Siña Conoce “e Mente di Cristo”

“‘Ken a yega di conocé e mente di Jehova, p’e instruyé?’ Pero nos sí tin e mente di Cristo.”—1 CORINTIONAN 2:16.

1, 2. Jehova a haña cu ta bon pa revelá kico tocante Jesus den su Palabra?

KI APARENCIA Jesus tabatin? Ki color di cabei? Ki color di cueru i di wowo? Con haltu e tabata? Cuantu el a pisa? Atrabes di siglonan, representacionnan artístico di Jesus a varia di razonabel te difícil pa kere. Algun di nan a present’é baronil i vigoroso, miéntras cu otronan a represent’é delicado i bleek.

² Pero Bijbel no ta enfocá riba Jesus su aparencia. Mas bien, Jehova a haña cu ta bon pa revelá algu muchu mas significativo: e sorto di persona cu Jesus tabata. E Evangelionan no ta conta solamente loke Jesus a bisa i haci. Tambe nan ta revelá e sintimentunan profundo i e patronchi di pensa tras di su palabra i accionnan. E cuater relatonan inspirá aki ta permití nos examiná cuidadosamente loke apostel Pablo a referí na dje como “e mente di Cristo.” (1 Corintionan 2:16) Ta importante pa nos siña conocé Jesus su pensamentunan, su sintimentunan i su personalidad. Pakico? Pa por lo ménos dos motibu.

3. Ki comprendimentu penetrante nos por gana dor di siña conocé e mente di Cristo?

 ³ Na promé lugá, e mente di Cristo ta duna nos un idea tocante e mente di Jehova Dios. Jesus a conocé su Tata asina íntimo cu e por a bisa: “Ningun hende conocé ken e Yu ta sino e Tata; i ningun hende conocé ken e Tata ta sino e Yu, i esun na ken e Yu ta dispuesto pa revel’é.” (Lucas 10:22) Ta como si fuera Jesus a bisa: ‘Si boso kier sa con Jehova ta, wak ami.’ (Juan 14:9) Pues, ora cu nos studia loke e Evangelionan ta revelá di e manera cu Jesus a pensa i sinti, en efecto nos ta siñando con Jehova ta pensa i sinti. Tal conocimentu ta permití nos hala mas cerca di nos Dios.—Santiago 4:8.

4. Pa di berdad nos actua manera Cristo a actua, kico nos tin cu siña promé, i pakico?

⁴ Na di dos lugá, dor di conocé e mente di Cristo nos por “sigui su pasonan cu sumo cuidou i atencion.” (1 Pedro 2:21) Sigui Jesus no ta djis cuestion di ripití su palabranan i imitá su echonan. Ya cu loke nos ta papia i haci ta ser influenciá dor di loke nos ta pensa i sinti, sigui Cristo ta rekerí pa nos cultivá e mésun “actitud mental” cu e tabatin. (Filipensenan 2:5) Cu otro palabra, pa di berdad nos actua manera Cristo a actua, promé nos tin cu siña pensa i sinti manera e, esta, te caminda nos por como hende imperfecto. Wel, laga nos ban examiná e mente di Cristo cuidadosamente, cu yudansa di esnan cu a skirbi e Evangelionan. Promé nos lo trata algun factor cu a influenciá e manera cu Jesus a pensa i sinti.

Su Existencia Prehumano

5, 6. (a) Ki efecto esnan cu nos ta asociá cuné por tin riba nos? (b) Ki asociacion Dios su Yu primogénito tabatin den shelu promé cu el a bini na tera, i con esaki a influenci’é?

