“Busca Jehova i Su Forsa”

“Pa loke ta Jehova, su wowonan ta pasando rond di henter e tera pa mustra su forsa na fabor di esnan kende nan curason ta completo pa cuné.”—2 CRONICANAN 16:9.

1. Kico ta poder, i con hende a trata cuné?

PODER por nificá diferente cos, por ehempel, poseé control, autoridad of influencia riba otro hende, e abilidad pa actua of producí un efecto, forsa of poder físico of capacidad mental of moral. Den loke ta toca nan uso di poder, hende no tin un bon registro. Lord Acton, un historiadó, papiando di poder den man di político, a bisa: “Poder tin e tendencia di corumpí, i poder absoluto ta corumpí na un grado absoluto.” Historia moderno ta yen di ehempel cu ta mustra cu, en general, e palabranan di Lord Acton ta berdad. Den siglo 20 “hende a dominá hende pa su perhuicio” mas cu nunca promé. (Eclesiástes 8:9) Dictadornan corupto a abusá mashá di nan poder, i a kita bida di miyones di hende. Poder cu no ta ser dominá cu amor, sabiduria i husticia ta peligroso.

2. Splica con otro cualidadnan divino ta influenciá e manera cu Jehova ta usa su poder.

² Diferente for di hende, Dios sí semper ta usa su poder pa haci bon. “Pa loke ta Jehova, su wowonan ta pasando rond di henter e tera pa mustra su forsa na fabor di esnan kende nan curason ta completo pa cuné.” (2 Crónicanan 16:9) Jehova ta dirigí su poder na un manera controlá. Pacenshi ta pone Dios wanta cu ehecutá e malbadonan pa duna nan chens di repentí. Amor ta pon’é laga solo briya riba tur tipo di hende, hustu i inhustu. Husticia lo motiv’é finalmente pa usa su poder ilimitá pa reducí na nada esun cu tin e medio pa causa morto, esta, Satanas e Diabel.—Mateo 5:44, 45; Hebreonan 2:14; 2 Pedro 3:9.

3. Di con e echo cu Dios ta todopoderoso ta un motibu pa nos confia den dje?

³ E poder impresionante di nos Tata celestial ta un motibu pa nos tin confiansa, tantu den su promesanan como den su proteccion. Un yu chikitu ta sintié sigur den hende straño ora e tin man di su tata duru tené, pasobra e sa cu su tata lo no laga nada malu pasa cuné. Mescos nos Tata celestial, esun “abundante den poder pa salba,” lo protehá nos di tur daño permanente si nos ta cana cuné. (Isaías 63:1; Mikéas 6:8) I manera un bon Tata, semper Jehova ta cumpli cu loke e primintí. Su poder sin límite ta garantisá cu su ‘palabra lo tin éxito sigur den loke el a mand’é.’—Isaías 55:11; Tito 1:2.

4, 5. (a) Kico tabata e resultado ora rey Asa a pone su pleno confiansa den Jehova? (b) Kico lo por pasa si nos confia riba solucion humano pa nos problemanan?

⁴ Pakico ta asina importante pa nos keda determiná pa no lubidá riba e proteccion di nos Tata celestial? Pasobra nos por haña nos asina anshá dor di circunstancianan, cu nos ta lubidá ken ta nos berdadero fuente di siguridad. E ehempel di rey Asa ta mustra esaki, un homber cu en general a confia den Jehova. Durante Asa su reinado, un ehército di un miyon etiopio a atacá Huda. Asa a realisá cu su enemigunan tabatin bentaha den sentido militar, pues el a resa: “O Jehova, pa loke ta yuda, pa bo no ta importá si nan ta hopi of ta hende sin poder. Yuda nos, o Jehova nos Dios, pasobra riba bo nos ta lèn, i den bo nomber nos a bini contra e multitud aki. O Jehova, abo ta nos Dios. No laga hende mortal retené forsa contra bo.”  (2 Crónicanan 14:11) Jehova a concedé Asa su peticion i a dun’é un victoria decisivo.

