Keda Leu for dje Zona di Peliger!

E TRABOU di un volcanólogo ta di haci observacion, evaluá evidencia, anto duna spiertamentu di erupcionnan volcánico cu ta na caminda. (Una bes ceru Fugen a haci erupcion, polis mester a tene e hendenan pafó dje zona di peliger.) Mescos, studiantenan di Bijbel ta observá e señal dje “conclusion dje sistema di cosnan” i alertá otronan dje peliger na caminda.—Mateo 24:3.

Den e mésun capítulo di Bijbel cu ta spierta nos di un catástrofe mundial cu ta na caminda, nos por lesa e descripcion aki di desaroyonan cu lo tuma lugá promé cuné: “Nacion lo lanta contra nacion i reino contra reino, i lo tin scarcedad di cuminda i temblor den un lugá tras di otro. . . . Hopi profeta falsu lo lanta i gaña hopi hende; i debí na e aumento di maldad, e amor di mayoria lo fria. . . . I e bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:7-14.

Nos no tin nodi ta analista di noticia pa nos ripará cu e profecia aki ta cumpliendo actualmente. Specialmente for di 1914, nos mes a experenci’é. E siglo aki a conocé dos guera mundial, un gran cantidad di guera civil, enfrentamentunan local i conflictonan racial i religioso. Humanidad a sufri di scarcedad di cuminda como resultado di tal gueranan, ademas di scarcedadnan provocá dor di desaster natural. Temblor a caba cu masha hopi bida. Cultonan cu lidernan cuestionabel i siguidónan fanático a lanta. “E aumento di maldad” a pone cu hende no ta mustra amor mas, ni no ta custumber mas pa trata hende amicalmente.

E obra mundial di predicá, otro aspecto dje señal, ta cumpliendo sin duda. Djis wak e portada dje revista aki atrobe i lo bo nota cu e palabranan “Anunciando e Reino di Jehova Dios” ta parti dje título. E Toren di Vigilancia, publicá na 132 idioma cu un circulacion di  mas cu 22 miyon revista, ta un dje hermentnan principal di esnan cu ta declará “e bon nobo aki dje reino” den tur e tera habitá. E bon nobo ei ta incluí e mensahe di cu e Creador di universo, Jehova Dios, a establecé e Reino celestial cu lo destruí e sistema di cosnan malbado i trece un paradijs riba tera. Sí, e señal di cu pronto Dios lo tuma accion ta bisto awor, loke ta indicá cu bida dje hendenan den e sistema di cosnan aki ta na peliger.—Compará cu 2 Timoteo 3:1-5; 2 Pedro 3:3, 4; Revelacion 6:1-8.

Jehova Su Dia Inspirador di Temor

Kico lo tuma lugá ora e tempu yega pa Jehova ehecutá su huicio? Scucha su propio descripcion detayá di loke lo sosodé: “Lo mi duna indicacionnan profético den shelu i riba tera, sanger i candela i pilarnan di huma. Solo mes lo cambia den scuridad, i luna den sanger, promé cu e binida dje dia di Jehova, grandi i inspirador di temor.”—Joël 2:30, 31.

E dia ei ta den porta, i e ta mas teribel i destructivo cu cualkier erupcion volcánico of temblor. Profeta Sofonías ta bisa: “E gran dia di Jehova ta cerca. E ta cerca, i e ta pura masha tantu. . . . Mediante e candela di su celo henter e tera lo ser devorá, pasobra lo e haci un exterminacion, en berdad unu teribel, di tur e habitantenan dje tera.” Apesar cu “ni nan plata ni nan oro lo no por libra nan den e dia di furia di Jehova,” tin un manera pa sobrebibí e dia inspirador di temor ei.—Sofonías 1:14-18.

Sofonías ta mustra con, dor di bisa: “Promé cu e rabia ardiente di Jehova bini riba boso, promé cu e dia di rabia di Jehova bini riba boso, busca Jehova, boso tur, e mansunan di tera . . . Busca husticia, busca suavedad. Probablemente boso lo ser scondí den e dia di rabia di Jehova.” (Sofonías 2:2, 3) Nos por busca refugio dor di ‘busca Jehova, busca husticia i busca suavedad.’ Ken ta esnan cu ta busca Jehova awe?