⁵ Esnan cu nos tin asociacion íntimo cuné por tin efecto riba nos. Nan por influenciá nos pensamentu, sintimentu i accionnan sea pa bon of pa malu. * (Proverbionan 13:20) Considerá e asociacion cu Jesus tabatin den shelu promé cu el a bini na tera. E Evangelio di Juan ta hala atencion na Jesus su existencia prehumano como “e Palabra,” esta e Bocero, di Dios. Juan ta bisa: “Na principio e Palabra tabata, i e Palabra tabata cerca Dios, i e Palabra tabata un dios. Esun aki tabata na principio cerca Dios.” (Juan 1:1, 2) Ya cu Jehova no tabatin principio, e echo cu e Palabra tabata cu Dios for di “principio” mester ta referí na e comienso di Dios su obranan di creacion. (Salmo 90:2) Jesus ta “e primogénito di tur creacion.” Pues, el a existí promé cu creacion di otro criaturanan spiritual i e universo físico.—Colosensenan 1:15; Revelacion 3:14.

⁶ Segun algun cálculo científico, e universo físico ta existí pa por lo ménos 12 mil miyon aña. Si e cálculonan ei ta sikiera un tiki cerca di berdad, Dios su Yu primogénito a disfrutá di asociacion íntimo cu su Tata pa un periodo increiblemente largu promé cu creacion di Adam. (Compará cu Mikéas 5:2.) Asina, un laso tierno i profundo a desaroyá entre nan dos. Como personificacion di sabiduria, e Yu primogénito aki den su existencia prehumano ta bisa: “Mi a yega di ta esun pa ken [Jehova] tabatin cariño special dia tras dia, i mi tabata alegre dilanti dje tur ora.” (Proverbionan 8:30) Pasa un cantidad incontabel di milenio den asociacion íntimo cu e Fuente di amor mester tabatin un efecto profundo riba Dios su Yu! (1 Juan 4:8) E Yu aki a siña conocé i reflehá e pensamentu, sintimentu i manera di actua di su Tata den un forma cu ningun otro persona por.—Mateo 11:27.

Bida i Influencianan Terenal

7. Cua ta un motibu pakico tabata necesario pa Dios su Yu primogénito bini na tera?

⁷ E Yu di Dios tabatin mas cos pa siña, pasobra Jehova su propósito tabata pa ekipá su Yu p’e ta un Sumo Sacerdote compasivo, capas pa “compadecé di nos debilidadnan.” (Hebreonan 4:15) Un dje motibunan cu e Yu a bini na tera como hende tabata p’e yena e rekisitonan pa e rol ei. Aki, como un homber di carni i wesu, Jesus tabata exponé na circunstancianan i influencianan cu promé cu esei el a observá so for  di shelu. Awor e por a experenciá sintimentu i emocionnan humano personalmente. El a yega di cansa, sinti sed i hamber. (Mateo 4:2; Juan 4:6, 7) Mas ainda, el a soportá tur tipo di dificultad i sufrimentu. Asina el a “siña obedencia” i a bira completamente cualificá pa su rol como Sumo Sacerdote.—Hebreonan 5:8-10.

8. Kico nos sa di Jesus su promé añanan di bida riba tera?

⁸ Kico di loke Jesus a pasa aden durante su promé añanan di bida riba tera? E registro di su infancia ta masha breve. De echo, ta Mateo cu Lucas so a relatá sosodementunan relacioná cu su nacementu. E skirbidónan di Evangelio tabata sa cu Jesus a biba den shelu promé cu el a bini na tera. Mas cu tur cos, ta su existencia prehumano ta splica e sorto di homber cu el a bira. Sin embargo, Jesus tabata humano den tur sentido. Apesar cu e tabata perfecto, tog e tabatin cu crece di baby pa mucha, i di mucha pa adolesente pa e bira adulto, siñando miéntras tantu. (Lucas 2:51, 52) Bijbel ta revelá cierto cosnan di Jesus su promé añanan di bida riba tera cu sin duda tabatin influencia riba dje.

9. (a) Kico ta indicá cu Jesus a nace den un famia pober? (b) Den ki circunstancia Jesus a crece probablemente?

