Obedece e Spiertamentu!

BUM! Dia 3 di juni 1991, ceru Fugen na Hapon, cu un zonido tremendo cu a keda resoná, a scupi un cantidad enorme di gas volcánico i shinishi. E mescla supercayente a basha bini abou na barica dje ceru. E erupcion a mata 43 persona. Hopi di esnan cu a scapa na wowo di angua a ricibí kemadura serio. Algun tabata grita: “Awa, awa, por fabor.” Bombero i polis desesperá tabata pura bai pa yuda nan.

DOS siman promé nan a nota cu tabatin un koepel grandi di lava riba top di ceru Fugen, di moda cu autoridadnan i e habitantenan tabata riba alerta. Un recomendacion pa evacuá e área a sali mas cu un siman promé cu e desaster. E dia promé cu e erupcion mes, polis a pidi miembronan di prensa pa nan no bai na e área restringí. Tog riba e atardi trágico ei, e 43 víctimanan tabata den e zona di peliger.

Pakico asina tantu hende a risca drenta e área ei, of keda sin sali? Algun cunukero cu a evacuá nan cas a bai bek pa controlá nan posesionnan i nan cunucu. Tres volcanólogo tabata purbando pa yega mas cerca posibel dje volcan pa satisfacé nan interes académico. Vários reportero i fotógrafo a risca crusa e liña di peliger dor cu nan tabata kier a haña e primicia dje actividad volcánico. Tabatin tres shofer di taxi n’e esena, contratá dor di miembronan di prensa. Tabatin polis i bombero boluntario riba trabou. Cada víctima tabatin su propio motibu pa drenta e zona di peliger, i como consecuencia el a perde su bida.

Abo Ta den un Zona di Peliger?

Kisas no ta nos tur ta biba cerca di un volcan activo. Pero, kico si nos ta enfrentá un catástrofe mundial? Esei lo kier men cu nos tur ta den e zona di peliger, esta, henter e planeta. Un buki cu a resultá di ta un fuente confiabel di informacion profético ta spierta nos di un desaster mundial binidero cu e palabranan aki: “Solo lo bira scur, i luna lo no duna su lus, i e streanan lo cai for di shelu, i e podernan di shelu lo ser sagudí. . . . Tur e tribunan di tera  lo bati nan mes den lamentacion.” (Mateo 24:29, 30) Aki e ta papia di fenómenonan celestial di magnitud universal cu ta afectá “tur e tribunan di tera.” Cu otro palabra, e profecia aki ta referí na un catástrofe cu lo afectá cada un di nos.

E buki di profecia confiabel aki ta Bijbel. Ta interesante pa nota cu e contexto dje texto bíblico mencioná ariba ta duna un descripcion detayá dje cosnan cu lo sosodé promé cu e calamidad mundial ei. Mescos cu e koepel di lava i otro fenómeno cu ta indicá actividad volcánico a duna autoridadnan dje stad di Shimabara motibu pa stipulá un zona di peliger, Bijbel ta duna nos motibu pa nos ta alerto, i pa prepará nos mes pa sobrebibí. Nos por saca un les for dje tragedia na ceru Fugen, i mira e gravedad di loke tin nos dilanti.

 [Rekonosementu pa Potrèt na página 2]

PORTADA: Yomiuri/Orion Press/Sipa Press

[Rekonosementu pa Potrèt na página 3]

Yomiuri/Orion Press/Sipa Press