⁵ Pero despues di hopi aña di sirbishi fiel, Asa su confiansa den Jehova su poder pa salba a swak. Pa evitá un menasa militar di parti dje reino di Israel di nort, el a acudí na Siria pa yudansa. (2 Crónicanan 16:1-3) Aunke e soborno cu el a paga Ben-hadad e rey di Siria en berdad a yuda kita e menasa cu Israel tabata pa Huda, Asa su pacto cu Siria a mustra un falta di confiansa den Jehova. Cu bon motibu, profeta Hananí a puntr’é: “Acaso e etiopionan i e libionan mes no tabata un forsa militar masha grandi na multitud, na garoshi i na homber riba cabai; i dor cu bo a lèn riba Jehova, e no a duna nan den bo man?” (2 Crónicanan 16:7, 8) Sin embargo, Asa a rechasá e reprendementu aki. (2 Crónicanan 16:9-12) Ora nos enfrentá problema, laga nos no confia riba solucion humano. Mas bien, laga nos mustra confiansa den Dios, pasobra si nos confia den poder di hende nos lo keda desapuntá sin duda.—Salmo 146:3-5.

Busca e Poder Cu Jehova Ta Duna

6. Pakico nos mester “busca Jehova i su forsa”?

⁶ Ademas di protehá su sirbidónan, Jehova por duna nan poder tambe. Bijbel ta urgi nos pa “busca Jehova i su forsa.” (Salmo 105:4) Pakico? Pasobra ora nos actua den Dios su forsa, nos lo usa nos poder pa bienestar di otronan, i no pa haci nan daño. No tin un mihó ehempel di esaki cu Jesucristo, kende a haci hopi milager den “e poder di Jehova.” (Lucas 5:17) Jesus por a dedicá su mes na bira ricu, famoso, of asta un rey cu poder absoluto. (Lucas 4:5-7) Na lugá di esei, el a usa e poder cu Dios a dun’é pa entrená i siña otronan, pa yuda i pa cura. (Marco 7:37; Juan 7:46) Esta un bon ehempel pa nos!

7. Ki cualidad vital nos ta cultivá ora nos ta actua den Dios su forsa, i no den esun di nos?

⁷ Ademas, si nos actua den e “forsa cu Dios ta suministrá,” esei lo yuda nos keda humilde. (1 Pedro 4:11) Hende cu ta busca poder pa nan mes ta bira presumido. Un ehempel di esaki ta e rey asirio Esar-hadon, cu a broma: “Mi ta poderoso, mi ta todopoderoso, mi ta un héroe, mi ta gigantesco, mi ta colosal.” Na contraste, Jehova “a scoge e cosnan débil di mundu, p’e brongosá e cosnan fuerte.” P’esei, si un cristian berdadero broma, e ta broma den Jehova, pasobra e sa cu loke el a logra no tabata cu su propio forsa. Si nos ‘humiyá nos mes bou dje man poderoso di Dios,’ esei ta loke lo trece berdadero onor.—1 Corintionan 1:26-31; 1 Pedro 5:6.

8. Kico nos mester haci promé, pa por ricibí Jehova su poder?

⁸ Con nos por haña Dios su forsa? Promé cu tur cos, nos mester pidi p’e den oracion. Jesus a sigurá su disipelnan cu su Tata lo duna spiritu santu na esnan cu pidi p’e. (Lucas 11:10-13) Pensa con esaki a duna e disipelnan di Cristo poder ora nan a scoge pa obedecé Dios mas bien cu e lidernan religioso cu a manda nan stop di duna testimonio tocante Jesus. Ora nan a haci oracion pa Jehova su yudansa, el a contestá nan oracion sincero, i spiritu santu a duna nan poder pa sigui predicá e bon nobo cu curashi.—Echonan 4:19, 20, 29-31, 33.