⁹ Parce cu Jesus a nace den un famia pober. E ofrenda cu José i Maria a hiba n’e tempel un 40 dia despues cu el a nace, ta indicá esei. Na lugá di hiba un chubat’i carné yong como ofrenda kimá i un pichon of un tortelduif como ofrenda pa picá, nan a trece sea “un par di tortelduif of dos pichon.” (Lucas 2:24) Segun e Ley di Moises, e ofrenda aki tabata un areglo pa hende pober. (Levítico 12:6-8) Cu tempu e famia humilde aki a crece. Despues dje nacementu milagroso di Jesus, José cu Maria a haña por lo ménos seis yu mas di forma natural. (Mateo 13:55, 56) Asina ta cu Jesus a crece den un famia grandi, posiblemente sin muchu luho.

10. Kico ta mustra cu José cu Maria tabata hende temeroso di Dios?

¹⁰ E mayornan cu a cria Jesus tabata temeroso di Dios, i nan tabatin interes den dje. Jesus su mama, Maria, tabata un muher remarcabel. Corda con ora angel Gabriel a salud’é, el a bisa: “Bon dia, altamente faborecí, Jehova ta cu bo.” (Lucas 1:28) José tambe tabata un homber deboto. Tur aña e tabata biaha 150 kilometer bai Jerusalem pa Pascu hudiu. Maria tambe a asistí, apesar cu ta e presencia di hende homber so tabata rekerí. (Exodo 23:17; Lucas 2:41) Un dje biahanan ei, despues cu José cu Maria a busca tur caminda, nan a haña Jesus di 12 aña den e tempel sintá meimei di e maestronan. Jesus a bisa su mayornan preocupá: “Boso no tabata sa cu mi mester ta den e cas di mi Tata?” (Lucas 2:49) “Tata”—e palabra ei mester a carga un sintimentu caluroso i positivo p’e hóben Jesus. Pa cuminsá, evidentemente nan a bis’é cu ta Jehova tabata su berdadero Tata. Ademas, José lo mester tabata un bon tata di criansa pa Jesus. Jehova sigur lo no a scoge un homber duru i cruel pa cria Su Yu stimá!

11. Ki fishi Jesus a siña, i kico e trabou ei a encerá den tempu bíblico?

¹¹ Durante su añanan na Názaret, Jesus a siña e fishi di carpinté cerca su tata di criansa, José. Jesus a dominá e arte aki te cu nan a yama e  mes tambe “e carpinté.” (Marco 6:3) Den tempu bíblico, hende tabata empleá carpinté pa traha cas, mueble (manera mesa, kruk pa sinta ariba i banki) i herment di cunucu. Den su obra Diálogo cu Trifon, Justino Mártir di siglo dos E.C., a skirbi tocante Jesus: “E tabatin custumber di traha como carpinté tempu e tabata cu hende, trahando ploeg i yugo.” E tipo di trabou ei no tabata fácil, pasobra probablemente e carpinté di antigwedad no por a cumpra su palu. Ta mas probabel cu el a bai den mondi, scoge un palu, zwai su hacha riba dje i carga e palu bai cas cuné. Pues, Jesus lo tabata sa dje reto di gana bo pan di cada dia, trata cu cliente i manehá cen pa e yega.

12. Kico ta indicá cu aparentemente José a muri promé cu Jesus, i kico esei lo a nificá pa Jesus?

¹² Como e yu mayó, ta probabel cu Jesus a yuda cria e famia, specialmente dor cu ta parce cu José a muri promé cu Jesus. * E Toren di Vigilancia di Síon di 1 di januari 1900 a bisa: “Segun tradicion, José a muri tempu Jesus tabata hóben ainda, i Jesus a tuma e fishi di carpinté i bira esun cu ta mantené e famia. Tin cierto apoyo pa esaki den e testimonio bíblico caminda nan ta yama Jesus mes un carpinté i ta mencioná su mama cu su rumannan, pero ta ignorá José. (Marco 6:3) . . . Pues, ta basta probabel cu Jesus a pasa e periodo largu di diesocho aña, for di tempu dje incidente [registrá na Lucas 2:41-49] te n’e tempu di su bautismo, cumpliendo cu e debernan rutinario di bida.” Probablemente Maria cu su yunan, incluso Jesus, a conocé e dolor causá dor di morto di un esposo i tata stimá.