Sin duda bo ta relacioná e palabra “Jehova” cu Testigonan di Jehova dor di nan trabou di predicá. Kisas bo a haña e revista aki mes cerca un di nan. Nan ta conocí como ciudadanonan moral cu ta hiba un bida recto. Nan ta haciendo esfuerso pa bisti un “personalidad nobo,” cu entre otro ta encerá pa nan desaroyá suavedad. (Colosensenan 3:8-10) Nan ta admití cu esaki ta bini dor cu nan ta ser educá pa Jehova su organisacion visibel, representá na tur parti di mundu dor di congregacionnan local di Testigonan di Jehova. Sí, bo por haña refugio entre Testigonan di Jehova rond mundu, huntu cu ‘henter e asociacion di rumannan.’—1 Pedro 5:9.

Busca Refugio Awor

Si nos kier haña refugio dor di busca Jehova, nos mester ta su amigu. Kico esei ta encerá? Bijbel ta contestá: “Boso no sa cu amistad cu mundu ta enemistad cu Dios? P’esei, ken cu ta deseá di ser amigu di mundu ta haci su mes enemigu di Dios.” (Santiago 4:4) Pa nos tin amistad cu Dios, nos mester libra nos mes di tur tipo di laso emocional cu e mundu malbado actual, caracterisá pa su actitud rebelde contra Dios.

Bijbel ta urgi nos: “No stima ni mundu ni loke ta den mundu. Si un hende ta stima mundu, e amor dje Tata no ta den dje; pasobra tur loke tin den mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu mundu. Ademas, mundu ta pasa bai i tambe su deseo, pero esun cu haci e boluntad di Dios ta permanecé pa semper.” (1 Juan 2:15-17) Deseo carnal ta loke ta motivá mayoria hende djawe, esta, apetit sexual descontrolá, corementu haragan tras di placa i abusu di poder. Pero pa bo ta na Jehova su banda, bo mester vence e tipo di deseonan ei.—Colosensenan 3:5-8.

Kisas bo a yega di lesa e revista aki de bes en cuando, i tal bes bo ta di acuerdo cu e manera cu e ta splica profecia bíblico. Tog por ta bo ta duda pa dal un paso mas aleu i asociá cu Testigonan di Jehova. Pero, si nos ta confrontá un  desaster, ta suficiente pa nos djis tende e spiertamentu? Manera e caso dje erupcion di ceru Fugen ta mustra, nos tin cu reaccioná riba e spiertamentu. Corda, por lo ménos 15 reportero i camarógrafo a perde nan bida en busca di un primicia di noticia. De echo, un fotógrafo a muri cu su dede riba e konopi di su cámara. Un volcanólogo—cu a yega di bisa: “Si mi tin cu muri un dia, mi kier muri na rand di un volcan”—a perde su bida net manera tabata su deseo. Nan tur tabata dedicá na nan trabou i nan metanan. Pero nan a paga cu nan bida. Esei ta e prijs di ignorá e spiertamentu.

Awe, hopi hende ta tende e mensahe tocante Dios su decision pa destruí e sistema di cosnan malbado aki, i te na cierto grado nan ta reconocé e valides dje spiertamentu. Kisas nan ta razoná: ‘Lo e por bini un dia, pero no awe.’ Nan ta posponé e dia di Jehova cumbinientemente, pa e no distraí nan for di loke ta parce mas importante den nan bista awor.

Baruc tabatin un problema asina. Como secretario dje antiguo profeta Jeremías, Baruc a spierta e israelitanan cu curashi tocante e calamidad cu tabata menasá Jerusalem. Pero na un ocasion el a cansa di su comision. Pues, Jehova a corigié, bisando: “En cuanto abo, bo ta sigui busca cosnan grandi pa bo mes. No sigui busca.” Sea ta rikesa, prominencia of siguridad material, Baruc no mester a ‘busca cosnan grandi pa su mes.’ Un cos so mester a interes’é: haci e boluntad di Dios dor di yuda hende para na Su banda. Como resultado, lo el a ricibí ‘su alma como botin.’ (Jeremías 45:1-5) Nos tambe, na lugá di ‘busca cosnan grandi pa nos mes,’ nos mester busca Jehova. Esei por hiba na salba nos bida.