9. Mencioná un di dos fuente di fortalesa spiritual, anto cita un ehempel bíblico pa mustra con eficas e ta.

 ⁹ Na di dos lugá, nos por haña fortalesa spiritual for di Bijbel. (Hebreonan 4:12) E poder cu e palabra di Dios tin tabata bisto den tempu di rey Hosías. Apesar cu e rey aki di Huda a kita ídolonan pagano caba for di e pais, e descubrimentu inesperá dje Ley di Jehova den e tempel a motiv’é pa intensificá su programa di limpiesa. * Despues cu Hosías a lesa e Ley personalmente p’e pueblo, henter e nacion a cera un pacto cu Jehova, i nan a lansa un otro campaña contra idolatria, unu mas vigoroso cu esun promé. E bon resultado di e reformanan di Hosías tabata cu durante “tur su dianan nan no a desviá di sigui Jehova.”—2 Crónicanan 34:33.

10. Cua ta un di tres manera cu nos por haña forsa di Jehova, i pakico e ta vital?

¹⁰ Na di tres lugá, nos por haña forsa di Jehova via asociacion cristian. Pablo a animá cristiannan pa asistí na reunion cu regularidad pa “incitá otro na amor i na obranan excelente,” i pa animá otro. (Hebreonan 10:24, 25) Ora Pedro a ser librá milagrosamente for di prizon, el a deseá di ta huntu cu su rumannan. Pues, el a bai direct na cas dje mama di Juan Marco, caminda “tabatin basta hende reuní i haciendo oracion.” (Echonan 12:12) Claro cu nan tur por a keda nan cas pa haci oracion. Pero nan a scoge pa reuní pa haci oracion i animá otro den e tempu difícil ei. Casi na fin di Pablo su biahe largu i peligroso pa Roma, el a topa algun ruman na Puteoli, i despues algun otro cu a biaha bin pa contra cuné. Con el a reaccioná? “Ora Pablo a haña bista di [e últimonan], el a gradicí Dios i a cobra ánimo.” (Echonan 28:13-15) El a ser fortalecé dor di ta huntu cu su compañeronan cristian atrobe. Nos tambe ta ser fortalecé dor di asociá cu compañeronan cristian. Miéntras nos tin e libertad pa asociá cu otro, i nos por hacié, nos no mester purba cana nos so riba e caminda pertá cu ta hiba na bida.—Proverbionan 18:1; Mateo 7:14.

11. Mencioná algun circunstancia caminda tin un necesidad special pa “poder mas ayá di loke ta normal.”

¹¹ Dor di haci oracion regular, studia e Palabra di Dios i asociá cu compañeronan creyente, nos ta “sigui adkerí poder den Señor i den e potencia di su forsa.” (Efesionan 6:10) Sin duda nos tur tin mester di “poder den Señor.” Algun ruman ta sufri di malesanan cu ta swak nan, otronan ta sufri dje efectonan destructivo di behes of dje pérdida di un compañero cu nan a compartí henter un bida cuné. (Salmo 41:3) Otronan ta soportá oposicion di un casá incrédulo. Mayornan, particularmente mayornan soltero, por ripará cu cumpli cu un trabou di tempu completo i n’e mésun tempu lanta un famia ta un responsabilidad cu ta laga bo agotá. Cristiannan hóben tin mester di e forsa pa resistí preshon di pareunan i bisa no na droga i inmoralidad. Niun hende lo no mester duda pa pidi Jehova “poder mas ayá di loke ta normal” pa por enfrentá e tipo di desafionan ei.—2 Corintionan 4:7.

“Dunando Poder na Esun Cansá”

12. Con Jehova ta apoyá nos den e ministerio cristian?

¹² Ademas, Jehova ta duna su sirbidónan poder ora nan ta efectuá nan ministerio. Den e profecia di Isaías nos ta lesa: “E ta dunando poder na esun cansá; i esun sin energia dinámico e ta haci abundá den pleno potencia. . . . Esnan cu ta spera den Jehova lo recobrá poder. Nan lo subi cu hala manera águila. Nan lo core i no fatigá; nan lo cana i no cansa.” (Isaías 40:29-31) Apostel Pablo personalmente a ricibí poder pa efectuá su ministerio. Como resultado, su ministerio tabata eficas. El a skirbi cristiannan na Tesalónica: “E bon nobo cu nos ta predicá no a resultá di ta entre boso cu papiamentu so, sino tambe cu poder i cu spiritu santu.” (1 Tesalonicensenan 1:5) Su predicacion i siñamentu tabatin e poder di producí cambionan grandi den bida di esnan cu a scuch’é.