13. Di con ora Jesus a cuminsá su ministerio el a hacié cu un conocimentu, perspicacia i sintimentu profundo cu ningun otro hende por tabatin?

¹³ Ta bisto cu Jesus no a nace den un bida cómodo. Mas bien, el a experenciá bida di hende comun personalmente. Anto na aña 29 E.C., a yega e ora pa Jesus efectuá e asignacion divino cu tabata sper’é. Den otoño dje aña ei el a bautisá den awa, i a ser engendrá como un Yu spiritual di Dios. “Shelu a habri” p’e, loke ta parce di indicá cu awor e por a corda su bida prehumano den shelu, incluso tur e pensamentu i sintimentunan relacioná cu e bida ei. (Lucas 3:21, 22) Pues, ora Jesus a cuminsá su ministerio, el a hacié cu un conocimentu, perspicacia i sintimentu profundo cu ningun otro hende por tabatin. Ta cu bon motibu gran parti di loke e skirbidónan di Evangelio a skirbi ta trata e sosodementunan relacioná cu e ministerio di Jesus. Asina mes nan no por a registrá tur loke el a bisa i haci. (Juan 21:25) Pero loke nan a ser inspirá pa registrá ta permití nos examiná cuidadosamente e mente dje homber mas grandi cu hamas a biba.

Ki Clase di Persona Jesus Tabata?

14. Con e Evangelionan ta pinta Jesus como un homber tiernamente caluroso i di sintimentu profundo?

¹⁴ E personalidad di Jesus cu e Evangelionan ta revelá, ta di un homber tiernamente caluroso i cu sintimentu profundo. El a desplegá un variedad amplio di reaccion emocional: duele pa un leproso (Marco 1:40, 41), pena pa un pueblo cu no a reaccioná faborabel (Lucas 19:41, 42), indignacion hustu contra cambiadónan di placa haragan (Juan 2:13-17). Como un homber cu empatia, cos por a pone Jesus yora, i e no a sconde su emocion. Na morto di su bon amigu  Lázaro, ora Jesus a mira Lázaro su ruman muher Maria ta yora, el a keda asina conmoví cu e mes tambe a cuminsá yora dilanti tur hende.—Juan 11:32-36.

15. Con Jesus su ternura a keda bisto den e punto di bista cu e tabatin di otronan, i e manera cu el a trata nan?

¹⁵ Jesus su ternura tabata bisto foral den e punto di bista cu e tabatin di otronan, i e manera cu el a trata nan. El a duna esnan pober i oprimí un man, dor di yuda nan ‘haña refrescamentu pa nan alma.’ (Mateo 11:4, 5, 28-30) E no tabata muchu ocupá pa respondé n’e necesidad di esnan afligí, sea ta un muher cu un fluho di sanger cu a mishi cu su paña den secreto, of un limosnero ciegu cu no kier a keda ketu. (Mateo 9:20-22; Marco 10:46-52) Jesus a busca e bon cualidadnan di otronan i a encomendá nan; pero e tabata dispuesto di duna reprendementu tambe ora tabata necesario. (Mateo 16:23; Juan 1:47; 8:44) Den un época ora hende muher tabatin masha poco derecho, Jesus a trata nan cu un midí balansá di dignidad i respet. (Juan 4:9, 27) Ta di comprendé cu un grupo di hende muher a sirbié gustosamente cu nan mes provisionnan.—Lucas 8:3.