Na ceru Fugen tabatin mas cu dies polis i bombero boluntario riba trabou ora e masa volcánico supercayente a bari nan. Nan tabata purba yuda i protehá otro hende den peliger. Nan tabata manera algun homber i muher cu bon intencion cu ta profundamente enbolbí den purba drecha mundu. Apesar di con noble nan motivacion por ta, “loke ta trocí, bo no por haci regt.” (Eclesiástes 1:15) Bo no por stret e sistema di cosnan trocí aki. Ta razonabel pa bo bira un “amigu di mundu” dor di purba yuda salba un sistema mundial cu Dios ta decididu pa eliminá?

Una Bes Bo A Hui, Keda Leu

Un cos ta pa nos hui dje sistema den peliger, pero keda den e cuido protectivo di “henter e asociacion di rumannan” ta henteramente un otro cos. (1 Pedro 2:17) Laga nos no lubidá e cunukeronan cu a bai bek pa controlá nan cunucunan cerca di ceru Fugen, despues cu a evacuá nan. Probablemente nan tabata ansioso pa bolbe na e bida “normal” cu nan tabatin promé. Pero ta bisto cu nan decision di bai bek no tabata sabí. Kisas esei no tabata e promé bes cu nan a crusa e liña di peliger. Por ta nan a drenta e área di peliger djis pa un ratu, i nada no a pasa. Kisas e siguiente bes nan a keda un poco mas tantu, i ainda nada no a pasa. Probablemente, den poco tempu nan a custumbrá di crusa e liña protectivo i a haña mas curashi pa keda mas largu den e zona di peliger.

Jesucristo a papia di un situacion similar cu lo a tuma lugá durante e “conclusion dje sistema di cosnan.” El a bisa: “Manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.”—Mateo 24:3, 38, 39.

Nota cu Jesus a mencioná come, bebe i casa. Niun dje cosnan aki no ta malu riba nan mes den bista di Jehova. Wel, kico tabata e problema anto? E hendenan den dia di Noe “no a haci caso.” Nan bida tabata drei rond di nan rutina diario. Den tempu di emergencia bo no por hiba un bida “normal.” Una bes bo a hui, of separá bo mes, dje mundu actual condená na destruccion, bo mester bringa e impulso pa bai bek i saca bentaha di loke sea cu  por saca for di dje ainda. (1 Corintionan 7:31) Lo bo por dual sali for dje zona di siguridad spiritual i drenta bek sin sufri daño, sin cu ningun hende nota mes. Sin embargo, esei probablemente lo duna bo mas curashi i haci cu bo ta bai den mundu atrobe, i keda un poco mas tantu. Den poco tempu lo bo por desaroyá e actitud: “E fin lo no bini awe.”

Pensa tambe riba e tres shofernan di taxi cu a perde nan bida wardando riba e reportero i camarógrafonan ora cu e masa volcánico a lora basha for dje barica di ceru. Algun hende awe kisas ta pega tras di otronan cu a risca bai bek den mundu. Loke sea por ta e motibu, ta bisto cu no ta bale la pena pa risca laga niun hende convencé bo di bai bek na e zona di peliger.

Tur e víctimanan dje erupcion di ceru Fugen a crusa e liña di siguridad i drenta e zona di peliger. Aunke nan a verwagt cu e ceru lo haci erupcion un dia, niun hende no a pensa cu lo ta e dia ei. Hopi hende ta observá e señal dje conclusion dje sistema di cosnan aki, i nan ta verwagt cu e dia di Jehova lo yega un dia, aunke posiblemente no pa awor. Algun hende ta asta pensa cu ta imposibel pa e dia ei ta “awe.” Un actitud asina ta hopi peligroso.

“E dia di Jehova lo bini manera ladron,” apostel Pedro a spierta. Nos mester ta alerto, “sperando i teniendo mashá presente e presencia dje dia di Jehova,” i haci nos “sumo posibel p’e haña [nos] finalmente sin mancha i sin defecto i den pas.” (2 Pedro 3:10-14) Despues di destruccion dje actual sistema di cosnan malbado, un tera paradísico bou dje Reino di Dios ta spera nos. Laga nos no ser tentá nunca pa risca drenta e zona di peliger pa ningun motibu cu bin den nos mente, pasobra e dia cu nos crusa e liña di peliger i drenta bek den mundu por ta e dia di Jehova.

Tuma refugio cerca Jehova su pueblo, i keda cerca nan.

[Plachinan na página 7]

Tuma refugio cerca Jehova su pueblo, i keda cerca nan

[Rekonosementu pa Potrèt na página 4]

Iwasa/Sipa Press