13. Kico a fortalecé Jeremías pa perseverá apesar di oposicion?

 ¹³ Ora nos topa un actitud indiferente den nos teritorio, un teritorio cu nos a predicá aden hopi bes pa basta aña caba i cu poco resultado, nos lo por bira desanimá. Jeremías tambe a sinti su mes desanimá dor dje oposicion, mofa i apatia cu el a topa. El a bisa den su mes: “Mi no ta bai haci mencion di [Dios], i lo mi no papia mas den su nomber.” Pero e no por a keda ketu. Su mensahe “a resultá di ta manera un candela ardiente cerá den [su] wesunan.” (Jeremías 20:9) Kico a dun’é poder di nobo, apesar di tantu adversidad? Jeremías a bisa: “Jehova tabata huntu cu mi manera un poderoso teribel.” (Jeremías 20:11) Dor cu Jeremías a capta e importancia vital di su mensahe i di e asignacion cu Dios a dun’é, e tabata receptivo p’e animacion di Jehova.

Poder pa Haci Daño i Poder pa Cura

14. (a) Con poderoso nos lenga ta? (b) Duna ehempel pa mustra cuantu daño lenga por haci.

¹⁴ No ta tur poder cu nos tin ta bini directamente di Dios. Nos lenga, por ehempel, tin poder tantu pa haci daño como pa cura. Sálomon ta advertí: “Morto i bida ta den poder di lenga.” (Proverbionan 18:21) E resultado dje combersacion breve cu Satanas tabatin cu Eva ta mustra cuantu desaster palabra por causa. (Génesis 3:1-5; Santiago 3:5) Nos tambe por causa hopi daño cu nos lenga. Comentarionan degradante tocante un mucha muher su peso por pon’é riba caminda pa anorexia. Ripití un calumnia sin pensa, lo por ruina un amistad di bida largu. Sí, mester controlá lenga.

15. Con nos por usa nos lenga pa edificá i cura?

¹⁵ Sin embargo, mescos cu lenga por destruí, e por edificá tambe. E proverbio di Bijbel ta bisa: “Ta existí esun cu ta papia sin pensa manera e hincánan di un spada, pero e lenga dje sabínan ta un curacion.” (Proverbionan 12:18) Cristiannan sabí ta usa e poder di nan lenga pa consolá esnan deprimí i esnan cu a perde un ser kerí. Palabranan di comprension por animá hóbennan cu ta lucha contra preshon perhudicial di nan pareunan. Palabranan di consideracion por sigurá rumannan di edad di cu ainda nos tin mester di nan i ta stima nan. Palabranan bondadoso por alegrá dia di hende enfermo. Principalmente, nos por usa nos lenga pa compartí e poderoso mensahe di Reino cu tur esnan cu kier scucha. Proclamá e Palabra di Dios ta den nos poder, si nos ta hacié di curason. Bijbel ta bisa: “No retené loke ta bon for di esnan na ken bo ta deb’é, ora ta sosodé cu ta den poder di bo man pa hacié.”—Proverbionan 3:27.

 Uso Apropiado di Poder

16, 17. Ora nan ta ehercé e autoridad cu Dios a duna nan, con anciano, mayor, esposo i esposanan por imitá Jehova?

