fácil. Algun shofer ta para net dilanti e ceritu, pero no ta tur. Si nan no hacié, esun di nos cu ta mas haltu ta yuda esun mas corticu subi. Pa nos coge e di dos bus nos mester crusa un caya druk. Cu nos pia corticu, esei ta un berdadero esfuerso. Dor di nos estatura corticu, un tas di literatura pisá ta otro reto mas. Pa haci e tas ménos pisá nos ta usa Bijbel tamaño di sacu, i nos ta limitá e cantidad di literatura cu nos ta bai cuné.

Nos tur dos ta masha tímido for di tempu cu nos ta mucha. Nos bisiñanan sa cu semper nos tabatin masha miedu di papia cu hende straño. Dor di esei nan ta keda sorprendí i impresioná di mira nos bati na nan porta, i por lo general nan ta scucha nos. Pero caminda cu nan no conocé nos dje bon ei, tur loke hende ta mira hopi bes ta cu nos ta enano; p’esei, no ta semper nan ta duna nos e atencion serio cu nos mensahe ta merecé. Apesar di esei, e amor di Jehova cu nos ta sinti ta duna nos e ánimo pa sigui den e trabou di evangelisá. Meditá riba Proverbionan 3:5 i 6 tambe ta duna nos curashi.”

Manera e caso di Laura cu María ta mustra, perseverancia apesar di strobansa físico por duna gloria na Dios. Apostel Pablo a pidi den oracion pa Dios kita su “sumpiña den carni,” posiblemente un problema físico. Pero Dios a bis’é: “Mi bondad inmerecí ta suficiente pa bo; pasobra mi poder ta ser hací perfecto den debilidad.”  Sí, un impedimentu físico no tin nodi ser kitá pa nos por sirbi Dios. Si nos dependé completamente riba Dios, esei por yuda nos saca lo máximo for di nos circunstancia. Dor cu Pablo a mira su “sumpiña den carni” cu e actitud ei, e por a bisa: “Ora mi ta débil, e ora ei mi ta poderoso.” (2 Corintionan 12:7, 9, 10) Algun aña despues Pablo a skirbi: “Pa tur cos mi tin e forsa den birtud di esun cu ta duna mi poder.”—Filipensenan 4:13.

Den nos tempu, Dios ta efectuando un obra poderoso pa medio di homber, muher i mucha cu ta completamente dedicá na dje. Vários di nan tin un of otro tipo di impedimentu. Aunke nan tur tin e speransa cu Dios lo cura nan bou di su Reino, nan no ta warda te ora cu e libra nan di nan problema, promé cu nan purba haci algu den su sirbishi.

Abo ta sufri di un debilidad físico? Tuma curashi! Mediante bo fe, bo por ta un di esnan manera Pablo, Laura cu María. Nos por bisa di nan, mescos cu di homber i muhernan di fe den tempunan antiguo: “For di un estado swak [nan] a ser hací poderoso.”—Hebreonan 11:34.

[Plachi na página 8]

María

Laura

[Plachi na página 9]

María ta yuda Laura subi bus

[Plachinan na página 9]

“Nos tin hopi miedu di cachó, pasobra nan por parce mes grandi cu cabai”

Abou: Laura cu María, i esnan cu a studia Bijbel cu nan