16. Kico ta mustra cu Jesus tabatin un punto di bista balansá di bida i di cos material?

¹⁶ Jesus tabatin un punto di bista balansá di bida. Cos material no tabatin e promé lugá cerca dje. Ta parce cu e tabatin masha poco den sentido material. El a bisa cu e no tabatin “lugá pa pone su cabes.” (Mateo 8:20) Na mes momento, Jesus a contribuí na placer di otronan. Dia el a bai un fiesta di casamentu, un evento caminda ta normal cu tin música, cantamentu i gosamentu, ta bisto cu e no a bai pa daña ambiente. No, Jesus a asta efectuá su promé milager einan. Ora e biña a caba, el a haci awa bira biña excelente, un bebida cu ta “haci e curason di hende mortal alegrá.” (Salmo 104:15; Juan 2:1-11) Asina e fiestamentu por a sigui, i sin duda e bruid cu e bruidegom a scapa un bergwensa. Su actitud balansá ta bisto tambe den e echo cu tin hopi mas mencion di ocasion cu Jesus a traha duru i largu den su ministerio.—Juan 4:34.

17. Di con no ta straño cu Jesus tabata un Gran Maestro, i kico su siñansanan a reflehá?

¹⁷ Jesus tabata un Gran Maestro. Hopi di loke el a siña a reflehá realidadnan di bida diario cu el a conocé bon. (Mateo 13:33; Lucas 15:8) Su moda di siña tabata sin comparacion, semper bon cla, simpel i práctico. Asta mas significativo ta e contenido di su siñansa. Loke el a siña a reflehá su deseo sincero pa yuda su scuchadónan conocé Jehova su pensamentu, sintimentu i manera di actua.—Juan 17:6-8.

18, 19. (a) Di ki manera bibu Jesus a describí su Tata? (b) Kico nos lo considerá den e siguiente artículo?

¹⁸ Jesus, hopi bes cu ilustracion, a revelá e personalidad di su Tata pintando cu palabra cuadronan bibu cu bo no por lubidá fácil. Ta normal pa papia den término general tocante e misericordia di Dios. Pero ta henteramente un otro cos pa compará Jehova cu un tata pordonadó cu ta asina conmoví di mira su yu bolbe, cu e ta ‘core i cai riba su garganta i sunch’é tiernamente.’ (Lucas 15:11-24) Rechasando un cultura stijf caminda lidernan religioso a menospreciá hende comun, Jesus a splica cu su Tata ta un Dios acercabel cu ta preferá e súplica di un cobradó di belasting humilde riba  e oracion pa show di un fariseo bromadó. (Lucas 18:9-14) Jesus a pinta Jehova como un Dios interesá, cu sa ora un mofi chikitu cai na suela. Trankilisando su disipelnan, Jesus a bisa “No tene miedu: boso ta bal mas cu hopi mofi.” (Mateo 10:29, 31) Ta di comprendé cu hende a keda asombrá cu Jesus su “manera di siña” i a sinti nan atraí na dje. (Mateo 7:28, 29) Sí, na cierto ocasion un “multitud grandi” a keda cerca dje tres dia largu, asta sin come!—Marco 8:1, 2.

¹⁹ Nos por ta gradicidu cu Jehova a revelá e mente di Cristo den su Palabra! Pero con nos por cultivá i desplegá e mente di Cristo den e manera cu nos ta trata cu otronan? Nos lo considerá esaki den e siguiente artículo.

[Nota]

Bo Ta Corda?

• Pakico ta importante pa nos conocé “e mente di Cristo”?

• Cu ken Jesus a asociá den su existencia prehumano?

• Durante su bida riba tera, ki circunstancia i influencianan Jesus a experenciá personalmente?

• Kico e Evangelionan ta revelá di Jesus su personalidad?

[Preguntanan di Estudio]

[Plachi na página 10]

Jesus a crece den un famia grandi, posiblemente sin muchu luho

[Plachinan na página 12]

E maestronan a keda asombrá di e comprendimentu i e contestanan di Jesus tempu e tabatin 12 aña