¹⁶ Apesar cu e ta todopoderoso, Jehova ta goberná e congregacion cu amor. (1 Juan 4:8) Imitand’e, superintendentenan cristian ta cuida e tou di Dios cu amor dor di usa i no abusá di nan autoridad. Ta berdad cu de bes en cuando superintendentenan tin cu “reprendé, corigí, consehá,” pero nan ta hacié “cu tur gran pacenshi i arte di siña.” (2 Timoteo 4:2) Pues, semper ancianonan ta meditá riba e palabranan cu apostel Pedro a skirbi na esnan cu tin autoridad den congregacion: “Pastoreá e tou di Dios bou di boso cuido, no obligá, sino di buena gana; tampoco pa amor pa ganashi desonesto, sino cu empeño; tampoco como dominando riba esnan cu ta herencia di Dios, sino birando ehempel p’e tou.”—1 Pedro 5:2, 3; 1 Tesalonicensenan 2:7, 8.

¹⁷ Mayornan i esposonan tambe tin autoridad cu Jehova a duna nan, i nan mester usa e poder aki pa nan yuda, stimulá i cuida cu cariño. (Efesionan 5:22, 28-30; 6:4) Jesus su ehempel ta mustra cu por usa autoridad den un moda eficas, cu amor. Si e disiplina ta balansá i consistente, yunan no tin nodi bira desanimá. (Colosensenan 3:21) Matrimonionan ta bira mas fuerte si esposonan cristian ta ehercé nan hefatura cu amor, i esposanan ta respetá nan esposo profundamente na lugá di bai mas ayá cu e límite di influencia cu Dios a asigná na nan, pa dominá of haña nan kièr.—Efesionan 5:28, 33; 1 Pedro 3:7.

18. (a) Con nos mester imitá Jehova su ehempel den controlá nos rabia? (b) Kico esnan cu autoridad mester purba inculcá den esnan cu ta na nan encargo?

¹⁸ Esnan cu tin autoridad den famia i den congregacion mester tin extra cuidou pa controlá nan rabia, pasobra rabia ta inculcá temor mas bien cu amor. Profeta Nahum a bisa: “Jehova ta tarda pa rabia i ta grandi den poder.” (Nahum 1:3; Colosensenan 3:19) Controlá nos rabia ta un señal di forsa, miéntras cu si nos lagu’é los, esei ta mustra debilidad. (Proverbionan 16:32) Tantu den famia como den congregacion, e meta ta pa inculcá amor: amor pa Jehova, amor pa otro i amor pa principionan hustu. Amor ta e laso mas fuerte di union i e motivacion mas fuerte cu tin pa haci loke ta bon.—1 Corintionan 13:8, 13; Colosensenan 3:14.

19. Ki siguransa consolador Jehova ta duna, i con nos lo mester reaccioná?

¹⁹ Si nos conocé Jehova, nos ta reconocé su poder. Pa medio di Isaías, Jehova a bisa: “Bo no a haña sa of bo no a tende? Jehova, e Creador dje extremidadnan di tera, ta un Dios pa tempu indefiní. E no ta cansa ni fatigá.” (Isaías 40:28) Jehova su poder no por caba. Si nos dependé riba dje i no riba nos mes, lo e no bandoná nos. E ta sigurá nos: “No tene miedu, pasobra mi ta cu bo. No wak rond, pasobra mi ta bo Dios. Lo mi fortificá bo. Lo mi realmente yuda bo. Lo mi realmente mantené bo firmemente gará cu mi man drechi di husticia.” (Isaías 41:10) Con nos lo mester reaccioná riba su cuido amoroso? Laga nos haci mescos cu Jesus, i semper usa tur poder cu Jehova duna nos pa yuda i pa edificá. Laga nos controlá nos lenga i us’é pa cura na lugá di pa haci daño. I laga nos semper keda spiritualmente lantá, para firme den fe, i bira poderoso den e poder di nos Magnífico Creador, Jehova Dios.—1 Corintionan 16:13.

[Nota]

Bo Por Splica?

• Con Jehova ta usa su poder?

• Di ki maneranan nos por haña Jehova su poder?

• Con mester usa e poder di lenga?

• Di ki manera autoridad cu Dios ta duna por ta un bendicion?

[Preguntanan di Estudio]

[Plachi na página 15]

Jesus a usa Jehova su forsa pa yuda otronan

[Plachinan na página 17]

Proclamá e Palabra di Dios ta den nos poder si nos ta hacié di curason